Səbail rayonu yeni dərs ilinə hazırlığa yekun vurur

Səbail rayonunda keçirilən toplantıda yeni tədris ilinə hazırlığın vəziyyəti müzakirə olunmuşdur. Tədbirdə çıxış edən Səbail Rayon İcra Hakimiyyətinin başçısı Asif Əsgərov ölkədə təhsil məsələləri ilə bağlı görülən işlərdən, Azərbaycan Respublikasının Prezidenti İlham Əliyevin və Heydər Əliyev Fondunun rəhbəri, millət vəkili Mehriban xanım Əliyevanın ölkəmizdə təhsilin inkişafına diqqət və qayğısından danışmışdır.

Başçı bildirmişdir ki, bu il Səbail rayonunda da aparılan genişmiqyaslı quruculuq və abadlıq işləri çərçivəsində bir sıra sosial yönümlü obyektlər, o cümlədən Badamdar qəsəbəsində mədəniyyət evi və mərkəzdə 2 saylı musiqi məktəbi əsaslı təmir olunmuşdur. May ayında Badamdar qəsəbəsindəki 1966-cı ildə inşa olunmuş və 1940 şagirdin təhsil aldığı 236 saylı orta məktəbdə Heydər Əliyev Fondu tərəfindən başlanmış əsaslı təmir-yenidənqurma işlərinə bu günlərdə yekun vurulmuşdur. Sentyabr ayının 7-də Heydər Əliyev Fondunun prezidenti Mehriban xanım Əliyeva məktəbdə olmuş və təmirin yekunları ilə tanış olmuşdur. Təhsil üçün hər cür şərait yaradılmış məktəbi gəzən Mehriban xanım buradakı əsaslı təmiri yüksək qiymətləndirmiş, kollektivə müvəffəqiyyətlər arzulamışdır.

Bakı şəhərinin qocaman tədris müəssisələrindən olan 132 saylı orta məktəb və Beynəlxalq Təhsil Kompleksinin binalarında keçən il başlanan əsaslı təmir-yenidənqurma işləri də başa çatmış və yaxın günlərdə bu məktəblərin açılışı olacaqdır. Təmirdən sonra hər iki təhsil müəssisəsinin yerləşdiyi kompleks şəhərimizin mərkəzinə yaraşıq verən memarlıq incisinə çevrilmişdir. Bayıl yaşayış sahəsindəki 110 və mərkəzdəki 130 saylı uşaq bağçalarında da təmir işləri aparılmış və yaxın günlərdə istifadəyə veriləcəkdir.

Tədbirdə görülən işlərlə yanaşı, keçən tədris ilində təhsil müəssisələrinin qazandığı uğurlardan da danışılmışdır. Vurğulanmışdır ki, 2009-2010-cu tədris ilində rayonun 18 orta məktəbini 1592 şagird bitirmiş, onlardan 1490 nəfəri kamal attestatı almışdır. 1313 məzun ali məktəblərə qəbul olunmaq üçün sənəd vermiş, onların 861 nəfəri tələbə adını qazanmışdır. Abituriyentlərdən 162 nəfəri 500- dən, 43 nəfəri 600-dən, 8 nəfəri isə 650-dən çox bal toplamışdır. Məzunlardan 83 nəfər xarici ölkələrin müxtəlif ali məktəblərinə qəbul olmuşlar.

2009-2010-cu ildə keçirilmiş "Ən yaxşı ümumtəhsil məktəbi" respublika müsabiqəsinin yekunlarına əsasən Səbail rayonunun 7 və 236 saylı orta məktəbləri, 49 saylı "İntellekt" məktəb-liseyi qaliblər sırasında olmuşdur. "Ən yaxşı müəllim" müsabiqəsinin qalibləri arasında isə Səbail rayonunun orta məktəblərinin 13 müəllimi yer almışdır.

Tədbirdə çıxış edən pedaqoji işçilər və valideynlər təhsil müəssisələrində yaradılan şəraitə, müəllimlərə göstərilən yüksək diqqət və qayğıya görə Azərbaycan Respublikasının Prezidenti İlham Əliyevə dərin minnətdarlıqlarını bildirmişlər.

Sonda "Ən yaxşı ümumtəhsil məktəbi" respublika müsabiqəsinin qalibi olmuş 7 və 236 saylı orta məktəblərə, 49 saylı "İntellekt" məktəb-liseyə, "Ən yaxşı müəllim" müsabiqəsinin qaliblərinə, qəbul imtahanlarında yüksək nəticələr göstərmiş məzunlara Səbail Rayon İcra Hakimiyyətinin qiymətli hədiyyələri təqdim edilmişdir. Aztəminatlı ailələrdən olan 20 uşağa isə məktəbli forması hədiyyə olunmuşdur.

R.TAHİR

Xalq qəzeti.- 2010.- 9 sentyabr.- S. 5.