Gədəbəy: dağlar
yurdunun yeni növrağı
Göyün üzünü bir
anda qara bulud aldı. Sıra ilə düzülmüş
dağların başında şimşək çaxdı.
Rayon icra hakimiyyətinin ictimai-siyasi şöbəsinin
müdiri Ləzgi Zeynalov əlini gözünün
üstünə qoyub "yenə yağacaq", - dedi.
Gədəbəyin təbiəti
elədir ki, yağışın, qarın, çovğunun,
sel-suyun nə vaxt gələcəyini bilmək olmur. Dəxli
yoxdur, hansı fəsil olursa-olsun. Bu ayın əvvəllərində
çöl-biyaban bir neçə saatın ərzində
ağ örpəyə büründü. May ayında
qarın yağması nadir hadisə olsa da, gədəbəylilər
artıq təbiətin şıltaqlığına bir
növ adət ediblər. Ona görə də
hazırlıqlarını bəri başdan görürlər.
Daha əvvəlki illərdə olduğu kimi, ciddi problemlərlə
üzləşmirlər. Yeni çəkilən yollar,
salınan körpülər, elektrik şəbəkələrinin
yenidən qurulması, digər qabaqlayıcı tədbirlər
nəticəsində təbiətin
şıltaqlığı adamların normal fəaliyyətinə,
yaşayış tərzinə bir o qədər də təsir
göstərmir.
"Azərbaycan
Respublikası regionlarının 2009-2013-cü illərdə
sosial-iqtisadii inkişafı Dövlət Proqramı"nın
yerinə yetirilməsinin gedişi ilə yaxından
tanış olarkən öyrəndik ki, rayonun elektrik şəbəkələrinin
yenidən qurulması və hava elektrik verilişi xətlərinin
özünüdaşıyan izolyasiyalı naqillərlə əvəz
olunması ilə bağlı proqrama daxil olmuş bəndin
artıq icrasına başlanmışdır. Digər bir tədbir
- yerli əhəmiyyətli yollarda yerləşən
körpülərin əsaslı təmiri və yeni
körpülərin də tikintisi gedir. Proqramda nəzərdə
tutulan Gədəbəy şəhərinin su təchizatının
yenidən qurulması və kanalizasiya sisteminin
yaradılması, rayonda sel sularından mühafizə tədbirlərinin
həyata keçirilməsi, mərkəzi və kənd ATS-lərin
rekonstruksiya edilməsi, mədəniyyət obyektlərinin təmiri,
tarix-mədəniyyət abidələrinin bərpası və
konservasiyası işlərinə artıq
başlanılmışdır. Bu işlərə rayon icra
hakimiyyəti, digər əlaqədar nazirlik və şirkətlər
ciddi nəzarət edir.
Dövlət
proqramında Gədəbəy rayonu üzrə nəzərdə
tutulan tədbirlərin ardıcıl olaraq həyata
keçirilməsi onu göstərir ki, bu rayon tezliklə aqrar
sahədə daha böyük uğurlar əldə edəcəkdir.
Proqramda kənd təsərrüfatı məhsulları
istehsalçılarının müvafiq kənd təsərrüfatı
texnikalarına olan tələbatının ödənilməsi
nəzərdə tutulur. Keçən il və bu ilin ötən
ayları ərzində həmin sahə üzrə xeyli iş
görülmüşdür. "Aqrolizinq" ASC-nin Gədəbəy
filialı tərəfindən traktor, kombayn, müxtəlif
kotanlar, ot-küləş presləyən, gübrəsəpən
maşınlar və s. texnika gətirilmişdir.
Rayonun qaz, elektrik xətlərinin
çəkilməsi, yeni poçt binalarının, məktəb,
səhiyyə, mədəniyyət ocaqlarının tikintisi, təmiri
işi sürətlənib. Hazırda rayonun Novosaratovka, Qaraməmmədli,
Böyük Qaramurad və Ataxal kəndlərinin
qazlaşdırılması məqsədilə
Qaradağ-Novosaratovka magistral qaz kəmərinin çəkilişi
davam edir. Qeyd edək ki, hələlik rayon ərazisində 1
şəhər, 9 kənd olmaqla, cəmi 10 yaşayış
məntəqəsində əhali təbii qazla təmin olunur.
İndi sərhədyanı kəndlərin hamısına qaz
çəkilməsi nəzərdə tutulur. Azərbaycan
Respublikasının Prezidenti İlham Əliyevin hələ
2006-cı ilin noyabrın 1-də Gədəbəyə ilk səfəri
zamanı verdiyi göstərişə əsasən, həyata
keçirilən bu işlər rayon əhalisi tərəfindən
hədsiz sevinc və razılıq hissi ilə
qarşılanmışdır.
Yolların çəkilişinə,
təmirinə xüsusi fikir verilir. Çünki qış
aylarının xüsusilə soyuqlu-şaxtalı keçməsi,
yaz aylarında yağıntının çox olması nəticəsində
avtomobil yolları, rayondaxili və kəndarası yollar
sıradan çıxır, nəticədə gediş-gəliş
çətinləşir. Ölkə Prezidentinin göstərişi
əsasında Şəmkir-Gədəbəy magistral yolunun
yenidən çəkilişi bir çox problemləri aradan
qaldırmış, nəqliyyat vasitələrinin tez və
rahat hərəkətinə imkan yaratmışdır.
Daxili yolların da vəziyyəti
daim nəzarət altındadır. Vaxt var idi şəhərin
mərkəzindən, bazarın qarşısından keçmək
mümkün deyildi və çox vaxt burada, xüsusilə
bazar günlərində tıxaclar yaranırdı ki, bu da adamların
haqlı narazılığına səbəb olurdu. Bu
yaxınlarda rayon rəhbərliyinin təşəbbüsü
və köməyi ilə alternativ bir yolun çəkilişi
həmin problemi birdəfəlik aradan
qaldırmışdır. Qeyd etmək lazımdır ki, təkcə
bu ilin birinci rübü ərzində rayonun avtomobil yollarının
saxlanması və cari təmirinə 168 min manat vəsait xərclənmişdir.
Son 6 ildə Gədəbəydə
tikinti-quruculuq işləri geniş vüsət almış,
yeni-yeni məktəb binaları, mədəniyyət
ocaqları , xəstəxanalar tikilmiş, parklar
salınmışdır. Son illər müşahidə olunan
yüksəliş bu il də davam etdirilir. Sənaye
istehsalının həcmi çoxalır, yeni iş yerləri
yaradılır. Belə bir fakt diqqəti cəlb edir ki, cari
ilin birinci rübündə 24 milyon 324 min manat məhsul
buraxılmışdır ki, bu da ötən ilin müvafiq
dövrü ilə müqayisədə 840 min manatdan
çoxdur. Bir tərəfdən, son illər rayonda
yaradılmış sağlam mənəvi-psixoloji mühit,
digər tərəfdən, ölkə miqyasında bu ucqar
dağ rayonuna xüsusi diqqət və qayğı vəziyyəti
kökündən dəyişdirmişdir. Təbii ki,
inkişaf ölkə Prezidenti İlham Əliyevin Gədəbəyə
son üç ildə iki dəfə səfər etməsindən
sonra daha sürətlə gedir. Rayon icra hakimiyyətinin
başçısı Kamran Rzazadə bu barədə söhbət
edərkən dedi:
- Möhtərəm
Prezidentimizin bir il əvvəl, mayın 26-da ikinci dəfə
Gədəbəyə gəlişi əhali tərəfindən
yenə hədsiz sevinc hissi ilə
qarşılanmışdır. Ölkəmiz
üçün, o cümlədən, Gədəğəy
rayonu üçün xüsusi əhəmiyyət kəsb edən
Qızıl emalı zavodunun açılışında və
şəhərin Heydər Əliyev parkında Aşıq
musiqi məktəbi binasının təməlqoyma mərasimində
iştirak etməsi, dəyərli çıxışı və
tövsiyələri gədəbəylilərin gündəlik
fəaliyyət proqramına çevrilmişdir. Biz fəxr
edirik ki, indi ucqar dağ rayonunun adı onun hüdudlarından
çox-çox uzaqlarda çəkilir...
İcra hakimiyyəti
başçısının dediyi bu sözlərdə
böyük həqiqət var. Hazırda rayonda istehsal edilən
qızıl "Ayrum brendi" altında dünya bazarına
çıxarılır. Bununla yanaşı, rayonda
avtomatlaşdırılmış rejimdə işləyən,
dördnövbəli və gündəlik gücü 3 ton
konsentrans olan mis emalı zavodu da işə
düşmüşdür.
Bir tərəfdən,
qiymətli istehsalat sahələrinin işə düşməsi,
digər tərəfdən, əvəzolunmaz təbiəti
olan Gədəbəyə hədsiz marağın olması
yeni istirahət guşələrinin, otellərin, müalicə
ocaqlarının tikintisi şəbəkəsini də
genişləndirir. Bu gün, mayın 26-da Azərbaycan
Respublikasının Prezidenti İlham Əliyevin rayona gəlişinin
bir ili şərəfinə "Kiçik Qafqaz" istirahət
mərkəzi işə düşmüşdür. Biz həmin
guşəyə baş çəkdik. İstər xarici
görünüşü, həyət-bacası, istərsə
də daxilində yaradılmış şərait bizi heyran
etdi. Bir-birindən gözəl nömrələr, konfrans
zalı, restoranı, idman zalları olan mərkəz ən tələbkar
qonaqlarını belə qarşılamağa hazırdır.
Təhsil, səhiyyə,
mədəniyyət sahələrində baş verən dəyişikliklər
hamının diqqətini cəlb edir. Rayon təhsil
şöbəsinin müdiri Ramiz Məmmədov deyir:
- İnana bilməzdim
ki, qısa vaxt ərzində bizim belə gözəl, hər
cür şəraiti olan, müasir məktəblərimiz
olacaq. Adi bir fakt deyim. 2003-cü ilə kimi rayonda 1 ədəd
də kompyuter olmadığı halda, hazırda 400-ə
yaxın kompyuter var. Bu illərdə məktəblərə
3500-ə yaxın parta, 300-dən çox lövhə, 600-dən
artıq stol, 1400-ə yaxın stul, 400-dən çox rəf
verilmişdir. Məktəblərin hamısı pulsuz dərsliklərlə
təmin olunmuşdur. Kimin ağlına gələ bilərdi
ki, son 6 ildə rayonda 26 yeni məktəb binası tikilib
istifadəyə veriləcək. 44 məktəb binası əsaslı
təmir olunmuş, 60-dan artıq əlavə sinif otaqları
tikilmişdir. Təkcə ötən il dövlət
proqramı çərçivəsində 200 yerlik Dəyəqarabulaq,
220 yerlik Xarxar kənd orta, 180 yerlik Arısu kənd əsas məktəbi
inşa olunaraq şagirdlərin istifadəsinə
verilmişdir. Bundan başqa, Çalburun kənd orta, 2
saylı şəhər orta, Ərtəpə və Mormor kənd
məktəbləri əsaslı təmir edilmişdir. Nəzərə
çatdıraq ki, 20-25 il əvvəl rayonun 86 ümumtəhsil
məktəbinin yalnız 4-ü birtipli layihə əsasında
inşa olunmuşdu və qalanları
uyğunlaşdırılmış, həm də çoxu qəza
vəziyyətində olan binalarda yerləşirdi. İndi vəziyyət
müqayisəolunmaz dərəcədə dəyişib.
Bütün bunlar bizi hədsiz sevindirir.
Uzun illər təhsil
sahəsində çalışan Ramiz Məmmədov təbiətən
narahat adamdır. Məktəblərdə baş verən ən
adi nöqsana görə həyəcan keçirir, onun
qarşısını almağa çalışır, yeni
yollar axtarır, kollektivlərin köməyi ilə vəziyyəti
nizamlamağa səy göstərir.
- Rayon icra hakimiyyətinin
başçısı Kamran Rzazadənin, təhsil naziri Misir
Mərdanovun və digər səlahiyyətli şəxslərin
dayağı, dəstəyi olmasaydı, yəqin ki, ruhdan
düşərdik, - deyə təhsil şöbəsinin
müdiri problemləri də dilə gətirir. - Orta məktəbi
bitirib attestat alanların, ali məktəbə daxil
olanların faiz göstəriciləri bizi qane etmir. Bunun
başlıca səbəblərindən biri ayrı-ayrı
ixtisaslar üzrə müəllim kadrlarına olan
ehtiyacımızla bağlıdır. Bir çox məktəblərdə
çalışan müəllimlərin yaş həddi 70-i
keçib. Elə Söyüdlü məktəbi buna
misaldır. Bu kənddən bir nəfər də olsun ali məktəbə
qəbul olunan yoxdur. Ən çox coğrafiya, xarici dil,
riyaziyyat-informatika, kimya-biologiya müəllimlərinə
ehtiyac duyulur.
Yuxarıda şeyd etdik
ki, Gədəbəy məktəbləri 20-25 il əvvəlki
məktəblər deyil. İndi rayonun bir çox məktəblərində
yaradılmış şərait heç də Bakı, Gəncə,
Sumqayıt kimi iri şəhərlərin məktəblərindən
geri qalmır. Belə olan tərzdə əlaqədar təşkilatlar,
ilk növbədə, Təhsil Nazirliyi ayrı-ayrı
ixtisaslar üzrə gənc müəllim kadrlarının
rayona göndərilməsini təmin etmək barədə
konkret ölçü götürməlidir. Yaşlı
müəllimlərin də gənc kadrlarla əvəz
olunmasının vaxtı çatmışdır. Bundan
başqa, rayonun sərhəd bölgəsində
olmasını, dağlıq ərazisində yerləşməsini
nəzərə alaraq, gənc kadrlar üçün müəyyən
imtiyazlar tətbiq edilməsi və ya onların güzəştli
şərtlərlə təhsil almasına şərait
yaratmaq pis olmazdı.
Səhiyyə də əvvəlki
səhiyyə deyil. İndi akademik Zərifə Əliyeva
adına Mərkəzi Rayon Xəstəxanasının həndəvəri
saysız-hesabsız maşınlarla doludur. Daha rayon əhalisi
başqa şəhərlərə üz tutmur. Mərkəzi
xəstəxananın baş həkimi Ramiz Pirverdiyevin sevinci
yerə-göyə sığmır. Deyir ki, Gədəbəydə
yaradılan şərait bizi hamının yanında
başıuca edib. Nə desən varımızdır: dərman
preparatlarından tutmuş, ən müasir tibbi avadanlıqlara
kimi. Yadımdadır ki, ən adi xəstəliyin müayinəsi
üçün başqa şəhərlərə göndərişlər
verilirdi. Daha buna ehtiyac yoxdur. Hazırda əhalinin
sağlamlığı keşiyində 455 nəfər tibb
işçisi dayanır ki, onun da 90 nəfəri ali təhsilli
həkimdir. Rayonda 35 çarpayılıq uşaq xəstəxanası,
9 kənd sahə xəstəxanası, 9 həkim
ambulatoriyası, 49 feldşer-mama məntəqəsi, Gigiyena
Epidemiologiya Mərkəzi fəaliyyət göstərir. Bütövlükdə,
əhalinin hər min nəfərinə 9 həkim
düşür.
Keçən il Mərkəzi
Rayon Xəstəxanasında, Slavyanka, Rəsullu kənd sahə
xəstəxanalarında, Söyüdlü kənd həkim
ambulatoriyasında əsaslı təmir işləri
aparılmış, bu səhiyyə ocaqları ən
müasir tibbi avadanlıq ilə təchiz edilmişdir. Yeri gəlmişkən,
bu günlərdə istifadəyə verilən
Söyüdlü və Qaraməmmədli kəndlərindəki
tibb məntəqələri özünün xarici və
daxili görkəminə, yaradılmış şəraitinə
görə göz oxşayır.
Mədəniyyət
ocaqları da özlərinin, necə deyərlər,
"ikinci həyatı"nı yaşayır. Hazırda
rayonda 109 kitabxana, 28 mədəniyyət evi, 22 klub, 4 musiqi məktəbi,
1 tarix-diyarşünaslıq muzeyi fəaliyyət göstərir.
Maddi texniki baza əsaslı şəkildə möhkəmləndirilmişdir.
Son 6 ildə rayonda 15 mədəniyyət
müəssisəsində təmir işləri, o cümlədən
7 mədəniyyət evi, 6 kitabxana, 1 klub, 1 muzey əsaslı
təmir olunmuşdur. Təkcə 2009-cu ildə dövlət
proqramı əsasında Slavyanka, Nərimankənd mədəniyyət
evləri əsaslı, rayon mədəniyyət evi, Əliismayıllı,
Samanlıq, Böyük Qaramurad kənd mədəniyyət
evləri, şəhər incəsənət məktəbi,
Slavyanka, Zəhmətkənd uşaq musiqi məktəbləri.
Slavyanka kənd kitabxanası cari təmir olunmuşdur. 2009-cu
ildə mədəniyyət müəssisələrinin əsaslı
və cari təmiri üçün 124 min 906 manat vəsait xərclənmişdir.
Təkcə, 2009-cu ildə
xüsusi evlərdə yerləşən 55 kitabxana ictimai
binalara köçürülmüşdür.
Milli mənəvi dəyərlərinin
qorunması, xalq yaradıcılığı nümunələrinin,
tarixi abidələrin mühafizəsi, təbliği, bədii
özfəaliyyətin inkişaf etdirilməsi, əhalinin asudə
vaxtının səmərəli keçirilməsi kimi aktual
məsələlər rayon mədəniyyət və turizm
sahəsində çalışan işçilərin
başlıca vəzifəsinə çevrilmişdir.
Gədəbəyin sərvəti
olan meşələrin qorunması işinə xüsusi fikir
verilir. Rayon Meşə Mühafizəsi İdarəsinin rəisi
Vasif Nəbiyev meşə zolaqlarının
salınmasında, meşələrin qorunmasında xüsusi
fəallıq göstərir. Maraqlı, həm də fərəhli
haldır ki, ucqar bir dağ rayonunun meşə təsərrüfatının
rəhbərinə Hacıqabul magistral yol kənarında, Gəncə
aeroportuna gedən yolun kənarlarında və digər yerlərdə
meşə zolağı salmaq kimi çətin işlər həvalə
olunur və o, bunların öhdəsindən şərəflə
gəlir. Gədəbəyin özündə isə bu işlər
çox sürətlə gedir, "Ekologiya ili" çərçivəsində
rayonda artıq 50 mindən çox ağac əkilib. İdarə
tərəfindən 30 hektar sahədə torpaq
hazırlığı işləri
görülmüşdür.
Rayonda imkansız ailələr,
qocalar, əlillər, kimsəsizlər, azsaylı xalqların
nümayəndələri daim qayğı ilə əhatə
olunurlar. Rusdilli əhali ilə tez-tez görüşlər
keçirilir, onların bayramlarında rayon rəhbərliyi və
ictimaiyyət yaxından iştirak edir. Azərbaycan
Respublikasının Prezidenti İlham Əliyevin və onun
xanımı Mehriban Əliyevanın Gədəbəydə
olarkən Slavyanka kəndində rus icmasının nümayəndələri
ilə görüşü hələ də yaddan
çıxmır və kənd əhalisinin böyük
razılığına səbəb olmuşdur.
İcra hakimiyyəti
başçısının, hüquq-mühafizə
orqanları, idarə, müəssisə rəhbərlərinin
yerlərdəki görüşləri ənənə şəklini
alıb. Ötən yazılarımızın birində qeyd
etmişdik ki, ən ucqar kənddə belə kiminsə evində
işıq olmayanda rayon icra hakimiyyəti aparatının ondan
xəbəri olur və həmin anda tədbir
görülür. Təkcə keçən il rayon icra
hakimiyyəti başçısı 61 səyyar qəbul
keçirib və bu qəbullarda 12 mindən çox adam
iştirak edib.
Gədəbəyin bu
günü gözəldir. Gələcəyi daha
işıqlı, nurludur. Vaxt gələcək ki, bu ucqar
dağ rayonunun sorağı bütün dünyaya
yayılacaq.
Hamlet QASIMOV,
"Xalq qəzeti"nin bölgə müxbiri
Xalq qəzeti.- 2010.- 26 may.- S. 6.