Azərbaycanın işğal edilmiş ərazilərində beynəlxalq təşkilatların faktaraşdırıcı missiyasının işləməsi diplomatiyamızın növbəti uğuru olacaq

Dağlıq Qarabağ Azərbaycanın tarixi və əzəli torpağıdır. Beynəlxalq birlik tərəfindən Dağlıq Qarabağ Azərbaycanın ayrılmaz hissəsi kimi tanınır və bu, o deməkdir ki, məsələnin istənilən yolla həll olunması Azərbaycanın daxili işidir, heç bir kənar qüvvə bu məsələyə müdaxilə edə bilməz.

İlham ƏLİYEV,

Azərbaycan Respublikasının Prezidenti

XXI əsrin ikinci onilliyinin ərəfəsində, dünya dövlətlərinin müasir siyasi texnologiyalarla idarə olunduğu, dünya xalqlarının sülhə və əmin- amanlığa daha çox can atdığı bir dövrdə orta əsrlər təfəkkürü ilə yaşayıb-işləyən ermənilər artıq tamamilə təklənmək üzrədirlər.

Bu gün beynəlxalq aləmdə işğalçını dəstəkləyən qüvvələr demək olar ki, qalmamışdır. Çünki yuxarıda qeyd etdiyimiz kimi artıq bütün dövlətlər müasir siyasi texnologiyalarla idarə olunur. Bu isə hər kəsin öz maraqları çərçivəsində fəaliyyət göstərməsini, özünün həyati problemlərinin həllini təmin edən prinsiplər əsasında siyasət yeritməsini zəruri edir. Çünki dünya ölkələrinin hamısı yeni əsrin diqtə etdiyi çox mühüm bir məsələ ilə üz-üzədir. Bu, ölkələrin enerji təhlükəsizliyinin təmin edilməsi məsələsidir. Belə olan halda heç bir ölkənin enerji təhlükəsizliyinin təmin edilməsində zərrə qədər də olsa əhəmiyyət kəsb etməyən Ermənistanın qəyyumları və himayədarları avtomatik olaraq azalır.

Bu ilin may-iyun aylarında - Amerika Birləşmiş Ştatlarının Prezidenti Barak Obamanın Azərbaycan Prezidenti İlham Əliyevə iki məktub göndərməsi, həmin məktublarda Azərbaycanla əməkdaşlığa böyük önəm ifadə edilməsi, ölkəmizin ərazi bütövlüyünün tanınması və digər məsələlər Ermənistanda çox böyük narahatlıq, hətta, təlaş-təşviş hissləri yaratmışdı. İrəvan rəsmiləri ABŞ kimi qüdrətli bir dövlətin prezidentini satqınlıqda, xəyanətdə ittiham etməkdən belə utanmırdılar: "Birləşmiş Ştatların ictimai-siyasi həyatında mühüm rol oynayan ermənilərin mənafeyinin satılmasının əsas səbəbi Azərbaycanın nefti və qazıdir". Azərbaycanın işğal edilmiş ərazilərində beynəlxalq təşkilatların faktaraşdırıcı missiyasının işləyəcəyi barədə xəbər yayılanda isə İrəvan rəsmiləri daha maraqlı bir ifadə işlətdilər: "Beynəlxalq təşkilatlar hər zaman olduğu kimi yenə də güclü dövlətlərin maraqlarının təmin edilməsinə üstünlük verir". Bu yerdə ənənəvi "Dayan!" - komandası yada düşür. Erməni siyasətçiləri beynəlxalq təşkilatları ittiham edərkən Azərbaycanın güclü dövlət olduğunu etiraf etmiş oldular. Yox, əgər o ifadədə Azərbaycanı deyil, rəsmi Bakının mövqelərini müdafiə edən üçüncü dövləti nəzərdə tuturlarsa belə, yenə də erməninin canındakı narahatlıq istənilən qədərdir. Necə də olmasın? Özləri də yaxşı bilirlər ki, 200 ildən çoxdur başqa xalqların və dövlətlərin hesabına yaşayırlar. İndi güclü dövlətlərin mötəbər beynəlxalq təşkilatların erməniləri dolandırmaq ənənəsindən əl çəkməsi isə - xəyanət və satqınlıq kimi qiymətləndirilir.

Son zamanlar İrəvanın yuxusuna haram qatan məsələlər onlarladır. Həmin siyahının ilk onluğunu Azərbaycanın xarici siyasətinin müxtəlif istiqamətləri təşkil edir. İkinci onluğu indiyədək Ermənistanla dost olub, indi isə Azərbaycanın mövqelərini dəstəkləyən qüvvələr diktə edirlər. Üçüncü onluğu isə Ermənistan Prezidenti Serj Sarkisyanın antierməni siyasəti, qarətçi və talançı əməlləri tamamlayır. Növbəti onluqlarda da çoxsaylı məsələlər vardır. Bu çoxsaylı məsələlərdən bir neçəsini, yəni İrəvanın yuxusunun daha çox hissəsini əlindən alan məqamları yada salmaq istəyirik.

Birinci, Azərbaycan Türkiyə, İran və Gürcüstanla bütün sərhəd məsələlərini çoxdan həll etmişdir. Rusiya Federasiyasının Prezidenti Dmitri Medvedevin ötən ay reallaşan Bakı səfəri zamanı şimal qonşumuzla da sərhədlərin ən incə detallara qədər tanınması məsələsi birdəfəlik həll edildi. Bakıda Azərbaycan və Rusiya prezidentlərinin imzaladığı sənədlər beş və ya on illər üçün deyil, əsrlər üçün nəzərdə tutulmuşdur. Ermənistan isə müstəqillik əldə etdikdən sonra heç bir ölkə ilə həqiqi sərhədlərini müəyyən edə bilməyib. İrəvan Azərbaycanla separatçı münaqişə vəziyyətindədir, Türkiyəyə ərazi iddiaları Konstitusiyada özünə yer tutur, Gürcüstana ərazi iddiaları eynilə Qarabağdakı ssenari üzrə davam etdirilir, İranın müəyyən hissələrinə tamah salırlar, İraqdakı ermənilərə (bu ölkə ilə heç bir sərhədi olmasa belə) "qayğı göstərilməsini" beynəlxalq aləmdən tələb edirlər və sairə. Yəni Azərbaycan müstəqil dövlət kimi öz varlığını tamamilə təsdiq etsə də, Ermənistanın kimliyi hələ havadan asılı qalıb. Ona görə də Bakının bu sahədəki diplomatik uğurları İrəvana böyük təlaş yaşadır.

İkinci, cənab Dmitri Medvedevin Azərbaycana səfərindən əvvəl ölkəmizin kütləvi informasiya vasitələrinə müsahibə verən Rusiya Federasiyası xarici işlər naziri Sergey Lavrov açıq şəkildə bəyan etdi ki, Gümrüdəki Rusiya hərbi bazasının bu ərazidə qalması müddətinin uzadılması oradakı hərbçilərin funksiyasında heç bir dəyişiklik etmir. Nazirin həmin bəyanatına qədər ermənilər toy-bayram içində idilər ki, Azərbaycan öz torpaqlarını işğaldan azad etmək üçün hərbi yolu seçərsə, onda biz Gümrüdəki rus hərbi hissələrinin hesabına müdafiə olunacağıq. Sergey Lavrov isə siyasətçi qətiyyəti və diplomat məharəti ilə erməniləri başa saldı ki, məsələ heç də elə deyil və bizə arxayın olub Azərbaycanla danışıqlarda "nala-mıxa vurmayın". Həm, cənab Medvedevin Bakı səfəri zamanı verdiyi bəyanatlar, həm də Sergey Lavrovun erməniləri üzən cavabı təkcə regionda - xüsusən, Azərbaycan, Rusiya və Ermənistanda deyil, bütün dünyada çox böyük maraqla qarşılandı. Ona görə də İrəvanın narahatlığı və təlaşı birə beş artdı.

Üçüncü, Azərbaycanın yeritdiyi xarici siyasət elə bir şəkildə qurulub ki, bu siyasətə istənilən beynəlxalq təşkilat böyük hörmət və ehtiramla yanaşır, inam nümayiş etdirir. Birləşmiş Millətlər Təşkilatının Baş Məclisində işğal edilmiş Azərbaycan ərazilərindəki vəziyyətlə bağlı məsələnin müzakirəyə çıxarılması və rəsmi Bakı tərəfindən həmin sənədin geri götürülərək yuxarıda qeyd etdiyimiz missiyanın fəaliyyətinə razılıq verilməsi Azərbaycana olan inam və etimadı daha da artırdı.

Dördüncü, ermənilər Dağlıq Qarabağda faktaraşdırıcı missiyanın işləyəcəyindən narahat olduqları bir vaxtda NATO-dan başqa bir xəbər gəldi. Belə ki, NATO Parlament Assambleyasının prezidenti Con Tanner Azərbaycanın bu qurumdakı nümayəndə heyətinin rəhbəri Ziyafət Əsgərovla söhbətində bildirib ki, payız sessiyasında Dağlıq Qarabağ münaqişəsi ilə bağlı məsələ müzakirəyə çıxarılacaqdır. Elə isə İrəvanın narahatlığı artmasın, neyləsin?

Beşinci, artıq digər ölkələr kimi Minsk qrupunun həmsədrləri də münaqişənin tezliklə və ədalətli şəkildə həll edilməsi üçün öz fəallıqlarını artırırlar. Bunun səbəbini biz dönə-dönə yazmışıq. Amerika Yəhudi Komitəsinin beynəlxalq yəhudi məsələləri üzrə direktor müavini Qay Billauer isə "Vaşinqton Tayms" qəzetinin 3 sentyabr tarixli nömrəsində dərc edilmiş məqaləsinin sərlövhəsindəcə bu məsələyə daha aydın şəkildə münasibət bildirir: "Azərbaycana biganəlik nümayiş etdirməsi ABŞ-a baha başa gələ bilər". Cənab Billauer kimi ABŞ rəsmiləri də həmin məsələni yaxşı bilirlər və ona görə də Ağ ev erməniləri üzən addımları getdikcə çoxaldır.

Bir sözlə, Azərbaycanın xarici siyasətdəki uğurları artdıqca dünya dövlətləri obyektiv qərarlar qəbul etməkdə, İrəvan isə narahat günlərini yaşamaqda davam edir.

İttifaq MİRZƏBƏYLİ

Xalq qəzeti.- 2010.- 21 sentyabr.- S. 1.