Cəlilabad - çiçək açan arzu, murad...

Bu il inzibati rayon kimi yaradılmasından düz səksən il ötən Cəlilabadın bir tərəfi qocaman Muğan düzünə düşür, bir tərəfi isə Burovar dağ silsiləsi ilə əhatələnib. Qışda bu yerlərə dağların soyuğu, yayda yaylaqların sərin mehi "əl" uzadır. Amma insan qəlbinin hərarətini Cəlilabadda ilin hər fəslində duymaq mümkündür. Xüsusilə də son illərdə. Regional inkişaf üzrə dövlət proqramları ölkənin hər yerində olduğu kimi, bu rayonda da ardıcıl həyata keçirilir. Təbiətin bəxş elədiyi gözəlliklərə yaradan-quran insanların əli ilə yeni naxışlar vurulur.

Cəlilabadı görmək, gəzmək adama ayrı zövq verir. ...Cəlilabadlı şair dostum Sabir Yusifoğlu Sumqayıtda yaşasa da, yarı canı hey doğma yurd yerlərində, Adnalı adlı bir kəndin əlçim-əlçim buludlarındadır. Onun kitablarında "Cəlilabad" adlı şeirə rast gəlməmişəm, amma hamısının üz qabığında dağların rəsmi əks olunub. Bir də bütün şeirlərindən bu yerlərin ab-havası duyulur, bulaqları çağlayır. "Barmağının ucunda göyün yeddinci qatı" fırlanan günlərin xiffəti boy göstərir. Şair dostum bu dağların qayalarına qoşula bilməməsinə heyfsilənir. Taledən küsməyə dəyərmi? Axı, harada yaşamağından asılı olmayaraq, hər kəs ömrü boyu dünyaya gəldiyi və ən azı on yeddi yaşınadək sakini olduğu yerləri təmsil eləyir. Təki bu təmsilçilik layiqli olsun, təki ruhən yadlaşmayasan. "O yerləri ruhumda yaşadıb bəsləyirəm". -Bu, qan yaddaşıdır...

Cəlilabad, doğrudan da, gəzməli-görməli yerdir. Mişarçayın sahilində qərar tutub vüqarlanan rayon mərkəzinin də, əlçatmaz ucalıqlara sığınmış dağ kəndlərinin də öz gözəllikləri var. Şəhərdəki Heydər Əliyev seyrəngahı, bu dilbər guşədəki "Göl" oteli və ətrafı, bir qədər aşağıda, çayın sahilində yaradılmış "Tut bağı" istirahət mərkəzi göz-könül oxşayır. Qonaqları valeh edir, əfsanəvi təsir bağışlayır. Yardımlıya doğru uzanan dağ yolunun bir dayanacağında - Sadatlı meşəsində yaradılan müasir istirahət kompleksi də çox keçməz ki, turistlərin diqqətini cəlb eləyər.

Cəlilabadın adamları işgüzardır, istiqanlıdır. Böyük əksəriyyət halallığa tapınandır. Bəlkə də elə bu məziyyətə görədir ki, bu yerlərdə bin-bərəkət var. Elin varı çoxalır. Həyatı, günü-güzəranı ilbəil gözəlləşir.

İcra hakimiyyətinin başçısı Əziz Əzizov bizimlə görüşündə dedi ki, cəlilabadlılar hələ də möhtərəm Prezidentimiz İlham Əliyevin aprelin 29-da rayona etdiyi növbəti səfərin xoş təəssüratlarını yaşayır. Dövlətimizin başçısı rayonda bir sıra sosial-mədəni obyektin açılışında iştirak edib. Prezidentin qayğısı ilə rayonun inkişafı üçün nəzərdə tutulub reallaşdırılan işlərlə yaxından maraqlanıb və vəziyyəti təqdir eləyib: "Mən çox şadam ki, Cəlilabadda bütün işlər yaxşı gedir. Rayonun inkişafı üçün lazımi tədbirlər görülür. Həm sənaye imkanları artır, iqtisadi göstəricilər yaxşılaşır, həm də sosial infrastruktur yaradılır. Cəlilabad Azərbaycanda inkişaf baxımından ən qabaqcıl yerlərdə olan rayonlardan biridir".

Yüksək qiymət rayonun hər bir sakinində qürur yaradıb. Quruculuq əzmini gücləndirib. Tapşırılan işə görə məsuliyyət hissini daha da artırıb. Əvvəllər də qeyd eləmişəm: Cəlilabadda işlərin zövqlə, keyfiyyətlə yerinə yetirilməsi nümunə ola biləcək səviyyədədir. Bu, görülən işlərin uzunömürlülüyünü təmin etməkdir, dövlətin ayırdığı vəsaitin qədrini bilməkdir, daha geniş mənada desək,vətənpərvərlikdir.

Xatırlayıram ki, görüşlərimizin birində Əziz müəllim şəhərə xüsusi yaraşıq verən yeraltı keçidin divarında bir mərmər plitənin qopduğunu görərək cavabdeh adamları əməlli-başlı tənbeh eləməsindən danışmışdı. Bu, həm qüsurun aradan qaldırılması, həm də yaradılanın qorunub-saxlanması, elin malına özününkü kimi yanaşılması baxımından ibrətamizdir. İndiki zamanda adamlarda məhz bu kimi keyfiyyətlərin tərbiyə edilməsi xüsusilə vacibdir.

Cəlilabadda abadlıq-quruculuq tədbirləri sürətlə davam edir. Yaşayış məntəqələrinin qaz, işıq, su ilə tam təchizatı üçün əməli işlər görülür. Rayonda yeni park və xiyabanlar salınır, yollar təmir edilir, kənd yolları abadlaşdırılır. Bu il şəhərin Füzuli, Tomris, M.Hadi, H.Məmmədov və "Azərbaycan" küçələri, yeddi kilometrlik Göytəpə-Privolnoye yolu asfaltlaşdırılıb. İlin sonunadək daha səkkiz küçənin asfaltlaşdırılması nəzərdə tutulub. Hazırda iki kəndə təzə yol çəkilir.

"Azəriqaz" İstehsalat Birliyi Regionlar üzrə qaz istismarı idarəsinin Cəlilabad sahəsi rayonun mavi yanacaqla təchizatını sürətləndirib. Rayon mərkəzində 10 kilometrlik daşıyıcı qaz kəməri dəyişdirilərək yeni polietilen borularla əvəz olunub. Rayon mərkəzinin və Göytəpə şəhərinin bir çox küçələrində xətlər təmir olunub. Göytəpə ərazisində yerləşən Kazımabad kəndində yüksək təmir-bərpa işləri görülməklə qaz verilişi yaxşılaşdırılıb,180 mənzilə məişət qaz sayğacları quraşdırılıb. Rayon üzrə indiyə kimi cəmi 1025 ədəd qaz sayğacı dəyişdirilərək yenisi ilə əvəz olunub. Allar və Günəşli kəndlərinin də qazlaşdırılmasından ötrü mühüm işlər görülür. Əgər ilin əvvəlində rayon üzrə qaz istehlak edən işlək abonentlərin sayı 7540 idisə, hazırda artıq 8764-ə çatıb.

Cəlilabadın iqtisadiyyatında kənd təsərrüfatı aparıcı sahədir. Bu il on minlərlə ton taxıl, kartof, minlərlə ton tərəvəz istehsal olunub. Prezidentin tapşırığına əsasən, kənd təsərrüfatı məhsulunun qorunması üçün Cəlilabadda da mühüm tədbirlər həyata keçirilir. Hazırda hər biri iki min tonluq soyuducu kameralar, hər biri on min tonluq taxıl anbarları, iyirmi min tonluq regional gübrə bazası inşa edilir. Bu obyektlərin istifadəyə verilməsi aqrar sahənin daha da inkişaf etməsinə, məhsulun qorunmasına şərait yaradacaq.

Rayonda cari ildə istifadəyə verilən ən böyük obyektlər müasir Müalicə-Diaqnostika Mərkəzi, Qarabağ müharibəsi və şəhid ailələri üçün 4 mərtəbəli, 36 mənzilli yaşayış binası, Cəlilabad Şahmat Məktəbi, Tarix və diyarşünaslıq muzeyi, Göytəpə su anbarı, Göytəpə-Privolnoye yoludur. Təsəvvür edin ki, son dövrlərdə hər il ən azı bir o qədər sosial-mədəni obyekt tikilərək istifadəyə verilib. Rayonda 22 mindən artıq yeni iş yeri yaradılıb. Məktəblər tikilib. Yollar salınıb, ağac əkilib. Bütün bu işlər səngimək bilmir.

Təxminən iyirmi il qabad cəlilabadlı şair dostum bu rayon haqqında söhbətimiz zamanı bədahətən "Cəlilabad-deyil abad" qafiyəsini işlətmişdi. Bu dəfəki söhbətimizdə isə o, qafiyəsində düzəliş eləməli oldu. Sevinə-sevinə: "Cəlilabad-hər il abad!"-dedi. Mən də cavabında "Çiçək açır arzu-murad"-deyərək sözünə qüvvət verdim. Bəlkə də Cəlilabadın indisi barədə daha dəqiq və sərrast səslənə biləcək başqa ifadələr tapmaq mümkün deyil.

Əli NƏCƏFXANLI,

"Xalq qəzeti"nin bölgə müxbiri

Xalq qəzeti.- 2010.- 5 sentyabr.- S. 6.