Nizami rayonunda cari ilin doqquz ayına yekun vurulmuşdur

Dünən Bakı şəhəri Nizami Rayon İcra Hakimiyyətində 2010-cu ilin doqquz ayında rayonun sosial-iqtisadi inkişafının yekunlarına və qarşıda duran vəzifələrə həsr olunmuş hesabat yığıncağı keçirildi. Rayonun sənaye, təhsil, səhiyyə, mədəniyyət, xidmət sahələrinin, hüquq-mühafizə orqanlarının, eləcə də ictimaiyyət nümayəndələrinin iştirak etdikləri yığıncağı Nizami Rayon İcra Hakimiyyətinin başçısı Tahir Budaqov açdı. Natiq oktyabrın 20-də Prezident İlham Əliyevin sədrliyi ilə keçirilən Nazirlər Kabinetinin 2010-cu ilin birinci yarısının sosial-iqtisadi inkişafının yekunları və qarşıda duran vəzifələrə həsr olunmuş iclasında dövlət başçısının proqram xarakterli nitqinin bəzi məqamlarına toxundu.

Nizami Rayon İcra Hakimiyyəti başçısının müavini İldırım Mehdiyev 2010-cu ilin yanvar-sentyabr ayları ərzində rayonun sosial-iqtisadi inkişafının yekunlarına və qarşıda duran vəzifələrə həsr olunmuş geniş hesabat məruzəsi ilə çıxış etdi. Natiq ulu öndər Heydər Əliyev tərəfindən əsası qoyulmuş sosial-iqtisadi islahatların Prezident İlham Əliyev tərəfindən uğurla davam etdirilməsi nəticəsində cari ilin doqquz ayında ölkəmizdə ümumi inkişafın davam etdiyini diqqətə çatdırdı. 2010-cu ilin doqquz ayının Azərbaycan Respublikası üçün kifayət qədər uğurlu və yüksək nailiyyətlərlə zəngin bir dövr olduğunu qeyd edən natiq dedi ki, oktyabr ayının 20-də Prezident Sarayında dövlət başçısı cənab İlham Əliyevin sədrliyi ilə keçirilən Nazirlər Kabinetinin cari ilin yanvar-sentyabr aylarının sosial-iqtisadi inkişafının yekunlarına həsr olunmuş iclasında son illər ərzində ölkə iqtisadiyyatında müşahidə olunan iqtisadi artımın hazırda da davam etməsi müsbət hal kimi qiymətləndirlimişdir. Belə ki, Prezident İlham Əliyev statistik göstəricilər əsasında Azərbaycanda sosial vəziyyətin, sənaye istehsalının, özəl bölmənin, neft-qaz sektorunun, qeyri-neft bölməsinin və digər bütün sahələr üzrə istehsalın yüksəlməsini və inkişafını təhlil edərək dünyada davam edən maliyyə böhranına baxmayaraq, cari ilin 9 ayında ölkədə ümumi daxili məhsulun 4,1 faiz, qeyri-neft sektorunun 5,2 faiz, sənaye məhsulu istehsalının 3,1 faiz artdığını,ölkənin valyuta ehtiyatlarının isə 28 milyard dolları ötdüyünü diqqətə çatdırmışdır . Dövlət başçısı sosial proqramların uğurla icra olunduğunu vurğulayaraq ölkədə 600 min insanın ünvanlı sosial yardım almasını, minimum əmək haqqı və pensiyanın artmasını bildirmiş, Azərbaycanda 2003-cü ildən bəri 900 min yeni iş yerinin açıldığını bəyan etmişdir.

Son illər ölkəmizin sosial-iqtisadi həyatında baş verən tərəqqi paytaxtın Nizami rayonunda da aydın hiss olunur. Bu barədə məlumat verən rayon icra hakimiyyəti başçısının müavini İ.Mehdiyev bildirdi ki, ölkə iqtisadiyyatında baş vermiş sürətli inkişaf Nizami rayonunun sosial-iqtisadi həyatını daha da canlandırmış, rayon sakinlərinin qarşılaşdığı sosial problemlərin həlli istiqamətində konkret addımlar atılmış, xidmət sahələrinin fəaliyyəti yüksəlmiş, çoxsaylı yeni iş yerləri açılmışdır.

Natiq bildirdi ki, 2010-cu ilin 9 ayında Nizami rayonunda sənaye sahəsi üzrə istehsalın həcmi 238 milyon manat təşkil etmişdir ki, bunun da 33,7 faizi qeyri-dövlət sektorunun payına düşmüşdür. Məhsul istehsalında artım, əsasən, ət və ət məhsulları, saflaşdırılmış günəbaxan yağı, şərabçılıq, hidrogenləşdirilmiş bitki piyləri və yağları, marqarin, kağız və karton polietilen kisələr, plastmas məmulatları, ağ portlandsement, betondan yığma tikinti konstruksiyaları məhsullarının istehsalı sahələrində qeydə alınmışdır. Həmin dövrdə istehsal olunmuş məhsulun 100,4 faizi istehlakçılara göndərilmişdir.

İ.Mehdiyev 2010-cu ilin doqquz ayında rayon iqtisadiyyatının və sosial sahələrin inkişafı üçün bütün maliyyə mənbələri hesabına əsas kapitala 51,7 milyon manat həcmində investisiya yönəldildiyini, bunun da 25 milyon manatının dövlət, 32,7 milyon manatının isə qeyri-dövlət müəssisələrinin payına düşdüyünü diqqətə çatdırdı. Qeyd olundu ki, hesabat dövründə əsas kapitala yönəldilmiş investisiyanın 18,9 milyon manatı, yəni 92,2 faizi istehsal təyinatlıdır. Cari ilin doqquz ayında rayon üzrə pərakəndə əmtəə dövriyyəsi və pullu xidmətlərin həcmi 27,9 faiz artaraq 685,5 milyon manat olmuş, özəl müəssisələr tərəfindən əhaliyə 667,3 milyon manatlıq istehlak malları satılaraq pullu xidmətlər göstərilmişdir. Həmçinin bildirildi ki, 9 ayın yekununa görə, rayon üzrə işçilərin orta aylıq əmək haqları 16,3 faiz artaraq 331,8 manat olmuşdur.

2010-cu ilin yanvar-sentyabr aylarında Nizami rayonunda 933 yeni iş yerinin açıldığını diqqətə çatdıran məruzəçi bildirdi ki, iş yerlərinin 218-i hüquqi şəxslərin, 715-i isə fiziki şəxslərin payına düşmüşdür. Bütövlükdə isə 2003-cü ilin oktyabr ayından 2010-cu ilin müvafiq ayının 1-dək rayonda 16071-i daimi olmaqla 16168 yeni iş yeri yaradılmışdır. Cari ilin ötən dövründə rayon əhalisinin sosial müdafiəsinin gücləndirilməsi sahəsində görülmüş işlər barədə məlumat verən natiq onu da dedi ki, ölkə başçısı tərəfindən imzalanmış fərman və sərəncamların məhz əhalinin sosial rifahının yüksəldilməsinə yönəldilməsinin nəticəsidir ki, əvvəlki dövrlərlə müqayisədə vətəndaşların maddi rifah halı getdikcə yaxşılaşır.

Məruzəçi sakinlərin işıq, qaz, istilik və içməli su ilə təminatının yaxşılaşdırılması ilə bağlı görülən işlər, eləcə də abadlıq-quruculuq sahəsində həyata keçirilmiş tədbirlər barədə geniş məlumat verdi. Bundan əlavə, qeyd olundu ki, rayonun səhiyyə və təhsil müəssisələrinin işinin əsaslı şəkildə yaxşılaşdırılması məqsədiilə həyata keçirilən tədbirlər cari ilin ötən dövründə də davam etmişdir.

İ.Mehdiyev qarşıdan gələn parlament seçkilərinə hazırlıqla bağlı görülmüş işlərdən geniş bəhs etdi, bu mühüm siyasi kampaniyanın Nizami rayonunda yüksək səviyyədə keçirilməsi üçün hər cür şərait yaradıldığını diqqətə çatdırdı. Natiq həmçinin qarşıda duran mühüm vəzifələrə toxundu, həlli vacib işləri sadaladı.

Məruzə ətrafında çıxış edən digər natiqlər rəhbərlik etdikləri sahələrin cari ilin doqquz ayı ərzindəki fəaliyyəti ilə bağlı hesabat verdilər, ölkənin sosial-iqştisadi inkişafı yolunda bundan sonra da səylə çalışacaqlarını bildirdilər.

Hesabat yığıncağına yekun vuran Nizami Rayon İcra Hakimiyyətinin başçısı Tahir Budaqov Nazirlər Kabinetinin 2010-cu ilin doqquz ayının yekunlarına həsr olunmuş iclasında ölkə prezidenti İlham Əliyevin proqram xarakterli yekun nitqindən irəli gələn vəzifələrin icrası ilə bağlı görüləcək işlərdən söhbət açdı, bununla bağlı müvafiq qurumların rəhbərlərinə konkret tapşırıqlar verdi.

Tədbirdə iştirak edən respublika Ağsaqqallar Şurasının sədri, akademik Budaq Budaqov Nizami rayonunda cari ilin 9 ayında görülmüş işləri yüksək dəyərləndirərək ağsaqqalların rayonun ictimai-siyasi, və sosial-iqtisadi həyatındakı rolundan söhbət açdı. Sonra rayonun bir qrup yaşlı sakininə Ağsaqqallar Şurasının üzvlük vəsiqələri təqdim olundu.

Mirbağır YAQUBZADƏ

Xalq qəzeti.- 2010.- 28 oktyabr.- S. 5.