Lerikdə cari ilin doqquz ayında görülmüş işlər təhlil olunmuşdur

Lerik Rayon İcra Hakimiyyətinin şura iclasında Prezidenti İlham Əliyevin sədrliyi ilə Nazirlər Kabinetinin 2010-cu ilin doqquz ayının sosial-iqtisadi inkişafının yekunlarına həsr olunmuş iclasından irəli gələn vəzifələr və cari ilin yanvar-sentyabr aylarında rayonda görülmüş işlər, qarşıda duran vəzifələr müzakirə edilmişdir.

Tədbiri giriş sözü ilə Lerik Rayon İcra Hakimiyyətinin başçısı Rövşən Bağırov açaraq qeyd etmişdir ki, ümummilli liderimiz Heydər Əliyevin ideyaları əsasında müəyyənləşdirilmiş və Azərbaycan Respublikasının Prezidenti İlham Əliyev tərəfindən inamla həyata keçirilən sosial-iqtisadi kurs əvvəlki illərə xas olan ardıcıllıqla ölkə iqtisadiyyatının davamlı artımını təmin etməklə xalqımızın maddi rifahının yaxşılaşdırılmasını şərtləndirmişdir. Respublikamızdakı uğurlu iqtisadi islahatların Lerikin də sosial-iqtisadi inkişafına ciddi təsir göstərdiyini diqqətə çatdıran natiq rayonun simasının tanınmaz dərəcədə dəyişdiyini, bütün ərazilərdə abadlıq- quruculuq işlərinin vüsət aldığını və iqtisadiyyatın bütün sahələrində uğurlara imza atıldığını qeyd etmişdir.

Bütövlükdə isə 2010-cu ilin doqquz ayında rayonda görülmüş işlər və qarşıda duran vəzifələr Lerik Rayon İcra Hakimiyyəti başçısının sosial-iqtisadi məsələlər üzrə müavini Habil Məlikovun məruzəsində geniş əksini tapmışdır.

Azərbaycan Respublikasının sosial-iqtisadi tərəqqisinin getdikcə sürətləndiyini, həyata keçirilən mühüm dövlət proqramlarının, məqsədyönlü islahatların ölkənin davamlı və tarazlı inkişafına geniş imkan yaratdığını vurğulayan məruzəçi 2010-cu il iyun ayının 25-də Lerikə üçüncü dəfə səfər etmiş Azərbaycan Respublikasının Prezidenti İlham Əliyevin bir neçə sosial obyektin açılışında iştirakını, ictimaiyyətlə görüşü zamanı söylədiyi fikirləri rayonda görülmüş işlərə verilən ən böyük qiymətin təzahürü olduğunu bildirmişdir.

Qeyd olunmuşdur ki, 2009-cu ilin aprel ayından icrasına başlanılan regionların sosial-iqtisadi inkişafı II Dövlət Proqramı rayonda həlli vacib bir çox məsələlərin, layihələrin və tədbirlərin həyata keçirilməsi üçün əsas stimuldur. Belə ki, rayon icra hakimiyyəti tərəfindən Dövlət Proqramının vaxtında icra edilməsi üçün yuxarı dövlət orqanlarına müraciətlər edilmiş, hazırlanmış tədbirlər planına uyğun olaraq ötən dövr ərzində rayonda 1159, o cümlədən cari ilin doqquz ayında 650 yeni iş yeri açılmışdır. Ümumilikdə 2004-2010-cu illər ərzində Lerikdə 5726 nəfər, o cümlədən 2400 nəfər daimi işlə təmin edilmişdir.

İlin əvvəlindən rayonda tikinti-abadlıq işləri nəzərdə tutulmuş tədbirlər planına uyğun olaraq davam etdirilmişdir. 2010-cu il iyunun 25-də açılışında Azərbaycan Respublikasının Prezidenti cənab İlham Əliyevin də iştirak etdiyi əsaslı təmir olunmuş rayon mədəniyyət evi, rayon mərkəzi xəstəxanası, yeni inşa edilmiş Heydər Əliyev Mərkəzi, ulu öndərin möhtəşəm abidəsi, Heydər Əliyev parkı, Bayraq Meydanı rayon sakinlərinin istifadəsinə verilmişdir.

Məruzəçi qeyd etmişdir ki, cari ilin doqquz ayında 2009-cu ilin müvafiq dövrü ilə müqayisədə rayonda ümumi məhsul buraxılışının həcmi 16,5 faiz, adambaşına düşən ümumi məhsul buraxılışının həcmi 14,7 faiz, sənaye məhsulunun ümumi həcmi 6,6 faiz, kənd təsərrüfatı məhsulunun həcmi 7,9 faiz, nəqliyyat xidməti 1,4 faiz, ticarət 7,2 faiz artmışdır. Rayonun tikinti sektoruna ötən ilin müvafiq dövrünə nisbətən 3 milyon 645,6 min manat çox vəsait qoyularaq xərclər 8 milyon 179,5 min manata çatdırılmışdır. Pərakəndə əmtəə dövriyyəsində 12,4 faiz, əhaliyə göstərilən pullu xidmətdə 11,9 faiz artım müşahidə edilmişdir. Rayon üzrə əhalinin orta aylıq nominal əmək haqqı keçən ilin müvafiq dövrünə nisbətən 17,9 manat artaraq 245,4 manata, əhalinin gəlirləri 5,5 faiz artaraq 42 milyon 320 min manata çatmışdır.

Natiq cari ilin 9 ayında aqrar sektorda əldə olunmuş uğurlardan bəhs edərək bildirmişdir ki, ilin əvvəlindən görülmüş kompleks tədbirlər nəticəsində rayonda iribuynuzlu mal-qaranın baş sayı 35995-ə, qoyun və keçilərin sayı isə 126287-yə çatdırılmışdır. Təsərrüfatlarda diri çəkidə 3259 ton ət, 12724 ton süd, 2981 min ədəd yumurta, 223,5 ton yun istehsal olunmuşdur.

Azərbaycan Respublikası Prezidentinin müvafiq fərmanına uyğun olaraq rayonda aztəminatlı ailələrin yaşayış səviyyəsinin yüksəldilməsi istiqamətində görülən işlərdən söhbət açan məruzəçi bildirmişdir ki, 2010-cu ilin 9 ayı ərzində ünvanlı dövlət sosial yardımı üçün 1400 nəfərdən çox vətəndaş müraciət etmiş, komissiya tərəfindən araşdırma aparıldıqdan sonra 900 nəfər aztəminatlı ailəyə ünvanlı dövlət sosial yardımı təyin edilmişdir. Hazırda rayon üzrə ünvanlı sosial yardım alan 1380 ailənin 7874 nəfər üzvünə hər ayda orta hesabla 138 min vəsait ödənilir.

Lerik şəhəri tam qazlaşdırılmışdır. Hazırda 2007-ci ildən qaz xətti çəkilmiş Ordahal kəndinin şəbəkəyə qoşulması üçün iş aparılır. Bundan əlavə, Cəngəmiran, Perzəkücə, Anbu, Blaband, Lüləkəran kəndlərinə, Lənkərandan qaz xəttinə qoşulmaqla Piran kəndinə və Lənkəran-Lerik magistral yolunun kənarında yerləşən yaşayış məntəqələrinə qaz xəttinin çəkilməsinə başlanılmışdır.

İlin əvvəlindən Lerik Yüksək Gərginlikli Elektrik Şəbəkəsi tərəfindən 04-10 və 35 kv-luq elektrik hava xətlərində və yarımstansiyalarda əsaslı və cari təmir işləri görülmüşdür.

Şəhər əhalisinin və 30-a yaxın kənddə yaşayan əhalinin içməli suya olan tələbatının tam ödənilməsi və kanalizasiya sisteminin yaradılması ilə bağlı Dünya Bankı artıq rayonda işə başlamışdır.

Rayon icra hakimiyyəti başçısının müavini H.Məlikov ilin ötən dövrü ərzində Lerikdə yol infrastrukturunun yaxşılaşdırılaması, abadlıq-quruculuq işləri sahəsində həyata keçirilmiş işlərdən bəhs etmiş, təhsil sahəsində əldə olunmuş uğurları diqqətə çatdırmışdır.

Məruzə ətrafında rayon maliyyə idarəsinin rəis müavini Güləmirzə Ağayev, yüksək gərginlikli elektrik şəbəkə rayonunun rəisi Əlican Şahbazov və əhalinin sosial müdafiəsi mərkəzinin direktoru Vəligülla Alışov çıxış etmişlər. Şura iclasında sadalanan nöqsan və çatışmazlıqların aradan qaldırılması məqsədilə qərar qəbul olunmuş, aidiyyəti idarə, müəssisə və təşkilat rəhbərlərinə tövsiyə və tapşırıqlar verilmişdir.

Sonda tədbir iştirakçıları adından Azərbaycan Respublikasının Prezidenti cənab İlham Əliyevə müraciət qəbul edilmişdir.

İlqar RÜSTƏMOV

Xalq qəzeti.- 2010.- 2 noyabr.- S. 5.