Ucarda bayram tədbiri

Respublika Günü münasibətilə keçirilən tədbirin iştirakçıları əvvəlcə Azərbaycan dövlətinin qurucusu, ulu öndər Heydər Əliyevin abidəsini ziyarət edib, gül-çiçək dəstələri qoydular.

Sonra icra hakimiyyətinin geniş iclas salonunda əlamətdar bayram münasibətilə təntənəli yığıncaq keçirildi.

Yığıncağı giriş sözü ilə açan Ucar Rayon İcra Hakimiyyətinin başçısı Yaşar Məmmədov bildirdi ki, Azərbaycan Xalq Cümhuriyyətinin yarandığı gün olan 28 May Azərbaycan xalqnın tarixində ən şərəfli və müqəddəs bir hadisə kimi daim xatırlanacaqdır.

Bildirdi ki, keçən əsrin əvvəllərində əldə olunan bu müstəqilliyi qoruyub saxlaya bilməsək də əsrin sonunda yenidən qazanılan azadlığı itirmək təhlükəsi ilə üzləşəndə məhz ulu öndər, ümummilli lider Heydər Əliyev xilaskarlıq missiyasını öz üzərinə götürdü. Daha sonra çıxış edənlər - şəhər 5 saylı orta məktəbin direktoru Hakim Nəcəfov, 4 saylı orta məktəbin tarix müəllimi Mübariz Qasımov, Yuxarı Şilyan kənd orta məktəbinin direktoru Cabir Hacıyev Azərbaycan xalqının keçdiyi şərəfli yoldan danışdılar.

28 May Respublika Gününün onun tarixində xüsusi yer tutduğunu bildirməklə, azadlıq mücadiləsində xidməti olan hər bir şəxsin rolunu qeyd etdilər. Daha sonra göstərdilər ki, əgər Heydər Əliyev xalqın təkidli tələbi ilə ikinci dəfə hakimiyyətə qayıtmasaydı bu gün Azərbaycanın müstəqilliyindən danışa bilməzdik. Bəli Heydər Əliyev qayıtdı və Azərbaycanı dağılmaq təhlükəsindən xilas etdi.

Xüsusi vurğulandı ki, bu gün Azərbaycan Xalq Cümhuriyyətinin varisi olan müstəqil Azərbaycan Respublikası gündən-günə inkişaf edir, yeni-yeni uğurlara imza atır.

Sonra rayon mədəniyyət evinin qarşısında böyük bayram konserti oldu.

İ.MUSAOĞLU

Xalq qəzeti.- 2010.- 28 may.- S. 7.