İnsanlara diqqət və qayğı Azərbaycan dövlətinin ali məqsədidir

Artıq xalqımız buna adət edib: hər ilin əvvəlində Azərbaycan Respublikasının Prezidenti cənab İlham Əliyevin sərəncamı əsasında pensiyalar yola salınan ilin inflyasiya dərəcəsinə uyğun olaraq artırılır. Son yeddi ildə təhsil, səhiyyə, mədəniyyət, gənclər və idman, sosial təminat və başqa sahələrdə çalışanların əməkhaqları bir neçə dəfə artırılıb. Buraya elm, incəsənət xadimlərini, güc strukturlarında işləyənləri də əlavə etsək böyük bir ordu yaranır.

Dünyanı bürüyən indiki maliyyə böhranı Azərbaycana bir o qədər də mənfi təsir göstərmir. Ona görə ki, təməli ulu öndərimiz Heydər Əliyev tərəfindən qoyulan iqtisadiyyatımızın hərtərəfli dinamik inkişaf etdirilməsi buna imkan verir. İqtisadiyyatımız gücləndikcə ölkənin gəlirləri çoxalır, insanların sosial vəziyyətinin yaxşılaşdırılması üçün əlverişli şərait yaranır. Bundan da səmərəli istifadə edən ölkə rəhbəri insanlara diqqət və qayğını ildən-ilə artırır.

Azərbaycan Respublikasının Prezidenti cənab İlham Əliyevin son vaxtlar imzaladığı sərəncamları göz önünə gətirək. "Əmək pensiyalarının baza hissəsinin artırılması haqqında" Azərbaycan Respublikası Prezidentinin 31 avqust 2010-cu il tarixli sərəncamı ilə başlanan bu qayğı ölkə əhalisinin rifah halının xeyli yaxşılaşmasına səbəb olmuşdur. Həmin sərəncam əsasında yaşa görə əmək pensiyasının baza hissəsi bu il sentyabr ayının 1-dən etibarən 85 manat olmuşdur. Bu münasibətlə keçirdiyi mətbuat konfransında Azərbaycan Respublikası Dövlət Sosial Müdafiə Fondunun sədri Səlim Müslümov demişdir:

- Əmək pensiyasının baza hissəsinin növbəti dəfə artırılması möhtərəm Prezidentimiz İlham Əliyevin rəhbərliyi ilə ölkəmizdə qısa müddətdə çox ciddi sosial- iqtisadi islahatların aparılmasının məntiqi nəticəsidir. Ölkəmizdə beynəlxalq standartlara uyğun yeni sosial müdafiə modelinin təşəkkül tapması və həmin modelin mühüm tərkib hissəsi olan sığorta-pensiya sistemində islahatların davam etdirilməsini dövlət başçısının xüsusi diqqət mərkəzində saxlaması bütün uğurların başlıca təminatçısıdır. Cənab Prezidentin əmək pensiyalarının baza hissəsinin 13,6 faiz artırılmasına dair sərəncamı təxminən 1 milyon 254 min 200 pensiyaçıya şamil olunacaq.

Mətbuat konfransında Səlim Müslümov onu da nəzərə çatdırıb ki, əmək pensiyalarının baza hissəsinin artımının maliyyələşdirilməsi üçün heç bir problem yoxdur və bu məqsədlərə ilin sonuna kimi təxminən 50 milyon manat əlavə vəsait tələb olunur. Ölkə rəhbərinin diqqət və qayğısını alqışlayan fond sədri bildirib ki, hazırda Azərbaycanda əmək pensiyalarının orta aylıq baza hissəsi 106 ABŞ dollarına bərabərdir. Bu göstəriciyə görə respublikamız Qazaxıstandan sonra (124,2 ABŞ dolları) MDB ölkələri arasında ikinci yerdə gedir. Rusiyada bu göstərici 90,2, Ukraynada 89,8, Belarusda 82,1, Ermənistanda isə vur-tut, 21,6 ABŞ dolları təşkil edir.

Prezidentin əmək pensiyalarının baza hissəsinin artırılması haqqında sərəncamı artıq icra olunur. DSMF-nin Nəsimi rayon şöbəsinin əməkdaşı Elman Musayevin redaksiyamıza verdiyi məlumata görə, sentyabr ayında həmin sərəncam rayon üzrə 23 min 346 əmək pensiyaçısına tətbiq olunub. Bunun üçün 239,4 min manat əlavə vəsait ayrılmaqla, ümumilikdə əmək pensiyaçılarına 3 milyon 395 min 500 manat pul verilib. Hazırda Nəsimi rayonunda əmək pensiyasının orta aylıq məbləği 123 manata çatıb. E.Musayevin sözlərinə görə, son yeddi ildə əmək pensiyalarının baza hissəsi təqribən on dəfə artmışdır.

Yeni Azərbaycan Partiyası Nəsimi rayon təşkilatı idarə heyətinin üzvü Elman Musayev ölkə başçısının imzaladığı sərəncamların xüsusi əhəmiyyət kəsb etdiyini vurğulayaraq dedi ki, müxtəlif sahələrdə çalışan insanların əmək haqqlarının mütəmadi olaraq artırılması son nəticədə həmin adamların yüksək məbləğdə pensiya almalarına əlverişli şərait yaradacaqdır. Bu, elə bizim özümüzə də aiddir.

Möhtərəm Prezidentimizin qayğısı sayəsində sosial müdafiə məsələləri ilə məşğul olanların da əmək haqları sentyabr ayının 1-dən 10 faiz artırılmışdır. Bu o deməkdir ki, mən əgər yeddi il bundan əvvəl 24 manat əmək haqqı alırdımsa, indi bu məbləğ 250 manata çatmışdır. Buna görə biz hörmətli Prezidentimiz İlham Əliyevə dərin təşəkkürümüzü bildiririk. Əminik ki, insanlara diqqət və qayğını əsas götürən ölkə rəhbərimiz bundan sonra da əhalinin yaşayış səviyyəsinin yüksəlməsinə öz töhfələrini əsirgəməyəcəkdir.

Azərbaycan Respublikasının Prezidenti cənab İlham Əliyev pensiyaçılarla yanaşı, əmək fəaliyyəti ilə məşğul olan müxtəlif peşə sahiblərinin maaşlarının 2010-cu il sentyabrın 1-dən etibarən 10 faiz həcmində artırılmasına dair sərəncamlar vermişdir. Onların sırasında təhsil, səhiyyə, mədəniyyət, gənclər və idman, Müdafiə, Daxili İşlər, Milli Təhlükəsizlik, Fövqəladə Hallar nazirliklərinin, Xüsusi Dövlət Mühafizə və Dövlət Sərhəd Xidmətlərinin, habelə Daxili İşlər Nazirliyi Daxili Qoşunların Baş İdarəsinin dövlət büdcəsindən maliyyələşdirilən qurumlarında çalışan hərbi qulluqçular, xüsusi rütbəsi olan əməkdaşlar və dövlət qulluqçusu olmayan mülki işçilər, sosial təminat müəssisələrində, kənd təsərrüfatı, meşə təsərrüfatı, meliorasiya və su təsərrüfatı, ətraf mühitin mühafizəsi, hidrometeorologiya və balıqartırma sahələrində çalışan yüz minlərlə əməkçi vardır. Bunlardan əlavə, cənab İlham Əliyev öz sərəncamları ilə doktorantlara, ali təhsil, orta ixtisas və ilk peşə-ixtisas təhsili müəssisələrinin tələbələrinə və şagirdlərinə verilən təqaüdlərin, aztəminatlı ailələrin, şəhid ailələrinin, əlillərin və başqa aztəminatlı kateqoriyadan olanlara, məcburi köçkünlərə verilən müavinətlərin məbləği, Azərbaycan Milli Elmlər Akademiyasının tabeliyində olan və dövlət büdcəsindən maliyyələşdirilən digər elm və elmi tədqiqat müəssisə, idarə və təşkilatlarında çalışan işçilərin əmək haqları da sentyabr ayının 1-dən etibarən artırılmışdır.

Bütün bunlar onu göstərir ki, ölkə başçısı verdiyi sözün ağasıdır, əhalinin sosial-rifahının daim yüksəldilməsi onun ali məqsədidir.

Telman ƏLİYEV

Xalq qəzeti.- 2010.- 25 sentyabr.- S. 4.