Dağlıq Qarabağ problemi Azərbaycanın ərazi bütövlüyü çərçivəsində həll olunmalıdır

“Azərbaycan Respublikası regionlarının sosial-iqtisadi inkişafı Dövlət Proqramı”nın qarşıya qoyduğu vəzifələrin uğurla icra olunması ölkə iqtisadiyyatını daha da gücləndirmiş, işsizlik probleminin aradan qaldırılmasına böyük təsir göstərmiş və əhalinin sosial müdafiəsinin gücləndirilməsi istiqamətində mühüm əhəmiyyətli tədbirlər həyata keçirilmişdir. Proqramın icrasına başlanılmasından ötən dövr ərzində ölkədə 840 mindən artıq yeni iş yerləri açılmış, beynəlxalq standartlara cavab verən, ən müasir avadanlıqlarla təchiz olunmuş istehsal və sənaye müəssisələri yaradılmışdır. Bunun nəticəsi olaraq həmin müddət ərzində ölkə iqtisadiyyatı 2,6 dəfə yüksəlmişdir. Dünyanı maliyyə və iqtisadi böhran bürüdüyü bir vaxtda belə bir inkişaf Azərbaycana olan marağı daha da artırmışdır.

Prezident İlham Əliyevin 14 aprel 2009-cu il tarixli fərmanı ilə təsdiq edilmiş “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı” da ölkə iqtisadiyyatının beynəlxalq aləmə uğurlu inteqrasiyasına, əhalinin sosial-rifah halının yaxşılaşdırılmasına, yoxsulluq səviyyəsinin daha da azaldılmasına, nəzərdə tutulmuş iri infrastruktur layihələrin reallaşdırılmasına, yeni iş yerlərinin yaradılmasına və digər amillərə xidmət edir. Yeni Dövlət Proqramının icrasına başlanılması ölkə iqtisadiyyatını daha da möhkəmləndirəcək, yeni iş yerləri yaradılacaq. İqtisadiyyatı möhkəm olan ölkələrdə sosial problemlərin aradan qaldırılması, ordunun möhkəmləndirilməsi, sənaye istehsalının artırılmasında çətinliklər yaranmır. Biz dövlət başçımızın regionlara səfəri zamanı bunun bir daha şahidi olduq.

Azərbaycan Prezidenti bu günlərdə respublikamızın dilbər guşəsi olan Qəbələ rayonuna səfər etmiş və bir sıra obyektlərin açılışında iştirak etmişdir. Qəbələ rayonunda məskunlaşmış məcburi köçkün ailələri üçün salınmış məhəllə də diqqəti cəlb etmişdir. Bu məhəllə “Qaçqınların və məcburi köçkünlərin yaşayış şəraitinin yaxşılaşdırlması və məşğulluğunun artırılması üzrə Dövlət Proqramı”na dövlət başçımızın 2007-ci il 31 oktyabr tarixli sərəncamı ilə edilmiş əlavələrə uyğun olaraq Qəbələ rayonunun Zarağan bələdiyyəsi ərazisində salınmışdır. Rayon ərazisində “Qafqaz” turizm bazası və “Lalə” sağlamlıq mərkəzində müvəqqəti məskunlaşmış 155 məcburi köçkün ailəsi üçün nəzərdə tutulan və 4 hektar sahəni əhatə edən məhəllədə beşmərtəbəli 2 yaşayış binası və 188 şagird yeri olan məktəb binası tikilmişdir. Beşmərtəbəli binalardan biri 80, digəri 75 mənzillidir. Binalar qaz, su, elektrik xətləri ilə tam təmin olunmuş, kanalizasiya şəbəkəsi yaradılmış, əraziyə asfalt-beton örtük salınmış, abadlıq və yaşıllaşdırma işləri görülmüşdür. Bir sözlə, burada yaşayış üçün çox rahat şərait yaradılmışdır.

Qəbələ rayonunda məskunlaşmış 598 məcburi köçkün ailəsi adından dövlət başçımızı salamlayan məcburi köçkün Əhəd Həsənov onlar üçün belə rahat şərait yaratdığına görə Prezident İlham Əliyevə minnətdarlığını bildirdi. O, əminliklə bildirdi ki, düşmən işğalında olan torpaqlarımız məhz dövlət başçımızın müdrikliyi, ulu öndər Heydər Əliyevin siyasi kursuna sadiqliyi və məntiqli xarici siyasət sayəsində azad ediləcək. Erməni silahlı qüvvələrinin azərbaycanlılara qarşı törətdikləri soyqırımı, terror aktları və vandalizm barədə beynəlxalq aləmə, dünya ictimaiyyətinə müfəssəl məlumatlar çatdırılmasında, Ermənistanın işğalçı dövlət olmasının təkzibolunmaz faktlarla sübut edilməsində Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın və Heydər Əliyev Fondunun Rusiya Federasiyasındakı nümayəndəliyinin rəhbəri Leyla xanım Əliyevanın yorulmaz fəaliyyətini yüksək qiymətləndirən Ə.Həsənov dedi ki, məcburi köçkünlər hamılıqla bu işlərdən fərəhlənir və qürur hissi keçirirlər. Leyla xanım Əliyevanın Xocalı fəryadını bütün dünyaya çatdırması böyük rezonans doğurub. Qeyd olundu ki, məcburi köçkünlər möhtərəm Prezidentimizə inanır, güvənir, həmişə ona arxa və dayaqdır.

Məcburi köçkünlər və Qəbələ rayon ictimaiyyətinin nümayəndələri ilə görüşü zamanı möhtərəm Prezidentimiz öz isti ocaqlarından didərgin düşən soydaşlarımızın sosial problemlərinin aradan qaldırılmasının dövlətin prioritet vəzifələrindən olduğunu diqqətə çatdıraraq dedi: “...Bilirsiniz ki, Azərbaycan dövləti, Azərbaycan hökuməti məcburi köçkünlərin yaşayış səviyyəsinin yaxşılaşdırılması və onların məşğulluğunun artırılması üçün çox böyük işlər görür. Dövlət Proqramı qəbul edilibdir və ilk mərhələdə ən ağır vəziyyətdə yaşayan soydaşlarımızın problemləri həll olundu. Artıq Azərbaycanda bir dənə də olsun çadır şəhərciyi yoxdur. İndiki mərhələdə digər yerlərdə yararsız binalarda yaşayan soydaşlarımızın problemləri həll olunmalıdır”.

Ermənistan silahlı qüvvələrinin Azərbaycan xalqına soyqırımı törətməsindən danışan möhtərəm Prezidentimiz qətiyyətlə bildirdi ki, Azərbaycan xalqına qarşı soyqırımında iştirak edənlər cinayət məsuliyyətinə cəlb olunmalıdırlar. Ermənilərin törətdikləri Xocalı soyqırımı heç vaxt yaddaşlardan silinməyəcək. Baxmayaraq ki, Ermənistan diasporu və onların dünyadakı havadarları tarixi həqiqəti təhrif etməklə, demək olar ki, Xocalı həqiqətlərini ört-basdır etməyə çalışırdılar. Ancaq bu gün bütün dünya Xocalı faciəsindən tam məlumatlıdır. Biz bu faciə ilə bağlı bütün həqiqətləri dünya birliyinə çatdıra bilmişik.

Möhtərəm Prezidentimiz rayon ictimaiyyəti ilə görüşü zamanı demişdir: “...Əminəm ki, o gün gələcək və Azərbaycan xalqının qanına əli batmış bütün cinayətkarlar, bütün quldurlar cəzalarını alacaqlar. O ki, qaldı Ermənistan – Azərbaycan, Dağlıq Qarabağ münaqişəsinin həllinə, Azərbaycan öz səylərini davam etdirəcəkdir. Biz çalışırıq və çalışmalıyıq ki, ölkəmizi hərtərəfli inkişaf etdirək, gücləndirək ki, danışıqlarda, ümumiyyətlə, Ermənistanla qarşıdurmada mövqelərimiz daha da güclənsin. Beynəlxalq müstəvidə buna nail ola bilmişik”.

Möhtərəm Prezidentimiz söhbət zamanı diqqətə çatdırmışdır ki, Ermənistan-Azərbaycan, Dağlıq Qarabağ münaqişəsinin nizamlanmasında beynəlxalq təşkilatlar Azərbaycanın mövqeyini dəstəkləyir, problemin ölkələrin ərazi bütövlüyü çərçivəsində və beynəlxalq hüququn normaları əsasında həllinin tərəfdarıdırlar. Ermənistan tərəfi isə münaqişəni əsası olmayan bəhanələrlə hələ də uzatmaq istəyir. Dövlət başçımız Minsk qrupunun həmsədrləri ilə keçirdiyi çoxsaylı görüşlərini xatırladaraq deyib ki, bu görüşdə Azərbaycanın haqlı mövqeyi daim vurğulanıbdır. Artıq bütün dünya bilir ki, Azərbaycan torpaqları işğal olunub, işğalçı dövlət işğal edilmiş torpaqlardan çıxmaq istəmir və məsələni uzatmaq istəyir: “Biz istəyirik ki, məsələ sülh yolu ilə həll olunsun, biz istəmirik ki, müharibə yenidən başlasın. Ancaq, eyni zamanda, özümüzü gücləndiririk, ölkəmizin hərbi-iqtisadi potensialını gücləndiririk və hər an torpaqlarımızı istənilən yolla düşməndən azad etmək üçün hazır olmalıyıq. Bunu etmək üçün bir daha demək istəyirəm ki, Azərbaycan güclü olmalıdır. Bugünkü dünyanın müxtəlif yerlərində baş vermiş hadisələr onu göstərir ki, güc amili həlledici rol oynayır”.

Ermənistan silahlı qüvvələrinin işğal etdikləri ərazilərdən qeyd-şərtsiz çıxmaları üçün beynəlxalq təşkilatlar bir sıra qərarlar qəbul ediblər. Dünyanın ən böyük, ən mötəbər təşkilatı olan BMT-nin Təhlükəsizlik Şurası 4 qətnamə qəbul edib.

Təəssüf ki, həmin qətnamələr bu vaxta qədər icra olunmayıb. Onu da qeyd edək ki, BMT Təhlükəsizlik Şurasının 5 daimi üzvü var. Bu dövlətlərdən üçü Minsk qrupunun həmsədridir. Təbii ki, Təhlükəsizlik Şurasının qətnamələri, bütün BMT üçün əsas olmalıdır. Qurumun daimi üzvləri istənilən qərara veto qoya bilərlər. Ölkə başçısı təəssüflə bildirmişdir ki, BMT Təhlükəsizlik Şurasının qəbul etdikləri qərarlardan 20 il keçsə də, bu qərarlar icra olunmur, hətta işğalçı dövlətə xəbərdarlıq da edilməyib.

Dünyanın nüfuzlu beynəlxalq qurumlarının keçirdikləri tədbirlərdə də birmənalı olaraq bildirilib ki, Ermənistan – Azərbaycan, Dağlıq Qarabağ münaqişəsinin nizamlanmasında Azərbaycan sülh tərəfdarıdır. Yəni biz problemin qan tökülmədən aradan qaldırılmasını istəyirik. Ancaq unutmamalıyıq ki, Ermənistan silahlı qüvvələri torpaqlarımızı müharibə yolu ilə, başqa ölkələrin dəstəyi ilə işğal edibdir. İşğalçı tərəf öz qəsbkarlıq missiyasını hələ də davam etdirir. Baxmayaraq ki, onlar bütün sahələr üzrə Azərbaycandan qat-qat geridə qalırlar. Bütün bunları nəzərə alan möhtərəm Prezidentimiz söhbət zamanı demişdir: “... Baxmayaraq ki, o hadisələrdən artıq 20 ilə yaxın vaxt keçir, bunu heç kim unutmamalıdır. Azərbaycan vətəndaşları, gənclər, gənc nəsil bunu daim yadda saxlamalıdır. Yəni, ermənilər bunu zor gücü ilə ediblərsə, bizə nə üçün daim tövsiyə edilir ki, sülh yolu ilə həll olunsun. Mən bir daha demək istəyirəm ki, heç kim müharibə istəmir. Kim istəyir ki, indi müharibə olsun? Ancaq biz bu dözülməz vəziyyətlə nə qədər barışmalyıq? Nə qədər dünya ictimaiyyəti və bu məsələ ilə məşğul olan tərəflər belə təmkinli mövqedə olacaqlar?”.

Azərbaycanda ordu quruculuğu işi daim dövlətin diqqət mərkəzində saxlanılır. Ordunun inkişafına, formalaşmasına ayrılan vəsait Ermənistanın dövlət büdcəsinə bərabərdir. Azərbaycanın dünya miqyasında ən sürətlə inkişaf edən ölkə olması milli ordunun formalaşmasına da öz təsirini göstərib. Bu gün işğal altında olan torpaqlarımızın azad edilməsi üçün Azərbaycanın qüdrətli orduya malik olması hamıya, hətta Ermənistana da bəllidir. Lakin bu, hələ kifayət deyil. Dövlət başçımız bildirir ki, hərbi quruculuq, ordu quruculuğu daha da sürətlə aparılmalıdır. Çünki biz işğal altında olan torpaqlarımızı öz qüvvəmizlə azad etməli, sonra da öz doğma yurd-yuvalarından didərgin düşən soydaşlarımızı öz ata-baba ocaqlarında yerləşdirməliyik.

Azərbaycan Prezidenti Qəbələdə keçirdiyi görüşü zamanı bir daha vurğuladı ki, son altı ildə ölkəmizin inkişafı istiqamətində çox işlər görülüb, amma bunlar hələ azdır. Qarşıda daha mühüm işlər durur. Azərbaycanın öz uğurlu inkişafını 2010-cu ildə də davam etdirməsinə heç bir şübhə yoxdur. Dövlətimizin başçısı qətiyyətlə bildirmişdir ki, qarşıda duran bütün vəzifələr icra ediləcək, iqtisadi və sosial problemlər öz həllini tezliklə tapacaqdır.

Əliqismət BƏDƏLOV

Xalq qəzeti.- 2010.- 7 mart.- S. 1.