Masallıda Dövlət Bayrağı Meydanının açılış mərasimi olub

Gözəl cənub şəhərindəki təzə meydanda dövlət bayrağımız qaldırılan anlarda xəyalım qanadlanıb ötən əsrin tarix dərslərindən öyrəndiyim "sübh" çağlarına doğru səmt aldı.

Qürurla xatırladım ki, doxsan iki il öncə dünya dövlətlərinin bayraqları sırasında ilk dəfə Azərbaycan Xalq Cümhuriyyətinin də bayrağı dalğalanmağı başlayıb. Milli dövlətçiliyimizin ali rəmzi kimi tanınıb üçrəngli, ay-ulduzlu bayrağımız. Amma Azərbaycan zirvəsinin tacı olan bu bayrağın ilkin bəxtəvərliyi cəmi ilyarım çəkib. Üstünə çilənən şəhid qanları ilə yenicə uca urvat tapan bayrağımız 1920-ci ilin aprelində dirəklərdən düşürülərək ürəklərimizə enib. Millət yetmiş il həsrətini çəkib öz bayrağının. Bir də bu bayraq SSRİ-nin süqutu ərəfəsində təkrar açılıb, meydanlarda, binalarda özünə layiq ucalığına yüksəlib.

Dünyanın ən mötəbər yerlərində bayraqlara qoşulub boy göstərən Azərbaycan bayrağı vüqar rəmzimizdir! Havada dalğalanan ipəyin, qumaşın arasında sanki küləklər də sehirlənir! BMT-nin qarşısındakı bayraqlar səfində onu hər görəndə sonsuz iftixar hissi keçiririk. Tezliklə Şuşanın dumanlı başında, Laçının, Kəlbəcərin qaşında görmək istədiyimiz milli bayrağımız hər birimizin and yeridir...

Masallı şəhərinin mərkəzində Dövlət Bayrağı Meydanının təntənəli açılış mərasiminə rayon ictimaiyyətinin çoxsaylı nümayəndələri toplaşmışdı. Fəxri qarovul düzülmüşdü. Rayon icra hakimiyyətinin başçısı Qəzənfər Ağayev mərasimi açaraq dövlət bayrağımızın şanlı tarixindən bəhs etdi. O dedi ki, Azərbaycan Xalq Cümhuriyyəti Nazirlər Şurasının 9 noyabr 1918-ci il tarixli qərarı ilə üçrəngli, mərkəzində ağ aypara və səkkizbucaqlı ulduz olan bayraq əsas dövlət rəmzi kimi qəbul edilib.

Natiq sonra qeyd etdi ki, 1990-cı il noyabrın 17-də AXC-nin bayrağı Azərbaycanda yenidən üzə çıxıb. Bu bayraq ulu öndər Heydər Əliyevin rəhbərliyi ilə Naxçıvan Ali Məclisinin sessiyasının keçirildiyi zala gətirilib və Azərbaycan Ali Sovetinin qarşısında vəsatət qaldırılaraq tələb edilib ki, Azərbaycanın dövlət bayrağı kimi qəbul edilsin. 1991-ci ilin 5 fevralında bu, Azərbaycan Respublikasının Qanunu ilə təsdiqlənib. Nəhayət, ötən il noyabrın 17-də Azərbaycanda Dövlət Bayrağı günü təsis olunub. Bu il sentyabrın 1-də Bakıda dünyanın ən uca bayrağı qaldırılıb. Möhtəşəm bayrağın ucaldığı meydanın təntənəli açılış mərasimində çıxış edən Möhtərəm Prezidentimiz İlham Əliyev bildirib ki, bu çox əlamətdar və tarixi bir gündür, dövlət bayrağımız bizim milli dəyərimizdir...

İcra hakimiyyətinin başçısı Qəzənfər Ağayev mərasim iştirakçılarını Masallıda da Bayraq Meydanının tikilib istifadəyə verilməsi və gözəl bayram münasibətilə təbrik etdi. Dövlət himninin sədaları altında üçrəngli bayrağımız uca dirəyə qaldırıldı və həzin payız küləyində dalğalanmağa başladı. Alqış sədaları ətrafa yayıldı.

Sonra elə bu meydandaca mərasim iştirakçılarına geniş konsert proqramı təqdim edildi. Bayram atəşfəşanlığı oldu.

Əli NƏCƏFXANLI

Xalq qəzeti.- 2010.- 11 noyabr.- S. 6.