Binəqədi rayonunda bu ilin 9 ayının yekunları müzakirə olunmuşdur

Ölkə Prezidenti İlham Əliyevin sədrliyi ilə Nazirlər Kabinetinin 2010-cu ilin 9 ayının sosial-iqtisadi inkişafının yekunlarına həsr olunmuş geniş iclasındakı nitqindən irəli gələn vəzifələr Binəqədi Rayon İcra Hakimiyyəti başçısı yanında Şuranın iclasında geniş müzakirə olunmuşdur.

İclası giriş sözü ilə açan rayon icra hakimiyyətinin başçısı Alı Qocayev Nazirlər Kabinetinin sözügedən iclası barədə məlumat verərək qeyd etmişdir ki, ilin 9 ayı ərzində ölkədə iqtisadi artım 4,1 faiz, qeyri-neft sektoru üzrə isə 5,2 faiz olmuşdur. Əhalinin pul gəlirləri 11 faiz artmış və inflyasiyanı 2 dəfədən çox üstələmişdir. Azərbaycanın valyuta ehtiyatları 20 milyard dollardan 28 milyard dollara çatmışdır. Bunlar dövlət başçısı İlham Əliyevin apardığı uğurlu daxili və xarici siyasətin nəticəsidir.

Rayon icra hakimiyyəti başçısının müavini Vüsal İsmayılov rayonda görülən işlərdən bəhs edərək diqqətə çatdırmışdır ki, Bakıelektrikşəbəkə ASC-nin xətti ilə rayonun 7, 8, 9-cu mikrorayonlarında, Azadlıq prospekti 158, Biləcəri və Rəsulzadə qəsəbələrində, Dərnəgül və Xutor yaşayış massivlərində nəzərdə tutulmuş 15 ədəd mövcud transformatorun hamısı yenisi ilə əvəz olunmuşdur. M.Ə.Rəsulzadə qəsəbəsi, Naxçıvani küçəsi, 7,8,9-cu mikrorayonlarda nəzərdə tutulmuş 20 kilometr elektrik kabel xətlərinin demək olar ki, 80 faizi yenisi ilə əvəz olunmuşdur.Yuxarıda qeyd olunan ünvanlarda nəzərdə tutulmuş 16 ədəd yeni transformator quraşdırılmış, Biləcəri, Binəqədi, Xocəsən, 28 May, Sulutəpə qəsəbələrində nəzərdə tutulmuş mövcud 125 kilometr uzunluğunda hava elektrik xətlərinin SİP kabellərlə təxminən 37 kilometri artıq yenisi ilə əvəz olunmuşdur. Eyni zamanda, 1800-dən çox abonentin sayğacı və elektrik xətti dəyişdirilmişdir.

Natiq vurğulamışdır ki, əhalinin içməli su ilə təminatı və çirkab sularının axıdılması üçün Baksol yaşayış massivində kanalizasiya kollektorunun quraşdırılması "Azərsu" ASC tərəfindən aparılır. Əhali üçün zəruri olan çox böyük həcmli bu iş yüksək templə yerinə yetirilir. Hal-hazırda Biləcəri qəsəbəsində tutumu 1000 kubmetr olan su ambarının tikintisi davam etdirilir.

Böyük -Şor gölü ətrafında mövcud yaşayış massivlərinin və sənaye obyektlərinin kanalizasiya sistemi quraşdırılır. Məhsuldarlığı sutkada 10.000 kubmetr olan kanalizasiya nasos stansiyasının tikintisi davam etdirilir. Binəqədi kəndində isə gücü saatda 800 kubmetr olan su nasos stansiyasının tikintisi başa çatdırılmışdır.

Rayonda tikinti-quruculuq işləri geniş vüsət almışdır. Azadlıq prospektində metronun "Azadlıq prospekti" stansiyasının çıxışındakı yerüstü piyada keçidi 2010-cu il may ayının 20-də istifadəyə verilmişdir. Azadlıq prospekti ilə Ziya Bünyadov prospektinin kəsişməsində inşa olunan yol qovşağının üçüncü mərhələsinin, Xırdalan dairəsi yaxınlığında Şimal istiqamətində dəmiryol xəttinin altından keçən tunelin əvəzinə yenisinin tikintisinin davam etdirilməsi nəzərdə tutulur.

Natiq göstərmişdir ki, Binəqədi rayonu üzrə 2010-cu il yanvar-sentyabr aylarında rayon üzrə 90 milyon 16 min manatlıq sənaye məhsulu istehsal edilmiş və xidmətlər göstərilmişdir. Qeyd olunanlarla yanaşı, yanvar-sentyabr aylarında istehlakçılara 96 milyon 804 min 900 manatlıq və ya bütün sənaye istehsalından 7,5 faiz çox sənaye məhsulu göndərilmişdir. Əlbəttə, bu göstərici yaxşıdır, lakin sənaye məhsulunun istehsalının artırılması sahəsində lazımi tədbirlərin həyata keçirilməsinə nail olunmalıdır.

Son illərdə rayonun istehlak bazarında müsbət irəliləyişlər əldə edilmişdir. 2010-cu ilin yanvar-sentyabr aylarında istehlak bazarı dinamik inkişaf etmiş və əhaliyə 824 milyon 737 min manatlıq və ya əvvəlki ilin müvafiq dövrü ilə müqayisədə 10,9 faiz çox geniş çeşidli istehlak malları satılmışdır. Istehlak bazarında pərakəndə əmtəə dövriyyəsinin və əhaliyə göstərilən xidmətlərin xüsusi çəkisi müvafiq olaraq 81,4 və 18,6 faiz təşkil etmişdir.

Ölkə Prezidenti tərəfindən 2010-cu il "Ekologiya ili" elan olunmuşdur. Artıq Balaxanı poliqonunun yerində yeni müasir məişət tullantıları zavodu tikilir. Bakı və Abşeronda 800 min ağac, o cümlədən rayonda yol kənarlarına, parklara və boş sahələrə 10 mindən çox ağac və gül kolları əkilmişdir. Bu iş hazırda da davam etdirilir.

Mənzil Fondunun saxlanması istiqamətində də xeyli iş görülmüşdür. Konkret olaraq, 2010-cu ilin 9 ayı ərzində Biləcəri qəsəbəsi Teymur Yaqubov küçəsi 20 saylı evin damının əsaslı təmiri,3 ünvanda 70 metr su xətti və 45 metr kanalizasiya xətti cari təmir edilmişdir. Azadlıq prospekti 11 ünvanda ümumiyyətlə rayon ərazisində 84 ünvanda ümumi uzunluğu 154 metr olan su xəttində cari təmir işləri aparılmışdır. Eyni zamanda, cari ilin 9 ayı ərzində Biləcəri qəsəbəsində Fizuli küçəsi 53 saylı binanın həyətində yarasız hala düşmüş istirahət yeri abadlaşdırılmış, yeni oturacaqlar və yelləncəklər quraşdırılmışdır. Eyni zamanda, 50/35-ci məhəllə 2 saylı, Natəvan 17 saylı, A.Zeynallı küçələrində 4 saylı evlərin həyətləri abad hala salınmışdır.

Hesabat dövründə Rayon Mənzil Kommunal Təsərrüfat Birliyi tərəfindən 25625 kvadratmetr yeni asfalt örtüyü salınmış, parklar təmizlənmiş, ümumilikdə 1118 ədəd ağaç və gül kolları əkilmişdir. Azadlıq prospekti bütövlükdə abad hala salınmışdır. Bundan başqa, 7058 kvadratmetr yumuşaq dam örtüyü cari təmir edilmiş, ümumi istifadə yerində 75 kvadratmetr şüşə salınmış, 92 ədəd giriş qapısı, 75 ədəd pəncərə cari təmir edilmişdir.

İclasda rayonun bir sıra xidmətlərinin rəhbərləri çıxış etmiş, təklif və mülahizələrini bildirmişlər. Toplantıda əldə olunmuş uğurlarla yanaşı, həllini gözləyən problemlər, çatışmazlıqlar və onların aradan qaldırılması yolları da diqqət mərkəzində olmuşdur.

Vaqif BAYRAMOV

Xalq qəzeti.- 2010.- 28 oktyabr.- S. 5.