Masazır: görülmüş işlər sakinlərdə razılıq doğurur

Son illər regionların sosial-iqtisadi inkişafı dövlətimizin diqqət mərkəzindədir. Bu sahədə ardıcıl islahatlar aparılır, dövlət proqramları qəbul edilir, abadlıq və quruculuq tədbirləri geniş vüsət alır, yeni infrastruktur sahələrinin yaradılması və köhnələrinin müasirləşdirilməsi günümüzün reallığına çevrilir. Son nəticədə görülən işlər regionlarımızdakı şəhər, qəsəbə və kəndlərin simasını əhəmiyyətli dərəcədə dəyişdirir, əhalinin sabaha inamını artırır, eyni zamanda, insanların rahatlığının təmin olunmasına gətirib çıxarır.

Azərbaycanın çiçəklənən, sosial-iqtisadi cəhətdən ardıcıl inkişafda olan ölkəyə çevrilməsi ideyası əslində ümummilli lider Heydər Əliyevin Azərbaycana rəhbərlik etdiyi illərdən reallaşdırılmağa başlayıb. Sonrakı illərdə Prezident İlham Əliyev bu ideyanı dönmədən həyata keçirməkdədir. Hazırda istər paytaxt Bakı şəhərinin, istər rayon mərkəzlərinin, istərsə də qəsəbə və kəndlərin abadlaşdırılması və müasirləşdirilməsi bir vəzifə olaraq qarşıya qoyulmuşdur. Bu fikirləri Masazır bələdiyyəsinin sədri Siyənfər Əliyev söylədi.

Bələdiyyə sədrinin sözlərinə görə, Azərbaycan Prezidenti İlham Əliyev "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nı imzalamaqla bu və ya digər sahəyə rəhbərlik edən, cavabdehlik daşıyan hər kəsə görüləcək işlərin, aparılacaq islahatların konkret istiqamətlərini göstərmişdir. Bu ilin martında Dənizkənarı Milli Parkdakı Bakı Biznes Mərkəzində çıxışı zamanı möhtərəm Prezidentimiz vurğulamışdır ki, birinci dövlət proqramında olduğu kimi, yeni proqramda da sosial infrastruktun daha da inkişaf etdirilməsi, müasir tələblər səviyyəsində yenidən qurulması prioritet vəzifələrdəndir.

S.Əliyev sözünə davam edərək dedi:

- Biz də Abşeron rayonu ərazisindəki bələdiyyələrdən biri olaraq öz üzərimizə düşən vəzifələrəi layiqincə yerinə yetirməyə çalışır, ölkəmizin çiçəklənməsi işinə töhfələrimizi verməyi özümüzə borc bilirik. Bu yaxınlarda Masazır qəsəbəsinin abadlaşdırılması və müasirləşdirilməsi ilə bağlı müəyyən tədbirlər həyata keçirmişik. Artıq 5 kilometrə yaxın yolun genişləndirilərək asfalt döşənməsi işini uğurla başa çatdırmışıq. Köhnə yolun enini 3 metr genişləndirərək 10 metrə çatdırmış, bu yola 9 santimetr qalınlığında asfalt döşəmişik. 4 kilometrdən çox yolun kənarlarına bardürlər düzülmüş, yolun bir tərəfi boyunca piyadalar üçün səki düzəldilmişdir. Eyni zamanda, yolun ətraflarının müasir dünya standartlarına uyğun şəkildə qurulması işini həyata keçirərək yol kənarlarında 10 min ədəd müxtəlif növ ağac və bəzək kolları əkmişik.

Abadlıq işləri aparılmış yolun 3 kilometrdən çox hissəsinin hər iki tərəfinə Daşkəsən, Ağstafa, Xaçmaz, Siyəzən, Qəbələ, Qax və Şəki rayonlarından gətirilmiş çay və qaya daşları ilə bəzək vurulmuşdur. Abadlıq işlərinin tam bir panoram yaratması üçün yolların kənarlarındakı mağaza və obyektlər alkopan və üzlük daşlarla bəzədilmişdir. Bütün bunlarla bərabər, 95 elektrik dirəyi təmir olunaraq küçələrin işıqlandırılması təmin edilmişdir. Yol keçidlərində suların ötürülməsi məqsədilə drenajlar qurulmuşdur.

Bələdiyyə sədri bildirdi ki, qəsəbədə görülmüş abadlıq və quruculuq işləri bunlarla tamamlanmır. Son vaxtlar Heydər Əliyev Fondunun dəstəyi ilə yeni yaşayış massivində müasir standartlar səviyyəsində yeni məktəb binası, uşaq bağçası və stadion tikilərək istifadə verilmişdir. Bunlardan əlavə, son zamanlar Masazırda 1680 kilometrdən çox qaz xəttinin çəkilişi işinə başlanmışdır və bu işlərin ilin sonuna qədər başa çatdırılması nəzərdə tutulur.

Görülmüş bütün işlər rayonun daxili imkanları və Masazır bələdiyyəsinin vəsaiti hesabına həyata keçirilmişdir. Abşeron rayon rəhbərliyi, xüsusilə RİH başçısı Zakir Fərəcov bu tədbirlərin həyata keçirilməsi üçün əlindən gələni etmişdir. Masazır bələdiyyəsi bundan sonra da regionların sosial-iqtisadi inkişafı Dövlət Proqramı çərçivəsində öz töhfələrini verməkdə davam edəcək.

Masazır Abşeron rayonunun on beş yaşayış məntəqəsindən biri olsa da, buranı digərlərindən fərqləndirən xüsusiyyətlər var. Əsası da budur ki, Masazır ərazisindən hər gün xeyli insan keçir, bunların da çoxusu, qonşu yaşayış məntəqələrinin - Sumqayıt şəhərinin, Saray qəsəbəsinin və Novxanı kəndinin sakinləridir. Bir sözlə, Masazır ərazisindəki yeniliklər, hamının gözü qarşısındadır.

Dörd-beş il əvvəl Abşeron rayonunun kəndlərindən birinə yeni asfalt yol çəkilmişdi. Yaşı yüzü haqlamış bir ixtiyar təəccüb qarışıq sevincini və heyrətini gizlətməyərək bu yaşında kəndlərində asfalt yol gördüyünü bildirmişdi və o vaxt rayon İcra hakimiyyətinin başçısı kimi təzə fəaliyyətə başlayan, bu işin əsas təşəbbüskarlarından biri olan Zakir Fərəcova minnətdarlığını bildirmişdi. Masazırda da hamı inanır ki, çəkilən təzə yol da, görülmüş digər işlər də Masazırın daha gözəl günləri üçün zəmin yaradır.

Səməd HÜSEYNOĞLU,

"Xalq qəzeti"nin bölgə müxbiri

Xalq qəzeti.- 2010.- 26 may.- S. 6.