Masallıda yüksək bayram ovqatı

Ölkəmizin hər yerində olduğu kimi, Masallı rayonunda da 28 May - Respublika Günü böyük bayram ovqatı ilə qeyd edilib.

Bayram tədbirinin iştirakçıları öncə müstəqil Azərbaycan Respublikasının qurucusu və memarı, unudulmaz dahi şəxsiyyət Heydər Əliyevin adını daşıyan parkda ulu öndərin abidəsini ziyarət etdilər, önünə çiçək dəstələri düzdülər. Rayon ictimaiyyətinin nümayəndələri - hüquq-mühafizə orqanlarının, idarə və müəssisələrin, təhsil, səhiyyə və mədəniyyət ocaqlarının rəhbərləri ümummilli liderin ölməz xatirəsi önündə ehtiramla baş əydilər.

Masallı Rayon İcra Hakimiyyətinin başçısı Qəzənfər Ağayev bildirdi ki, 1918-ci ildə yaradılmış Azərbaycan Xalq Cümhuriyyətinin varisi olan müstəqil respublikamız məhz ulu öndərin idarəetmə bacarığı və uzaqgörən siyasəti sayəsində möhkəmlənmiş, dövlət müstəqilliyimiz əbədi, dönməz və sarsılmaz xarakter almışdır. Prezident İlham Əliyevin uğurlu daxili və xarici siyasəti ilə Azərbaycan regionun lider dövlətinə çevrilmişdir. Bütün bölgələrimiz, o cümlədən də Masallı rayonunun sürətli sosial-iqtisadi inkişafı təmin edilmişdir. Sonra Q.Ağayev gündəlik dövlət qayğısının nəticəsi olaraq rayonda həyata keçirilən mühüm layihələr barədə məlumat verdi, Respublika Günü münasibəti ilə ən xoş arzularını bildirdi.

Bayram tədbiri parkda maraqlı konsert proqramı ilə davam etdi. "Halay" folklor ansamblının, digər bədii özfəaliyyət kollektivlərinin üzvləri şən mahnıları, rəqsləri ilə tədbiri daha da rövnəqləndirdilər. İdmançıların nümunəvi çıxışları da maraqla izlənildi və alqışlandı.

Əli NƏCƏFXANLI

Xalq qəzeti.- 2010.- 28 may.- S. 7.