Türkdilli Ölkələrin Parlament Assambleyasının Beynəlxalq Katibliyində görüş

Türkdilli Ölkələrin Parlament Assambleyasının (TÜRKPA) Baş katibi Ramil Həsənov TÜRKPA Katibliyinin ofisində Yunanıstanın ölkəmizdəki fövqəladə və səlahiyyətli səfiri İoannis Metaksas ilə görüşmüşdür.

Qonağı salamlayan R.Həsənov O, TÜRKPA-nın quruluşu, fəaliyyəti və əsas məqsədləri haqqında geniş məlumat vermişdir. TÜRKPA Beynəlxalq Katibliyinın Azərbaycan Respublikasındakı 57-ci diplomatik missiya olaraq fəaliyyətə başladığı və türkdilli ölkələrin siyasi, sosial-iqtisadi, mədəni, humanitar və digər sahələrdə əlaqələrinin inkişafına xidmət etdiyi vurğulamışdır. Qurumun Avropa ölkələri üçün siyasi, iqtisadi cəhətdən çox böyük əhəmiyyət kəsb etdiyi və parlamentlərarası əməkdaşlığın keyfiyyətcə yeni mərhələsi olan parlament diplomatiyası vasitələrinin köməyi ilə dövlətlər arasında dialoqun daha da inkişaf etdirilməsində, din, dil, irqə fərq qoymayan, beynəlxalq hüquq normaları çərçivəsində fəaliyyət göstərən bir tolerant təşkilat olduğu qonağın diqqətinə çatdırılmışdır. Gələcəkdə enerji sahəsində region və Avropa ölkələrinin əməkdaşlığının genişləndirilməsində və gücləndirilməsində də Parlament Assambleyasının mühüm olacağı qeyd edilmişdir.

Daha sonra beynəlxalq əməkdaşlıq çərçivəsində ATƏT PA, AŞPA, NATO PA, Avropa Parlamenti, Avropa Parlamentinin İnkişaf Ofisi, Cənubi Avropa Ölkələrinin Parlament Assambleyası, MDB PA, İKT PA, Beynəlxalq Parlamentlər Birliyi, Beynəlxalq Parlamentlərin Baş Katiblərinin Assosiasiyası, Qara Dəniz İqtisadi Əməkdaşlıq Təşkilatının parlament assambleyası (QİƏT PA), Asiya Təhlükəsizlik və Əməkdaşlıq Şurası və digər beynəlxalq təşkilatlarla əməkdaşlığın qurulması, qarşılıqlı fəaliyyət, müşahidəçi statusunun alınması ilə bağlı fəaliyyətləri haqqında da səfirə məlumat verilmişdir.

Eyni zamanda, R. Həsənov Yunanıstan ilə bir çox istiqamətlərdə əməkdaşlığın müsbət şəkildə inkişaf etdirilməsində, genişləndirilməsində və davam etdirilməsində Parlament Assambleyasının maraqlı olduğunu bildirmişdir.

Səfir İoannis Metaksas TÜRKPA Baş katibinə geniş və ətraflı məlumat verdiyi üçün təşəkkür etmiş, assambleyanın yaranması, Beynəlxalq Katibliyin daimi əsasda fəaliyyət göstərməsi və qurumun Bakıdakı fəaliyyətinə önəm verdiyini qeyd etmişdir. TÜRKPA-nın quruluşunu, həmçinin beynəlxalq əməkdaşlıq çərçivəsində qısa zamanda ATƏT, NATO və Avropa Şurası Parlament Assambleyası kimi beynəlxalq təşkilatlarla fəaliyyətini yüksək qiymətləndirmişdir. Bu işlərdə Azərbaycan Respublikası Milli Məclisinin sədri, TÜRKPA-nın fəaliyyətdə olan sədri Oqtay Əsədovun fəaliyyətini yüksək qiymətləndirdiyini və onun TÜRKPA-nın sabitlik qarantı rolunda çıxış edəcəyinə əmin olduğunu söyləmişdir.

Səfir daha sonra Azərbaycan, Qazaxıstan, Türkiyə və Yunanıstan arasında mövcud parlamentlərarası əlaqələrin inkişafından və dostluq qruplarının yaxından fəaliyyət göstərməsindən məmnun olduğunu qeyd etmişdir. Qonaq enerji sahəsində ölkələrarası əməkdaşlığın inkişaf etdirilməsinin önəmli fakt olduğunu Baş katibin diqqətinə çatdırmışdır.

Yunanıstan Respublikasının Azərbaycandakı səfirliyi ilə TÜRKPA Beynəlxalq Katibliyi arasında əlaqələrin inkişaf edəcəyini bildirən səfir assambleyanın Beynəlxalq Katibliyinə gələcək işlərində uğurlar diləmiş və qurumun bir çox tədbirlərində məmnuniyyətlə iştirak edəcəyini qeyd etmişdir.

Görüşün sonunda TÜRKPA adından İoannis Metaksasa assambleyanın müvafiq sənədlər toplusu və xatirə hədiyyəsi təqdim olunmuşdur.

Görüşdə TÜRKPA Baş katibinin müavini, Qazaxıstan Respublikasının Parlament Assambleyasındakı nümayəndəsi Mels Semqaliyev iştirak etmişdir.

Əliqismət BƏDƏLOV

Xalq qəzeti.- 2010.- 5 sentyabr.- S. 7.