"Dağlıq Qarabağ: həqiqətlər, yalanlar..." sənədli filminin təqdimat mərasimi keçirilmişdir

Avqustun 31-də Azərbaycan Respublikasının Prezidenti yanında Strateji Araşdırmalar Mərkəzində Milli Məclisin deputatı Həvva Məmmədovanın müəllifliyi ilə çəkilmiş "Dağlıq Qarabağ: həqiqətlər, yalanlar..." sənədli filminin təqdimat mərasimi keçirilmişdir.

Bu ekran əsərinin çəkilməsində məqsəd ermənilərin xalqımıza qarşı zaman-zaman həyata keçirdiyi soyqırım siyasətini və Azərbaycanın haqq səsini dünya ictimaiyyətinə çatdırmaqdır. Filmdə xain qonşularımızın uzun illər boyu azərbaycanlılara qarşı həyata keçirdiyi soyqırımı siyasətinin tarixi xronologiyası təqdim edilmiş, eyni zamanda, erməni vandalizminin son mərhələsi olan Dağlıq Qarabağın işğalı zamanı törədilən vəhşiliklər barədə məlumat verilmişdir.

Sənədli filmdə ilk dəfə olaraq ABŞ, Türkiyə, Rusiya, Gürcüstan, Qazaxıstan, Fransa və digər ölkələrin tarixçiləri, alimləri, ekspertləri Dağlıq Qarabağ və Azərbaycan ilə bağlı öz fikirlərini səsləndirmişlər: "Dünya ictimaiyyəti bilməlidir ki, erməni sindromu mövcuddur və ona qarşı ciddi mübarizə aparılmalıdır".

H.Məmmədova filmin ingilis dilinə tərcümə edildiyini və digər dillərə də tərcümə olunacağını demişdir.

Mərasimdə iştirak edən Milli Məclisin deputatları, siyasət və elm xadimləri bildirmişlər ki, ermənilərin zaman-zaman azərbaycanlılara qarşı törətdikləri terror aktlarından bəhs edən film Ermənistanın işğalçılıq siyasətinin mahiyyəti, o cümlədən Ermənistan-Azərbaycan, Dağlıq Qarabağ münaqişəsinin yaranma səbəbləri barədə tarixi həqiqətlərin dünya ictimaiyyətinə, gənc nəslə çatdırılması baxımından əhəmiyyətli hadisədir.

Vurğulanmışdır ki, erməni vəhşiliklərindən bəhs edən filmlərin və kitabların sayının çoxluğu Ermənistanla informasiya müharibəsində qalib gəlməyimizə kömək edir.

Təqdimat mərasimində təklif olunmuşdur ki, "Dağlıq Qarabağ: həqiqətlər, yalanlar..." sənədli filmi Azərbaycanın xarici ölkələrdəki səfirlikləri vasitəsilə Azərbaycan diasporuna çatdırılsın: "50 milyon azərbaycanlı bu filmi görməli, onu digər insanlar arasında yaymalıdır".

Xalq qəzeti.- 2010.- 1 sentyabr.- S. 6.