Təhsildəki uğurlar dövlətimizin bu sahəyə qayğısının nəticəsidir

Son illər respublikamızda iqtisadi sahədə olduğu kimi, sosial sistemdə, o cümlədən də təhsildə mühüm uğurlar əldə edilmişdir. Müasir dünya təcrübəsi əsas tutulmaqla ümumi təhsilin yeni konsepsiyasının işlənib hazırlanması, məqsəd və vəzifələrin yeni təfəkkür baxımından formalaşdırılması, fənlərin məzmununun konseptual müddəalarının müəyyənləşdirilməsi, fənn kurikulumlarının yaranması və s. bunun bariz ifadəsidir.

Hazırda ölkəmizdə bütün şagirdlərin təxminən 50 faizi müasir tələblərə cavab verən təhsil ocaqlarında oxuyur. Bu sahədə Heydər Əliyev Fondunun, şəxsən onun prezidenti Mehriban xanım Əliyevanın xidmətləri göz önündədir. Bununla əlaqədar diqqəti bir fakta yönəltmək istərdim. Heydər Əliyev Fondunun təşəbbüsü ilə reallaşdırılan "Yeniləşən Azərbaycana yeni məktəb" və "Uşaq evləri və internat məktəbləri" proqramları çərçivəsində son illərdə 226 yeni məktəb tikilmiş, 39 məktəb, 10 uşaq bağçası əsaslı təmir olunmuşdur.

Ümumtəhsil məktəblərinin müasir avadanlıqlarla təmin edilməsi, kompyuterlə təchizatı sahəsində də xeyli iş görülmüş, elektron təlim materiallarından istifadəyə xüsusi diqqət yetirilmişdir.

Məktəbimizdə təlimin təşkilində şagirdlərin potensial imkanları nəzərə alınır, təlimin diferensial xarakterinin təmin edilməsinə, tədris ocağında şagirdə yaşından asılı olmayaraq bir şəxsiyyət, təhsil prosesinin səmimi və səmərəli "müəllim-şagird" əməkdaşlığı formasında qəbul olunmasına xüsusi diqqət yetirilir.

İstedadlı şagirdlərin üzə çıxarılması və onlarla məqsədyönlü iş aparılması üçün tədbirlərin keçirilməsinə də mühüm əhəmiyyət verilir. İnşa yazı müsabiqələri, fənn olimpiadaları şagirdlərin təhsilə bağlılığını daha da artırır, onların yüksək səviyyədə bilik nümayiş etdirmələrini şərtləndirir.

Lakin təəssüflə xatırlatmalıyam ki, bəzi müxalifət mətbuatında təhsil sistemində əldə edilən uğurlara kölgə salmağa cəhd göstərilən yazılar verilir. Bu yazılarda elə təsəvvür yaradılır ki, guya təhsil sistemimiz acınacaqlı vəziyyətdədir, şagirdlər məktəbə getmir, müəllimlər isə dərs keçmirlər... Əslində, təkrar edirəm, bu, inkişafımızı, təhsildəki uğurları görməyən, daha doğrusu, görmək istəməyən şəxslərin qərəzindən başqa bir şey deyil.

Azərbaycanın təhsil sistemində özünü büruzə verən davamlı inkişafı bizim məktəbin timsalında da görmək olar... 2008-2009-cu dərs ilində məktəbimizin məzunlarının 50 faizi tələbə adını qazanmışdır.

Qazandığımız bütün uğurlara görə şagirdlərimizə minnətdarıq. Çünki onlara verdiyimiz biliklər nəticəsiz qalmayıb. Bu gün dərs dediyimiz şagird 675 bal toplayırsa, bizim sevincimizin həddi-hüdudu yoxdur. Hazırda yüzlərlə şagirdimiz müstəqil dövlətimizin tərəqqisi naminə müxtəlif təhsil ocaqlarında, idarə və müəssisələrdə çalışır. Bu gün onlardan bizimlə çiyin-çiyinə işləyənlər də var və biz onlarla qarşılaşanda qürur hissi keçiririk.

Müəllimlərimizin nailiyyəti də bizi fərəhləndirir. İbtidai sinif müəllimi Sevil Quliyevanın "Ən yaxşı müəllim" adı qazanaraq ilin müəllimi müsabiqəsinin qalibi olması sözün həqiqi mənasında təkcə onun deyil, eləcə də məktəbimizin mükafatıdır.

Möhtərəm Prezidentimizin idmana göstərdiyi böyük diqqət bizi də bu sahədə gücümüzü səfərbər etməyə ruhlandırır. Bu da nəticəsiz qalmır. Belə ki, şagirdlərimizdən Röyal Abbasov, Niyaməddin Əlizadə İranda keçirilən karate üzrə beynəlxalq yarışlardan medalla qayıtmışlar. Elçin Eminov İtaliyada keçirilən beynəlxalq "Kinq-Boksinq" yarışında I yeri tutmuşdur.

Bütün bu uğurlar hörmətli Prezidentimiz cənab İlham Əliyevin idmana qayğısının məntiqi nəticəsidir ki, biz müəllimlər bundan qürur duyuruq.

Ramazan VƏLİYEV,

Binəqədi rayonundakı 179

nömrəli orta məktəbin Azərbaycan dili

və ədəbiyyatı müəllimi

Xalq qəzeti.- 2010.- 20 may.- S. 6.