Azərbaycanı yeni inkişaf mərhələsinə çıxaran lider

Möhtərəm dövlət başçımız İlham Əliyev hələ Prezident seçilənə qədər klassik siyasətdən XXI yüzilliyin modern siyasətinə keçid formulunu uğurla sınaqdan çıxaran qətiyyətli siyasətçi, həqiqət naminə sərt mövqe nümayiş etdirən diplomat kimi tanınırdı. Siyasətdə, diplomatiyada mühafizəkar, ənənəçi və yenilikçi, liberal və mötədil dəyərləri sintez etməyi, qovuşdurmağı bacaran dövlət xadimi kimi seçilirdi. Məhz bu keyfiyyətlərinə görə o, Azərbaycanın sadə vətəndaşlarından tutmuş ziyalılarına, elm xadimlərindən siyasətçilərinə qədər bütün geniş xalq kütləsinin inamını, etimadını, etibarını qazanmışdı. Ona görə də 2003-cü ilin 15 oktyabr prezident seçkiləri ərəfəsində ümummilli liderimiz Heydər Əliyevin Azərbaycan vətəndaşlarına ünvanladığı 1 oktyabr 2003-cü il tarixli müraciət də təkcə ulu öndərimizin deyil, bütövlükdə, Azərbaycan xalqının İlham Əliyevə olan böyük inamının təcəssümü kimi qarşılandı.

Həmin tarixi müraciətin əvvəlində Azərbaycana rəhbərliyinin 34, müstəqil Azərbaycan Respublikasına rəhbərliyinin 10 ilinin tamam olduğunu vətəndaşların diqqətinə çatdıran ümummilli liderimiz həyatının mənasının bütün varlığı qədər sevdiyi xalqına, dövlətinə, ölkəmizin iqtisadi, siyasi və mənəvi inkişafına xidmətdən ibarət olduğunu vurğulayırdı: "Bu yolda bütün gücümü və iradəmi yalnız müdrik və qədirbilən xalqımdan almışam. Ən çətin anlarda, ən mürəkkəb vəziyyətlərdə yalnız və yalnız xalqıma arxalanmışam. Bu da mənə dözüm, iradə verib və bütün uğurlarımı təmin edib".

Müraciətdə ötən illərdə görülmüş işlərin xalqımıza yaxşı məlum olduğunu bildirən böyük öndərimiz hələ tamamlanmamış perspektivli planlarının qaldığını, son vaxtlar səhhətində yaranan bəzi problemlərin artıq başladığı, nəticələrini aydın gördüyü işləri sona çatdırmağa imkan vermədiyini göstərirdi. Və tezliklə Vətənə dönəcəyinə, yenidən xalqla birlikdə olacağına əmin olduğunu bildirməklə, öz namizədliyini cənab İlham Əliyevin xeyrinə geri götürdüyünü elan edirdi: "Üzümü sizə - həmvətənlərimə tutaraq, qarşıdan gələn prezident seçkilərində prezidentliyə namizəd, mənim siyasi varisim, Yeni Azərbaycan Partiyası sədrinin I müavini İlham Əliyevi dəstəkləməyə çağırıram. O, yüksək intellektli, praqmatik düşüncəli, müasir dünya siyasətini və iqtisadiyyatını gözəl bilən, enerjili və təşəbbüskar bir şəxsiyyətdir. Sizi əmin edirəm ki, həm İlham Əliyev, həm də Yeni Azərbaycan Partiyası bundan sonra da xalqımızın ən layiqli övladlarını öz ətrafında sıx birləşdirərək Azərbaycan dövlətinin inkişafı və xalqımızın firavanlığı yolunda çox işlər görəcəklər. İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm".

Ümummilli liderimiz həmin müraciətilə xalqa onun alternativsiz siyasi kursunu davam etdirə biləcək dəqiq ünvanı göstərdi. Respublikamızın gələcək inkişafının, vətəndaşlarımızın firavan həyatının məhz Heydər Əliyevin həyata keçirdiyi siyasətin varisliyindən, dövlət hakimiyyətinin həmin siyasətin həyata keçirilməsini təmin edə biləcək etibarlı əllərə tapşırılmasından asılı olduğunu dərindən anlayan Azərbaycan xalqı yeni minilliyin ilk prezident seçkilərində müdrik qərar verdi: Heydər Əliyev siyasi xəttinin layiqli davamçısı olan cənab İlham Əliyev 2003-cü ilin 15 oktyabr seçkilərində xalqın mütləq əksəriyyətinin etimadını qazanaraq Azərbaycan Respublikasının Prezidenti seçildi. Azərbaycan vətəndaşları Heydər Əliyev siyasi kursuna alternativ görmədikləri kimi, bu strategiyanı uğurla davam etdirəcək siyasi xadimi də düzgün olaraq ümummilli liderin komandasında müəyyənləşdirdilər. Xalqına, dövlətinə qəlbən bağlı olan cənab İlham Əliyevin respublikamıza rəhbər seçilməsi dünyanın tərəqqipərvər, sabitlik, demokratiya, sülh, rifah və inteqrasiya şəraitində yaşamağa üstünlük verən bütün mütərəqqi qüvvələri tərəfindən həm Azərbaycanda, həm də regiondakı ictimai-siyasi proseslərin məntiqindən doğan labüd hadisə kimi qarşılandı.

Azərbaycanın çağdaş tarixində Heydər Əliyev siyasi kursunun təntənəsi kimi xatırlanacaq 15 oktyabr seçkiləri dünya birliyinə sürətlə inteqrasiya olunan, demokratik inkişaf yolunda atdığı ardıcıl addımlarla böyük nüfuz sahibinə çevrilən müstəqil dövlətimizin həyatında yeni bir tarixi mərhələnin əsasını qoymuşdur. Bu müddətdə respublikanın bütün həyati əhəmiyyətli sahələrdə qazandığı böyük nailiyyətləri gündəlik həyatında hiss edən, möhkəm təməllərə söykənən iqtisadi-siyasi sabitlik, əmin-amanlıq və sülh şəraitində yaşayan hər bir azərbaycanlının tarixi 15 oktyabr seçiminin son dərəcə düzgün və dəyişməz olduğu təsdiqlənmişdir.

Möhtərəm İlham Əliyevin prezident kimi fəaliyyət göstərdiyi yeddi il ərzində inamla davam etdirdiyi sosial-iqtisadi inkişaf strategiyası, böyük uğurla həyata keçirdiyi islahatlar həm də onun yüksək idarəçilik qabiliyyətinin və mükəmməl iş təcrübəsinin əyani təzahürü kimi dəyərləndirilə bilər. Ölkənin bütün problemlərinə milli dövlətçilik prinsipləri kontekstindən yanaşan, cəmiyyətin ümumi inkişaf qanunauyğunluqlarını dəqiq şəkildə qiymətləndirməyi bacaran, eyni zamanda, ictimai həyatın müxtəlif sahələrindəki çətinliklər və nöqsanlar haqqında aydın təsəvvürə malik olan Prezident İlham Əliyev məhz bu keyfiyyətləri sayəsində yeni bir dövr üçün qarşıda duran prioritet vəzifələri dəqiq şəkildə müəyyənləşdirməyə müvəffəq olmuşdur.

Ölkə başçısının 2003-cü ilin 31 oktyabrında keçirilən andiçmə mərasimində "Azərbaycanı qüdrətli dövlətə çevirmək üçün ən başlıcası ölkədə Heydər Əliyevin siyasəti davam etdirilməlidir. Bu gün yüksək kürsüdən çıxış edərkən mən Azərbaycan xalqına söz verirəm ki, bu siyasətə sadiq qalacağam, heç vaxt bu yoldan dönməyəcəyəm" - deməsi onun ulu öndərimiz Heydər Əliyevin dövlətçilik irsinə sadiq olduğunu bir daha nümayiş etdirmişdir. Bu möhtəşəm mərasimdə ölkə başçısı İlham Əliyev Azərbaycanın mövcud vəziyyətini və gələcək inkişaf perspektivlərini dəqiq xarakterizə etməklə yanaşı, növbəti beş il üçün özünün əsas fəaliyyət prioritetlərini açıqlamışdır: güclü dövlət, sabitliyə təminat, hər kəs üçün sosial rifah!

Güclü, mobil və yüksək iş qabiliyyətli komandaya malik olan dövlət başçısı hökumət qarşısında duran prioritet vəzifələri düzgün müəyyənləşdirməklə, yeni dövrün ən səciyyəvi cəhəti kimi, ilk növbədə, milli iqtisadiyyatda struktur dəyişikliklərinə nail olmağın, kəmiyyət dəyişikliklərini keyfiyyət müstəvisinə keçirməyin zəruriliyini önə çəkmişdir: "Bizim hamımızın vəzifəmizdir ki, ölkədə bu siyasəti davam etdirək, əldə olunan uğurları artıraq və hərtərəfli inkişaf üçün böyük imkanlardan istifadə edərək, qoyulmuş bu gözəl təməl üzərində müasir Azərbaycan yaradaq", - deyən Prezident İlham Əliyev yeddi ildə imzaladığı məqsədyönlü fərman və sərəncamlarla, qəbul etdiyi praqmatik qərarlarla, habelə obyektiv reallıqdan irəli gələn addımları ilə ölkəmizin dinamik yüksəlişini təmin etmiş, həyata keçirdiyi islahatlarla inkişaf mexanizminin daha da çevikliyinə, işləkliyinə nail olmuşdur.

İlham Əliyevin fəaliyyətinin ən mühüm göstəricisi odur ki, Prezident olaraq o, Heydər Əliyev tərəfindən əsası qoyulmuş tərəqqini, əldə edilən nailiyyətləri təkcə qoruyub saxlamadı, həm də onların miqyasını genişləndirdi, inkişaf dinamikasını qat-qat artırdı. Böyük çətinliklə qazanılan ictimai sabitlik toxunulmaz qaldı, sosial-iqtisadi yüksəliş, mütərəqqi siyasi dəyişikliklər, hüquqi və demokratik yönümlü islahatlar uğurla davam etdirildi, demokratik prinsiplər və insan hüquqlarının prioritetliyi təmin olundu, xalqın sabaha inamı, dövlətinə və rəhbərinə etimadı daha da artdı.

Ölkədə siyasi münasibətlərin sağlamlaşdırılması yönümündə atılan konkret addımlar öz bəhrəsini verdi, milli birlik, vətəndaş həmrəyliyi möhkəmləndi, yüzlərlə insan rəhbərin ali mərhəməti nəticəsində əfv olunub cəmiyyətdə yenidən özünü təsdiq etmək imkanı əldə etdi. Milli-mədəni intibah yeni yüksəliş dövrünə qədəm qoydu, azərbaycançılıq ideologiyası ətrafında mənəvi səfərbərlik təmin olundu.

Azərbaycan iqtisadiyyatının, xüsusilə də qeyri-neft sektorunun inkişafı bu gün Prezident İlham Əliyevin siyasətinin əsas prioritetlərindən biridir. Ümummilli liderimiz Heydər Əliyev tərəfindən müəyyən edilmiş və elmi əsaslara söykənən iqtisadi siyasət strategiyasının həyata keçirilməsi bütün sahələrdə davamlı inkişafı təmin etmiş, qısa müddət ərzində Azərbaycanda çox böyük nailiyyətlər əldə edilməsinə imkan vermişdir.

Azərbaycan Prezidenti regionların inkişafına nail olmaq üçün qarşıya kənd təsərrüfatı məhsulları istehsalının artırılması, qeyri-neft sənayesi sahələrinin, o cümlədən emal sənayesinin, xidmət və digər infrastruktur obyektlərinin yaradılması, turizmin inkişafının təmin edilməsi, məşğulluğun səviyyəsinin yüksəldilməsi, əhalinin güzəranının yaxşılaşdırılması, bölgələrdə müasir tipli elektrik stansiyalarının tikilməsi, yolların və kommunikasiya xətlərinin qurulması, sahibkarlığın inkişaf etdirilməsi istiqamətində kompleks tədbirlərin görlməsi, sahibkarlığın inkişafına maliyyə yardımının artırılması, regionlarda təhsil, səhiyyə sahələrində mühüm işlərin görülməsi kimi strateji vəzifələr qoydu. Bu vəzifələr Prezident İlham Əliyevin imzaladığı regionların sosial-iqtisadi inkişafı Dövlət proqramlarında öz əksini tapdı. Dövlət proqramları olduqca əhəmiyyətli və regionların inkişafı üçün bütün zəruri məqamları əks etdirən mühüm sənədlər kimi qəbul edilib və hazırda da həyata keçirilir.

Müstəqil Azərbaycan Respublikasının tarixində ilk dəfə olaraq, həmin sənədlərdə işlərin görüləcəyi regionun, rayonun, hətta kəndin ünvanı, nəzərdə tutulan layihənin, həyata keçiriləcək tədbirin adı, konkret vaxtı, icrasına məsul olan təşkilatlar göstərilmişdir. Birinci regional dövlət proqramının icrasında olduğu kimi, ikincinin də reallaşmasına Prezident İlham Əliyev şəxsən nəzarət edir. Bu məqsədlə mütəmadi olaraq, respublikanın regionlarına səfər edir, problemlərin yerindəcə həll olunması üçün tapşırıqlar verir. Proqramın həyata keçirilməsini sürətləndirmək üçün Azərbaycan Prezidenti regionlar üzrə əlavə tədbirlər planları imzalayır.

2003-2010-cu illərdə qəbul etdiyi fundamental qərarlar, imzaladığı sərəncamlar cənab İlham Əliyevin daim xalqın mənafeyindən çıxış etdiyini, habelə verdiyi vədlərin əməli fəaliyyətə, praqmatizmə söykəndiyini, reallığa adekvat olduğunu göstərmişdir.

Azərbaycan xalqının 2008-ci il 15 oktyabr tarixli növbəti müdrik və uzaqgörən seçimi də məhz bu reallıqla şərtlənmişdir. Belə ki, ölkə vətəndaşları ötən beş ildə hər vədini əməli işilə doğruldan, əzmkar fəaliyyətilə ölkə həyatının ən müxtəlif sahələrində inkişaf və tərəqqini təmin edən, bütün məsələlərdə insan və şəxsiyyət amilini uca tutan layiqli siyasi liderə səs vermişlər.

Xalqına və dövlətinə bağlı lider İlham Əliyevin ikinci müddətə Azərbaycan prezidenti seçilməsi dünyanın sabitlik, demokratiya, sülh, rifah və inteqrasiya şəraitində yaşamağa üstünlük verən bütün mütərəqqi qüvvələri tərəfindən həm Azərbaycanda, həm də regiondakı ictimai-siyasi proseslərin məntiqindən doğan labüd və qanunauyğun hadisə kimi qarşılanmışdır.

2008-ci il oktyabrın 24-də növbəti dəfə Vətənə, xalqa və dövlətə sədaqət andı içərək ikinci müddətə prezidentlik səlahiyyətlərinin icrasına başlayan dövlət başçısı İlham Əliyev təntənəli mərasimdəki çıxışında növbəti beş ildə də Heydər Əliyev siyasi kursunun uğurla davam etdirilməsinə səylə çalışacağını vurğulamışdır: "Beş il bundan əvvəl andiçmə mərasimində Azərbaycan xalqına söz vermişdim ki, Azərbaycanın hərtərəfli inkişafı üçün fəal çalışacağam. Söz vermişdim ki, Azərbaycanda Heydər Əliyev siyasətini davam etdirəcəyəm. Çünki bu, Azərbaycanın bugünü və sabahı üçün, gələcəyi üçün yeganə siyasətdir. Bu siyasət Azərbaycanı böyük bəlalardan qurtardı. Ulu öndər Heydər Əliyevin rəhbərliyi ilə Azərbaycan sürətlə inkişaf etmişdir. Azərbaycan xaosdan, böhrandan, anarxiyadan inkişafa, sabitliyə doğru böyük addımlar atmışdır. Məhz onun rəhbərliyi altında Azərbaycanda dövlətçilik ənənələri qurulmuşdur, Azərbaycan öz dövlət müstəqilliyini möhkəmləndirmiş, ölkədə sabitlik yaradılmış və inkişaf başlamışdır. Bu gün bir daha demək istəyirəm ki, növbəti beş il ərzində mən bu siyasətə sadiq qalacağam və bu yoldan dönməyəcəyəm".

Bu gün regionda ikinci elə bir dövlət tapmaq çətindir ki, son 7 ildə ümumi daxili məhsulun artım tempinə görə dünyada lider mövqelərini qoruyub saxlasın, qısa müddətdə dövlət büdcəsinin vəsaitlərini 10 dəfədən çox artırsın. Ötən dövrdə dövlət büdcəsinin 1,5 milyard ABŞ dollarından 15 milyard dollara yüksəlməsi, yalnız hərbi xərclərin - dövlət başçısının müəyyənləşdirdiyi vəzifə kimi - təcavüzkar Ermənistanın bütövlükdə dövlət büdcəsinə çatması həyata keçirilən siyasətin uğurları barədə dolğun təsəvvür yaradır.

Ölkədə bazar münasibətlərinə söykənən liberal iqtisadi sistemin qurulmasının, vətəndaşların iqtisadi azadlığına, təşəbbüskarlığına geniş meydan verilməsınin, Azərbaycanın zəngin təbii sərvətlərindən səmərəli istifadə edilməsınin, respublikanın investisiya cəlbediciliyinin yüksəldilməsinin və digər konseptual əhəmiyyətli tədbirlərin nəticəsi olaraq 2010-cu ilin yanvar-avqust aylarında da ölkədə dinamik inkişaf müşahidə edilmişdir. Belə ki, ötən ilin eyni dövrü ilə müqayisədə Azərbaycanda ümumi daxili məhsul istehsalı 3,8, sənaye istehsalı 3,8 faiz, əhalinin banklardakı əmanətləri isə 35,8 faiz artmışdır.

Azərbaycan Prezidenti İlham Əliyev ölkənin valyuta ehtiyatlarının yüksək templə artımını haqlı olaraq ciddi uğur kimi dəyərləndirmişdir: "Ölkədə böyük maliyyə resursları yaradılmışdır. Bizim uğurlu neft siyasətimiz nəticəsində bu gün Azərbaycan öz maliyyə imkanlarını genişləndirir. İlin əvvəlindən Azərbaycanın valyuta ehtiyatları artmış - 20 milyard dollardan 24,7 milyard dollara çatmışdır və bu, bizim strateji ehtiyatlarımızdır. Bu ehtiyatlar imkan verir ki, biz iqtisadi sahədə istənilən məsələni, istənilən infrastruktur layihəsini özümüz öz gücümüzə arxalanaraq icra edə bılək. Bu, bir daha onu göstərir ki, Azərbaycanda neft-qaz sektorunda islahatların aparılması, şəffaflığın təmin olunması və şəffaflıqla bağlı bütün mütərəqqi təşəbbüslərə qoşulmağımız, bax, bu böyük ehtıyatın yaranmasına gətirib çıxarmışdır".

Bütün bunlar bir daha təsdiqləyir ki, 2008-ci il oktyabrın 24-də keçirilmiş andiçmə mərasimində "Azərbaycan xalqını əmin etmək istəyirəm ki, bundan sonra da Vətənimizin uğurlu inkişafı üçün, Azərbaycanın çiçəklənməsi üçün mən əlimdən gələni əsirgəməyəcəyəm, Azərbaycan xalqına bundan sonra da xidmət edəcəyəm" - deyən dövlət başçısı İlham Əliyev xalq qarşısında verdiyi bütün vədlərə sadiqdir. Azərbaycan Prezidentinin verdiyi bütün vədlər əməli fəaliyyətə, real siyasətə əsaslanmış, milli maraq və mənafeləri maksimum dərəcədə özündə ehtiva etmişdir. İnanırıq ki, elmi əsaslara söykənən bu siyasətin qarşıdakı illərdə də uğurla davam etdirilməsi vətəndaşları qayğılandıran bütün problemlərin aradan qalxmasına, xalqın yaşayış səviyyəsinin daha da yüksəlməsinə real imkanlar yaradacaqdır.

Qüdrət Kərimov,

iqtisad elmləri doktoru,

"Xəzər" Səhmdar Cəmiyyətinin sədri

Xalq qəzeti.- 2010.- 31 oktyabr.- S. 5.