Prezident İlham Əliyev
xalqın etimadını şərəflə doğruldur
İlham
Əliyev yüksək intellektli, praqmatik düşüncəli,
müasir dünya siyasətini və iqtisadiyyatını
gözəl bilən enerjili və təşəbbüskar bir
şəxsiyyətdir.
Heydər ƏLİYEV,
Azərabycan xalqının ümummilli
lideri
Müasir
Azərbaycan Heydər Əliyevin əsəridir. Biz
hamımız, bütün Azərbaycan xalqı gərək
bundan sonra onun gördüyü işləri davam etdirək,
genişləndirək, onun yolu ilə Azərbaycanı gələcəyə
aparaq.
İlham ƏLİYEV,
Azərbaycan Respublikasının
Prezidenti
Müasir
tariximizin son yeddi ildəki inkişaf mərhələsinin
başlanğıcı barədə qələmə
aldığımız bu məqalədə 2003-cü ilin
oktyabrında söylənilmiş iki ifadədən sitat gətirdik.
Çünki həmin ilin payızı Azərbaycan
üçün, sözün əsl mənasında, çox
həssas bir dövr idi. Hətta bəzi ekspertlər
2003-cü ilin oktyabrı haqqında danışarkən, həmin
ayın 15-də keçirilmiş prezident seçkisini bizim
üçün taleyüklü bir məsələ
olduğuna görə 1993-cü ilin seçkisi ilə
müqayisə etməyə çalışırlar. Öz
fikirlərini bu şəkildə əsaslandırırlar ki,
93-cü ilin oktyabrında Heydər Əliyev prezident
seçilməsəydi milli dövlətçilik əldən
gedəcəkdisə, 2003-cü ilin oktyabrında İlham Əliyevin
seçilməyəcəyi təqdirdə Heydər Əliyevin
Azərbaycan xalqı ilə birlikdə son 10 ildə əldə
etdiyi bütün nailiyyətlər heçə dönəcək,
xalq öz müstəqilliyinin inkişaf yolunu yenidən,
sıfırdan başlamalı olacaqdı.
Hər
halda 1993-cü ilin oktyabrı bizim üçün
taleyüklü bir seçkinin reallaşması ilə yadda
qalmışdısa, 2003-cü ilin oktyabrında
xalqımız həssas bir məqamı yaşadı, başı
minbir bəla çəkmiş millət yol ayrıcında
qalan istiqlaliyyətini düzgün istiqamətə yönəldə
bildi. Azərbaycan xalqının 2003-cü ilin oktyabrında
etdiyi seçim müstəqilliyimizin əbədiləşdirilməsi
üçün 10 il gecə-gündüz çəkdiyimiz zəhmətin
nəticələrini qorumuş oldu.
Bəlkə
də, möhtəşəm bir tarixi inkişaf mərhələsinin
başlandığı günlə xalqın vətəndaş
müharibəsi və dövlətçiliyin əldən
getməsi ilə üz-üzə qaldığı günlər
arasında paralellər axtarmaq o qədər də məntiqli
görünmür. Ancaq milli mənafe baxımından
1993-cü ilin və 2003-cü ilin oktyabr aylarında
keçirilmiş prezident seçkilərinin əhəmiyyətini
eyniləşdirənlərin qənaətində bir məntiq
var. Daha doğrusu, bu məntiqi zaman sübut etmişdir.
Ölkə əhalisinin 1993-cü ilin oktyabrında inam və
etimad göstərdiyi Heydər Əliyev 30 ildən çox
öz xalqına və dövlətinə canı, qanı ilə
xidmət etmiş görkəmli dövlət xadimi,
dünyanın ən üzdə olan, görkəmli türk
siyasətçisi idi. 2003-cü ildə Rusiya
Federasiyasının Prezidenti Vladimir Putin Heydər Əliyevin
keçdiyi həyat yolunu "postsovet məkanının siyasətçiləri
üçün məktəb", Türkiyə Cümhuriyyətinin
Prezidenti Əhməd Nejdət Sezər isə "türk
dünyasının ən təəssübkeş siyasətçisi"
adlandırmışdı. Yəni Heydər Əliyevin siyasi
dühasi təkcə Azərbaycan və Qafqaz
reallığı deyil, bütün postsovet məkanının
və Türk dünyasının reallığı idi. Cənab
Vladimir Putinin məktəb adlandırdığı Heydər Əliyev
təcrübəsinə ən yaxından bələd olan, bir
çox məqamlarda isə onun ən etibarlı
silahdaşı kimi xüsusi xidmətləri ilə yadda qalan
("Əsrin müqaviləsi"nin imzalanmasında və
40-50 il üçün nəzərdə tutulmuş yeni neft
strategiyasının hazırlanmasında Heydər Əliyevin ən
etibarlı silahdaşı məhz İlham Əliyev idi)
İlham Əliyevə etibar göstərilməsi, onun dövlət
başçısı seçilməsi tamamilə gözlənilən
idi. Xalq bu seçimi etdi və özünün uzunömürlü
inkişafının təməlini qoydu.
İlham
Əliyevin keçdiyi həyat yolu, ictimai-siyasi proseslərdə
fəal iştirakı, idarəetmədə
qazandığı təcrübə və şəxsi
imkanları, xüsusən intellektual səviyyəsi və
müasir siyasət adamları üçün zəruri olan
bütün keyfiyyətləri mənimsəməsi onun qələbəsini
şəksiz edirdi. Xalq onu şəriksiz lideri kimi
görürdü. Moskva Dövlət Beynəlxalq Münasibətlər
İnstitutunun məzunu və müəllimi olması, Rusiya
paytaxtında fəaliyyət göstərən böyük
bir şirkətin baş direktoru kimi iqtisadi idarəçilikdə
təcrübə qazanması İlham Əliyevə Azərbaycan
Respublikası Dövlət Neft Şirkətinin xarici iqtisadi əlaqələr
üzrə vitse-prezidenti, sonra isə birinci vitse-prezidenti kimi fəaliyyət
göstərməsində kifayət qədər kömək
etmişdi.
Azərbaycan
seçiciləri İlham Əliyevin diplomatik
uğurlarını onun Milli Məclisin deputatı kimi Avropa
Şurasının Parlament Assambleyasındakı daimi nümayəndə
heyətimizin başçısı olarkən əldə
etdiyi uğurlardan tanıyırdı. Məhz İlham Əliyevin
prinsipiallığı, təşəbbüskarlığı
və Avropa qurumlarında aparıcı dil olan ingilis və
fransız dillərini dərindən bilməsi nəticəsində
AŞPA münaqişə tarixində ilk dəfə olaraq Ermənistanı
işğalçı dövlət kimi tanıyan rəsmi sənəd
qəbul etmişdi. Bilavasitə həmin peşəkarlığın
nəticəsi idi ki, 2003-cü ilin yanvarında azərbaycanlı
deputat İlham Əliyev AŞPA sədrinin müavini və
qurumun büro üzvü seçilmişdi.
Azərbaycan
seçiciləri yaxşı bilirdilər ki, İlham Əliyev
həm Azərbaycan Milli Olimpiya Komitəsinin prezidenti kimi
(1997-ci ildən bəri), həm də Azərbaycan Respublikasının
Baş naziri kimi vəzifələrdə (2003-cü ilin
avqustundan sonra) mükəmməl bir idarəçilik təcrübəsi
qazanmışdır. İlham Əliyevin 1999-cu ildə Yeni Azərbaycan
Partiyasının sədr müavini, 2001-ci ildə isə sədrin
1-ci müavini seçilməsindən sonra siyasi həyatda
nümayiş etdirdiyi fəallıq onun liderlik keyfiyyətlərini
də ortaya qoymuşdu. Beləliklə, öz diplomatik
uğurları, liderlik keyfiyyətləri, idarəetmə məharəti
və iqtisadi proseslərə dərindən bələd
olması ilə xalqın həqiqi seçiminə
çevrilmiş İlham Əliyevin 2003-cü ilin
oktyabrındakı qələbəsi şəksiz idi. Necə
ki, xalq bu gözləntini reallaşdırdı. Baş nazirin
qeyd edilən bütün şəxsi keyfiyyətləri ilə
yanaşı, Azərbaycan əhalisinin əlində ulu öndər
Heydər Əliyevin söylədiyi bir fikir də var idi:
"Mən ona özüm qədər inanıram və gələcəyinə
böyük ümidlər bəsləyirəm". Bu gün
Azərbaycanın dünya miqyaslı uğurlar qazanması ulu
öndərimizin həmin ümidlərinin doğrulması deməkdir.
Prezident
İlham Əliyev 2003-cü il oktyabrın 31-də dövlət
başçısı kimi ilk dəfə and içdi və həmin
günlə də ölkədə mükəmməl bir
sosial-iqtisadi inkişafa start verildi. "Mən hər bir azərbaycanlının
Prezidenti olacağam" - deyən İlham Əliyev ilk
növbədə həmin tezisin reallaşmasına nail oldu.
Qısa müddət ərzində ölkənin yeni rəhbəri
ümumxalq etimadı qazandı. Əfv fərmanları və
amnistiya aktları, insan hüquqlarının daha geniş
şəkildə qorunub saxlanılması, seçki təcrübəsinin
təkmilləşdirilməsi və digər addımlar
İlham Əliyevin reytinqini o qədər yüksəltdi ki, nəticədə
ikinci dəfə prezident seçilməsindən dərhal sonra
bütün rəqibləri səmimi bir etirafla onu təbrik
etdilər. Türk ekspertlər yazırdılar ki, prezidentliyə
hər bir namizədin öz platforması və qarşıya
qoyduğu vəzifələr olur. 2008-ci ildə Azərbaycanda
prezidentliyə namizəd olan şəxslər ölkədə
həyata keçirəcəkləri tədbirlərin
hamısının məhz İlham Əliyev tərəfindən
reallaşdırıldığını görəndə
onu qələbə münasibətiylə təbrik etməkdən
başqa bir yol görmədilər.
Prezident
İlham Əliyev regionların sosial-iqtisadi
inkişafını təmin edən məlum dövlət
proqramı ilə start verdiyi hərtərəfli inkişafa məhz
çoxsaylı dövlət proqramlarının icrası ilə
nail ola bildi. Qeyri-neft sektorunun inkişafı, neft sektorundan əldə
edilən gəlirlərin bir hissəsinin insan kapitalına -
intellektual kapitala çevrilməsi, dünyanın ən
mütərəqqi təcrübələrinin Azərbaycana gətirilməsi,
ən mükəmməl vətəndaş cəmiyyətinin
yaradılması, insanların sosial-rifah halının
yaxşılaşdırılması üçün maksimum
layihələrin reallaşdırılması və çox
başqa faktlar ölkə daxilində İlham Əliyevin
uğurları kimi qəbul edilir. Ancaq beynəlxalq təşkilatlar
onun ölkədəki bütün çadır düşərgələrini
müasir qaçqın şəhərciklərii ilə əvəz
etməsini, 7 ildə 2 minə qədər məktəb
binası tikilməsinə nail olmasını, yoxsulluq həddinin
49 faizdən 11 faizə endirilməsini, işsizlik probleminin həlli
üçün 800 min yeni iş yeri yaradılmasını,
adambaşına düşən ümumi daxili məhsul
istehsalının artım tempinə görə bütün
dünyada lider dövlətə çevrilməyimizi,
dünyanın ən yaxşı biznes mühütünə
malik ölkəsinə çevrilməyimizi və bir çox
məqamları Azərbaycan Prezidentinin ən böyük
uğurları kimi tanıyırlar.
Xalqımız
isə başqa bir məqamı önə çəkir:
Munaqişə tarixində ilk dəfə - 2010-cu ilin
oktyabrında Rusiyanın Həştərxan şəhərində
Ermənistan Prezidentinin Azərbaycanın humanitar tələbləri
ilə razılaşması Prezilent İlham Əliyevin
başa çatmaqda olan ildəki siyasi-diplomatik
uğurlarındandır. İnanırıq ki, bu tendensiya
ölkəmizin ərazi bütövlüyünün bərpa
olunmasına qədər davam edəcəkdir.
İttifaq Mirzəbəyli
Xalq qəzeti.- 2010.- 31 oktyabr.- S. 5.