160 saylı klassik gimnaziyada bayram sevinci

Pərdə açılar-açılmaz əlində bir səbət alma ilə səhnəyə daxil olan balaca Əlinin şirin səsi zal boyu yayıldı –

Qəbələdən alma var,

Qızıləhmədi adlanır.

Üstünə səpdim saman,

Ah, ətirlidir, yaman.

Baharın ilıq nəfəsi təbiəti oyatdığı kimi, artıq insanların da çöhrəsində, ovqatında yaz sevinci duyulur. Bakının Səbail rayonunda yerləşən 160 saylı klassik gimnaziyanın II a sinif şagirdləri bu yazı-bahar bayramını müəllimələri Ulduz Ocaqovanın köməkliyi ilə hazırladıqları kiçik tamaşa ilə qarşılayırdılar. Daha doğrusu, bayram sevinclərini məktəbin müəllim-şagird kollektivi ilə bölüşmək fürsəti əldə etmişdilər. Yazıçı Solmaz Amanovanın “Turacın nağılı” əsəri əsasında hazırlanan bu tamaşada balaca Əli Ömərovun payına şən nəğmə oxumaq, gözəl rəqs etmək düşmüşdü. Yaşıdları Jalə Hüseynova – Turac, Sürəyya Abbasova – Xanım kimi obrazlarla əsərin qəhrəmanları idilər.

Bakı Baş Təhsil İdarəsinin Səbail, Qaradağ və Yasamal rayonları üzrə metodisti vəzifəsində çalışan Solmaz Amanova uşaq psixologiyasını gözəl bildiyindən uşaqların dilində danışmağı, yazmağı ustalıqla bacarır. Bu, həm də onun sənətinə olan sevgisindən doğan duyğularıdır.

Məktəbin akt zalında keçirilən Yaz bayramı şənliyi – “Turacın nağılı” tamaşası balaca “aktyorlar”ın könüldoyuran, qəlbsevindirən, şirin-şəkər danışıqları ilə zövq oxşasa da, gözəl səhnə dekorasiyası, tərtibat ustalığı da öz işini görmüşdü. Tamaşaya uyğunlaşdırılaraq səhnədə quraşdırılan avadanlıq – tonqal üçün çatılmış çır-çırpı, nənənin sehrli sandığı, milli ornamentlərlə bəzədilmiş pərdələr, naxışlı xalı-xalçalar, qədim qab-qacaqlar, ən başlıcası isə noğul-badamla, paxlava-şəkərbura, şirniyyatla dolu xonçalar olduqca gözəl görünürdü. Uşaqların üz-gözlərindəki sevincdən hiss olunurdu ki, əsil Novruz bayramı sanki ilk görüşlərini 160 saylı məktəbdən – elə o, şənlikdən başlayırdı.

Tamaşanın hazırlanmasında Bülbül adına orta ixtisas məktəbinin, Kamera Teatrının əməkdaşları da öz köməkliyini əsirgəməmişdilər.

Tədbirdə məktəbin direktoru, respublikanın tanınmış pedaqoqu Faina Ələkbərova, Səbail Rayon İcra Hakimiyyəti Aparatından və Bakı Baş Təhsil İdarəsindən nümayəndələr də iştirak edirdilər.

Bayram şənliyinin sonunda fidan balalara – tamaşa qəhrəmanlarına gül-çiçək buketləri təqdim olundu. Onların sevinci-şən təbəssümləri dünyaya dəyəsi anlar idi.

A.ÜLVİ

Xalq qəzeti.- 2010.- 12 mart.- S. 5.