Azərbaycanın müasir sığorta – pensiya sistemi beynəlxalq mükafata layiq görülüb

DSMF - in ictimaiyyətlə əlaqələr sektorundan redaksiyaya daxil olan məlumatda bildirilir ki, Azərbaycan Respublikasında qurulan müasir sığorta-pensiya sistemi növbəti beynəlxalq uğura imza atıb.

Qeyd olunur ki, Dövlət Sosial Müdafiə Fondu Beynəlxalq Sosial Təminat Assosiasiyasının (BSTA) Avropa müsabiqəsində “İnformasiya kommunikasiya texnologiyalarının tətbiq olunması vasitəsilə effektiv idarəetmə” nominasiyasında müsabiqənin qalibi elan olunaraq, fəxri fərmanla təltif edilmişdir.

Mükafat martın 3-dən 5-nə qədər Varşava şəhərində keçirilən Avropa Forumunda Dövlət Sosial Müdafiə Fonduna təqdim olunmuşdur. Fəxri Fərmanı təqdim edən BSTA-nın prezidenti xanım Korazon de La Paz və qurumun baş katibi Hans Host Konkalevski DSMF- in informasiya kommunikasiya texnologiyalarının tətbiqi ilə səmərəli idarəetmə sahəsindəki fəaliyyətini qeyd etmişlər: “Biz ümid edirik ki, bu nailiyyət Avropanın sosial təminat təşkilatlarının rəhbərlərini daha da ruhlandıracaqdır”.

Məlumatda xüsusi olaraq vurğulanır ki, sosial təminat sahəsində mühüm tədbir olan Avropa Forumunda Azərbaycanın ali mükafata layiq görülməsi ölkəmizdə pensiya islahatlarının uğurla gercəkləşdiriməsinin əyani göstəricisidir. “Əsası ümummilli lider Heydər Əliyev tərəfindən qoyulan və Azərbaycan Prezidenti İlham Əliyevin rəhbərliyi ilə davam etdirilən məqsədyönlü islahatlar nəticəsində aztəminatlı əhalinin sosial müdafiəsi sahəsində qurulan yeni sistem pensiyaçılar və sığortaolunanlar haqqında avtomatlaşdırılmış müfəssəl məlumatların toplanmasına və idarə olunmasına istiqamətlənmişdir.

Hazırda Fondun mərkəzi məlumat bazasında ölkə əhalisinin üçdə biri, yəni 1 308 432 nəfər pensiyaçı və 1 milyon 640 min nəfər sığortaolunan barədə müvafiq məlumatlar toplanmışdır. Fondun yerli şöbələrində müasir kompyuter sistemləri qurulub, “1 işçiyə-1 kompyuter” prinsipi gerçəkləşmişdir”.

Məlumatda daha sonra bildirilir ki, pensiya və müavinətlərin əhaliyə çatdırılması sahəsində bank infrastrukturundan və elektron hökumət prinsiplərindən səmərəli istifadə olunmuşdur. Azərbaycanda pensiyaların 97,4 faizinin ödənişi plastik kartlarla həyata keçirilir ki, bu da ödəniş sahəsində dünyada ən şəffaf praktika hesab olunur.

Hazırda pensiyaların təyinatının avtomatlaşdırılması sahəsində işlər yekunlaşmaqdadır. Qeyd etmək yerinə düşər ki, bu prosesin başa çatdırılması ilə şəffaf sığorta-pensiya sisteminin fəaliyyəti tam təmin olunacaqdır.

Z.BƏŞİRQIZI

Xalq qəzeti.- 2010.- 14 mart.- S. 3.