Ağsu: payız-qış mövsümünə hazırlıq yüksək səviyyədədir

Bu istiqamətdə tədbirlər hələ ilin ikinci rübündən start götürmüşdü

Təxminən iki ay əvvəl dünyanın aparıcı kütləvi informasiya vasitələri belə bir xəbər yaymışdılar ki, guya, builki qış son min ilin ən soyuq və ən yağmurlu qışı olacaq. Ona görə "guya" deyirəm ki, sonradan dünyanın ən mötəbər elmi təşkilatları həmin xəbəri əsassız saydılar. Amma buna baxmayaraq Avrasiyada builki qışın ötən illərə nisbətən daha soyuq keçəcəyini də inkar edən olmadı. Yəni cəmi bir aydan sonra bizi son min ilin olmasa da, son beş-altı ilin ən soyuq qışı gözləyir. Qar qapını alacaq, küləklər öz simfoniyasını çalacaq və qışa vaxtında hazırlaşmayanların problemləri üzə çıxacaq. Ona görə də fikirləşdik ki, rayonlarda payız-qış mövsümünə hazırlığın vəziyyəti ilə bağlı qəzet materialı hazırlayaq. Elə Ağsuya gəlişimizin əsas səbəbi də bu idi.

- Əvvəla, hansı ilin hansı fəslinin necə keçəcəyi tanrının işidir. İnsanların o barədə proqnoz verməsindənsə, hərənin öz vəzifəsini layiqincə yerinə yetirməsi daha yaxşı olardı. İkinci, qış öz qarıyla gözəllik, soyuğuyla təmizlik gətirir. Əlbəttə, bu gözəl fəsilə vaxtında hazırlaşanlar üçün. Yəni biz bu ilki qışın ötən illərə nisbətən sərt və ya mülayim keçməsi barədə xəbərlərdən o qədər də narahat deyilik - bu sözləri Ağsu rayon icra hakimiyyəti başçısının sosial-iqtisadi məsələlər üzrə müavini İqbal Mikayılov dedi. Həmsöhbətim əlavə etdi ki, bu gün Azərbaycanın sosial-iqtisadi inkişafı dünya ölkələrinin hamısında yüksək səviyyədə qiymətləndirilirsə, beynəlxalq təşkilatlar dövri olaraq öz hesabatlarında Azərbaycanın hansısa nümunəsini və ya rekordunu qeyd edirlərsə, biz nə üçün öz fəaliyyətimizi həmin səviyyəyə uyğun qurmayaq? Üstəlik, bu gün Azərbaycan elə bir tərəqqi və inkişaf dövrü yaşayır ki, bu tendensiyanın fonunda hansısa rayonun qışa hazırlığında problem olması inandırıcı görünməz.

İcra başçısının müavini Nazirlər Kabinetinin oktyabrın 20-də keçirilmiş geniş toplantısını yada salaraq qeyd etdi ki, 2010-cu ilin doqquz ayının sosial-iqtisadi inkişafının yekunlarına həsr olunmuş iclasda Prezident İlham Əliyev ölkəmizin son illərdə və son aylarda əldə etdiyi çoxsaylı faktlardan söz açdı:

- Dövlət başçımız qeyd etdi ki, Azərbaycanda iqtisadi sahədə aparılan düşünülmüş siyasət yüksək göstəricilərə nail olmaq üçün şərait yaradıb. Ölkədə son doqquz ayda 56 min, 2003-cü ildən sonra isə 900 minə yaxın iş yeri yaradılıb. Azərbaycanın ümumi valyuta ehtiyatları 28 milyard dollardan çoxdur və sairə. Yəni, dövlət başçımız xalqın rifahının, ölkənin inkişafının, dövlətin qüdrətləndirilməsinin təsdiqi olan çoxsaylı faktlar söylədi. Deməli, biz də öz fəaliyyətimizi elə qurmalıyıq ki, bu ənənəvi uğurlar salnaməsinə öz töhfəmizi vermiş olaq. Elə rayonun payız-qış mövsümünə hazırlığını dövlətin tələb etdiyi səviyyədə təşkil etməyimiz də həmin töhfələrimizdəndir.

Payız-qış mövsümünə hazırlıqla bağlı məlumat verərkən ilk növbədə təhsil müəssisələrinin bu mövsümə hazırlığının səviyyəsini yada salaq. Bu da təsadüfi deyil. Çünki bu gün Prezident İlham Əliyevin ən böyük önəm verdiyi sahə təhsil sektorudur. Bu faktı əsas götürən Ağsu rayon rəhbərliyi 2010-2011-ci dərs ilinin payız-qış mövsümündə rayonun təhsil müəssisələrinin fasiləsiz fəaliyyətinin təmin olunması üçün bir sıra tədbirlər həyata keçirmişdir. Yeni dərs ilinə hazırlıq dövründə Heydər Əliyev Fondunun təşəbbüsü ilə "Yeniləşən Azərbaycana yeni məktəb" layihəsi çərçivəsində Qaraqoyunlu kəndində 220, dövlət vəsaiti hesabına Kalva kəndində 220 şagird yerlik orta məktəb binasının tikintisi başa çatdırılıb. Şəhər 2 və 5 saylı orta məktəb binası isə cari təmir olunub. Digər tədris müəssisələrində də zəruri xırda təmir işləri aparılıb. Rayonun 13 məktəbində istilik sistemi müasir tələblərə uyğun qurulub. Qalan bütün ümumtəhsil məktəblərinin payız-qış mövsümündə istiliklə təchizatı odun yanacağı ilə həyata keçirilir. Məktəblər odun peçi ilə tam təmin olunub və odun yanacağı ilə fasiləsiz olaraq təmin edilməsi istiqamətində lazımi tədbirlər görülüb. Tədris müəssisələrində bina və qurğuların elektrik şəbəkəsində olan nasazlıqlar əsasən aradan qaldırılıb, cihaz və avadanlıqların təhlükəsiz istismarının təmin edilməsi üçün müvafiq tədbirlər görülüb.

Qış mövsümünə hazırlıqla əlaqədar Mədəniyyət və Turizm şöbəsində və onun struktur bölmələrində müəyyən işlər görülüb. Belə ki, cari ildə Mədəniyyət və Turizm şöbəsi, Mərkəzləşdirilmiş kitabxana sistemi, Mədəniyyət evi, Tarix-diyarşünaslıq muzeyi və Uşaq Musiqi Məktəbində əsaslı və cari təmir işləri həyata keçirilib. Rayon əhalisinin qarşıdan gələn qış mövsümündə enerji daşıyıcıları ilə fasiləsiz təminatını təşkil etmək məqsədiylə Şəbəkə Rayonunun balansında olan 10/04 kilovoltluq enerji verilişi xəttinin 17 kilometrdən çox hissəsində əsaslı və cari təmir işləri aparılıb, 10 ədəd yüksək güclü, 37 ədəd isə nisbətən aşağı güclü transformator yarımstansiyası təmir olunub, 393 ədəd elektron sayğac quraşdırılıb.

Şəhərin yaşayış massivlərinin qaz təchizatının yaxşılaşdırılması və rayonun kənd yaşayış məntəqələrinin qaz təminatının bərpası və yenidən qurulması, eləcə də, növbəti payız-qış mövsümündə abonentlərin təbii qaz təminatının yaxşılaşdırılması istiqamətində işlər davam etdirilib. Şəhərin Heydər Əliyev küçəsində 1400 metrlik aşağı təzyiqli qaz kəməri təmir olunub, M.Müşfiq, M.Əliyev, H.Tağızadə, T.İsmayılov, M.F.Axundov, S.Rzayev, D.Bünyadzadə və Nizami küçələrində 2 min 700 metrə yaxın yeni qaz kəməri çəkilib. Cari ildə və gələn il qazlaşdırılması nəzərdə tutulmuş kənd yaşayış məntəqələrinin qazlaşdırılması üçün Ağsu-Göydəlləkli və Ağsu-Bəyimli kəndləri istiqamətində - 41 kilometrdən çox məsafədə polietilen borularla orta təzyiqli qaz kəmərinin tikintisi başa çatdırılmaq üzrədir. Ərəbsarvan, Hacıqədirli, Göydəlləkli, Bəyimli və Ərəbmehdibəy kəndlərində qaz çəkilişi davam etdirilir. Çiyni, Növcü, Axundlu və Məliksoltanlı kəndlərinin qaz təsərrüfatı yenidən qurularaq təbii qazın qəbulu üçün tam hazır vəziyyətə gətirilib. Lap yaxın vaxtlarda həmin kəndlərə qaz verilməsi təmin ediləcəkdir. Eləcə də rayondakı bütün Qaz Tənzimləyici Şkaflar və digər avadanlıqlar təmir olunaraq istismara yararlı vəziyyətə gətirilib, qaz itkisinə yol verməmək üçün şəhərdə 409 abonentə məxsus sayğac həyətlərdən küçəyə çıxarılıb.

Payız-qış mövsümünə hazırlıqla əlaqədar Mənzil-İstismar İdarəsinin balansında olan ictimai yaşayış binalarının dam örtüyünün dəyişdirilməsi, təmiri, binalarda məişət-kanalizasiya xətlərinin və digər avadanlıqların təmiri, çirkabdan təmizlənməsi işləri aparılıb. Şəhərin əksər küçələrini əhatə edən su xətlərinin 1260 metri, mərkəzi su anbarına gələn xəttin isə 150 metri cari təmir edilib.

2010-2011-ci illər qış mövsümündə rayonun səhiyyə müəssisələrinin əhaliyə lazımi tibbi xidmət göstərməsini təmin etmək məqsədiylə həmin müəssisələrin istilik və elektrik enerjisi ilə təchizatı yaxşılaşdırılıb. Bu müəssisələrin ekstremal vəziyyətdə fasiləsiz işləməsi rayon rəhbərliyinin daimi diqqət mərkəzindədir. Payız-qış mövsümünə hazırlıqla əlaqədar rayonun Telekommunikasiya Qovşağı tərəfindən müvafiq tədbirlər həyata keçirilib. Rabitə obyektlərinin elektrik qida qurğularında müvafiq hazırlıq işləri aparılıb və dizel generator qurğularının, eləcə də akkumlyator batareyalarının daimi işlək və saz vəziyyətdə saxlanılması, həmçinin dizel-generatorlarının yanacaq ehtiyatı təmin edilib.

Rayon rəhbərliyi Ağsu ərazisində məskunlaşmış qaçqın və məcburi köçkün ailələrinin payız-qış mövsümündə mənzil-məişət şəraitinin yaxşılaşdırılması, onların elektrik enerjisi, təbii qaz və istilik enerjisi ilə təchizatı sahəsində bir sıra tədbirlər həyata keçirib. Şəhərdə yaşayan 34 qaçqın ailəsinin (142 nəfər) mənzilləri təbii qazla və elektrik enerjisi ilə təchiz olunub, kəndlərdə yaşayan 48 qaçqın (260 nəfər) və 340 məcburi köçkün ailələrinin (1345 nəfər) elektrik enerjisi ilə dayanıqlı təminatı təşkil edilibdir. Bundan başqa, təbii qazla təmin olunmayan 307 məcburi köçkün ailəsinin hər birinə beş ay müddətinə ayda 40 litr soba yanacağı verilməsi üçün tədarük görülüb. Qaçqın və məcburi köçkünlərin daha sıx məskunlaşdığı Gürcüvan kəndi ərazisində elektrik verilişi xətləri və transformator yarımstansiyaları təmir edilib, həmin kənddə fasiləsiz rabitə xidməti yaradılıbdır.

...İcra başçısının müavini ilə bu məzmunlu söhbətimizi davam etdirə-etdirə şəhərin bir neçə küçəsini gəzdik. Həmsöhbətim payız-qış mövsümünə hazırlığın nəticələri barədə daha ətraflı danışmağa, daha konkret faktlar üzərində dayanmağa çalışırdı. Hətta, onun qeyd etdiyi bəzi faktlarla əyani şəkildə, birlikdə tanış olurduq. Mənim diqqətim onda olsa da bəzi küçələrin adları nəzərimdən yayınmırdı. Heydər Əliyev, Nizami, Mirzə Fətəli Axundov kimi tarixi şəxsiyyətlərin adını daşıyan küçələrlə yanaşı iki görkəmli sənət adamının adını daşıyan küçədən də keçdik - Mirzə Ağa Əliyev və Səməndər Rzayev küçələrindən. Birinin sənət nurunun çoxmilyonlu vurğunlarından olduğuma görə fəxr edirdim, digərinin isə müasiri olmaqdan iftixar hissi keçirirdim. Səməndər Rzayevlə bağlı necə xatirələrimiz var... Başçının müavini payız-qış mövsümünə hazırlıqdan danışdıqca mənim ürəyimdən başqa bir hiss keçirdi: Kaş Səməndər də öz ömrünün payız-qış mövsümünə hazırlaşmış olaydı. Çünki payız onun qarşısına çox erkən çıxmışdı.

Elə rayon icra hakimiyyətinin başçısı Ənvər Seyidəliyevlə söhbətimizin sonunda da Səməndər Rzayev yada düşdü. Ənvər müəllim dedi ki, Səməndər Rzayev Ağsu camaatının ümumiləşdirilmiş bir nümunəsi idi. Sadəcə, o, sənətdə öz sözünü dedi, qalan ağsulular isə ölkənin ictimai-siyasi həyatında öz sözlərini deyirlər. Özü də uğurla.

İlqar HƏSƏNOV

Xalq qəzeti.- 2010.- 26 oktyabr.- S. 5.