Sərhəd dəstəsi – 17 il

Azərbaycan Respublikası Dövlət Sərhəd Xidməti Zaqatala Sərhəd Dəstəsinin yaranmasının 17 illiyinə və gənc əsgərlərin andiçmə mərasiminə həsr olunmuş tədbir keçirilmişdir. Tədbirdə Zaqatala rayon icra hakimiyyətinin başçısı Mübariz Əhmədzadə, Balakən və Qax rayon icra hakimiyyəti başçısının müavinləri, hər üç rayonun hüquq-mühafizə orqanlarının rəhbərləri, valideynlər, ictimaiyyət və kütləvi informasiya vasitələrinin nümayəndələri iştirak etmişlər.

Tədbirdə Zaqatala rayon icra hakimiyyətinin başçısı Mübariz Əhmədzadə, Zaqatala sərhəd dəstəsinin komandiri, polkovnik-leytenant Rövşən Səfərov və başqaları çıxış edərək hərbi hissənin zabit, gizir və əsgərlərini sərhəd dəstəsinin yaradılmasının 17 illiyi və gənc əsgərlərin andiçmə mərasimi münasibəti ilə təbrik etmişlər. Çıxış edənlər ulu öndər Heydər Əliyevin ölkəmizi bölgədə lider dövlətə çevirmək məqsədi ilə hərbi potensialımızın gücləndirilməsi istiqamətində gördüyü işlərdən danışılmış, Azərbaycan Respublikasının Dövlət Sərhəd Xidmətinin formalaşdırılmasında böyük siyasətçinin əvəzsiz xidmətləri qeyd olunmuşdur.

Natiqlər eyni zamanda hazırda sərhəd qoşunlarının daha da güclənməsi, onun maddi-texniki bazasının müasirləşdirilməsi istiqamətində apardığı işlərə görə ölkə Prezidenti cənab İlham Əliyevə öz təşəkkürlərini bildirmişlər.

Daha sonra tədbir iştirakçıları hərbi hissənin çevik alayının əsgərlərinin nümunəvi çıxışlarına baxmışlar. Xidmətdə fərqlənən zabit, gizir və əsgərlərin mükafatlandırılma mərasimindən sonra tədbir geniş konsert proqramı ilə davam etdirilmişdir.

İ.MUSAOĞLU,

“Xalq qəzeti”nin bölgə müxbiri

Xalq qəzeti.- 2010.- 4 mart.- S. 8.