İstedadlı iqtisadçı
alim və bacarıqlı təşkilatçı
Hər bir alim qiymətlidir.
Ancaq nəzəriyyəni təcrübə ilə birləşdirən,
fikirlərini tətbiq edə bilən və onlardan əməli
nəticə götürə bilən, cəmiyyətə,
ölkəyə, xalqa konkret fayda gətirən insanlar alimlərin
sırasında xüsusi yer tuturlar.
Heydər ƏLİYEV,
Ümummilli lider
“... Azərbaycan alimləri, ziyalıları ölkəmizin,
cəmiyyətimizin elitasıdır. Onların
dünyagörüşü, mövqeyi, hərəkətləri,
fəaliyyəti Azərbaycanın inkişaf
dinamikasını, inkişaf perspektivlərini xeyli dərəcədə
müəyyən edir”. Ölkə Prezidenti cənab İlham Əliyevin
bu sözlərini Azərbaycan alimləri sırasında
özünəməxsus yer tutan iqtisad elmləri doktoru,
professor Natiq Qasımova da şamil etmək olar. N. Qasımov hər
bir soydaşımıza örnək olası şərəfli
bir ömür yaşayır: müəllim adına ucalıq,
şərəf gətirmiş mərhum əməkdar elm
xadimi, iqtisad elmləri doktoru, professor, “Şöhrət”
ordenli, Yazıçılar İttifaqının üzvü Əbülfəz
(“Bərəkət”) müəllimin və Validə
xanımın ailəsində boya-başa çatmış,
valideynlərinin şəxsi nümunəsi və zəhmətsevərliyi
həyat yolunda ona yol göstərən çıraq
olmuş, uşaq yaşlarında qəlbində biliyə və
yeniliyə sonsuz həvəs oyatmışdır.
N.Qasımov 1960-cı
ilin mart ayının 19-da Bakı şəhərində,
ziyalı ailəsində anadan olmuşdur. 1982-ci ildə Azərbaycan
Kənd Təsərrüfatı İnstitutunun (indiki Aqrar
Universiteti) iqtisadiyyat fakültəsini və 1992-ci ildə
Bakı Sosial İdarəetmə və Politologiya İnstitutunu
(indiki Azərbaycan Respublikası Prezidenti yanında Dövlət
İdarəçilik Akademiyası) fərqlənmə
diplomları ilə bitirmiş, iqtisadçı-təşkilatçı
və politoloq ixtisasları almışdır.
Natıq müəllim
elmə sıx bağlı insandır. O, 1986-cı ildə
iqtisad elmləri namizədi dərəcəsini müdafiə
etmiş, 1996-cı ildə dosent elmi adı, 1998-ci ildə
iqtisad elmləri doktoru dərəcəsini almışdır.
2004-cü ildə Azərbaycan Respublikası Prezidenti
yanında Ali Attestasiya Komissiyası tərəfindən
N.Qasımova professor elmi adı verilmişdir.
N.Qasımovu
başqalarından fərqləndirən bir cəhət isə
budur ki, onun elmi fəaliyyəti əmək fəaliyyəti ilə
sıx çulğalaşmışdır. Əmək fəaliyyətinə
1982-ci ildə Azərbaycan ETKT İqtisadiyyatı və Təşkili
İnstitutunda kiçik elmi işçi kimi başlayan
N.Qasımov çox qısa müddətdə
özünün potensialını ortaya qoya bilmiş, ona
müvafiq vəzifələr
tapşırılmışdır. Təsadüfi deyil ki, əmək
fəaliyyətinin bir hissəsi məhz elmlə bağlı
olan sahələrin payına düşür. N.Qasımov
1988-1993-cü illərdə Azərbaycan
İqtisadçılar İttifaqının sədr
müavini, 1993-1994-cü illərdə “Azəryeyintisənaye”
Elmi-Tədqiqat İnstitutunun direktoru, 1994-1996-cı illərdə
Azərbaycan Respublikası Maliyyə Nazirliyinin baş idarə
rəisinin müavini, 1996-1998-ci illərdə Azərbaycan
Dövlət İqtisad Universitetində dosent, professor,
1998-2000-ci illərdə Əmək və Sosial Problemlər
üzrə ET və Tədris mərkəzinin direktoru vəzifəsində
işləmişdir. Elmi-tədris fəaliyyətində əldə
etdiyi nailiyyətlərə görə N.Qasımov 1998-cü
ildə Beynəlxalq İqtisadçılar
İttifaqının və 2004-cü ildə Beynəlxalq
Menecment Akademiyasının həqiqi üzvü
seçilmişdir.
Natiq Qasımov əmək
fəaliyyətinin son illərini vergi sistemi ilə
bağlamışdır. O, 2000-2001-ci illərdə Azərbaycan
Respublikası Vergilər Nazirliyinin baş idarəsi rəisinin
birinci müavini vəzifəsində
çalışmışdır. Əmək fəaliyyətində
əldə etdiyi nailiyyətlər ölkə rəhbərliyi
tərəfindən də qiymətləndirilmişdir. Belə
ki, N.Qasımov ulu öndərimiz Heydər Əliyevin 17 yanvar
2002-ci il tarixli sərəncamı ilə vergilər nazirinin
müavini vəzifəsinə təyin edilmişdir.
Azərbaycan
Respublikasının Prezidenti İlham Əliyevin 9 fevral 2005-ci
il tarixli sərəncamı ilə N.Qasımova 3-cü dərəcəli
dövlət vergi xidməti müşaviri xüsusi rütbəsi
verilmişdir.
N.Qasımov vergi sistemində
Azərbaycan təcrübəsinin öyrənilməsi və
təbliği sahəsində fəal iştirak edir. Ümummilli
liderimiz Heydər Əliyev tərəfindən müəyyənləşdirilən
və inkişafımızın müasir mərhələsində
Azərbaycan Prezidenti cənab İlham Əliyev tərəfindən
uğurla həyata keçirilən sosial-iqtisadi inkişaf
siyasətinin fəal təbliğatçısı və tədqiqatçısı
kimi onun səmərəli fəaliyyəti də təqdirəlayiqdir.
O, 100-dən çox elmi-praktiki əsərin müəllifidir
və onlardan 45-i müxtəlif ölkələrdə
çap olunmuş monoqrafiya, kitablar və məqalələrdir.
Müəllifi olduğu
“Azərbaycanın sosial-iqtisadi inkişafında islahatların
rolu”, “İpək yolu bəşəriyyətin tərəqqi
yoludur”, “Ərzaq təhlükəsizliyi problemləri”, “Azərbaycanın
sosial inkişafında islahatların rolu”, “Azərbaycanda bazar
münasibətləri şəraitində sosial problemlər”,
“Heydər Əliyev və sosial-iqtisadi islahatlar”, “Azərbaycanda
bazar iqtisadiyyatına keçid şəraitində vergi
sistemi”, “Vergi sisteminin təkmilləşdirilməsi davamlı
prosesdir”, “Azərbaycan Respublikasının vergi sisteminin
inkişaf problemləri”, “Vergi siyasətinin beynəlxalq
standartlar səviyyəsinə qaldırılması dahi
öndərimiz Heydər Əliyevin xidmətidir”, “Heydər Əliyevin
vergi konsepsiyası və onun psixoloji əsasları”,
“Müasir vergi sisteminin formalaşdırılmasında Heydər
Əliyevin rolu əvəzedilməzdir”, “Azərbaycan və
dünya: iqtisadi inteqrasiya məsələləri”, “Milli
iqtisadi modeldə vergi sisteminin formalaşması və onun
inkişaf strategiyası”, “Azərbaycan beynəlxalq sistemə
sıx inteqrasiya edir”, “Müasir iqtisadi şərait yeni
yanaşma tələb edir”, “Ölkənin iqtisadiyyatı
inkişaf etdikcə vergi islahatları da davam etdiriləcək”,
“Beynəlxalq təcrübəyə əsaslanan milli vergi
sistemi təkmilləşdirilməkdədir” və s. kimi ciddi
tədqiqat əsərləri ictimaiyyət tərəfindən
maraqla qarşılanmışdır. Bu yaxınlarda dərc
olunmuş vergilərə dair son dövrlərin dəyərli
əsərlərindən olan “Vergilər Nazirliyi — 10 il”
kitabının işıq üzü görməsində də
Natiq Qasımovun təşəbbüsü və böyük
əməyi olmuşdur.
Respublikanın
tanınmış iqtisadçılarından olan professor Natiq
Qasımov, ümumiyyətlə, son on beş il ərzindəki
fəaliyyətini bütünlüklə Heydər Əliyev
modelinin ayrı-ayrı elementlərinin tədqiqinə həsr
edən, bu mövzuda ardıcıl olaraq müxtəlif beynəlxalq
səviyyəli elmi-praktiki konfrans, simpozium, seminarlarda və nəşrlərdə
çıxışlar edən tədqiqatçılarımızdandır.
O, bilavasitə respublikada bir neçə konfrans və
seminarın təşkilatçısı olub.
N.Qasımov həm
respublikada, həm də MDB və Avropa dövlətlərində
keçirilən beynəlxalq məclislərdə Azərbaycan
iqtisadiyyatının inkişafı, vergi sistemində həyata
keçirilən islahatların tətbiqi haqqında
çıxışlar etmişdir.
Mərhum atası Əbülfəz
(Bərəkət) Qasımovun müəllifliyi ilə 2009-cu
ildə dərc olunmuş “Yeni əsrin yeni lideri”
kitabının məsləhətçisi olan N.Qasımov
ümummilli lider Heydər Əliyevin və onun layiqli
davamçısı, möhtərəm Prezident İlham Əliyev
barədə yazdıqlarını daim örnək gətirir.
Qeyd edək ki, bu dəyərli kitab böyük oxucu kütləsi
toplamışdır.
Natiq müəllim
müdrik, özündən çox başqaları
haqqında düşünən, mərd, səbirli,
intizamlı, öz üzərində müntəzəm
çalışan ziyalı kimi daima yeniliyə, həyatın
tələbatına uyğun meyl göstərən, həmişə
mütaliə edən iqtisadçıdır. O, öz təvəzökarlığı,
müsbət əxlaqi keyfiyyətləri və elmi-praktiki
biliyi ilə iqtisadçılar ordusu arasında layiqli yerini
daim tutmaqdadır.
Son dərəcə səmimi,
mehriban və eyni zamanda tələbkar olaraq heç kimdən
köməyini əsirgəməyən qayğıkeş dost
Natiq müəllimin 50 illik yubileyi ərəfəsində onu
ürəkdən təbrik edir, uzun ömür, həyatda ən
şirin nemət olan cansağlığı, şəxsi həyatda
səadət diləyirik!
Asəf NADİROV,
akademik
Ziyad SƏMƏDZADƏ,
akademik
Xalq qəzeti.- 2010.- 10 mart.- S. 6.