“Peşə təhsili və təlimi sahəsində islahatlar strategiyası” layihəsi müzakirə olunub
Avropa İttifaqının maliyyə dəstəyi ilə
Britaniya Şurası və Təhsil Nazirliyinin birgə təşkil
etdiyi “Peşə təhsili və təlimi sahəsində
islahatlar strategiyası” layihəsinin İdarəetmə Komitəsinin
iclası keçirilib. Bu barədə nazirliyin mətbuat xidməti
məlumat yayıb.
İclasda layihənin
icrası haqqında üçüncü hesabat dinlənilib,
ötən 6 ayda layihə üzrə həyata
keçirilmiş işlər və növbəti 6 ay ərzində
planlaşdırılmış tədbirlər müzakirə
edilib.
İclas
iştirakçılarını salamlayan təhsil naziri Misir
Mərdanov Britaniya Şurası tərəfindən Təhsil
Nazirliyi ilə birgə həyata keçirilən “Peşə
təhsili və təlimi sahəsində islahatlar
strategiyası” layihəsinin məqsədləri barədə
məlumat verib. Birgə əməkdaşlıq nəticəsində
İsmayıllı rayonunda Turizm Peşə Təhsili
Kompleksinin yaradılması istiqamətində görülən
işlərdən söz açan nazir layihənin uğurla
icra edilməsi üçün yaradılmış İdarəetmə
Komitəsində Təhsil Nazirliyi, İqtisadi İnkişaf
Nazirliyi, Mədəniyyət və Turizm Nazirliyi, Əmək və
Əhalinin Sosial Müdafiəsi Nazirliyi, İsmayıllı
rayon İcra Hakimiyyəti, Avropa Komissiyasının Nümayəndəliyi,
Azərbaycan Respublikası Sahibkarlar (İşəgötürənlər)
Təşkilatları Milli Konfederasiyası və İqtisadi
İslahatlar Elmi Tədqiqat Mərkəzi nümayəndələrinin
təmsil olunduğunu nəzərə çatdırıb.
“Peşə təhsili və
təlimi sahəsində islahatlar strategiyası” layihəsinin əsas
məqsədinin Azərbaycanda qeyri-neft sektorunun inkişafı
olduğunu bildirən əməliyyatlar üzrə rəhbər
Jan Lui Lavroff gələcəkdə digər layihələrin
reallaşdırılmasının da nəzərdə
tutulduğunu qeyd edib.
“Peşə təhsili və
təlimi sahəsində islahatlar strategiyası” layihəsinin
rəhbəri Ann Castis layihə üzrə əldə
edilmiş nailiyyətlər və qarşıda duran vəzifələr
barədə təqdimat-məruzə edib. Pilot məktəbin
işçi heyətinə və rəhbərliyinə bilik və
bacarıqların inkişafı üzrə müvafiq təlimlərin
keçiləcəyini bildirən qonaq məktəbə Turizm
İnstitutu və Mingəçevir Turizm Kollecindən kadrlar cəlb
etməyin məqsədəuyğun olduğunu
vurğulayıb.
Təhsil Nazirliyi Texniki
peşə təhsili şöbəsinin müdiri Namiq Məmmədov
İsmayıllı Turizm Peşə Təhsili Kompleksinin
tikintisinin başa çatmaq üzrə olduğunu və
müvafiq avadanlıqların yaxın gələcəkdə
tədris ocağına veriləcəyini bildirib. Şöbə
müdiri qeyd edib ki, pilot məktəbdə müəllimlərin
bilik və bacarıqlarının qiymətləndirməsi
aparılıb və müvafiq hesabat hazırlanıb.
Azərbaycan texniki
peşə təhsilinin gələcəyi üçün
böyük əhəmiyyət kəsb edən bu pilot məktəbin
fəaliyyətinin düzgün qurulmasının vacibliyini
önə çəkən təhsil naziri işçilərin
və müasir idarəetmə qabiliyyətinə malik rəhbərliyin
seçiminin əhəmiyyətini qeyd edib. Texniki peşə
təhsilinin inkişafı məsələlərinin Azərbaycan
Prezidentinin daim diqqət mərkəzində olduğunu
vurğulayan nazir son illər bu sahədə bir sıra
uğurların qazanıldığını bildirib. Nazir
layihə üzrə hesabatın qəbul olunduğunu nəzərə
çatdırıb və qarşılıqlı əməkdaşlığın
gələcəkdə daha yaxşı nəticələr verəcəyinə
əminliyini ifadə edib.
M.MÜKƏRRƏMOĞLU
Xalq qəzeti.- 2010.- 2 may.- S. 8.