Ulu öndərin ad gününə həsr edilmiş konfrans

Azərbaycan Texniki Universitetində ulu öndər Heydər Əliyevin ad gününə həsr olunmuş tələbə elmi-texniki konfransı keçirildi. Konfransı giriş sözü ilə açan Azərbaycan Texniki Universitetinin rektoru, texnika elmləri doktoru, professor Havar Məmmədov bildirdi ki, gənclərin bu konfransının ulu öndərin ad günü ərəfəsində keçirilməsi təsadüfi deyil. Ulu öndər Azərbaycan gənclərinin böyük himayədarı idi və bu böyük tarixi şəxsiyyət gəncləri Azərbaycanın gələcək qurucuları adlandırırdı.

Havar müəllim öz çıxışında Heydər Əliyevin həyatının mühüm məqamlarına diqqəti yönəltdi. O, bildirdi ki, ümummilli lider Heydər Əliyev dünyanın tanınmış şəxsiyyətləri içərisində sayılan, seçilən, xüsusi yeri olan, xalqını böyük xalqların, dövlətini böyük dövlətlərin cərgəsinə çıxaran müdrik dövlət xadimi idi. O, ölkə həyatının bütün sahələrində quruculuğun, islahatların banisi olmuşdur. İqtisadiyyatımızın yenidən qurulması, kənd təsərrüfatının dirçəldilməsi, peşəkar ordunun yaranması, səhiyyə, elm, təhsil, mədəniyyət, incəsənət sahələrinin tərəqqisi, hüquqi dövlət quruculuğu onun adı ilə bağlıdır. Natiq vurğuladı ki, hakimiyyətdə olduğu illərdə xalqımız üçün gördüyü titanik işlərin ayrı-ayrılıqda hamısını sadalamaq qeyri-mümkündür. Ulu öndər əzmkar, mətanətli, uzaqgörən lider olmuş, xalqın qəlbində özünə əbədi abidə ucaltmışdır.

Ulu öndərin işıqlı dühası Azərbaycanı hələ sovetlər dövründə qabaqcıl respublikalar sırasına çıxardı. O dövrdə Azərbaycanda 250-dən çox zavod, fabrik, istehsal sexləri, iri qəsəbələr, mikrorayonlar, mehmanxanalar, metro stansiyaları və toxuculuq kombinatları tikilib istifadəyə verildi. İqtisadiyatımızın yüksəlməsi ilə yanaşı, təhsilimizin də inkişafında yeni dövr başlandı. Hələ sovetlər dövründə Azərbaycanın gələcək müstəqilliyini düşünən uzaqgörən lider gənclərimizin SSRİ-nin nüfuzlu ali təhsil müəssisələrində oxumaları üçün şərait yaratdı. O dövrdə Moskvanın, Sankt-Peterburqun və digər şəhərlərin ali təhsil ocaqlarında yüksək ixtisaslı kadr kimi yetişən gənclərimiz bu gün müstəqil Azərbaycanımızın qüdrətlənməsinə xidmət göstərirlər.

Natiq sözünə davam edərək belə bir fakta diqqət yönəltdi. O, bildirdi ki, 1970—1980-ci illərdə Azərbaycan ali təhsil müəssisələrinin sayı 1960-cı illə müqayisədə 12-dən 17-yə, təhsil alanların sayı 70 mindən 100 minə çatmışdır. Bu illər ümumiyyətlə, təhsilimizin inkişafı üçün əhəmiyyətli bir dövr olmuşdur. Biz bunu minnətdarlıq hissi ilə xatırlayırıq. Bu nailiyyətlərdən biri də Azərbaycan Texniki Universiteti ilə bağlıdır. Heydər Əliyevin həm sovetlər dönəmində, həm də müstəqillik illərində rəhbərlikdə olduğu dövrdə universitetimizin maddi-texniki bazası möhkəmlənmiş, yeni laboratoriyalar yaradılmış, müasir tələblər səviyyəsinə çatdırılmışdır.

Bu gün gənclərin konfransıdır. Ulu öndər gənclərin yaxın dostu, onların əsl himayədarı idi. Heç təsadüfi deyil ki, 29 iyul 1999-cu ildə Heydər Əliyev “Dövlət gənclər siyasəti haqqında” fərman imzalamışdır. “Azərbaycan Respublikasında dövlət gənclər siyasətinin həyata keçirilməsi ilə bağlı tədbirlər planı” da təsdiq olunmuşdur. 2 fevralın Azərbaycanda Gənclər Günü elan edilməsi də ulu öndərin adı ilə bağlıdır. Gənclərin təhsili, yüksək vətənpərvərlik ruhunda tərbiyəsi isə ulu öndərin həmişə diqqət mərkəzində olmuşdur.

Bu gün Heydər Əliyevin uzaqgörən müdrik siyasəti cənab Prezidentimiz İlham Əliyev tərəfindən ləyaqətlə davam etdirilir. Gənclərə göstərilən qayğı ildən-ilə artır, istedadlı gənclər Prezident təqaüdü alır, tələbə gənclərin təhsil alması, onların sosial vəziyyətinin yaxşılaşdırılması üçün mühüm tədbirlər həyata keçirilir. Cənab Prezident Azərbaycan gənclərinin xaricdə təhsil almaları üçün xüsusi sərəncam imzalamışdır. Ali təhsilin ölkədə inkişafını təmin etmək üçün Dövlət Proqramı qəbul olunmuşdur. Bütün bunlar ulu öndərin ölməz ideyalarının real nəticələridir.

Havar müəllim tələbə gənclərin Azərbaycan xalqının ümummilli lideri Heydər Əliyevin anadan olmasının 87 illiyinə həsr olunmuş 53-cü tələbə elmi-texniki konfransının işinə uğurlar arzuladı.

Sonra universitetin dosenti S.Qasımovun elmi rəhbərliyi ilə tələbə İsgəndər Cəfərlinin hazırladığı “Heydər Əliyevin Azərbaycanda təhsilin və dilin inkişafına qayğısı”, dosent A.Ş.Süleymanovun elmi rəhbərliyi ilə tələbələrdən Tural Əkbərli və Nigar Nazirovanın hazırladıqları “Universitet portalının proqram və informasiya resurslarının yaradılması” mövzusunda məruzələr dinlənildi.

Konfrans öz işini ayrı-ayrı bölmələrdə davam etdirdi. “Avtomatika və kompyuter texnikası”, “Radiotexnika və rabitə”, “Elektronika və energetika”, “Metallurgiya”, “Texnoloji maşınlar”, “Nəqliyyat”, “Maşınqayırma”, “Mühəndis biznesi və menecment”, “Təbiət və fundamental elmlər”, “Dillər” və “İctimai elmlər” bölmələri üzrə iclaslar davam etdiriləcək.

Konfransda Milli Məclisin deputatı Fuad Muradov, AMEA- nın birinci vitse-prezidenti Arif Haşımov çıxış etdilər.

M.MÜKƏRRƏMOĞLU

Xalq qəzeti.- 2010.- 6 may.- S. 4.