Dövlət İdarəçilik Akademiyasında Milli Qurtuluş Günü qeyd edilmişdir

Azərbaycan Respublikasının Prezidenti yanında Dövlət İdarəçilik Akademiyasında 15 İyun Milli Qurtuluş Gününə həsr olunmuş yığıncaq ulu öndərin büstünün önünə gül dəstələri qoymaqla başlanmışdır. Sonra qüdrətli şəxsiyyət Heydər Əliyevin əziz xatirəsi bir dəqiqəlik sükutla yad edilmişdir.

Dövlət himni səsləndirildikdən sonra akademiyanın rektoru, əməkdar elm xadimi, professor Seyfəddin Qəndilov tariximizə mühüm bir hadisə kimi daxil olmuş bu günün əhəmiyyətindən danışmış, Milli Qurtuluş Gününün qaynaqlandığı hadisələr barədə təfsilatı ilə məlumat vermişdir. Natiq ölkənin və xalqın xaos, anarxiya şəraitində yaşadığı o günlərdə baş verən hadisələrin separatçı qüvvələrin fəallığı ilə daha da gərginləşdiyini, Azərbaycanın parçalanmaq, məhv olmaq təhlükəsi qarşısında qaldığını bildirmişdir. Xalqımızın bu çətin şəraitdən çıxması üçün öz xilaskarı kimi Heydər Əliyevə üz tutmasının düzgün seçim olduğunu qeyd etmişdir.

Rektor bildirmişdir ki, məhz bu seçim xalqın qurtuluş, nicat yolu olmuş, bu böyük şəxsiyyətin vətənin ağır günlərində öz xalqının yanında olması insanların itmiş ümidlərini özlərinə qaytarmışdır. Heydər Əliyevin respublika rəhbərliyinə vaxtında və yenidən qayıdışı ölkəmizi məhv olmaqdan xilas etdi və ulu öndəri xalqına bağlı olan bir rəhbər kimi bir daha tanıtdı.

Ümummilli lider Heydər Əliyev yenidən siyasi hakimiyyətə qayıtmaqla müstəqil Azərbaycana yeni dövlət idarəçiliyi fəlsəfəsi, mədəniyyəti gətirmişdir. Bu o deməkdir ki, Heydər Əliyev bugünkü Azərbaycanın yox, sabahkı Azərbaycanın da memarıdır. Əsası ulu öndər tərəfindən qoyulmuş xarici siyasət kursu bu gün Azərbaycanı dünya birliyinin fəal üzvünə çevirib. Natiq həmçinin, ulu öndərin varisi möhtərəm Prezidentimiz cənab İlham Əliyevin respublikamızın tərəqqisi naminə gördüyü işlərdən danışmış, bu illər ərzində əldə etdiyimiz nailiyyətlərin qazanılması istiqamətində cənab Prezidentin apardığı daxili və xarici siyasət nəticəsində ölkəmizin nüfuzunun günbəgün artdığını qeyd etmişdir.

S.Qəndilov diqqətə çatdırmışdır ki, möhtərəm Prezidentimizin düşünülmüş daxili və xarici siyasəti Azərbaycanın beynəlxalq aləmdəki nüfuzunu xeyli artırıb. Son günlər ABŞ Prezidenti Barak Obama Azərbaycan Prezidenti İlham Əliyevə iki məktub göndərib. Həmin məktublarda Azərbaycanla ABŞ arasındakı münasibətlərin getdikcə yaxşılaşması və Ağ ev rəhbərliyinin iki ölkə arasında əməkdaşlığından məmnun olduğu ifadə olunub. Dünyanın ən qüdrətli dövlətinin başçısı tərəfindən Azərbaycan Prezidentinə belə bir məktub göndərilməsi dövlət başçımızın siyasi kursunun dünya birliyi tərəfindən bəyənilməsi və qəbul edilməsindən xəbər verir. Bütün bunlar ümummilli lider Heydər Əliyev siyasətinin nəticəsidir. Heydər Əliyevin ideyaları Azərbaycanı daha yüksəkliyə aparacaq.

Ümummilli lider Heydər Əliyevin Bakıya dönüşü ilə əlaqədar sənədli filmin nümayişindən sonra respublikanın tanınmış incəsənət ustalarının və akademiya tələbələrinin ifasında ulu öndərə həsr olunmuş şeirlər və mahnılar səsləndirilmişdir.

Əliqismət BƏDƏLOV

Xalq qəzeti.- 2010.- 17 iyun.- S. 3.