Biz daim yeniləşən bir
ölkənin vətəndaşlarıyıq
Bu inkişafda Heydər Əliyev
Fondunun xüsusi xidmətləri var
Bu gün hər bir azərbaycanlı bu torpağın
övladı olması ilə fəxr edə bilər. Günü-gündən
inkişaf edən müstəqil Azərbaycan Respublikası
artıq Cənubi Qafqazda lider ölkə hesab olunur. Fəxrlə
deyə bilərik ki, Azərbaycan beynəlxalq təşkilatların
hesabatlarında ən islahatçı ölkə kimi
tanınır. Bu inkişaf, bu tərəqqi ulu öndər
Heydər Əliyevin siyasi kursunun uğurlu nəticəsidir. Və
bu gün Azərbaycanımız ümummilli liderin
ideyalarından güc alan möhtərəm Prezidentimiz
İlham Əliyevin uzaqgörən, davamlı siyasəti nəticəsində
sabaha uğurlu addımlarla irəliləyir.
Ölkə həyatının
hansı sahəsini götürürsən-götür, orada
inkişaf var, tərəqqi var. Bugünkü nəsil son 17
ildə Azərbaycanda həyata keçirilən islahatların
canlı şahididir. Azərbaycanın bundan əvvəlki vəziyyətinə
nəzər yetirsək görərik ki, son illər ölkəmizdə
əsaslı sıçrayışlar baş vermişdir. İqtisadiyyatımız,
sosial həyatımız, mədəniyyətimiz, təhsilimiz
tamamilə yeniləşmişdir. Əhəmiyyətli olan
budur ki, biz müstəqil bir ölkənin vətəndaşlarıyıq
və müstəqilliyimiz də ildən ilə möhkəmlənir.
Ulu öndərin bu ifadəsini xatırlayıram: “Azərbaycanın
müstəqilliyi, əbədidir, dönməzdir”. Cənab
Prezidentimiz İlham Əliyev isə bu müstəqilliyi öz
davamlı siyasəti ilə daha da möhkəmləndirir.
Azərbaycanda hüquqi,
demokratik mühit formalaşmışdır. İndi hər kəs
öz hüququnu müdafiə edir, mətbuatda azad fikir
söyləyə bilir. Davamlı həyata keçirilən
gender siyasəti qadınlarımızın da cəmiyyətdəki
roluna müsbət təsir göstərmişdir.
Son illər qəbul olunan
dövlət proqramları inkişafımıza əsaslı
stimul yaratmışdır. Təkcə təhsil sahəsində
16 dövlət proqramı hazırlanıb həyata
keçirilir. Bu isə Azərbaycanın gələcəyi
üçün çox vacib olan milli təhsilimizin
inkişafına göstərilən yüksək dövlət
qayğısının nəticəsidir.
Yoxsulluğun aradan
qaldırılması, sahibkarlığın, səhiyyənin
və mədəniyyətin inkişafı ilə bağlı
qəbul olunan proqramlar cəmiyyətimizin inkişafında əhəmiyyətli
rol oynamış və oynamaqdadır.
Biz azərbaycanlıyıq.
Bizim zəngin milli-mənəvi dəyərlimiz var və
onların qorunub saxlanılması, gələcək nəsillərə
çatdırılması dövrümüzün
mühüm problemlərindəndir. Bu istiqamətdə
reallaşdırılan ardıcıl tədbirlər bir daha təsdiq
edir ki, ulu öndərin mədəniyyətin inkişafı
ilə bağlı tövsiyələri həyata
keçirilir və ölkəmiz artıq sivil mədəniyyət
diyarına çevrilmişdir.
Bu sahədə Heydər Əliyev
Fondunun prezidenti, YUNESKO və İSESKO-nun xoşməramlı
səfiri Mehriban xanım Əliyevanın bu sahədəki xidmətlərini
qeyd etmək lazımdır. Heydər Əliyev Fondunun
yaradılması 2004-cü ilə təsadüf edir. Həmin
il martın 10-da Azərbaycan Respublikasının Prezidenti cənab
İlham Əliyev ümummilli lider Heydər Əliyevin xatirəsini
əbədiləşdirmək üçün sərəncam
imzalamışdır ki, həmin sərəncamın 12-ci bəndində
ictimai əsaslarla Heydər Əliyev Fondunun
yaradılmasından bəhs olunurdu. Həmin il mayın 10-da,
ulu öndərin ad günündə Heydər Əliyev
Fondunun rəsmi açılışı oldu, ölkənin
birinci xanımı Mehriban Əliyeva fondun prezidenti təyin
edildi. Bu uğurlu təyinat çox keçmədi ki, öz
müsbət bəhrəsini verdi.
Həyatımızın hər
bir sahəsində Heydər Əliyev Fondunun fəaliyyətinin
nəticələrini görürük. Fond məktəblər
tikir, xəstələrə sağlamlıq bəxş edir,
qaçqın və məcburi köçkünləri evlərlə
təmin edir, uşaqlara himayədarlıq göstərir, Azərbaycan
tarixi və mədəniyyətinin dünyada təbliği ilə
məşğul olur, Qarabağ həqiqətlərini beynəlxalq
ictimaiyyətə çatdırır. Ən əsası budur
ki, fond bu gün dünyaya bir azərbaycançılıq məfkurəsi
yayır.
Bu fondun həyata
keçirdiyi bəzi layihələrə diqqəti yönəltmək
istərdik. Onlardan bir neçəsi təhsillə
bağlıdır. Ulu öndər Heydər Əliyev deyərdi:
“Azərbaycanın gələcək tərəqqisi, hərtərəfli
inkişafı, uşaqların, gənclərin yüksək səviyyədə
təhsil almasından çox asılıdır”. Cənab
Prezidentimiz İlham Əliyevin bu fikri isə ulu öndərin
ideyalarına sadiqliyini bir daha təsdiqləyir: “Təhsil bizim
gələcəyimizdir və ölkənin inkişaf
perspektivlərini müəyyən edən sahədir”. Arzusu
uşaqlarımızın dünyanın ən yüksək
standartlarına cavab verən təhsilə yiyələnməsi
olan Mehriban xanım Əliyeva fondun xətti ilə “Yeniləşən
Azərbaycana – yeni məktəb” layihəsini
reallaşdırmağa başlamış və hazırda bu
sahədə çox uğurlu nailiyyətlər
qazanılmışdır. Ölkəmizin elə bölgəsi
yoxdur ki, orada fondun inşa etdirdiyi yeni məktəb, yeni uşaq
bağçası tikilməmiş olsun, yaxud məktəblər
əsaslı təmir edilməsin. Abşeron, Şamaxı, Lənkəran,
Astara, Samux, Kəlbəcər, Gəncə və s. şəhər,
rayon mərkəzləri və kəndlərimizdə
müasir standartlara cavab verən yeni məktəblərin
inşası milli təhsilimizin maddi- texniki bazasının
möhkəmləndirilməsində əhəmiyyətli rol
oynamışdır.
Bu gün nüfuzlu beynəlxalq
təşkilat olan YUNESKO-nun Azərbaycanla əməkdaşlığının
genişlənməsində Heydər Əliyev Fondunun prezidenti
Mehriban xanımın xidmətləri danılmazdır.
Artıq bu təşkilatın köməyi və
iştirakı ilə milli mədəniyyətimizin
qorunması və inkişafı ilə bağlı bir
sıra tədbirlər reallaşdırılıb. Azərbaycan
həqiqətən dünyanın mədəniyyətlərarası
dialoq mərkəzinə çevrilmişdir. Heydər Əliyev
Fondunun milli mədəniyyət incilərinin mühafizəsi,
eləcə də musiqi təhsili və gələcək nəslin
maarifləndirilməsi prosesini diqqət mərkəzində
saxlaması mədəniyyətimizin zəngin ənənələrinin
qorunması işinə gözəl töhfədir. “Azərbaycan
– İrs” jurnalının nəşri milli mədəniyyətimizin
dünyada təbliği işində mühüm rol
oynayır.
Qala kəndində
yaradılan Arxeoloji Etnoqrafik Muzey Kompleksi də Heydər Əliyev
Fondunun dəstəyi ilə istifadəyə verilmişdir. Azərbaycan
muğam sənətinin təbliğində Mehriban
xanımın xidmətləri olduqca böyükdür. Milli-mənəvi
dəyərlərimizin qorunması və Azərbaycan mədəniyyətinin
dünyada geniş təbliği ilə çoxsaylı layihələr
həyata keçirən Heydər Əliyev Fondunun Azərbaycan
mədəniyyəti qarşısında ən böyük
xidmətlərindən biri musiqi incimiz olan muğamın
inkişafı və təbliği ilə bağlı
atdığı ciddi addımlardır. “Qarabağ xanəndələri”
musiqi albomunun nəfis şəkildə nəşri, “Muğam
aləmi” Beynəlxalq Muğam Festivalı bu istiqamətdə
həyata keçirilən tədbirlərdəndir. Bakıda
Muğam Mərkəzinin tikilib istifadəyə verilməsi isə
muğamsevərlərə çox qiymətli töhfə
oldu.
Qarşıdan 8 Mart Beynəlxalq
Qadınlar bayramı gəlir. Bu münasibətlə Azərbaycanımızın
bütün qadınlarını səmimi qəlbdən təbrik
edir, onlara xoş həyat, firavan ömür arzu edirik.
Mehriban ABASQULİYEVA,
YAP Sabunçu rayon təşkilatının
sədri,
tibb elmləri namizədi
Xalq qəzeti.- 2010.- 7 mart.- S. 4.