Binəqədi rayonunda Konstitusiya Gününə həsr olunmuş tədbir keçirilmişdir

Müstəqil Azərbaycan Respublikasının demokratik tələblərə tam cavab verən, ümumbəşəri dəyərləri özündə ehtiva edən Ali Qanununun - Konstitusiyanın qəbul olunmasından 15 il ötür. 1995-ci il noyabrın 12-də ümumxalq səsverməsi yolu ilə qəbul edilmiş Konstitusiya ötən müddətdə ölkəmizin beynəlxalq nüfuzunu artırmaqla yanaşı, vətəndaşların hüquq və azadlıqlarının, sosial ədalət prinsipinin, bir sözlə, hər bir Azərbaycan vətəndaşının normal yaşayış və fəaliyyətinin təminatçısına çevrilmişdir. Ulu öndər Heydər Əliyevin rəhbərliyi ilə müstəqilliyini və mövcudluğunu qorumuş Azərbaycan Respublikasının ən böyük tarixi nailiyyəti məhz özünün demokratik, sivil norma və dəyərlərə cavab verən Konstitusiyasını qəbul etməsidir.

Dünən ölkəmizin hər yerində olduğu kimi, Binəqədi Rayon İcra Hakimiyyətində də Konstitusiyanın 15-ci ildönümü böyük bayram təntənəsi ilə qeyd olundu. Tədbiri giriş sözü ilə icra hakimiyyətinin başçısı Alı Qocayev açdı. Dövlət quruculuğu sahəsində başladığı böyük işi məntiqi şəkildə davam etdirərək müstəqil Azərbaycanın siyasi tarixində yeni bir mərhələnin əsasını qoyan demokratik Konstitusiyasının qəbulunu ulu öndər Heydər Əliyevin Vətəni, xalqı qarşısında ən böyük tarixi xidməti olduğunu diqqətə çatdıran A.Qocayev bu ali sənədin ötən illər ərzində Azərbaycanın beynəlxalq nüfuzunun artırılması və əsl vətəndaş cəmiyyətinin tam bərqərar olunması sahəsində misilsiz rol oynadığını bildirdi. Qeyd etdi ki, ümummilli lider Heydər Əliyevin rəhbərliyi ilə hazırlanmış və xalqımızın yekdilliklə qəbul etdiyi Əsas Qanunumuz siyasi cəhətdən bitkin, hüquqi cəhətdən kamil, dil və üslub baxımından sadə və son dərəcə əhatəli bir ali sənəd olmaqla bərabər, Azərbaycan Respublikasının götürdüyü beynəlxalq öhdəlikləri və ümumbəşəri dəyərləri özündə tam əks etdirir.

İcra hakimiyyəti aparatı hüquq şöbəsinin müdiri Nəsimi Cəfərov Azərbaycanın tarixində sayca dördüncü olan yeni Konstitusiyanı xalqımızın keçdiyi tarixi yolun məntiqi nəticəsi kimi dəyərləndirdi. O, bu ali sənədin üçdə bir hissəsinin vətəndaş hüquq və azadlıqlarının qorunmasına həsr edildiyini ölkəmizdə insan amilinə verilən yüksək qiymətin bariz nümunəsi olduğunu diqqətə çatdırdı. Bildirdi ki, Azərbaycan Respublikasının Konstitusiyasına əsasən dövlət hakimiyyətinin qanunvericilik, icra və məhkəmə hakimiyyətinə ayrılması ölkəmizin hüquqi dövlət kimi mövcudluğuna əsas yaradır ki, bu da müstəqilliyimizin əbədi və daimi olmasına başlıca təminatdır.

Məruzəçi qeyd etdi ki, xalqımızın dövlətçilik ənənələrinə, milli və ümumbəşəri dəyərlərə, sivil dövlətlərin konstitusiya təcrübəsinə əsaslanan Əsas Qanunumuz qəbul olunduğu andan Azərbaycanın ictimai-siyasi həyatında, ölkəmizin beynəlxalq nufuzunun daha da artmasında müstəsna rol oynamışdır. Natiq daha sonra ümummilli lider Heydər Əliyevin təklif və tövsiyəsi ilə 2002-ci ildə ümumxalq referendumu yolu ilə Konstitusiyamıza tarixi zərurətdən yaranmış dəyişikliklərin edilməsini demokratiya yolunda növbəti mühüm addım kimi səciyyələndirdi. Məruzəçi ulu öndərin siyasi kursunun layiqli davamçısı, möhtərəm Prezidentimiz İlham Əliyevin rəhbərliyi ilə son illər Azərbaycanın böyük inkişaf yolu keçdiyinin, ölkəmizin beynəlxalq nüfuzunun xeyli artmasının əsas səbəblərindən birinin də məhz demokratik Konstitusiyanın olduğunu vurğuladı.

İcra hakimiyyəti aparatının şöbə müdiri Ramiz Göyüşov belə bir məqamı diqqətə çatdırdı ki, respublikamızın bütün vətəndaşları kimi, Binəqədi rayonunun sakinləri də ümummilli liderin Konstitusiyanı öyrənmək və onu qorumaqla bağlı tövsiyələrinə daim əməl etməyə çalışırlar.

Sonda rayon gənclər və idman idarəsi tərəfindən Konstitusiya Günü ərəfəsində keçirilən "Bilik viktorinası"nın qalibləri mükafatlandırıldı.

Vaqif BAYRAMOV

Xalq qəzeti.- 2010.- 13 noyabr.- S. 7.