Azərbaycanın dövlət siyasətindəki insan amili BMT İnkişaf Proqramının hesabatında xüsusi diqqət mərkəzindədir

Dünyanın ən mötəbər beynəlxalq təşkilatının bir qurumu növbəti hesabatını Bakıda açıqlamaqla ölkəmizə etimad nümayiş etdirdi

Azərbaycan vətəndaşı maddi rifah və təhlükəsizlik şəraitində yaşamalı, işsizlik, yoxsulluq olmamalı, sülh, əmin-amanlıq hökm sürməlidir.

İlham ƏLİYEV,

Azərbaycan Respublikasının Prezidenti

Müstəqil Azərbaycanın son yeddi ildə əldə etdiyi sosial-iqtisadi uğurlardan, yoxsulluğun, işsizliyin azaldılmasından, ordu quruculuğunun təkmilləşdirilməsindən, hərbi potensialın artırılmasından, ümumiyyətlə, hərtərəfli islahatların verdiyi irimiqyaslı nəticələrdən hamı yazır və danışır. Həm yerli mətbuatımız, həm də dünyanın müxtəlif ölkələrindəki kütləvi informasiya vasitələri bu məzmunlu yazılara çox tez-tez müraciət edirlər. Eləcə də yerli və ya əcnəbi olmasından asılı olmayaraq bütün ekspert və politoloqlar bu həqiqətləri olduğu kimi qiymətləndirir və təqdir edirlər. Ancaq son üç ildə ölkəmiz başqa bir məsələyə görə dünya mətbuatının diqqət mərkəzindədir. Bu, Bakıda ən mötəbər beynəlxalq təşkilatların xüsusi tədbirlərinin keçirilməsidir. Prezident Administrasiyasının, Heydər Əliyev Fondunun, Xarici İşlər Nazirliyinin, eləcə də Yeni Azərbaycan Partiyasının təşəbbüsü və təşkilatçılığı ilə keçirilən beynəlxalq tədbirlər dünya mətbuatında özünəməxsus əks-səda vermişdir. Hərəsi ayrıca bir məsələyə həsr edilmiş həmin tədbirlərin hamısı son nəticədə ümumbəşəri dəyərlərin inkişafına verilmiş töhfə kimi qiymətləndirilir. Ölkəmizdə keçirilmiş sonuncu beynəlxalq tədbir isə, demək olar ki, dünyanın hər yerində böyük əks-səda verdi.

Azərbaycan Prezidenti Administrasiyasının və Birləşmiş Millətlər Təşkilatının İnkişaf Proqramının təşəbbüsü və dəstəyi ilə noyabrın 4-də Bakıda keçirilmiş təqdimat mərasimi bir neçə cəhətdən həm ölkəmiz, həm də BMT üçün əlamətdar idi. "Millətlərin həqiqi sərvəti: İnsan inkişafına aparan yollar" devizi altında keçirilən bu tədbirdə BMT İnkişaf Proqramının 2010-cu il İnsan İnkişafı Hesabatı təqdim olunurdu. Tədbirin gündən-günə inkişaf edən Azərbaycanın paytaxtında keçirilməsi bizim üçün birinci uğur idisə, BMT İnkişaf Proqramının rezident nümayəndəsi Fikrət Akçuranın ölkəmiz haqqında söylədiyi fikirlər digər uğur və nailiyyətlərimiz kimi qiymətləndirilirdi. Cənab Akçura təqdimat mərasimində söylədi ki, insan inkişafı indeksinin orta illik tempinə görə Azərbaycan keçmiş Sovet İttifaqı ölkələri arasında son 10 il ərzində aparıcı dövlət olmuşdur. Azərbaycan bu istiqamətdə hətta dünya üzrə qabaqcıl sayılan iki dövləti - Çin və Hindistanı da geridə qoymağa nail olmuşdur.

Qeyd edək ki, Birləşmiş Millətlər Təşkilatının İnkişaf Proqramı özünün İnsan İnkişafı Hesabatını ilk dəfə 20 il bundan əvvəl hazırlamışdır. Deməli, 2010-cu ildə Bakıda təqdimatı keçirilən növbəti hesabat yubiley xarakterli hesabatdır. Yəni, biz yuxarıda "Bakıda keçirilən tədbir həm Azərbaycan üçün, həm də BMT İnkişaf Proqramı üçün əlamətdar hadisədir" - deyəndə ölkəmizin bu hesabatda aparıcı dövlət kimi tanınması ilə yanaşı, İnsan İnkişafı Hesabatının özünün 20 yaşını Bakıda qeyd etməsini nəzərdə tuturduq. Bu tədbir bir də ona görə əlamətdardır ki, 1993-cü ilin yayından sonra Azərbaycan rəhbərliyi dövlət siyasətini bilavasitə insan amili, insana qayğı göstərilməsi prinsipi üzərində qurmuşdur. Cəmiyyət həyatının elə bir sahəsi yoxdur ki, Azərbaycan dövləti orada insana qayğının özünəməxsus nümunəsini yaratmamış olsun. Eləcə də, son 20 ildə Birləşmiş Millətlər Təşkilatı özünün müxtəlif tədbirlərində dönə-dönə vurğulamışdır ki, milli inkişafın əsasında insan amilinə qayğı və diqqət dayanmışdır. Yəni, insan amilinə münasibət məsələsində Azərbaycanın mövqeyi BMT-nin mövqeyi ilə tamamilə üst-üstə düşür. Onu da əlavə edək ki, hesabatın Bakıda təqdim olunması da bilavasitə Azərbaycanın bu məsələyə verdiyi önəmin yüksək qiymətləndirilməsinin nəticəsi idi. Həmin məntiq təqdimat mərasiminin başlanmasından əvvəl nümayiş etdirilən "Azərbaycan: inkişafa aparan yol" adlı sənədli filmdə də özünü göstərirdi.

Prezident Administrasiyasının rəhbəri, akademik Ramiz Mehdiyev təqdimat mərasimində açılış nitqi ilə çıxış edərək gənc müstəqil Azərbaycanın keçdiyi inkişaf yolunu xarakterizə etmiş, ölkəmizin beynəlxalq təşkilatlar və dünya dövlətləri ilə sıx əməkdaşlıq nəticəsində əldə etdiyi nailiyyətləri yada salmışdır. Natiq qeyd etmişdir ki, Birləşmiş Millətlər Təşkilatının insan inkişafına dair son hesabatında verilmiş Azərbaycan haqqında məlumatlar ölkəmizin ümumi inkişafının göstəricisidir. 2005-ci illə müqayisədə 34 pillə irəliləyən Azərbaycan 101-ci yerdən 67-ci yerə yüksəlmişdir. Bununla da ölkəmiz 2000-2010-cu illər ərzində postsovet məkanı ölkələri arasında insan inkişafı indeksinə görə illik 1,77 artım dərəcəsi ilə ən yüksək göstəriciyə malik olmuşdur.

Akademik qeyd etmişdir ki, ölkəmizin bu sahədəki uğurlarının əsas səbəbi dövlət siyasətinin təməlində insan amilinin dayanmasıdır: "Tarixi proseslər göstərir ki, dövlət hələ ki, fərdlərin öz potensialını inkişaf etdirməsi üçün yeganə və ən optimal institut olaraq qalır. Dövlətin müasir dövrün tələblərinə uyğun, universal dəyərlər əsasında fəaliyyəti bəşəriyyətin inkişafını səciyyələndirir. Yer kürəsi hər birimizin, hər bir vətəndaşın ümumbəşəri xəzinəsi və sərvətidir. Ona görə də, dövlət ilk növbədə, məhz insan amilinin inkişafına xidmət etməli və onun gələcəyini düşünməlidir".

Heydər Əliyev siyasi kursunun aparıcı simalarından olan Ramiz Mehdiyev Azərbaycan dövlətinin beynəlxalq aləmə inteqrasiyaya böyük önəm verdiyini söyləmiş və bu inteqrasiya prosesində BMT ilə əməkdaşlığın daim prioritet məsələ olaraq qaldığını vurğulamışdır: "Azərbaycan BMT ilə sıx əməkdaşlıq edir, beynəlxalq təhlükəsizliyə və sülhün təmin edilməsinə öz töhfəsini verir... Azərbaycan dövlətinin rəhbər tutduğu siyasi və iqtisadi strategiya vətəndaşların azad və bərabər mühitdə yaradıcı düşüncələrini, istedadlarını inkişaf etdirmələrinə və onların qloballaşan müasir dünyaya inteqrasiyasını təmin etməyə imkan verir... ATƏT, Avropa Şurası və Avropa İttifaqı tərəfindən inkişaf etdirilən"insan təhlükəsizliyi", "demokratik təhlükəsizlik" və "kooperativ təhlükəsizlik" konsepsiyaları bizim üçün xüsusi əhəmiyyət kəsb edir. Çünki bu konsepsiyaların əsas qayəsi fərdin maraqlarının təmin edilməsidir. Dövlət bunun üçün bir vasitə kimi çıxış edir".

Bütün bunları yada salan, Azərbaycanın beynəlxalq ictimaiyyətin rəyinə və təkliflərinə böyük hörmət və ehtiramla yanaşdığını xüsusilə vurğulayan Ramiz Mehdiyev BMT rəsmilərinin də iştirak etdiyi beynəlxalq tədbirin tribunasından başqa bir məqamı da yada salmağı məqsədəuyğun sayır: "Lakin bir məqamı xüsusilə vurğulamaq istərdim. Demokratiyada "ikili standartlar" qəbuledilməzdir. Biz istəmirik ki, Azərbaycanda cərəyan edən demokratik proseslərə, həmçinin Dağlıq Qarabağ münaqişəsinin həllinə kənardan "ikili standartlar" mövqeyindən yanaşılsın. Biz Azərbaycanda demokratiyanın təşəkkülü üçün zəruri şəraitin yaradılmasını təmin etmişik və bundan sonra da edəcəyik. Bu gün biz görürük ki, demokratik dəyərlər Azərbaycanın milli-mədəni irsinin inkişafı kontekstində insanların həyat tərzinin, mentalitetinin mühüm ünsürünə çevrilir".

Beləliklə, Azərbaycan paytaxtı növbəti bir beynəlxalq tədbirə ev sahibliyi etdi. Dövlətimiz növbəti dəfə sübut etdi ki, gənc müstəqil Azərbaycan ümumbəşəri dəyərlərə öz töhfəsini vermək iqtidarındadır. Beynəlxalq təşkilatlar isə növbəti dəfə sübut etdilər ki, Azərbaycan həqiqətləri heç kəsin nəzərindən yayınmır, hamı tərəfindən yüksək qiymətləndirilir.

İttifaq MİRZƏBƏYLİ

Xalq qəzeti.- 2010.- 7 noyabr.- S. 1.