"Qırxıncı otaq"

Yazıçı-dramaturq, publisist Hüseynbala Mirələmovun "Qırxıncı otaq" kitabı çapdan çıxmışdır.

Kitaba yazıçının "Qırxıncı otaq" romanı, "Qumru yumurtaları" povesti və "Qaraçı gözəli Dorito" hekayəsi daxil edilmişdir. Romanda qanunların, insan hüquqlarının keşiyində vicdanla dayanan ədalətli hüquqşünas obrazı yaradılmışdır. Bu, demokratik, hüquqi dövlət quruculuğunda müstəsna rol oynayan, saxtakarlıq, böhtan, hiylə qarşısında əyilmədən mərdliklə mübarizə aparıb bu çətin yolda zirvələrə ucalan hakim Adil Hüseynlidir.

Kitaba daxil edilmiş "Qumru yumurtaları" povesti dünyanı narahat edən məsələlərdən biri olan ağ ölümün - narkomaniyanın insan mənəviyyatı və sağlamlığına gətirdiyi faciə və bəlalardan bəhs edir.

Müəllif "Qaraçı gözəli Dorito" hekayəsində Tanrının şah əsəri sayılan gözəl qadın, bu ilahi gözəlliyə səcdə edən ülvi və pak sevgidən söhbət açır.

"Nurlan" Nəşriyyat-Poliqrafiya Mərkəzində çap edilmiş kitabın redaktoru Reyhan Mirzəzadədir. Kitabı rəssam Yavər Əsədovun illüstrasiyaları bəzəyir.

Xalq qəzeti.- 2010.- 21 noyabr.- S. 4.