Xalqın Mübariz oğlu

Mübariz yaxşı bilirdi ki, o döyüşdən sağ-salamat çıxa bilməyəcək. Ancaq Vətən, torpaq sevgisi, vətənpərvərlik ruhu onu şəhidlik zirvəsinə ucaltdı. Mübariz bütün gənclər üçün örnəkdir, nümunədir.

İlham ƏLİYEV,

Azərbaycan Respublikasının Prezidenti

Əsgər müqəddəsdir, çünki o, müqəddəs torpağımızın keşikçisidir. Onu müqəddəsliyə ucaldan içdiyi and, götürdüyü silah, geydiyi əsgər paltarı, yatdığı kazarma, əməl etdiyi sıra və döyüş nizamnamələridir. Əsgərin vətənə olan məhəbbəti, öz borcunu şüurlu anlaması, vətən üçün canından keçməyə hazır olması da müqəddəslik rəmzləridir. Bu sonuncu keyfiyyətləri heç kim görmür, çünki onlar əsgərin qəlbindədir. Əsgərin vətən qarşısında borcuna münasibəti nə içdiyi andın, nə imzaladığı müqavilənin, nə də yazdığı tərcümeyi-halın mətnində olur. Bu ancaq əsgərin qəlbində olur, ana südü ilə onun qanına hopur.

Bu gün biz fəxrlə deyə bilərik ki, vətən üçün könüllü şəhidliyi qəbul edən, bununla fəxr edən balalarımız var. Mübariz İbrahimov, Fərid Əhmədov kimi qəhrəmanlar yetirən xalq heç vaxt məğlub hesab edilə bilməz. Bu gənclərin qəhrəmanlığı xalqımızın həyatında, yeni nəslin düşüncə tərzində yaranan mühüm hadisədir. Doğru deyirlər ki, qəhrəmanları tarix yetirir, onun məntiqi ehtiyacları yaradır.

Mən də bir ana və müəllimə kimi Mübariz İbrahimovun hünərini eşidən andan bu hadisənin sehrindəyəm. Onun valideynlərinə yazdığı vida məktubundakı bir məqam mənə xüsusilə təsir edib: "Şəhid olsam, ağlamayın. Əksinə sevinin ki, o mərtəbəyə yüksəldim". Mübariz şəhidlik mərtəbəsinə yüksəlməyi özü üçün ideal seçibmiş. Bu hədəf, bu yol bizim cəmiyyətimiz üçün təzə əqidə və iman örnəyidir. Bu durumu mən milli yetkinlik təkamülündə əlamətdar hadisə sayıram.

Mübariz İbrahimovun vida məktubu təsdiq edir ki, o nəinki öz şəhidlik yolunu çoxdan seçibmiş, onun içində inamla birgə həyəcan da, kövrək şübhələr də varmış: "Niyyətim necə baş tutacaq, düşündüyüm kimi alınacaqmı?" O anlayırdı ki, şəhidlik yolu çox çətin yoldur. İnsan qəlbi bütün hallarda şübhələri də, iradəni zəiflədən tərəddüdləri də özündə daşıyır. Ona görə intiqam barədə milyonlar düşünür, amma, intiqam yolunu tək-tək qazilər keçə bilir.

Şəhidin isə əməli, hünəri onun niyyətinə bərabər olmalıdır. Məqsəd ölmək deyil, düşməndən qisas almaqdır, ona hiss olunacaq zərbə vurmaqdır. Bunun üçün sarsılmaz iradə, qorxunu yaxın qoymayan, nifrətlə döyünən cəsur ürək lazımdır. Şəhid balamız bunu dərk edir və bunun həyəcanları ilə yaşayırmış.

Bu həyəcanlar onun atasına son iki zəngində, məktubunda onun üçün çoxlu dua etmək xahişlərində də görünür. O, öz iradəsinin qətiliyi, əməliyyatı uğurlu aparmaq üçün Allahdan da yardımlar diləyirdi. Öz yaxınlarından da xeyir-dua gözləyirdi. Bu əl boyda məktub insan psixologiyasının misilsiz bir sənədidir. Canını borca, əqidəyə, imana vermiş adamın sənədi. Orada Mübarizin mənəvi seçimi etdiyi və bu seçimdən daxili bir sakitlik və əzm tapdığı aşkar duyulur. Hadisədən bir gün qabaq atası ilə telefon danışığında nəsə demək istəmişdi, amma, lazımi sözləri tapa bilməyib adi qaydada vidalaşmışdı.

Axı, o, düşmənin üstünə, Şiştəpə yüksəkliyinə tək gedirdi. Üstəlik qaranlıqda, cəbhə xəttini, minalı sahəni keçmək lazım idi. Lakin, bunlar da məqsəd deyildi. Məqsəd düşməni öz yuvasında qəfil yaxalamaq, ona sarsıdıcı zərbə vurmaq idi. Şəhid balamız sanki düşmənlərə demək istədi: fövqəlgüclərin himayəsi, əsgəri köməyi, silah-sursat və məlumat dəstəyi siz namərdləri Azərbaycan xalqının ağır qisasından xilas edə bilməyəcək, arxayınlaşmayın. Arxalı köpək həmişə qurd basa bilməyəcək. Şəhidlik imanına tapınmış yüzlərlə Mübarizlərin intiqam yanğısı hələ irəlidədir və biz onu görəcəyik.

Mübariz İbrahimovun rəşadəti erməni faşistlərinə qarşı yeni bir gücün həyata gəldiyini göstərir. Bu şəhadəti səadət və mübarək bir ucalıq bilən bir əsgər iradəsidir. Bu iradənin komandiri, nizamnaməsi, idarəedici rəhbəri yoxdur. Onun yeganə rəhbəri qəlbində gəzdirdiyi Vətən eşqidir. Bu əsgərə dünya nemətlərinə, madiyyata bağlanmaq, şəxsi mənfəət axtarmaq, siyasətbazlıq yaddır. Bu əsgərin gücü, onun döyüş potensialı ermənilər üçün ölümdən də qorxuludur. Bu əsgərin alacağı intiqamın qarşısını heç nə ala bilməz. Bu, qaçılmazlığın və labüdlüyün intiqamıdır. Mübariz İbrahimovların gücü gec-tez erməni dövləti adlı şər yuvasını dağıdacaq və əzəli torpaqlarımızı, Qarabağla birgə Qərbi Azərbaycanı da vətənimizlə birləşdirəcəkdir.

Şəhid balamızın həyətinə, atası Ağakərim kişinin, anası Şamama xanımın ziyarətinə gələnlərin sayı-hesabı yoxdur. Belə bir oğulu adi ata-ana, adi məktəb yetirə bilməzdi. Mübarizin valideynləri əməlisaleh, ağzı dualı, inamlı insanlardır. Elə ona görə Mübarizin yaraşıqlı qaməti, gözəl siması bir nur mücəssəməsi idi.

Şəhidin ocağını ziyarət edənlərin, onun ata-anasını görməyə gələnlərin çoxu onlara başsağlığı yox, şəhadət mübarəkliyi verirlər, "Mübarizin şəhadəti mübarək olsun", - deyirlər. Onu həqiqi bir cihad şəhidi kimi anırlar. Bu ziyarətçilər xalqımızın sadə insanlarıdır. Lakin, bu insanların qəlbi də erməni zülmünə və istilasına nifrətlə döyünür, intiqam alovu ilə yanır. Bu alov bütün Azərbaycan gəncliyinə sirayət edib.

Mübarizin uşaqlığı və gəncliyi Biləsuvarın Əliabad adlı balaca kəndində keçib. O, körpəlikdən səmimi ürəyi, doğruçuluğu ilə ailə üzvlərinin, müəllimlərinin, qonşularının diqqətini cəlb edib. Deyirlər, uşaqlıqda o, balaca və çəlimsiz olub. Amma, əsgər yaşı yetişəndə Tanrı bir el igidinə lazım olan hər şey bəxş edib ona: boy, yaraşıq, iradə, manqal kimi alovlu ürək. O, beş yaşından idmana can atırdı. Bu da bir qismət və hikmətdir, çünki onun üçün taleyin hazırladığı yol pəhləvan gücü, soyuqqanlı döyüşçü ürəyi tələb edirdi. Bu keyfiyyətlər əsgərlik ərəfəsində artıq onda var idi.

Mübariz hərbi xidmətini Azərbaycan Ordusunun seçmə hissələrindən birində- Daxili Qoşunların xüsusi təyinatlı hissəsində çəkib başa vurdu. Bu hissədə o, döyüşçü və əsgər hazırlığının bütün sirlərini öyrəndi, peşəkar hərbçi keyfiyyətləri qazandı. Xüsusilə öz fiziki hazırlığını artırdı. Lakin, onun qeyri-adi insan olduğunu, dünyaya xüsusi məqsədlə gəldiyini hər yerdə hiss edirdilər. O, əsgərləri müqəddəs sayırdı, çünki şəhidlik yolunun onlara məxsus olduğunu bilirdi. Ona görə də öz əsgərlərinə qarşı çox şəfqətli idi. Onların üstündə əsir, öz əməkhaqqından onlara xərcləyirdi. Onların əsgər qəlbinin və iradəsinin formalaşmasına çalışırdı. Ordudan tərxis olunandan sonra gizirlər məktəbinə daxil oldu, çünki artıq öz əsgər missiyasını dərk etmişdi, o, adi insan həyatı yaşaya bilməzdi, bu missiya onun həyatının mənasına çevrilmişdi.

Gizirlər məktəbindən sonra o, hərbi hissələrdən birinə göndərildi. Lakin, birinci gündə rəhbərliyə raportlar yazıb cəbhə bölgəsinə dəyişilməyini tələb etdi. Nəhayət, onu Tərtər rayonundakı hərbi hissəyə göndərdilər. Burada isə o heç bir ay xidmət etmədi. Amma, bu qısa müddət də onun öz sonuncu qulluq etdiyi hərbi hissəni, düşmən üzərinə yürüşünün başladığı postu şöhrətləndirməsi üçün kifayət etdi. Adi əsgər xidmətindən uca olan əbədi şəhidlik yürüşünə getdi. O, elansız və danışıqsız getdi. O, tək getdi. Mübariz çoxdan anlamışdı ki, təklik zəiflik deyil, təklikdə ilahi bir güc də vardır, amma, bu güc Allahın seçmə insanlara verdiyi bir qismətdir. O, bu qismətin mənasını bilirdi. Ona görə vida məktubunda özü haqqında çox aydın deyirdi: "O mərtəbəyə yüksələ bilsəm..." O yüksəldi və Azərbaycan əsgərinin, Azərbaycan şərəfinin mərtəbəsini də qaldırdı, bizim başımızı uca elədi. Buna görə nəsillər ona minnətdar olacaqdır.

Hadisədən dərhal sonra mətbuatda bir-birini tamamlamayan, qeyri-səhih xəbərlər yayıldı. Lakin, Mübariz İbrahimovun misilsiz hünərinə ən doğru qiyməti Azərbaycan Respublikası Silahlı Qüvvələrinin Ali Baş Komandanı, Prezidentimiz İlham Əliyev verdi: Azərbaycan Respublikasının müstəqilliyinin və ərazi bütövlüyünün qorunub saxlanmasında müstəsna xidmətlərinə görə və göstərdiyi rəşadətə görə Mübariz Ağakərim oğlu İbrahimova Azərbaycanın Milli Qəhrəmanı adı verdi. Əlavə bir sərəncamla onun xatirəsini əbədiləşdirmək üçün tədbirlər müəyyən etdi.

Cənab Prezidentin böyük səyi ilə Mübarizin və Fəridin cəsədləri əsirlikdən azad edildi. Vida mərasimində iştirak edən möhtərəm Prezidentimiz bir daha Mübarizin qəhrəmanlığından geniş danışdı: "Mübariz İbrahimov qeyri-bərabər döyüşdə 5 düşməni məhv edərək, 3-nü yaralayaraq şəhid olubdur. Mübariz yaxşı bilirdi ki, o, döyüşdən sağ-salamat çıxa bilməyəcək. Ancaq, Vətən, torpaq sevgisi, onda olan vətənpərvərlik ruhu onu şəhidlik zirvəsinə ucaltdı. Mübariz bütün gənclər üçün örnəkdir, nümunədir". Bu gün Mübarizin ailəsi, oxuduğu orta məktəb, boya-başa çatdığı Əliabad kəndi ziyarət yeri olub.

Mübariz İbrahimov öz misilsiz şəhid hünəri ilə, ermənilərə vurduğu sarsıdıcı zərbəsi ilə sadə Azərbaycan vətəndaşlarının ürəyindən xəbər verib onların içindəki intiqam hissini alovlandırdı.

Xalqımız dünən də, bu gün də özünü yaltaq və qorxaq erməni ordusundan üstün və güclü hesab edir, gələcəkdə də güclü hesab edəcəkdir. Müstəqillik dövründə böyümüş gənclik Qarabağ müharibəsinin, itirilmiş torpaqlarımızın dərslərini və faciəli nəticələrini yaxşı mənimsəyib. Bu işdə bizim müəllimlərimizin, məktəblərimizin işi səmərəli olmuşdur. Bu isə orduya çağırılan gəncliyin vətənpərvərlik tərbiyəsində, bu tərbiyənin keyfiyyətində açıq şəkildə özünü göstərir.

Bu gün ordumuzun durumu, püxtələşməsi, qüdrətli olması şərəf və məmnunluq doğurur. Bunu jurnalistlərlə görüşdə düşmənə nifrətdən danışan əsgər və zabitləri dinləyərkən də hiss etmək olur. Şübhə yoxdur ki, Mübariz İbrahimovun misilsiz qəhrəmanlığı ordumuzda nümunə və örnək timsalı olacaq, gənc əsgərlərimizin düşmənə nifrət və döyüşkənlik ruhunda tərbiyəsinə daha artıq kömək edəcəkdir. Bu nümunənin təbliği, qəhrəmanın həyat yolunun öyrədilməsi tərbiyəçilərin, müəllimlərimizin və komandirlərimizin müqəddəs borcudur.

Mübariz İbrahimovun vətənpərvərliyi, əsgər hünəri bizim xalqın, cəmiyyətin mənəvi inkişafında yeni bir mərhələ açır... Bu mərhələdə ruh bədəndən, ideal nəfsdən, əqidəyə sədaqət şəxsi emosiyalardan qat-qat üstündür.

Mübariz İbrahimov ölməz xatirəsini öz xalqına bəxş edib. Bu xatirəni əbədiləşdirməyə bizə heç kəs mane ola bilməz. Mübarizin şəkli və vida məktubu bütün idman və orta təhsil məktəblərimizin, kazarmalarımızın, məscidlərimizin divarlarından asılmağa layiqdir. Qoy onun məktubu erməni faşizminə qarşı açdığı yeni mübarizə yolunun təcəssümü olsun, vətən balalarını müqəddəs müharibəyə çağırsın.

Erməni irticasına və bütün düşmənlərə qarşı mübarizədə, Vətəni qorumaqda bizim milli əsgərimizin söykənməli olduğu öz mənəvi-tarixi dəyərlərimiz vardır. Ordumuzun, xalqımızın yaşam gücü də bu dəyərlərdədir. Bu dəyərlər torpaq, Vətən, müqəddəs mənəvi dəyərlərdir . Biz onları qrantlara və dialoq oyunbazlığına dəyişə bilmərik.

"Mənim yolum ayrıdır". Mübariz İbrahimov bu sözləri çoxlarına, hətta ailə üzvlərinə də demişdi. Həqiqətən, onun yolu ayrı idi. Qəhrəman əsgərimiz o yolu tək, cığırdan kecən kimi keçdi. Bu gün isə bu yol bütöv bir nəslin , bütöv bir ordunun məslək yolu olub. Mübarizin açdığı yol çox genişdir, o qədər genişdir ki, onu insan təsəvvürünə sığdırmaq çətindir. Çünki hər qəhrəman o yola öz ürəyinin içindən çığır salır. Bu cığırın mənzili isə əbədiyyətdir: həm dünyəvi, həm də mənəvi əbədiyyətdir.

Mübarizə xalq məhəbbətinin əsl nümunəsinə çevrilmiş vida mərasimini xatırlayıram. Cənab Prezidentin bu mərasimdəki çıxışı hər bir Azərbaycan vətəndaşında sabaha böyük ümid yaratdı. Möhtərəm Prezident nikbinliklə bildirdi: "bu gün, eyni zamanda çox şərəfli bir gündür. Çünki biz öz övladlarımızı burada böyük ehtiramla son mənzilə yola salırıq. Əminəm ki, onların əziz xatirəsi Azərbaycan xalqının qəlbindən heç vaxt silinməyəcək. Bizim ordumuzda minlərlə, on minlərlə Mübariz kimi, Fərid kimi qəhrəmanlar vardır. Onlar Ali Baş Komandanın əmrini gözləyirlər. Onlar öz doğma torpaqlarını azad etmək üçün hər an hazırdırlar". Bunu bütün Azərbaycan xalqı bilir və inanır ki, o gün çox da uzaqlda deyil.

Xalqımız qəhrəman övladı ilə vidalaşmaq üçün II Fəxri Xiyabana axışırdı. Qəribə də olsa, mən o gün böyük fəxarət hissi keçirirdim. Qəhrəman övladımızın vida mərasiminə gələnlərin çoxu gənclər idi. O gənclər ki, burada, Mübarizin məzarı üstündə müqəddəs torpaqlarımızı azad etməyə hazır olduqlarına and içirdilər. Bax, bu ruhu yaradan qəhrəman övladlarımıza ulu Tanrıdan rəhmət diləyirik.

Nurlana ƏLİYEVA,

YAP Qadınlar Şurasının sədri,

professor

Xalq qəzeti.- 2010.- 20 noyabr.- S. 6.