Yeni Azərbaycan Partiyası zamanın tələbi və xalqın arzusu ilə yaranmışdır

Ötən 18 il sübut etdi ki, bu təşkilat regionun ən qüdrətli siyasi partiyalarından biridir

1992-ci ildə Naxçıvanda ağır bir şəraitdə, böyük təzyiqlər altında biz partiyanın yaranması ilə əlaqədar xeyli işlər gördük və ilk konfrans keçirdik. ...Yeni Azərbaycan Partiyası o vaxtkı mövcud vəziyyətdə bütün Azərbaycan xalqının mənafelərinə xidmət etmək üçün və xalqın o ağır dövründə ölkəmizin qarşısında duran məsələlərin həll edilməsi üçün zamanın tələblərinə uyğun olaraq, zəruriyyətdən yaranmış bir partiyadır.

Heydər ƏLİYEV,

Ümummilli lider

Azərbaycanın bir əsrdə ikinci dəfə dövlət müstəqilliyinə qovuşmasından sonra əldə etdiyimiz nailiyyətlər, yaşadığımız məhrumiyyətlər, ulu öndər Heydər Əliyevin hakimiyyətə qayıdışı və başqa xüsusi məqamlarla bağlı çoxsaylı kitablar yazılmış, radio-televiziya verilişləri hazırlanmışdır. Tarixi proseslərin olduğu kimi qiymətləndirilməsi baxımından həmin əsərlərin hamısı dəyərlidir. Xüsusən, ötən əsrin 90-95-ci illərində baş vermiş ictimai-siyasi hadisələr haqqında qələmə alınmış faktlar, lentlərin yaddaşına köçürülmüş məqamlar gələcək nəsillər üçün daha böyük önəm kəsb edəcəkdir. Çünki həmin beş ildə ölkəmizdə kimin kim olduğu, xalqın istiqlaliyyəti, ağ günə çıxması üçün kimin mübarizə apardığı, kimin "keçəl Həmzə"lik etməsi barədə yazılanlar 30-40 ildən sonra çox dəyərli olacaqdır. Bu gün böyük əminlik və məmnunluqla yazırıq ki, xəyalən təsəvvür etdiyimiz həmin gələcəyin azərbaycanlıları təkcə ölkəmizin deyil, bütün regionun ən güclü siyasi təşkilatlarından olan Yeni Azərbaycan Partiyasının yaranması, siyasi fəaliyyətə başlaması, partiya sədrinin siyasi hakimiyyətə qayıdışından sonra respublikamızın keçdiyi möhtəşəm inkişaf yolu haqqında çox zəngin materiallarla tanış ola biləcəklər.

Bəli, bu istiqamətdə ərsəyə gətirilmiş əsərlər istənilən qədərdir və belə kitabların yazılması Azərbaycan xalqı mövcud olduqca davam edəcəkdir. Son 20 ilin ictimai-siyasi proseslərinə mütəxəssis kimi, peşəkarcasına münasibət bildirən politoloqların fikrincə isə yazılmış və yazılacaq bütün kitabların fövqündə duran daha mükəmməl və daha möhtəşəm bir əsər vardır. Bu əsər dünya azərbaycanlılarının ümummilli lideri Heydər Əliyevin tarixi bir müraciətidir. Ulu öndərin 2001-ci il, yeni əsr və üçüncü minillik münasibətilə Azərbaycan xalqına müraciəti yaşadığımız eranın XX və XXI yüzilliklərinin, İkinci və Üçüncü minilliklərin qovşağında öz xalqına üz tutan dahi liderin mükəmməl qiymətləndirməsi idi. Elmi ədəbiyyatda qısaca olaraq "Azərbaycan XXI əsrin və üçüncü minilliyin ayrıcında" adı ilə təqdim olunan həmin müraciətdə milli tariximizin bütün dövrləri kimi ötən əsrin 90-cı illərinin əvvəlləri də çox incə detallarına qədər təhlil edilir. Həmin müraciətə üz tutan istənilən oxucu qeyd edilən mürəkkəb illərə bir də qayıdırmış kimi adı çəkilən hadisələri yenidən göz önünə gətirir.

Ulu öndərin müraciətinin bilavasitə indi haqqında söz açdığımız dövrü əhatə edən hissəsində oxuyuruq: "Hakimiyyətdə olan siyasi qüvvələr tərəfindən tez-tez səsləndirilən məsuliyyətsiz bəyanatlar müstəqil Azərbaycan dövlətinin ali məqsədləri və vəzifələri, prinsipləri və istiqamətləri haqqında beynəlxalq aləmdə yanlış rəy yaradır, onun sivil dünya dövlətlərindən təcrid edilməsinə səbəb olurdu".

Bu sitat konkret tarixi şəraiti əks etdirir. AXC-Müsavat iqtidarının təmsilçiləri isə həmin dövrü xarakterizə edərkən arqument əvəzinə bəhanə səsləndirirdilər: "Biz türk soylu xalq, müsəlman dünyasının bir parçası olduğumuza görə dünya dövlətləri bizi qəbul etmirdi". Tamamilə əsassız və uydurma bir məntiqdir. Həmin məntiqə qarşı qoyulan suallara (bu sətirlərin müəllifi həmin sualları onlara KİV təmsilçisinin iştirak etdiyi mətbuat konfransında AXC - Müsavat liderlərinə ünvanlamışdır - red.) isə adı çəkilən siyasi qütbün təmsilçiləri yeni bəhanələr uyduraraq cavab vermək istəsələr də alınmırdı. Suallar belə idi: ƏVVƏLA, sizcə müstəqil Azərbaycan dövlətinin başçısı "Türkün türkdən başqa dostu yoxdur" - deyə bəyanat verəndən sonra rus, ingilis, fransız və ya alman həmin "liderlə" dostluğa meyl edərdimi? İKİNCİ: Məgər Heydər Əliyev siyasi hakimiyyətə qayıdandan sonra da biz türksoylu xalqın ölkəsi, müsəlman dünyasının bir parçası deyilikmi? Bəs nə üçün beynəlxalq ictimaiyyət bizi 1993-cü ilin yayından sonra qəbul etdi və müstəqil Azərbaycan dövləti dünya birliyinin ən nüfuzlu subyektlərindən birinə çevrildi?

Bu açıq və aydın ifadə edilən sualları cavablandırımaqda acizlik çəkən AXC-Müsavat təmsilçiləri növbəti cəfəngiyyat uydururdular ki, guya hakimiyyətdə daha çox qalsaydılar vəziyyəti nəzarət altına ala bilərdilər. Ancaq ulu öndərin yuxarıda qeyd etdiyimiz müraciətinin həmin dövr haqqındakı abzasında deyilir: "Vəziyyət elə təhlükəli xarakter almışdı ki, 1991-ci ildə əlverişli tarixi şəraitin və taleyin xalqımıza bəxş etdiyi imkandan yaranmış müstəqil dövlətimiz qəsdən və yaxud səriştəsizlikdən yaranan idarəsizlik nəticəsində real itirilmək təhlükəsi ilə üz-üzə qalmışdı". Bir daha qeyd edirik ki, bu sitat ulu öndərin məlum müraciətindən seçilib. Yəni "biz hakimiyyətdə daha çox qala bilsəydik vəziyyəti nəzarət altına alacaqdıq" - deyənlər faktiki olaraq vəziyyətin nəzarət altından çıxmasının səbəbkarları və hətta, günahkarları idilər.

AXC-Müsavat iqtidarının nəzarət altından çıxartdığı vəziyyəti bərpa etmək istəyən xalq ölkəni xaos və anarxiya girdabından qurtarmağın yolunu çox yaxşı görürdü. Bu yolun o biri başında - Naxçıvanda, neft lampasının işığında çalışaraq xalqına xidmət edən liderin ziyasına çox böyük ehtiyac var idi. Xalq bilirdi ki, 1990-cı ilin 20 Yanvar hadisələrindən dərhal sonra Moskvada - Kremlin qulağının dibində Mixail Qorbaçovun qaniçən siyasətini lənətləyən, Naxçıvana qayıdandan sonra mühasirədə olan muxtar respublikanı məhrumiyyətlərdən xilas edən Heydər Əliyev Azərbaycanın dövlət müstəqilliyini qoruyub saxlaya biləcək yeganə siyasətçidir. Bu həqiqətləri dərindən dərk edən Azərbaycan ziyalıları ulu öndərə müraciət edərək müstəqilliyin qorunması üçün yollar axtarılmasını xahiş etdilər. Bu yol ölkənin həqiqi siyasətçilərini və milli ziyalılarını öz ətrafında birləşdirəcək yeni bir siyasi təşkilatın formalaşdırılmasından ibarət idi.

Heydər Əliyev xalqın öndə gedən ziyalılarını öz ətrafına toplayaraq Yeni Azərbaycan Partiyası adlı mükəmməl bir siyasi təşkilat yaratdı. 1992-ci il noyabrın 21-də Naxçıvanda təsis edilən bu partiya çox qısa bir müddətdə nəinki ölkədə, hətta, bütün regionda ən güclü təşkilata çevrildi. Partiyanın sədrinin ölkədə siyasi hakimiyyətə qayıtması isə bu gənc siyasi təşkilata bütün dünyada böyük nüfuz qazandırdı.

Bu gün Azərbaycanı qələbədən qələbəyə aparan, böyük sosial-iqtisadi inkişafa müəlliflik edən Prezident İlham Əliyevin Yeni Azərbaycan Partiyası sədrinin müavini, sədrin birinci müavini və nəhayət, partiya sədri seçilməsi isə bu partiyanın nüfuzunu qat-qat artırmışdır. İndi artıq Yeni Azərbaycan Partiyasının üzvlərinin sayı yarım milyondan çoxdur. Bu partiyaya üz tutanlar hər gün artır. Ən maraqlı məqam isə odur ki, Yeni Azərbaycan Partiyasının bir çox üzvləri özlərini həm də Heydər Əliyev Partiyasının üzvü adlandırmaqdan məmnunluq hissi keçirirlər.

İttifaq MİRZƏBƏYLİ

Xalq qəzeti.- 2010.- 21 noyabr.- S. 3.