Azərbaycan regional lider
kimi bütün dünyada böyük nüfuz
qazanmışdır
Bizim yolumuz müstəqillik, inkişaf yoludur. Azərbaycan xalqı öz taleyini özü müəyyən edir və müəyyən edəcəkdir. Azərbaycan o ölkələrdəndir ki, öz hesabına yaşayır və ildən-ilə daha yaxşı yaşayacaqdır... Vaxt keçdikcə, imkanlarımız, xarici əlaqələrimiz genişləndikcə Azərbaycan haqqında real vəziyyəti danmaq mümkün olmayacaqdır.
İlham ƏLİYEV,
Azərbaycan Respublikasının
Prezidenti
Birləşmiş Ştatlar Azərbaycan
hökuməti və xalqı ilə möhkəm münasibətləri
yüksək dəyərləndirir və həm öz
regionunda, həm dünyada sabitliyə töhfə verən,
çiçəklənən və demokratik dövlət
kimi Azərbaycanın suverenliyi və inkişafına sadiq
olaraq qalır.
Barak OBAMA,
Amerika Birləşmiş
Ştatlarının Prezidenti
Azərbaycanın
müstəqillik əldə etdiyi dövrdən bu vaxta qədərki
xarici siyasət tarixinə qısa nəzər saldıqda
1993-cü ilin yayında baş verən hakimiyyət dəyişikliyindən
sonra bu sahədə əsaslı yeniləşmə diqqəti
cəlb edir.
Ümummilli lider Heydər Əliyevin
müdrikliyi və uzaqgörənliyi sayəsində xarici
siyasətimizin ölkənin strateji maraqları əsasında
yenidən qurulmasına imkan yarandı. Qüdrətli
şəxsiyyət xarici siyasət sahəsində
qarşıya qoyulan vəzifələri müəyyənləşdirərkən
demişdir ki, Azərbaycanın xarici siyasəti sülhsevər
siyasətdir. Bu sahədə əsas vəzifə
dünyanın bütün dövlətləri ilə bərabər
hüquqlu, qarşılıqlı faydalı əlaqələr
yaratmaq və inkişaf etdirməkdən, bu əlaqələrdən
həm ölkəmizin beynəlxalq mövqelərini möhkəmləndirmək,
həm də respublikanın iqtisadiyyatını, elmini, mədəniyyətini
inkişaf etdirmək üçün səmərəli
istifadə etməkdən ibarətdir. Azərbaycan
dövlətinin strateji maraqlarının regionda baş verən
hadisələrə əhəmiyyətli təsir göstərə
bilən müxtəlif dövlətlərin və beynəlxalq
güc mərkəzlərinin maraqları ilə
uzlaşdırılması da zəruri məsələlərdəndir.
Bu gün Azərbaycanın xarici siyasəti məhz
bu motivlər üzərində qurulduğundan ölkəmizin
beynəlxalq aləmdəki nüfuzu xeyli artmış, əlaqələri
genişlənmişdir.
Əsası ümummilli lider Heydər Əliyev
tərəfindən möhkəm təməllər üzərində
qurulmuş xarici siyasətimizin bu gün möhtərəm
Prezidentimiz İlham Əliyev tərəfindən
düşünülmüş formada davam etdirilməsi
dünyanın diqqət mərkəzindədir. Əgər
biz Azərbaycanı 10 il əvvəlki
dövrü ilə müqayisə etsək, bu zaman ciddi irəliləyişlərin
şahidi olarıq. Hazırda Azərbaycan
dünyanın inkişaf etmiş dövlətləri cərgəsinə
qoşulmaqdadır. Ölkəmizin sülhsevər xarici
siyasətinə sadiqliyinin nəticəsidir ki, bu gün Ermənistan
- Azərbaycan, Dağlıq Qarabağ münaqişəsinin
nizamlanmasında bütün beynəlxalq qurumlar və
dünyanın əksər dövlətləri Azərbaycan
Prezidentinin mövqeyini dəstəkləyir. Dövlət
başçımızın məntiqli xarici siyasəti Ermənistanı
dünyada işğalçı, Azərbaycanı isə
sülhsevər dövlət kimi tanıdıb. Artıq dünyanın qüdrətli dövlətləri
də ölkəmizin dünyada sabitliyə və təhlükəsizliyə
böyük töhfələr verdiyini yüksək qiymətləndirirlər.
Təkcə bir fakta diqqəti cəlb etmək
istərdim. Son 20 gün ərzində Amerika Birləşmiş
Ştatlarının Prezidenti Barak Obama Azərbaycan Prezidenti
İlham Əliyevə iki məktub göndərmiş,
müdafiə naziri Robert Qeyts Azərbaycana səfər
etmiş, bu ölkənin dövlət katibi Hillari Klinton da
dövlətimizin başçısına Azərbaycanın
sürətli iqtisadi inkişafından, iri layihələrin
müvəffəqiyyətlə
reallaşdırılmasından məmnunluq ifadə olunan məktub
ünvanlamışdır.
ABŞ Prezidenti öz məktubunda regional
sabitliyin gücləndirilməsi və ümumi təhlükəsizlik
problemlərinin aradan qaldırılmasında ABŞ-la Azərbaycan
arasındakı tərəfdaşlıqdan qürur hissi
duyduğunu xüsusi vurğulayıb. İki
ölkə arasındakı münasibətlərin yüksələn
xətt üzrə inkişaf etdiyi də diqqətə
çatdırılır. ABŞ
Prezidentinin Azərbaycanın həm öz regionunda, həm də
dünyada sabitliyə və təhlükəsizliyin təmin
olunmasına böyük töhfələr verməsini
yüksək qiymətləndirməsi təsadüfi deyil.
Azərbaycanın beynəlxalq terrorizmə
qarşı mübarizədə fəal iştirakı, Əfqanıstanda,
İraqda və Kosovoda sülhməramlı qüvvələrin
keçirdiyi əməliyyatlarda fəallıq göstərməsi
beynəlxalq aləmdə çox yüksək qiymətləndirilir.
ABŞ Prezidenti Barak Obama müdafiə naziri Robert Qeyts vasitəsilə
Azərbaycan Prezidentinə göndərdiyi sonuncu məktubunda
da beynəlxalq terrorizmə qarşı mübarizədə Azərbaycan
dövlətinin siyasətini yüksək qiymətləndirərək
yazır: "Bu gün Azərbaycan əsgərləri Əfqanıstanda
nümunəvi xidmət göstərir və Beynəlxalq Təhlükəsizliyə
Yardım Qüvvələrinə (BTYQ) təkrar təchizatın
asanlaşdırılması məqsədilə Azərbaycanın
hava yollarını və hava məkanını açmaq qərarınız
ölkənizin təhlükəsizlik sahəsində qətiyyətli
tərəfdaş kimi nüfuzunu daha da möhkəmləndirdi.
Enerji sahəsində Cənub dəhlizinin
inkişafında Azərbaycanın liderliyi, həmçinin
regionun çiçəklənməsini gücləndirdi və
qlobal enerji təhlükəsizliyini möhkəmləndirdi".
Dünyanın super dövlətinin
başçısının Azərbaycanı hər hansı
bir sahədə lider hesab etməsi ölkəmizin dünya
birliyində nüfuz qazanmasından xəbər verir. Bununla
yanaşı, Ermənistan - Azərbaycan, Dağlıq
Qarabağ münaqişəsinin nizamlanmasında Azərbaycanın
beynəlxalq hüququn norma və prinsiplərinə
üstünlük verməsi, ATƏT-in
Azərbaycanın öz təbii sərvətlərindən
düşünülmüş şəkildə istifadə
etməsi, sürətli iqtisadi tərəqqiyə nail
olması, çoxlu sayda yeni iş yerlərinin
açılması ölkəmizlə əməkdaşlığa
meyl edən dövlətlərin sayını xeyli
artırıb. Bir vaxtlar xəyallarda əfsanə
kimi canlanan Bakı -
Bu gün Azərbaycan Avropanın enerji təhlükəsizliyində
təminatçı dövlətlərdəndir. Azərbaycanda həyata keçirilən qlobal enerji
layihələri ölkəmizin nüfuzunu daha da
artırıb. Eyni zamanda Azərbaycanın dost ölkələrlə
əlaqələri də qırılmaz tellərlə
bağlanır. Bu yaxınlarda Azərbaycanda rəsmi səfərdə
olmuş Belarus Prezidenti Aleksandr Lukaşenko da keçirdiyi
görüşlərdə ölkəmizdəki sürətli
inkişafı yüksək qiymətləndirmiş, ikitərəfli
əməkdaşlığın daha da möhkəmləndirilməsi
üçün energetika, kənd təsərrüfatı,
tikinti, turizm, yüksək texnologiyalar və digər sahələr
üzrə mühüm əhəmiyyətli sənədlər
imzalanmışdır.
A.Lukaşenko səfəri zamanı Azərbaycanın
həm daxili inkişafından, həm də xarici siyasətindəki
uğurlarından heyranlıqla danışdı. O,
dövlətimizin başçısına müraciət edərək
"Siz bütün bu işləri yüksək bacarıqla
görürsünüz" - dedi. A.Lukaşenko
sözünə davam edərək bildirmişdi ki, "Əgər
ölkədə insanlar haqqında düşünən və
öz xalqını sevən Prezident varsa, deməli, bu dövlətin
perspektivləri çox böyükdür".
Belarus dövlət başçısı bu fikri ilə
Azərbaycanda xalqla Prezident arasında qırılmaz vəhdət
olduğuna, xalqın öz Prezidenti ətrafında sıx birləşməsinə
və Prezidentin insanlara yüksək diqqət və
qayğı göstərməsinə işarə edirdi.
Azərbaycan Prezidentinin xarici siyasətində
Türkiyə ilə münasibətlər, qardaş ölkə
ilə bütün sahələr üzrə əməkdaşlıq,
həmrəylik nümayiş etdirilməsi xüsusi olaraq
özünü büruzə verir. Son hadisələr -
Türkiyə - Ermənistan sərhədlərinin
açılmasında Türkiyəyə edilən təzyiqlər,
Qəzza sektoruna humanitar yardım aparılarkən İsrail hərbçilərinin
Türkiyə gəmilərinə hücum edərək
mülki vətəndaşları qətlə yetirməsi və
digər sahələrdə Azərbaycanın qardaş
Türkiyə dövləti ilə həmrəyliyi çox
yüksək qiymətləndirilir. Prezident
İlham Əliyevin qeyd etdiyi kimi, biz bütün məsələlərdə
Türkiyəyə dəstəyimizi əsirgəməmişik.
Bu, dövlət başçımızın
xarici siyasətinin uğurudur. Elə buna
görə də Azərbaycan Prezidentinin Türkiyəyə
sonuncu dəfə işgüzar səfəri dünyanın
diqqət mərkəzində idi. Bunu
dünya mətbuatında dərc olunan məqalələr də
təsdiqləyir. Türkiyənin "Zaman",
"Hürriyyət", "Milliyyət" qəzetləri,
"CNN Türk" televiziyası, "Amerikanın səsi"
(VOA) radiosu, "Cihan" agentliyi və digər kütləvi
informasiya vasitələri bu səfəri çox yüksək
dəyərləndirmiş, dövlət
başçımızın enerji təhlükəsizliyi məsələlərinə
kompleks şəkildə yanaşmanın və beynəlxalq
terrorizmə qarşı mübarizənin gücləndirilməsinin
zəruriliyi, ölkəmizin həyata keçirdiyi iri
infrastruktur layihələrin bölgədə əməkdaşlığa
böyük zəmin yaratması barədə fikirlər
xüsusi olaraq diqqətə
çatdırılmışdır.
Azərbaycanın regional və beynəlxalq
təhlükəsizliyə verdiyi töhfələrin yüksək
qiymətləndirilməsi xarici siyasətdə
qazandığımız uğurların bəhrəsidir.
Ölkəmizin bugünkü reallıqları və
əldə edilmiş nailiyyətlər də bunu təsdiqləyir.
Sonda bir məsələni də qeyd edək.
Belə ki, dövlət
başçımızın qeyd etdiyi kimi, Azərbaycanın
bugünkü reallıqları və əldə edilmiş
nailiyyətlər onu göstərir ki, seçdiyimiz yol
düzgün yoldur. Heç bir təzyiq
bizi ana xəttimizdən döndərə bilməz. Bizim yolumuz müstəqillik, inkişaf yoludur. Bizim reallıqlarımızı danmaq mümkün
deyil. Bu reallıqlar Azərbaycanın
xarici siyasətində özünü daha qabarıq şəkildə
göstərir.
Əliqismət BƏDƏLOV
Xalq qəzeti.- 2010.-
12 iyun.- S. 1.