Türkiyə ilə Azərbaycan möhkəm əlaqələrə malik iki qardaş ölkədir

İki dost ölkə arasında Yüksək Səviyyəli Strateji Əməkdaşlıq Şurasının qurulması haqqında Birgə Bəyannamənin imzalanması da bunu təsdiqləyir

Bu sənəd hüquqi sənəddir, amma, eyni zamanda, bu sənəd çox səmimi sənəddir. Bu, sadəcə iki ölkə arasında müqavilə deyildir. Bu, ürəkləri, xalqları birləşdirən, bizim xoş niyyətimizi ifadə edən bir əsərdir. Bu əsər yaşayacaq və bizi daha da zəngin və xoşbəxt edəcəkdir.

İlham ƏLİYEV,

Azərbaycan Respublikasının Prezidenti

Türkiyə ilə Azərbaycan dünyada misli görünməmiş əlaqələrə malik iki qardaş ölkədir. Yüksək Səviyyəli Strateji Tərəfdaşlıq Şurası bu qardaşlığı möhkəmləndirən daimi bir əsər olacaqdır. Bu düşüncələrlə Türkiyə-Azərbaycan Yüksək Səviyyəli Strateji Tərəfdaşlıq Şurasının istər ikitərəfli əlaqələrimiz, istərsə də regional əməkdaşlıq naminə uğurlu olmasını diləyir, sevgi və hörmətlərimi ifadə edirəm.

Rəcəb Tayyib,

ƏRDOĞAN Türkiyənin Baş naziri

Azərbaycan Prezidenti İlham Əliyevin xarici ölkələrə hər bir rəsmi səfəri ölkəmiz üçün böyük əhəmiyyət daşıyır. Çünki dövlətimizin başçısı hər dəfə rəsmi səfərə gedərkən ilk növbədə ölkəmizin qarşılaşdığı problemləri, ərazilərimizin 20 faizinin Ermənistan Silahlı Qüvvələri tərəfindən işğal olunduğunu, bir milyondan artıq soydaşımızın öz doğma ata-baba ocaqlarından didərgin salınmalarını xüsusi olaraq diqqətə çatdırır. Azərbaycan Prezidenti səfər çərçivəsində keçirdiyi görüşlərdə Ermənistanın qəsbkar dövlət olduğunu təkzibolunmaz faktlarla əsaslandırır, işğalçı dövlətin beynəlxalq hüquq norma və prinsiplərinə hörmətsizlik etdiyini diqqətə çatdırır. Bu baxımdan dövlət başçımızın bütün səfərləri xüsusi əhəmiyyət kəsb edir.

Azərbaycan Prezidentinin Türkdilli ölkələrin dövlət başçılarının X zirvə toplantısında iştirak etmək üçün Türkiyəyə rəsmi səfəri diqqət mərkəzində idi. Bu səfər diqqəti daha çox cəlb edirdi. Buna səbəb NATO-nun Ermənistanda keçirməyi planlaşdırdığı tədbir zamanı Türkiyə-Ermənistan sərhədlərinin açılacağı ilə əlaqədar söz-söhbətlərin yenidən gündəmə gəlməsi idi. Lakin Türkiyə-Azərbaycan dostluq və qardaşlığının sarsılmazlığı bu söz-söhbətin qarşısını aldı. Beynəlxalq ictimaiyyətə bir daha bəyan oldu ki, bu iki ölkə arasındakı səmimi münasibətlər, qarşılıqlı əməkdaşlıq və "bir millət, iki dövlət" prinsipi əsasında möhkəmlənən əlaqələr davamlı özüllər üzərində qurulub. Böyük maraqla, intizarla gözlənilən Türkiyə-Ermənistan sərhədləri bu dəfə də açılmadı, Türkiyə NATO ölkəsi olduğu halda da Azərbaycanla dostluq və qardaşlıq münasibətlərini heç nəyə qurban vermədi və "Ermənistan işğal etdiyi Azərbaycan torpaqlarını azad etməyənə qədər bu ölkə ilə Türkiyə arasında hər hansı bir diplomatik əlaqələrin bərpa olunmasından, sərhədlərin açılmasından söhbət gedə bilməz" vədinə sadiqliyini nümayiş etdirdi. Bütün dünyaya bəlli oldu ki, Türkiyə ilə Azərbaycan dünyada misli görünməmiş əlaqələrə malik iki qardaş ölkədir. Onu da qeyd edək ki, Türkiyə-Ermənistan sərhədlərinin açılması üçün qardaş ölkəyə edilən güclü təzyiqlər zamanı Azərbaycan həmişə öz haqq səsini qaldırmış, bütün vasitələrlə Türkiyəyə arxa-dayaq olmuş və istəyinə qovuşmuşdur. Bu baxımdan dövlət başçımız Türkiyəyə - Türkdilli ölkələrin dövlət başçılarının zirvə toplantısına həmişəki kimi yenə də qürurla, bir növ qalib kimi gedirdi. Qalib deyəndə, təbii ki, bəzi ermənipərəst qüvvələrin Türkiyə-Ermənistan sərhədlərinin açılmasında göstərdikləri güclü təzyiqlərin qarşısının alınmasını və onların müqavimətinin qırılmasını nəzərdə tuturuq.

Qardaş ölkədə böyük hörmət və ehtiramla qarşılanan Prezident İlham Əliyev ilk növbədə İstanbulda Türkiyə Prezidenti Abdullah Güllə, sonra isə Türkiyənin Baş naziri Rəcəb Tayyib Ərdoğanla görüşmüşdür. Hər iki görüşdə Türkdilli ölkələrin zirvə toplantısının böyük əhəmiyyət kəsb etdiyi, bu tədbirin türkdilli dövlətlər arasında əməkdaşlığın daha sıx tellərlə bağlanmasına böyük xidmət göstərəcəyi xüsusi vurğulanmışdır. Bir daha qeyd edilmişdir ki, Türkiyə-Azərbaycan münasibətləri yüksələn xətt üzrə inkişaf edir. Həmçinin ölkələr arasında əməkdaşlığın gələcək perspektivləri müzakirə olunmuşdur. Azərbaycan Prezidentinin dost, qardaş ölkəyə budəfəki səfəri iki xalqın tarixində yeni bir səhifə yaratdı. Ona görə ki, Azərbaycan Respublikası və Türkiyə Respublikası arasında Yüksək Səviyyəli Strateji Əməkdaşlıq Şurasının qurulması haqqında Birgə Bəyannamə imzalandı. Bu tarixi sənədi Azərbaycan Prezidenti İlham Əliyev və Türkiyənin Baş naziri Rəcəb Tayyib Ərdoğan imzaladılar.

Bu vacib və zəruri sənədin imzalanması belə bir sual doğurur: Türkiyə-Azərbaycan dostluğunun, qardaşlığının, iki ölkə arasında bütün sahələr üzrə sıx əməkdaşlıq, isti münasibətlər olduğu halda, bu bəyannamənin imzalanmasına ehtiyac var idimi? Bu suala Türkiyənin Baş naziri Rəcəb Tayyib Ərdoğanın dedikləri ilə cavab verməyi daha məqbul hesab edirik. O dedi: "Mən bu dostluğun gələcək nəsillərimizə də gücləndirilərək çatdırılmasında Yüksək Səviyyəli Strateji Tərəfdaşlıq Şurasını daimi bir əsər kimi gördüyümü xüsusi vurğulamaq istəyirəm. Belə ki, Türkiyə-Azərbaycan əməkdaşlığı sadəcə dövlətlərimiz arasındakı güclü həmrəyliyə deyil, eyni zamanda, xalqlarımızın paylaşdığı köklü tarix və könül birliyinə söykənir. Türkiyə və Azərbaycan xalqları eyni dildə danışır, müştərək bir tarix paylaşır. Türkiyə və Azərbaycan qarşılarına eyni coğrafiyada sülh, sabitlik və rifahın təmin edilməsi məqsədini qoymuşlar... İnanıram ki, şura mexanizmi sayəsində Türkiyə-Azərbaycan dostluğunu gələcək nəsillərimizə sarsılmaz bir əməkdaşlıq olaraq əmanət edəcəyik".

Yeni şuranın yaradılması Türkiyə-Azərbaycan əməkdaşlığını daha sıx tellərlə bağlayacaq, bu sahədə böyük töhfələr verəcək. Şura çərçivəsində alt komissiyaların yaradılması da nəzərdə tutulub. Alt komissiyalar iki ölkə arasında bütün sahələr üzrə əlaqələrin müntəzəm olaraq nəzərdən keçirilməsini təmin edəcək, ictimai fikirdə hər hansı bir mənfi rəy formalaşarsa, bunun qarşısının alınması istiqamətində dərhal qabaqlayıcı addımlar atacaq. Qardaş ölkənin Baş naziri yeni yaradılmış şuranı yüksək qiymətləndirərək dedi: "Yüksək Səviyyəli Strateji Tərəfdaşlıq Şurası, eyni zamanda, "Azərbaycanın sevinci bizim sevincimiz, kədəri bizim kədərimizdir" deyən Atatürklə, "bir millət, iki dövlət" deyən mərhum Heydər Əliyevdən aldığımız bayrağı daha da irəli aparmaq qətiyyətinin bir təzahürüdür".

Türkiyə-Azərbaycan xalqları arasında əsrlər boyu dostluq, qardaşlıq münasibətləri həmişə yüksək səviyyədə qurulub. Bu münasibətlər getdikcə daha da yaxşılaşır. Həm böyük öndər Atatürkün, həm də türk dünyasının lideri Heydər Əliyevin iki ölkə arasında möhkəm təməllər üzərində qurulmuş əməkdaşlığın onun varisləri tərəfindən böyük müvəffəqiyyətlə davam etdirilməsi siyasi, iqtisadi və mədəni sahələrdə əldə olunan inkişaf prosesi ilə bugünkü mükəmməl səviyyəyə çatmışdır. Dövlətimizin başçısı İlham Əliyev Azərbaycan və Türkiyə arasında Yüksək Səviyyəli Strateji Əməkdaşlıq Şurasının qurulması haqqında Birgə Bəyannamənin əhəmiyyətindən danışarkən bunu xüsusi olaraq qeyd etdi. O dedi: "Bugünkü mərasimin çox böyük əhəmiyyəti vardır. Bu gün imzalanmış sənəd əslində bu günə qədər görülən işlərə bir növ yekun vurur, strateji tərəfdaşlığımızın gələcək inkişafını müəyyən edir. Yüksək Səviyyəli Strateji Tərəfdaşlıq Şurasının yaradılması sadəcə adi bir müqavilə, saziş deyildir. Bu, bizə imkan verəcək ki, gələcəkdə bütün sahələrdə fəaliyyətimizi birlikdə quraq, əlaqələndirilmiş şəkildə aparaq və bütün sahələrdə daha da böyük nəticələrə çataq. Bu saziş bütün sahələri əhatə edir - siyasi əlaqələri, hansılar ki, bu gün ən yüksək zirvədədir. Ticarət əlaqələri, qarşılıqlı sərmayə qoyuluşu, enerji, neft-qaz sahələrindəki əməkdaşlıq, nəqliyyat, dəmir yolu layihələri, mədəniyyət, humanitar sahələr - yəni, elə bir sahə yoxdur ki, bu sazişdən kənarda qalsın. Bu, bizə imkan verəcək ki, Türkiyə ilə Azərbaycanın əlaqələri bundan sonra da uğurla, sürətlə və daha da mütəşəkkil qaydada irəliyə getsin və xalqlarımız daha da birləşsin, daha da sıx əməkdaşlıq etsin".

Hər dəfə olduğu kimi, bu səfər çərçivəsində də Azərbaycanın ən ağrılı problemi olan Ermənistan-Azərbaycan, Dağlıq Qarabağ problemi xüsusi olaraq diqqətə çatdırıldı, Ermənistanın hələ də işğalçılıq missiyasından əl çəkməməsi, atəşkəsi pozması, beynəlxalq hüququn norma və prinsiplərinə hörmətsizlik etməsi əsas müzakirə məsələlərindən birinə çevrildi. Bir daha vurğulandı ki, Ermənistan nə vaxta qədər öz işğalçılıq siyasətindən əl çəkməyib, bu ölkə ilə hər hansı bir diplomatik əlaqə bərpa olunmayacaq. Türkiyə ilə Azərbaycanın bütün səyləri, yeni imzalanan sənədlər də buna xidmət edir. Çünki Türkiyə bütün dövrlərdə Azərbaycanın haqq işini dəstəkləmiş, Ermənistanla sərhədləri də bu məqsədlə bağlamışdır. Türkiyə Azərbaycanın ərazi bütövlüyünün bərpa olunmasında çox fəallıq göstərir, bəzi ermənipərəst qüvvələrin təzyiqlərinə dözür, onlara Azərbaycanla qardaşlıq münasibətlərinin sarsılmaz olduğunu öz əməlləri ilə nümayiş etdirir. Bu sənədin imzalanması da işğalçı Ermənistana, onu dəstəkləyənlərə tutarlı cavab oldu. Bir daha məlum oldu ki, heç bir qüvvə Türkiyə-Azərbaycan münasibətlərinə zərrə qədər də olsun xələl gətirə bilməz.

Ümumiyyətlə, dövlət başçımızın Türkiyəyə bu səfəri, Türkdilli ölkələrin dövlət başçılarının X zirvə toplantısında iştirakı çox zəngin olmuşdur. Belə tədbirlər türkdilli dövlətlər arasında əməkdaşlığın daha da genişlənməsinə xidmət etməklə yanaşı, Azərbaycanın beynəlxalq aləmdəki mövqelərini daha da möhkəmləndirir.

Əliqismət BƏDƏLOV

Xalq qəzeti.- 2010.- 19 sentyabr.- S.- 1.