Xəzər
hövzəsi və Qafqaz regionundakı
proseslər ABŞ-Azərbaycan əməkdaşlığının
daha da gücləndirilməsini
tələb edir
Dağlıq Qarabağ
münaqişəsinin tezliklə nizamlanması Vaşinqtonun
ciddi maraq dairəsindədir
2010-cu ilin sentyabrında baş
tutmuş Barak Obama - İlham Əliyev görüşü
müasir dünya siyasətinin əlamətdar hadisələrindən
biri kimi, "böyük səkkizlər" başda olmaqla
dünyanın bütün ölkələrinin maraq dairəsində
idi. Nəyə görə bu görüş barədə
söz açarkən öncə "böyük səkkizlər"i
yada salırıq? Çünki dünyanın əsas neft
istehlakçıları məhz onlar - ABŞ, Yaponiya və Qərbi
Avropa dövlətləri sayılır. Yəni, həmin
ölkələrin hamısı Obama-Əliyev
danışıqlarının nəinki detallarını, hətta,
ab-havasını belə maraqla gözləyir, nə isə
öyrənməyə çalışırdılar.
Çünki hamı yaxşı bilir ki, Azərbaycan Avropa
ölkələrinin enerji təhlükəsizliyinin təmin
edilməsində əsas ünvanlardan birinə çevrilir.
Avropa ölkələrinin əsas tərəfdaşlarından
biri və bəlkə də birincisi olan ABŞ-ın isə
Azərbaycana olan maraqları bilavasitə ölkəmizin enerji
ehtiyatlarının zənginliyinə və rəsmi
Bakının siyasi kursunda demokratik dəyərlərə sədaqətin
əsas yer tutmasına görə durmadan artır.
Ekspertlər
qətiyyətlə israr edirlər ki, əgər 90-cı illərin
əvvəllərində Azərbaycanda Heydər Əliyev
hakimiyyətə gəlməsəydi, bu gün Azərbaycan-ABŞ
münasibətləri tamamilə başqa məcraya yönəlmiş
olacaqdı. Çünki Vaşinqton hansısa ölkə ilə
əməkdaşlıq prinsipləri üzərində
işləyəndə sırf iqtisadi maraqları nəzərdə
tutmur, eləcə də bir çox siyasi məqamları nəzərə
alır. Cəmiyyətin demokratikləşdirilməsi
üçün atılan addımlar, vətəndaş cəmiyyətinin
formalaşdırılması istiqamətində göstərilən
səylər, ədalətli seçkilər, insan
hüquqlarının qorunması, söz azadlığı,
insanların sərbəst toplaşmasına yaradılan şərait
və bir çox başqa məqamlar da diqqət mərkəzində
saxlanılır. Yəni bu bir həqiqətdir ki, Azərbaycanın
nefti və qazı nə qədər çox olsa da,
sadaladığımız həmin amillərin yoxluğu şəraitində
Vaşinqton Bakı ilə münasibətləri indiki səviyyədə
qura bilməzdi və qurmazdı. Bu səviyyəni Heydər Əliyev
siyasi dühasının yaratdığı danılmaz bir
tarixi faktdır. Yeri gəlmişkən, oktyabrın 4-də Azərbaycan
Prezidenti İlham Əliyevlə görüşən Amerika Yəhudi
Konqresinin prezidenti Cek Rozen Azərbaycanda müxtəlif dinlərin
və millətlərin dostluq şəraitində, birgə
yaşamasını beynəlxalq dəyərlər
baxımından nümunə kimi qiymətləndirdi.
Təsadüfi
deyil ki, ABŞ Prezidenti Barak Obama həm Azərbaycan Prezidentinə
göndərdiyi məktublarda, həm də sentyabrın 24-dəki
görüşdə Azərbaycanın iqtisadi potensialı ilə
yanaşı ölkəmizin siyasi iradəsini də yüksək
qiymətləndirir. Dünyanın aparıcı dövlətlərindən
birinin prezidenti etiraf edir ki, bu gün Azərbaycan regionun ən
çox uğurlar qazanan və ən nüfuzlu ölkələrindən
birinə çevrilib. Üstəlik cənab Obama bildirir ki, gənc
müstəqil Azərbaycanın bu uğurlara nail
olmasının səbəbi Prezident İlham Əliyevin
liderlik keyfiyyətidir. Yəni Azərbaycanı indiki
inkişaf səviyyəsinə təkcə neft, qaz və ya
ölkənin geosiyasi əhəmiyyəti deyil, həm də
dövlət başçısının liderlik məharəti
çatdırmışdır. Nəzərə alaq ki,
SSRİ dağılandan sonra yaranmış gənc müstəqil
dövlətlərin hamısı kimi Azərbaycanın da bərbad
vəziyyətə düşmüş iqtisadiyyata, cəmiyyətdə
xaos və anarxiyanın hökm sürdüyünü
ABŞ-da yaxşı bilirdilər. Məhz həmin məlumatların
nəticəsidir ki, bu gün bizim hərtərəfli
inkişafımız ABŞ rəsmiləri tərəfindən
ən ali səviyyədə etiraf edilir.
Prezidentlər
görüşdülər və bu görüşdə
ölkələrimiz arasında uzun illər davam edən
energetika əməkdaşlığının əhəmiyyətindən,
bundan sonra da həmin əməkdaşlığın
genişləndirilməsinin zəruriliyindən
danışdılar. Yeri gəlmişkən, Azərbaycan-ABŞ
energetika əməkdaşlığının banisi ulu
öndər Heydər Əliyev olsa da, gənc müstəqil
dövlətimizin həmin siyasətinin - yeni neft
strategiyasının əsas icraçısı məhz
bugünkü dövlət başçımız İlham Əliyev
olmuşdur. Çünki ulu öndərin 1993-cü ilin
payızından "Əsrin müqaviləsi"nin
imzalanmasınadək işləyib hazırladığı
neft strategiyasının icrasında onun ən yaxın
silahdaşı məhz Azərbaycan Respublikası Dövlət
Neft Şirkətinin birinci vitse-prezidenti İlham Əliyev idi.
Xəzərin Azərbaycan sektorundakı karbohidrogen
ehtiyatlarının müştərək işlənilməsi
üçün xarici şirkətlərlə müvafiq sənədin
imzalanması, daha doğrusu belə bir sazişin
hazırlanması çox mürəkkəb və uzun
müddət tələb edən məsələ idi. Həmin
dövrdə Birləşmiş Ştatların neft şirkətləri
ilə danışıqları bu məqsədlə ABŞ-a
səfərlər etmiş İlham Əliyev
aparmışdı.
Neft
strategiyası öz uğurlu addımlarını atdıqca
ABŞ-ın maraqları da nəzərə
alınırdı. "Əsrin müqaviləsi"ndə
dost ölkənin şirkəti təmsil olundu, hasil olunmuş
neft və qazın dünya bazarına
çıxarılması üçün əsas ixrac neft və
qaz kəmərlərinin marşrutunun müəyyənləşdirilməsi
zamanı Vaşinqtonun maraqlarına cavab verən variantlar
seçildi. Nəticədə Azərbaycan ABŞ-ın
energetika sahəsində əməkdaşlıq etdiyi əsas
ölkələrdən birinə çevrildi. Bütün
bunlar Vaşinqtonda heç kəsin yadından
çıxmayıb və yəqin ki, çıxmayacaq.
Məhz
həmin arqumentləri əsas götürən rəsmi
Vaşinqton Azərbaycanın ən ağrılı problemi
olan Ermənistan-Azərbaycan, Dağlıq Qarabağ
münaqişəsinin həllində fəal iştirak etməyə
çalışır. Elə sentyabrın 24-də Azərbaycan
Prezidenti İlham Əliyevlə görüşən Prezident
Barak Obama Ermənistan-Azərbaycan, Dağlıq Qarabağ
münaqişəsinin tezliklə nizama salınmasının
vacibliyini vurğulayıb və əldə ediləcək
sülhün region üçün xüsusi əhəmiyyət
kəsb etdiyini söyləyib. Son zamanlar ABŞ rəsmiləri
Qafqazda sülhün yaranmasına böyük ehtiyac
olduğunu tez-tez yada salırlar. Hətta, bir çox ABŞ
siyasətçiləri daha da irəli gedərək Qafqazda
yaranacaq sülhə Qafqaz ölkələri ilə
yanaşı Vaşinqtonun da böyük ehtiyacı
olduğunu söyləyirlər. Nə üçün?
Əvvəla,
ABŞ rəsmiləri və həmin ölkənin bir
neçə il sonralar üçün proqnoz verməyi bacaran
siyasətçiləri ermənilərin getdikcə daha da həyasızlaşmasını
bilavasitə öz ölkələrindəki azsaylı ermənilərin
timsalında görürlər. Bilir və inanırlar ki, XXI əsrdə
XVII əsr təfəkkürü ilə işləmək istəyən
ermənilərin tutduğu yol regionu fəlakətlərə
aparır. Üstəlik, torpaqlarının 20 faizi
işğal edilmiş, 1 milyondan çox qaçqın və
köçkünün problemləri ilə üz-üzə
qalmış Azərbaycan dövlətinin səbr
kasasının dolduğu da ABŞ-da yaxşı məlumdur.
Bu
gün ölkəyə rəhbərlik edən Prezident
İlham Əliyevin qətiyyəti arxasında 9 milyonluq əhalinin
iradəsi vardır. Əgər ermənilərin həyasızlığı
davam edərsə və danışıqlar nəticəsiz
olarsa, onda Azərbaycan dövlət
başçısının qətiyyəti və xalqın
iradəsi ilə hərb yolunu seçər. O zaman isə
Vaşinqtonun son 20 ildə Qafqazda qurduğu bütün əməkdaşlıq
telləri təhlükə altına düşə bilər.
ABŞ şirkətlərinin regiona yatırdığı
milyardlar, ABŞ-ın Avropadakı partnyorlarının enerji təhlükəsizliyinin
təmin edilməsi və başqa iqtisadi imkanlar təhlükəyə
məruz qalar və hətta ABŞ böyük iqtisadi itkilərlə
üzləşər. Üstəlik, ABŞ vətəndaşlarının
Ağ evin xarici siyasətinə olan inam və etimadı
sıfıra enər. Ona görə də Qafqazda yaranacaq
sülhə və sabitliyə region ölkələri ilə
yanaşı, ABŞ-ın da böyük ehtiyacı var.
Prezidentlərin görüşündə cənab Obamanın
dilə gətirdiyi əsas məqamlardan biri də bu idi.
İkinci,
bu gün dünya ölkələri və müxtəlif
güc mərkəzləri Xəzər hövzəsi və
Qafqaz regionunda mövcud olmaq üçün həm
görünən, həm də görünməyən
variantlarla mübarizə aparırlar. Bu mübarizə bir
neçə istiqamətli ictimai-siyasi proseslərdə
müşahidə edilir. Həmin proseslərdən öz
ölkəsinin maraq və mənafeləri üçün
istifadə etmək istəyən ABŞ rəsmiləri
Vaşinqton-Bakı əməkdaşlığının daha
da güclənməsinə çalışırlar. Məhz
bunun nəticəsidir ki, Ağ ev Ermənistan-Azərbaycan,
Dağlıq Qarabağ münaqişəsinin tezliklə və
ədalətli həlli üçün fəallığını
artırır. Fakt ondan ibarətdir ki, dünyanın
aparıcı dövlətləri artıq Azərbaycanın
mövqeyi ilə razılaşır, rəsmi Bakının dəstəklənməsini
üstün tuturlar. Bu isə Prezident İlham Əliyevin Azərbaycanı
inkişaf etmiş ölkələrin sırasına
çıxarmaq üçün həyata keçirdiyi tədbirlərin
nəticəsidir.
İttifaq MİRZƏBƏYLİ
Xalq qəzeti.- 2010.- 10 oktyabr.- S. 1.