Azərbaycanın
sabit və davamlı inkişafı düzgün iqtisadi
strategiyanın nəticəsidir
2010-cu ilin ilk doqquz ayı da
uğurlu nəticələrlə başa
çatmışdır
Müasir dövr
bir sıra səciyyəvi xüsusiyyətlərlə
xarakterizə edilir ki, bu da əsasən, qloballaşma və inteqrasiya
ilə bağlıdır. Belə ki, məhz
qeyd edilən amillərin təsiri ilə qlobal iqtisadi məkana
yaxından inteqrasiya olunmaq, dünya bazarına rəqabətqabiliyyətli
məhsullarla çıxa bilmək, qloballaşma prosesinin təsiri
ilə formalaşan sosial-iqtisadi və ictimai-siyasi proseslərdə
milli və dövlətçilik prinsiplərinə uyğun fəal
iştirak etmək hər bir milli iqtisadiyyatın
davamlı inkişafının zəruri şərtinə
çevrilmişdir.
Artıq
hər bir müstəqil dövlətin, o cümlədən
Azərbaycan Respublikasının dünya iqtisadiyyatında cərəyan
edən sosial-iqtisadi proseslərdə iştirakı labüd və
qaçılmazdır. Bu zaman qarşıda duran
başlıca vəzifə milli və iqtisadi təhlükəsizlik
baxımından zərərli ola biləcək proseslərin
qarşısını almaq, eləcə də beynəlxalq təcrübənin
vəd etdiyi nailiyyətlərə yiyələnməkdir. Məlumdur
ki, 2008-ci ildən etibarən dünyada cərəyan edən,
bütün dünyanı silkələyən və nəhəng
şirkətlərin müflisləşməsinə səbəb
olan iqtisadi böhran da məhz qloballaşma prosesi nəticəsində
vahid orqanizmə çevrilən dünya iqtisadiyyatını
qısa zamanda əhatə etmişdir. Demək olar ki,
bütün dövlətlər böhrandan bu və ya digər
dərəcədə zərər çəkmişlər.
Təbii ki, zərərin miqyası milli
dövlətlərin, eləcə də milli hakimiyyətlərin
həyata keçirdikləri daxili və xarici siyasətdən
çox asılıdır. Bu baxımdan, milli
iqtisadiyyatımızın böhrandan minimum zərərlə
çıxa bilməsi məhz Azərbaycan dövlətinin həyata
keçirdiyi siyasi və iqtisadi tədbirlərin real nəticəsi
kimi qəbul edilməlidir. Ölkə iqtisadiyyatında son illər
təmin edilmiş iqtisadi dinamika, davamlı inkişaf tempi
2010-cu ildə də qorunub saxlanılmış və
daha da möhkəmləndirilmişdir. Bütün bunlar Nazirlər
Kabinetinin son iclasında da bir daha təsdiq edildi.
2010-cu ilin 9 ayının yekunlarına həsr edilmiş
iclas, sözün əsl mənasında, hökumətin xalq
qarşısında hesabatı idi. İclasda səslənən
fikirlərdən bir daha aydın oldu ki, ötən doqquz ay ərzində
Azərbaycan iqtisadiyyatında əldə edilmiş dinamik
inkişaf davam etdirilmişdir. Ötən müddət ərzində
ÜDM-in həcmi 4,1 faiz artaraq 29,3 milyard
manata bərabər olmuşdur. Milli iqtisadiyyatın
inkişafını xarakterizə edən mühüm göstəricilərdən
olan sənaye istehsalının artımı 3,1
faiz, qeyri-neft sektorunun artımı isə 5,2 faiz təşkil
etmişdir. Bu müddət ərzində bir işçiyə
hesablanmış orta aylıq əmək haqqı 6,6 faiz
artaraq 319 manata, əhalinin adambaşına düşən gəlirləri
10 faiz artaraq 2 min 16 manata, adambaşına düşən
ümumi daxili məhsul isə 2,8 faiz artaraq 3 min 286 manata
çatmışdır. Vergi və digər icbari ödənişlər
çıxıldıqdan sonra əhalinin sərəncamında
qalan vəsait ötən ilin eyni dövrü ilə
müqayisədə 11,3 faiz çox
olmuşdur. Bu da əhalinin pul gəlirlərinin
artım sürətinin mövcud inflyasiya səviyyəsini iki
dəfə üstələməsi deməkdir. Hesabat
dövründə əhalinin maliyyə imkanlarının vacib
göstəricisi sayılan pullu xidmətlərin həcmi
artaraq ötən ilin müvafiq dövrünün göstəricisini
10,5 faiz üstələmiş, pərakəndə
əmtəə dövriyyəsi 8,5 faiz, əhalinin
banklardakı əmanətləri isə 34,4 faiz
artmışdır. Cari ilin doqquz ayı ərzində Azərbaycan
Respublikası 140 ölkə ilə xarici ticarət dövriyyəsini
həyata keçirmişdir ki, bunun həcmi 20,2 milyard dollar, o
cümlədən idxalın həcmi 4,5 milyard, ixracın həcmi
isə 15,7 milyard ABŞ dolları təşkil etmişdir. Yəni
bu dövr ərzində xarici ticarət saldosu müsbət 11,2 milyard ABŞ dolları olmuşdur.
2010-cu
ilin ilk 9 ayı ərzində dövlət büdcəsinin mədaxili
7 milyard 505 milyon manat və ya 93,6 faiz yerinə
yetirilmişdir ki, bu da ötən ilin eyni dövrü ilə
müqayisədə 270 milyon manat və ya 3,7 faiz çoxdur. Əlbəttə, özəl sektorun aparıcı
mövqedə olduğunu, eləcə də büdcənin
başlıca gəlir mənbəyinin vergilər təşkil
etdiyini nəzərə alsaq büdcə daxilolmalarında da əsas
yerin Vergilər Nazirliyinə məxsus olduğu
aydınlaşar. Ötən müddətdə Vergilər
Nazirliyi mədaxil proqnozunu 100,6 faiz icra etməklə dövlət
büdcəsinə 3 milyard 128 milyon manat vəsait yönəltmişdir
ki, bunun da 56,4 faizi və ya 1 milyard 768 milyon manatı qeyri-neft
sektorundan daxilolmaların payına düşür.
Eyni zamanda, qeyd etmək lazımdır ki, dövlətin
qeyri-neft sektorunun inkişafının sürətləndirilməsi
istiqamətində reallaşdırdığı tədbirlər
artıq öz bəhrəsini verməkdədir. Bu sahədən
daxilolmaların 2009-cu ilin müvafiq dövrünə nisbətən
89 milyon manat və yaxud 5,3 faiz çox
olması da bunu bir daha təsdiqləyir. Büdcə
daxilolmalarının başqa bir mənbəyi olan
gömrük rüsumlarında da müvafiq mənzərə
müşahidə edilmişdir. Belə ki, baxılan
dövrdə Dövlət Gömrük Komitəsi büdcə
proqnozuna 100 faiz əməl edərək, büdcəyə 730
milyon manat vəsait yönəltmişdir. Neft Fondundan dövlət
büdcəsinə 3 milyard 625 milyon manat məbləğində
transfert olunmuş, sair daxilolmalar üzrə isə dövlət
büdcəsinə 22 milyon manat vəsait ödənilmişdir.
Cari ilin
doqquz ayı ərzində dövlət büdcəsinin xərcləri
6 milyard 837 milyon manat və ya 83,9 faiz səviyyəsində
icra olunmuşdur ki, bu da ötən ilin eyni dövrü ilə
müqayisədə 380 milyon manat çoxdur. Ötən ilin
müvafiq dövrünə nisbətən bu ilin doqquz
ayında dövlət büdcəsindən müdafiə xərclərinə
20 faiz, kənd təsərrüfatı xərclərinə
14,2 faiz, sosial müdafiə və sosial təminat xərclərinə
13,9 faiz, mənzil-kommunal təsərrüfatı xərclərinə
9,4 faiz, mədəniyyət xərclərinə 8,3 faiz, səhiyyə
xərclərinə isə 5,9 faiz çox vəsait yönəldilmişdir.
Əvvəlki dövrlərdə olduğu kimi, ötən
doqquz ayda da ölkədə sosial məsələlərin həllinə,
insanların yaşayış şəraitinin daha da
yaxşılaşdırılmasına çox böyük
diqqət göstərilmiş, bu məsələlər
prioritetlik kəsb etmişdir. Hesabat dövründə icra
olunmuş dövlət büdcəsi xərclərinin 2 milyard
65 milyon manatı və ya 30,2 faizi sosialyönümlü tədbirlərin,
yəni təhsil, səhiyyə, sosial təminat, mədəniyyət
sahələrinin maliyyə təminatına sərf
edilmişdir ki, bu da 2009-cu ilin eyni dövrü ilə
müqayisədə 124 milyon manat və ya 6,4 faiz çoxdur. Bu isə o deməkdir ki, cari ildə də ölkə
əhalisinin sosial rifahının
yaxşılaşdırılması və sosial müdafiəsinin
gücləndirilməsi Azərbaycan dövlətinin diqqət
mərkəzində olmuşdur. Minimum əmək
haqqı, pensiyaların baza hissəsi, əmək
haqlarının artırılması və ümumilikdə əhalinin
sosial rifahının yaxşılaşdırılması
istiqamətində xeyli sayda sosial təşəbbüslərin
irəli sürülməsi, yeni məktəblərin, xəstəxanaların
tikilərək istifadəyə verilməsi də məhz bunun
nəticəsidir.
Əhalinin
gəlir əldə etmək imkanlarının genişləndirilməsi,
ölkədə yoxsulluq səviyyəsinin azaldılması,
aztəminatlı ailələrin və sosial cəhətdən
xüsusilə həssas qrupların, ilk növbədə,
qaçqınların və məcburi köçkünlərin
sosial vəziyyətinin yaxşılaşdırılması
ilə bağlı həyata keçirilən məqsədyönlü
sosial-iqtisadi siyasət nəticəsində 2010-cu ildə
ölkə əhalisinin rifahının yüksəldilməsi
və sosial müdafiəsinin gücləndirilməsi istiqamətində
mühüm əhəmiyyətli addımlar
atılmışdır. Belə ki, cari ilin ilk 9 ayında
ölkə başçısının imzaladığı
ardıcıl sərəncamlarla 1,3 milyon nəfərdən
artıq pensiyaçının baza pensiyalarının 13
faizlik artımı həyata keçirilmiş, dövlət
büdcəsindən maliyyələşən 800 min nəfərə
yaxın təhsil, elm, səhiyyə, mədəniyyət, kənd
təsərrüfatı, ətraf mühitin mühafizəsi
müəssisələrində çalışanların,
habelə hərbi qulluqçuların və xüsusi rütbəli
əməkdaşların, dövlət qulluqçusu olmayan
mülki şəxslərin aylıq vəzifə maaşları
10 faiz, 394 min aztəminatlı şəxsə dövlət tərəfindən
ödənilən sosial müavinətlərin məbləği
orta hesabla 20 faiz, məcburi köçkünlərə yemək
xərci üçün verilən müavinətin məbləği
11 faiz artırılmışdır.
Eyni
zamanda, şəhid ailəsi üçün müəyyən
edilmiş Prezident təqaüdünün məbləğinə
50 faiz əlavə edilmişdir ki, bu da 14 minə yaxın
insanı əhatə edir. O cümlədən, 87 min nəfərdən
artıq doktorant, ali, orta ixtisas və
peşə məktəbləri və peşə liseylərinin
tələbələrinə və şagirdlərinə verilən
təqaüdlərin məbləğində də orta hesabla,
15 faizlik artım müşahidə edilmişdir. Bu da artımların tətbiqi ilə təqribən
3 milyon nəfərin güzəranının nisbətən
yaxşılaşması deməkdir. Hesabat
dövründə sosial-mədəni, inzibati idarəetmə və
məişət təyinatlı obyektlərin tikintisi və
yenidənqurulması üzrə əsas investisiya layihələrinin
və proqramların həyata keçirilməsi davam
etdirilmiş, bu məqsədlə 2 milyard 929 milyon manat, o
cümlədən dövlət büdcəsindən 2 milyard
128 milyon manat, Dövlət Neft Fondunun büdcəsindən 305
milyon manat, Naxçıvan Muxtar Respublikasının büdcəsindən
45,6 milyon manat, dövlət zəmanəti ilə beynəlxalq
maliyyə institutlarından daxil olmuş vəsait hesabına
450 milyon manat vəsait yönəldilmişdir.
Dövlət
büdcəsinin dövlət əsaslı vəsait
qoyuluşu xərclərindən 300,2 milyon manat, o cümlədən
təhsil müəssisələrinə 80,8 milyon manat, səhiyyə
müəssisələrinə 42,7 milyon manat, mədəniyyət
müəssisələrinə 101 milyon manat, idman müəssisələrinə
40,9 milyon manat, sosial müdafiə və sosial təminat təyinatlı
müəssisələrin inşası və yenidən
qurulması məqsədlərinə 34,8 milyon manat vəsait sərf
edilmişdir.
Bu müddət ərzində infrastruktur sahələrinin
təkmilləşdirilməsi tədbirləri də davam
etdirilmişdir. Belə ki, əsas kommunal və nəqliyyat
infrastrukturunun tikintisi və yenidən qurulması
üçün 1 milyard 212 milyon manat, o cümlədən
elektrik enerjisi infrastrukturunun tikintisinə 89,5 milyon manat,
regionların içməli su və suvarma-drenaj infrastrukturunun
bərpası və yenidən qurulmasına 170,3 milyon manat,
respublika əhəmiyyətli avtomobil yollarının və
yol infrastrukturunun tikintisi və yenidən qurulmasına 844
milyon manat, Bakı Metropoliteninin yeraltı nəqliyyat obyektlərinin
tikintisi və metro üçün avadanlığın
alınmasına 106,3 milyon manat vəsait sərf edilmişdir.
Hesabat dövründə Azərbaycan Respublikası Prezidentinin
Ehtiyat Fondundan 108 milyon manat, o cümlədən Bakı şəhərində
aparılan yenidənqurma və abadlıq işlərinin təmin
edilməsi üçün 20 milyon manat, təcili və təxirəsalınmaz
tibbi yardım xidmətinin maddi-texniki bazasının gücləndirilməsi
üçün 7 milyon manat, Bakı Sağlamlıq Mərkəzinin
tikintisi üçün 5 milyon manat, məktəbəqədər
və ilk peşə-ixtisas təhsil müəssisələrinin
əsaslı təmiri üçün 4 milyon manat vəsait sərf
edilmiş, eləcə də dövlət büdcəsinin
Ehtiyat Fondundan əvvəlcədən büdcədə nəzərdə
tutulmayan bir sıra tədbirlərin maliyyələşdirilməsinə
106 milyon manat vəsait ayrılmışdır.
Cari ilin yaz-yay aylarında ölkəmizin bir sıra
rayonlarında Kür-Araz çaylarının törətdiyi
irimiqyaslı təbii fəlakətin fəsadlarının
aradan qaldırılması da dövlətin diqqət mərkəzində
olmuşdur.
Belə ki, hesabat dövründə fəsadların aradan
qaldırılması üçün təcili və təxirəsalınmaz
tədbirlərin görülməsi ilə bağlı
müvafiq sərəncam və fərmanlara uyğun olaraq, fəlakətdən
zərər çəkmiş əhaliyə birdəfəlik
maddi yardımların ödənilməsinə,
uçub-dağılmış evlərin tikintisinə və
yeni yaşayış massivlərinin salınmasına, sosial,
aqrar, kommunal, enerji, rabitə, nəqliyyat və digər
infrastrukturun bərpası və yenidən qurulması işlərinə
başlanılmış, eləcə də bu məqsədlə
dövlət büdcəsindən ayrılmış 320,5
milyon manat vəsaitdən 98 milyon manatı artıq təyinatı
üzrə istifadə edilmişdir.
Qeyd etmək lazımdır ki, 2010-cu ildə təbiətdə
baş verən iqlim dəyişiklikləri və müxtəlif
fəlakətlərlə əlaqədar olaraq regionun bir
çox ölkələrində kənd təsərrüfatına
və ərzaq istehsalına əhəmiyyətli dərəcədə
ziyan dəymişdir. Müvafiq olaraq, bəzi ölkələr
taxıl və digər əmtəələrin
ixracının həyata keçirilməsinə embarqolar tətbiq
etmək məcburiyyətində qalmışdır ki, bunun da
nəticəsində taxılın və bir çox ərzaq
məhsullarının qiymətlərində artım baş
vermişdir. Bütün bunları əvvəlcədən
qiymətləndirən Azərbaycan hökuməti 2010-2011-ci
illər üçün tədarük olunan taxıl məhsullarının
həcminin əlavə olaraq 250 min ton artırılmasına
dair dövlət büdcəsinin Ehtiyat Fondundan 50 milyon manat vəsait
ayırmışdır. Bu da öz
növbəsində ölkənin daxili bazarında taxıl və
ərzaq məhsullarının qiymətlərinin sabit
qalması üçün zəmin yaratmışdır.
"2008-2015-ci
illərdə Azərbaycan Respublikasında əhalinin ərzaq
məhsulları ilə etibarlı təminatına dair Dövlət
Proqramı"nda nəzərdə tutulmuş tədbirlərin
həyata keçirilməsi üçün 2010-cu ilin doqquz
ayında 102 milyon manat, o cümlədən kənd təsərrüfatı
məhsulları istehsalçılarının məhsul
istehsalı üçün istifadə etdikləri
yanacağın, motor yağlarının dəyərinin orta
hesabla 50 faizinin ödənilməsinə 55,5 milyon manat,
buğda və çəltik istehsalının
stimullaşdırılması məqsədi ilə 23 milyon
manat, taxıl elevatorlarının tikintisi və ərzaq
buğdası tədarükünün nəqliyyat xərclərinə
11 milyon manat vəsait yönəldilmişdir. Cari ilin doqquz
ayında kənd təsərrüfatı istehsalında
xüsusi əhəmiyyət kəsb edən mineral gübrələrin
dəyərinin orta hesabla 50 faizinin ödənilməsi ilə
bağlı 12,5 milyon manat, o cümlədən dövlət
büdcəsinin Ehtiyat Fondundan əlavə olaraq 5,9 milyon manat
vəsait ayrılmışdır.
Əvvəlki illərdə olduğu kimi, hesabat
dövründə də sahibkarlığın müxtəlif
formalarının, ümumilikdə özəl sektorun
inkişafı prioritet məsələ kimi diqqət mərkəzində
olmuşdur.
Bu məqsədlə sahibkarlara maliyyə dəstəyinin
artırılması, onların güzəştli kreditlərə
çıxış imkanlarının genişləndirilməsi
istiqamətində fəaliyyət davam etdirilmiş,
Sahibkarlığa Kömək Milli Fondu vasitəsilə 1016
sahibkarlıq subyektinə 81 milyon manat məbləğində
güzəştli kreditlər verilmişdir.
Ayrılmış vəsaitin 62 milyon manatı və ya 76,1 faizi kənd təsərrüfatı məhsullarının
istehsalı və emalını stimullaşdıran infrastruktur
layihələrinə, 16 milyon manatı və ya 20,4 faizi sənaye
məhsullarının istehsalı və emalı layihələrinə,
3 milyon manatı və ya 3,5 faizi turizm infrastrukturunun
inkişafı layihələrinə yönəldilmişdir. Bütövlükdə fond tərəfindən
ayrılmış kreditlərin 44 milyon manatı və ya 54
faizi dövlət büdcəsində Sahibkarlığa
Kömək Milli Fondu üçün nəzərdə
tutulmuş vəsaitlər hesabına həyata
keçirilmişdir. Aqrar sektorun inkişafında vacib
rol oynayan "Aqrolizinq" Səhmdar Cəmiyyətinə
dövlət büdcəsindən 38,4 milyon manat, o cümlədən
Prezidentin Ehtiyat Fondundan 5 milyon manat vəsait
ayrılmışdır.
İlin 9
ayı ərzində müxtəlif istiqamətləri, o
cümlədən regionları əhatə edən infrastruktur
layihələrin icrası uğurla davam etdirilmiş və nəhəng
layihələr - nəqliyyat, energetika, tikinti və s. sahələri
əhatə edən layihələr uğurla icra olunmuşdur.
Belə layihələrin həyata keçirilməsi
ölkənin uzunmüddətli dayanıqlı
inkişafını təmin edir və şübhəsiz ki,
qeyri-neft sektorunun inkişafına ciddi təkan verir. Ümumiyyətlə, Azərbaycanda son illər ərzində
infrastruktur sahələrin inkişafına çox
böyük vəsaitlər qoyulmuşdur. Demək
olar ki, dövlət xərclərinin böyük əksəriyyəti
infrastruktur layihələrinə sərf olunmuş, elektrik
stansiyaları tikilmiş, qaz xətləri çəkilmiş,
su və meliorasiya məsələlərinin həlli
üçün əməli-praktik işlər
görülmüşdür. Avtomobil yolları, dəmir
yolu, hava, dəniz nəqliyyatı və s. sahələrin
inkişafı isə göz qabağındadır. Sevindirici haldır ki, ümumilikdə ölkənin
hərtərəfli inkişafı, regionların
inkişafı üçün həyata keçirilən
infrastruktur layihələri, nəhəng transmilli layihələrlə
paralel həyata keçirilir ki, bu da qarşıya qoyulmuş
məqsədlərin tamamlanmasında öz bəhrəsini
verir.
Məhz həyata keçirilən layihələrin nəticəsidir
ki, son doqquz ayda da regionların sürətli inkişafı
davam etmişdir. Demək olar ki, regionların sosial-iqtisadi inkişafı
haqqında məlum Dövlət Proqramı uğurla icra
edilmiş, həm infrastruktur layihələri, həm də
özəl biznesin inkişafı üçün aparılan
işlər, qoyulan sərmayələr regional inkişafı
daha da sürətləndirmişdir. Bütün bunlar isə
onu göstərir ki, qeyri-neft sektorunun inkişafına son beş il ərzində verilən dəstək
və diqqət öz gözəl bəhrəsini verir və
Azərbaycan iqtisadiyyatı artıq çoxşaxəli
istiqamətlərdə davamlı inkişaf etməkdədir. Əldə
edilmiş dinamikanın nəticəsidir ki, "Azərbaycan
Respublikası regionlarının 2009-2013-cü illərdə
sosial-iqtisadi inkişafı Dövlət Proqramı"nda nəzərdə
tutulmuş tədbirlərin icrası çərçivəsində
hal-hazırda ayrı-ayrı regionlarda 211 müəssisənin,
o cümlədən 80 sənaye, 57 kənd təsərrüfatı,
63 xidmət müəssisəsinin tikintisi davam etdirilir.
Son doqquz ayda sosial sahə ilə bağlı da
bütün problemlər diqqət mərkəzində
olmuş, o cümlədən bir çox problemlər həllini
tapmış və sosial infrastrukturun yaradılmasına
böyük investisiyalar qoyulmuşdur. Ötən müddətdə
23 səhiyyə müəssisəsi təmir olunubdur, 59 məktəb
və əlavə korpus, 3 regional olimpiya idman mərkəzi
tikilib. Bu proses davam etdirilir və növbəti illərin
büdcəsində də sosial infrastrukturun möhkəmlənməsi
prioritet istiqamətlərdən biri olacaqdır. Azərbaycanda
yeni iş yerlərinin yaradılması prosesi uğurla davam
etdirilmiş, 2010-cu ilin əvvəlindən bəri ölkədə
56 min yeni iş yeri açılmışdır. Ümumilikdə
isə, 2003-2010-cu illər ərzində 900 minə yaxın
iş yeri açılmışdır. Bu da
özlüyündə onu göstərir ki, işsizlik kimi
çox çətin və ağır problem Azərbaycanda tədricən
öz həllini tapır. Əlbəttə,
ölkəmizin valyuta ehtiyatlarının artması, iqtisadi
inkişafın sürətlənməsi növbəti illərdə
işsizliklə bağlı daha böyük addımlar
atılmasına imkan verəcəkdir.
Statistik araşdırmalardan aydın olur ki, 2010-cu ilin
yanvar-sentyabr aylarında Azərbaycanın maliyyə mənbələri
güclənmiş, valyuta ehtiyatlarının həcmi xeyli
çoxalmış və daha geniş miqyaslı layihələrin
həyata keçirilməsi üçün münbit şərait
yaranmışdır. Belə ki, ölkənin valyuta
ehtiyatlarının artımı davam etmiş və 2010-cu ilin
sentyabr ayında 28 milyard ABŞ dollarını ötüb
keçmişdir. Baxmayaraq ki, valyuta
ehtiyatlarının artımı, əsas etibarı ilə
neftdən, eləcə də onun qiymətindən
asılıdır. Neftin qiymətində kəskin
enmə müşahidə edildiyi aylarda da ölkəmizin
valyuta ehtiyatlarının artım dinamikası qorunub
saxlanılmışdır. Ümummilli
lider Heydər Əliyevin neft strategiyasının uğurla həyata
keçirilməsi Azərbaycan dövlətinin enerji təhlükəsizliyi
sahəsində güclü və müstəqil bir tərəfdaşa
çevrilməsini təmin etmişdir. Ulu
öndərin neft strategiyasının ayrılmaz hissəsi
olan Azərbaycan Respublikası Dövlət Neft Fondu
yaradılarkən mövcud olan 271 milyon ABŞ dollarına bərabər
aktivlərinin həcmi ildən-ilə artmışdır.
Təkcə son üç il ərzində
Neft Fondu aktivləri təxminən 10 dəfə
artmışdır. Bu isə neft
strategiyasının reallaşmasının ilkin mərhələsində
Dövlət Neft Fondunun yaradılması ulu öndər Heydər
Əliyev tərəfindən atılmış uzaqgörən
və strateji bir addım olduğunu sübut edir.
Neft ilə zəngin ölkələrdə Neft Fondu və
yaxud bu kimi qurumların təsis edilməsi dövlətlərdə
neft sərvətlərinin nəsillər arasında bərabər
bölgüsünə, onların səmərəli, məqsədyönlü
və şəffaf şəkildə idarə edilməsinə
şərait yaradır. Eyni zamanda, məlumdur ki, Dövlət Neft
Fondunun qarşısında qoyulan əsas məqsədlərdən
biri neft gəlirlərinin səmərəli idarə edilməsindən
əlavə gəlirlərin əldə edilməsidir. Cari ilin 9 ayının yekunlarına dair statistik məlumatlara
əsasən, fondun yaradılmasından bu günə kimi Neft
Fondunun idarəetmədən toplanan gəlirləri ilk dəfə
olaraq 1 milyard ABŞ dollarını ötüb
keçmişdir. Bu isə təbii
resurslardan əldə edilmiş vəsaitlərin artıq kifayət
qədər əhəmiyyətli, müstəqil və ən
vacibi daimi gəlir mənbəyinə çevriləcəyinə
əminlik yaradır.
Neft Fondunun əsasnaməsinə uyğun olaraq fondun digər
məqsədi Azərbaycanda mühüm infrastruktur və
sosialyönümlü layihələrin maliyyələşdirilməsinin
təmin edilməsidir. Ölkə iqtisadiyyatına daxili mənbələr
hesabına investisiyaların həyata keçirilməsində
Neft Fondu mühüm rola malikdir. Yalnız bir göstəricini
qeyd etmək kifayətdir ki, 2001-2010-cu illər ərzində
fonddan ümumilikdə 2,3 milyard manat vəsait
ölkənin sosial-iqtisadi tərəqqisi naminə ən
mühüm ümummilli problemlərin həllinə və
strateji əhəmiyyətli infrastruktur obyektlərinin inşa
və rekonstruksiyası üzrə layihələrin maliyyələşdirilməsinə
yönəldilmişdir. Eyni zamanda, fondun 14
milyard manat vəsaiti dövlət büdcəsinə transfert
edilmişdir ki, bu vəsait hesabına dövlət investisiya
proqramları həyata keçirilir.
Neft Fondundan maliyyələşən digər strateji əhəmiyyət
kəsb edən bir layihə - "Dəmir İpək
Yolu" adlanan Bakı-Tbilisi-Qars dəmir yolunun inşası
Azərbaycanın tranzit potensialının genişlənməsini
təmin edəcəkdir. Əlbəttə, bu həm dünyaya
inteqrasiyanı sürətləndirəcək, ölkəmizin
dünya bazarına çıxışını təmin edəcək
və ən əsası, tranzit ölkə kimi strateji əhəmiyyətini
artıracaqdır. Bütün bunlar isə
bütövlükdə doqquz ayın yekunlarının ürəkaçan
və müsbət olması deməkdir.
Araşdırmalar
göstərir ki, 2010-cu il
üçün qarşıya qoyulmuş məsələlərin
həlli uğurla icra edilməkdədir. Bütün
istiqamətlərdə ən müasir infrastruktur layihələri
uğurla həyata keçirilir ki, bütün bunlar da Azərbaycan
dövlətinin indiki və gələcək
inkişafında mühüm rol oynayacaqdır.
Aparılan təhlil və araşdırmalardan aydın
olur ki, bu gün bütün dünyanın diqqət mərkəzində
olan məsələlərdən biri də ərzaq təhlükəsizliyi
məsələləridir. Eyni zamanda, sürətli iqtisadi inkişaf
yolunda olan, əldə edilmiş inkişafı davamlı
iqtisadi inkişafa çevirmək məqsədi ilə
vaxtaşırı olaraq genişəhatəli tədbirlər
planı qəbul edən və həyata keçirən Azərbaycan
Respublikasında da əsas məsələlərdən biri əhalinin
ərzaq məhsulları ilə təminatını
yaxşılaşdırmaq, istehsal edilən ərzaq məhsullarının
keyfiyyətini yüksəltmək, bir sözlə, ölkənin
ərzaq təhlükəsizliyini təmin etməkdir. Bu
baxımdan, "2008-2015-ci illərdə Azərbaycan
Respublikasında əhalinin ərzaq məhsulları ilə
etibarlı təminatına dair Dövlət Proqramı"na
uyğun olaraq, ərzaq ehtiyatlarının toplanması, kənd
təsərrüfatı istehsalının
artırılması, torpaqlardan daha səmərəli istifadənin
təmin edilməsi, eləcə də bu istiqamətdə
stimullaşdırıcı mühitin
formalaşdırlması və s. 2010-cu ildə də dövlətin
daxili iqtisadi siyasətinin prioritetlərindən olmuşdur. Ona görə ki, etibarlı ərzaq təminatı
ölkənin milli təhlükəsizliyinin ayrılmaz tərkib
hissəsi olan iqtisadi təhlükəsizliyin təmin edilməsidir.
Məlumdur ki, iqtisadi təhlükəsizliyin əsasında
cəmiyyətin və ölkənin iqtisadi maraqları durur. Eyni zamanda,
iqtisadi təhlükəsizlik iqtisadi maraqların təmin
olunmasına mane olan daxili və xarici amillərin zərərsizləşdirilməsidir.
Deməli, iqtisadi təhlükəsizlik, həm
də iqtisadiyyatın səmərəli fəaliyətinin təmin
olunmasını tələb edir. İqtisadiyyat
inkişaf etmirsə və ya ölkənin resurs
ehtiyatlarının imkan verdiyi lazımi sürətlə
inkişaf etmirsə, onun daxili və xarici təhlükələrə
müqavimət göstərmək və uyğunlaşmaq
imkanları məhdudlaşır. Eyni
zamanda, iqtisadi maraqlar yalnız iqtisadiyyatın səmərəli
fəaliyyət göstərdiyi bir halda təmin olunur.
İqtisadiyyatın səmərəli fəaliyyəti dedikdə
isə ölkədə geniş təkrar istehsalın həyata
keçirilməsi, ölkənin resurs potensialının səmərəli
bölgüsü və istifadə olunması, dünya təsərrüfatında
səmərəli iştirakın və sosial
yönümlü iqtisadiyyatın təmin olunması və s.
nəzərdə tutulur. Azərbaycan hökumətinin
iqtisadi siyasətinin də əsas məqsədi məhz
yuxarıda qeyd olunanların təmin edilməsi, əhalinin
bütün əsas ərzaq məhsullarına olan tələbatının
tam şəkildə ödənilməsidir. Təbii ki, bu istiqamətdə vacib məsələlərdən
biri ölkənin taxılla təmin olunmasıdır ki, bu da
dövlətin diqqət mərkəzində olan və demək
olar ki, artıq həll edilmiş bir problemdir.
İstər son illər, istərsə də ötən
doqquz ayda əldə edilmiş iqtisadi uğurların əsas
səbəbi ölkə başçısı cənab
İlham Əliyevin həyata keçirdiyi
balanslaşdırılmış daxili və xarici siyasətin
bəhrəsidir. Məhz düzgün siyasətin nəticəsidir
ki, artıq Azərbaycan nəinki regionda, hətta dünyada
söz sahibi olan, özünəməxsus mövqeyə malik
islahatçı bir ölkə kimi qəbul edilir. Təbii ki, güclü iqtisadi dayağı olmayan
siyasət lazımi səmərə verə bilməz.
Bunu çox düzgün qiymətləndirən Azərbaycan
hökuməti iqtisadi və siyasi sahədə
atdığı addımları uzlaşdırmış və
nəticədə də məqsədə nail olmuşdur.
Yekunda
ölkə başçısının Nazirlər Kabinetinin
iclasında səsləndirdiyi bir fikri xatırlatmaq yerinə
düşərdi: "Bütün şəhərlərimiz
abadlaşır, gözəlləşir, müasirləşir
və bu, çox sevindirici haldır. Əlbəttə
ki, Bakı - bizim paytaxtımız, sevimli şəhərimiz
dünyanın ən gözəl şəhərləri
sırasındadır. Bunu təkcə biz
yox, Bakıya gələn hər bir insan görür və
qeyd edir. Ancaq mən istəyirəm ki,
bütün şəhərlərimiz gözəl, abad olsun və
orada yaşamaq üçün bütün şərait
olsun".
Bu fikirlər vəzifəsindən və yaşından
asılı olmayaraq hər bir insanın gələcək fəaliyyəti
üçün proqram əhəmiyyətli tövsiyədir və
hər kəs qarşısında duran vəzifələri, məhz
bu fikirləri rəhbər tutaraq yerinə yetirməlidir.
Aqil ƏSƏDOV,
AMEA-nın İqtisadiyyat İnstitutunun
şöbə müdiri, iqtisad elmləri
namizədi
Xalq qəzeti.- 2010.- 3 noyabr.- S. 3.