Qax: Ulu öndərin bayrağı Uludağda dalğalandı

Xalqımızın həyatında, dövlətçiliymizin tarixində milli-mənəvi dəyərlərimizi özündə yaşadan tarixi günlər, əlamətdar hadisələr çoxdur. Cəmiyyətimizin inkişafı ilə bağlı yaranmış milli-adət ənənələrimiz günbəgün yeniləşir, daha da zənginləşir, təqvimimizə yeni bayramlar, yaddaqalan tarixi günlər daxil olur.

Onlardan biri də 9 noyabr - Dövlət Bayrağı günüdür. Məlum olduğu kimi bu il sentyabr ayının 1-də Respublika Prezidenti İlham Əliyevin iştirakı ilə Bakı şəhərində "Bayraq Meydanı"nda hazırda "Ginnesin rekordlar kitabı"nda təsbit edildiyi kimi dünyanın ən uca bayrağı olan Azərbaycanın üçrəngli bayrağı qaldırılmışdır. Azərbaycan Prezidentinin 17 noyabr 2009-cu il tarixli sərəncamı ilə isə 9 noyabr günü Azərbaycan Dövlət Bayrağı Günü kimi elan olunmuşdur. Milli adət-ənənələrimizi daha da zənginləşdirən, milli birliyimizi təcəssüm etdirən, mübarizlik simvolumuz olan bayrağımıza xalqın sevgisini nümayiş etdirməyə xidmət edən Dövlət Bayrağı Günü bu il ilk dəfə ölkəmizin hər yerində olduğu kimi Qaxda da rayon ictimaiyyəti tərəfindən böyük bayram ovqatı ilə qeyd olunmuşdur.

Rayon icra hakimiyyətinin hazırladığı tədbirlər planına əsasən bu əlamətdar gün münasibətilə rayonun təhsil, mədəniyyət müəssisələrində, idman və gənclər idarələrində bir sıra mədəni-kütləvi tədbirlər, konfranslar, müsabiqələr, idman yarışları keçirilmiş, ədəbi-bədii kompozisiyalar təşkil olunmuşdur. Ayın 8-də isə əllərində gül-çiçək, üzlərində təbəssüm, böyük bayram ovqatı ilə şəhərin mərkəzi meydanına axışan insanların ardi-arası kəsilmirdi. Buraya toplaşan insanlar - başda rayon rəhbərliyinin nümayəndələri, idarə, müəssisə kollektivləri, gənclər, rayon sakinləri, ağsaqqallar Dövlət Bayrağı Günü münasibətilə öz sevinc və fərəhlərini ifadə etdilər. Onlar öncə 1990-cı ildə Azərbaycanın hazırkı üçrəngli bayrağını dövlət bayrağı kimi Naxçıvan Ali Sovetinin binasında dalğalandıran, müasir Azərbaycan dövlətinin memarı, türk dünyasının qəhrəman oğlu, ulu öndərimiz Heydər Əliyevin şəhərin mərkəzi meydanında ucaldılan abidəsi önünə tər gül-çiçək düzərək hörmət və ehtiramlarını bidirdilər.

Sonra şəhərin Nizami parkında Dövlət Bayrağı Günü münasibətilə rayonun mədəniyyət kollektivlərinin üzvləri böyük konsert proqramı ilə çıxış etdilər. İştirakçılar meydana gətirilən Azərbaycan bayrağına ehtiram nümayiş etdirdilər.

Noyabrın 9-da isə Bayraq Günü münasibətilə keçirilmiş müxtəlif müsabiqələrin, idman yarışlarının qaliblərindən ibarət bir qrup gənc dövlətçiliyimizə sədaqət, vətənimizə məhəbbət əlaməti olaraq dövlətimizin atributu, milli birlik rəmzi olan Azərbaycan Respublikasının Dövlət bayragını rayonun ən mənzərəli guşələrindən birinə - uca Uludağın yamacına sancdılar.

İ.MUSAOĞLU

Xalq qəzeti.- 2010.- 11 noyabr.- S. 7.