“Telli sazın meydanı” xalqımızın qəlbidir

Respublikanın müxtəlif bölgələrində, qonşu ölkələrdə yaşayan, qədim ozan xalq sənətini yaşadan aşıqların Bakı səhnəsində hər çıxışı paytaxtın mədəni həyatında həmişə xoş hadisəyə çevrilir, könüllərdə təravətli, unudulmaz təəssürat yaradır. Baharın ilk günlərində ölkənin ən böyük toplantı salonu olan Heydər Əliyev adına Sarayda Azərbaycan aşıqlarının növbəti konserti də böyük uğurla keçdi.

“Telli sazın meydanı” adlı bu saz-söz məclisi bədii tutumuna, çal-çağıra qoşulan sənətçilərin sayına və coğrafi dairəsinə görə bu vaxtadək keçirilən aşıq konsertlərinin ən böyüyü idi. Milli aşıq sənətinin müxtəlif üslublarını və nəsillərini əhatə edən kişi və qadın aşıqlar, telli saz qrupları 4 saata yaxın bir vaxtda bu ulu xalq yaradıcılığının ən yaxşı örnəkləri ilə mədəni irsimizə sıx bağlı olan tamaşaçıları coşdurdular, heyran qoydular.

Məclisin əvvəlində aşıq sənəti pərəstişkarlarını hərarətlə salamlayan Azərbaycan Aşıqlar Birliyinin sədri, xalq şairi Zəlimxan Yaqub bildirdi ki, min illər əvvəl olduğu kimi, bu gün də aşıq sənəti xalqımızın milli-mənəvi dəyərlər sistemində layiqli yer tutur. Aşıq sənəti çağdaş mədəni tələbatın rəngarəngləşdiyi, kütləviləşdiyi bir dövrdə də sevilir, dəyərləndirilir, qayğı ilə qorunub inkişaf etdirilir. Ulu saz tarixən xalqımızın ən çətin günlərində mübarizə, döyüş meydanında olduğu kimi, bu gün də xalqımızın ağrı-acıları və sevinci-uğuru ilə nəfəs alır.

Aşıqlar Birliyi yazın ilk günlərində aşıqların bu sənət hesabatını təşkil etməklə, əslində, ölkəmizdə yaxınlaşan Novruz şənliklərinə start verir. İndi bir səhnədə çalıb-çağıran bu ünlü sənətçilər evlərinə dönəndən sonra xalq şənliklərində fəal iştirak edəcəklər. Onların meydanı xalqımızın yaşadığı bütün ulu yurd yerləri olacaq. Nə qədər xalqımız var, o qədər də telli saz olacaq, onun milli ruhumuzu yaşadan, qidalandıran ölməz havaları olacaq. Əsrlərin sınağı, müstəqil dövlətimizin himayəsi və xalqımızın öz kökünə bağlılığı milli aşıq sənətimizə həmişəyaşarlıq qazandırıb.

Sonra meydan telli saza verildi. O axşam bu nəhəng salonda hər şey sazın sözünə, səsinə, sehrinə bələndi. Səhnənin uca yerində asılan iri saz da, bir-birilə bəhsə girişmiş ustad və istedadlı aşıqların coşğun ifaları da, susmaq bilməyən alqışlar da, hətta ifaçıların şərəfinə səhnəyə gətirilən sazabənzər əklil də Dədə Qorqud yadigarı saza xalqımızın sonsuz sevgi və ehtiramını ifadə edirdi.

Konsert Nemət Qasımlının rəhbərliyi ilə uşaq aşıq ansamblının ifa etdiyi dövlət himnimizlə başladı. Balaca aşıqlara qoşulan bütün salon telli sazın sədaları altında himnimizi oxudu. “Baş sarıtel”, “Ruhani”, “Döşəmə Koroğlu”, “Dilqəmi”, “Göyçə gözəlləməsi”, “Göyçə gülü” kimi ruhumuzun min bir əhvalına sığal çəkən aşıq havaları, yetkin-bitkin ifalar qədirbilən tamaşaçıları, sanki, tarixin müxtəlif dövrlərindən keçirib, yurdumuzun yaxın-uzaq bölgələrindən dolandırıb bu günümüzə gətirdi.

Abbas Musaxanoğlu, Azər Xanlaroğlu, Solmaz Kosayeva, Səyyad Pənahov, İlham Aslanbəyli, Ulduz Sönməz, Zülfiyyə, Həbib Musayev, Zülal Məmmədov, Firudin Tovuzlu, Telli Borçalı, Səlim Abdullayev, Ədalət Dəlidağlı, Avdı Musayev, Rakif İsmayılov, Ramil Qarayev, Əhliman Allahverdiyev və daha neçə-neçə aşığın barmaqları telli sazın möcüzəsini dönə-dönə nümayiş etdirdi.

Həmin axşam aşıq sənətinin müxtəlif üslub və nəsilləri bir məcrada qovuşub coşğun bir sel kimi çağladı, sazın ölməzliyini bir daha təsdiqlədi. Bir daha aydın oldu ki, telli sazın meydanı xalqımızın qəlbidir.

Tahir AYDINOĞLU

Xalq qəzeti.- 2010.- 7 mart.- S. 6