"Ürəklə söhbət"lərdə həyat həqiqətləri

Həyatı qadın gözü ilə görmək, buradakı fərəhverici hadisələri və acıları həssas qadın qəlbi ilə duymaq, şeir dili ilə ifadə edə bilmək qadın şairlərimizin yaradıcılıqlarını fərqləndirən ən mühüm xüsusiyyətlərdəndir. Gerçəkdən də qadın şairlərimizin yaradıcılığında müxtəlif həyat hadisələri ilə birlikdə bu hadisələrə qadınlarımızın spesifik münasibətləri, bizim görə bilmədiyimiz, hiss edə bilmədiyimiz tərəfləri də öz bədii həllini tapa bilir.

Bu yaxınlarda çapdan çıxmış Nailə İbrahimovanın "Ürəklə söhbət"(Avropa nəşriyyatı, Bakı, 2010) adlı şeirlər kitabı bir daha söylədiklərimizə gözəl misal ola bilər. Öncə elə bir fikir yarana bilər ki, kitabdakı şeirlər şairənin öz məhrəm fikir və düşüncələrini, özü ilə olan söhbətlərini əks etdirməklə yaranır. Lakin şeirləri bir - bir oxuduqca anlayırsan ki, fikirlər əslində real həyat hadisələri ilə, xalq həyatı və məişəti ilə qırılmaz əlaqələrlə bağlı olduğuna görə daha çox fərdi çərçivələri aşıb milli - bəşəri məna kəsb edə bilir. Zənnimizcə, belə bir poetik səviyyəyə yüksəlmək yolunda şairənin istedad və bilgi dairəsinin geniş olması ilə birlikdə, onun bədii təsvir vasitələrindən, ana dilimizin saflığından, xalqımızın müdrik kəlamlarından, mənəvi - tarixi dəyərlərindən yaradıcılıqla istifadə edə bilməsi də mühüm rol oynamışdır.

Nailə İbarahimovanın ikinci şeir kitabı olan "Ürəklə söhbət" kitabında biz zəngin həyat yolu keçmiş (O, Azərbaycan Dövlət Tibb Universitetini bitirmiş, gənc yaşlarından müxtəlif mətbuat orqanlarında yazılarını çap etdirmişdir), geniş maraq dairəsinə malik bir müəlliflə rastlaşırıq. Daha çox lirik xarakterdə yazılmış şeirlərində müəllif əsasən qadın taleyi, onun istək və arzuları, həyəcanları, sevgisi, nifrəti, ailə haqqındakı fikirləri və s. yer almışdır. Onun şeirlərinin çoxu sevgi mövzusuna həsr olunmuşdur. Şeirlərdə bu əbədi mövzunun müxtəlif anları, mərhələləri, tərəfləri yüksək bir bədiiliklə ifadə olunmaqdadır.

Nailə xanımın zəngin təbiətimizin vəsfinə həsr edilmiş şeirləri də az deyil. "Bənövşə" "Bil Həyatın qədrini" , "Nərgiz gülü", "Bahar gəlir", "Günəş çıxır", "Dan ulduzu", "Çox sevirəm Baharı", "Külək" kimi şeirlərində Nailə xanımın poetik təfəkkürü, təbiət sevgisi son dərəcə inandırıcı, təsirli görünür. Təbiətə həsr edilmiş şeirlərində müəllif təbiət hadisə və lövhələrini, sadəcə, sözlər - anlayışlar vasitəsilə təqdim etmir, onlarda insanı təsirləndirən xüsusiyyətlər axtarır, sanki onlarla canlı varlıqlar olaraq söhbət edir, onlara öz ürək sözlərini söyləyə bilir, hətta onlardan mənəvi güc aldığını belə bəyan edir.

Nailə xanımın şeirlərində insan amili, mürəkkəb dünyamızda onun yeri və önəmi xüsusilə mühüm məna kəsb edir. Hiss edirsən ki, təbiətdən də, sevgidən də, şeir və sənətdən də yazanda onu hər zaman xalqına, millətinə bağlı olan yaradıcı və mükəmməl insan idealı düşündürür.

Kitabın "Yalanlar ayaq açanda" bölümündə isə müəllif nadanlıq, paxıllıq, ikiüzlülük, yaltaqlıq, hiyləgərlik, acgözlük, qiybətçilik, xəbislik kimi mənfi mənəvi keyfiyyətlərin ifşasına xüsusi şeirlər həsr etmiş, bu eybəcər keyfiyyətləri daşıyan insanlardan uzaq gəzməyi tövsiyə etmişdir:

Nailə xanım şairin sosial məsuliyyət hissini də heç bir zaman unutmur, müasir mərhələdə xalqımızı düşündürən, rahatsız edən problemlərə cavab axtarır. Qarabağın erməni qəsbikarları tərəfindən işğal olunması, bu səbəbdən insanlarımızın acı psixoloji vəziyyətləri ilə əlaqədar yüksək vətənpərvərlik ruhunda yazılmış şeirləri söylədiklərimizi təsdiqləyə bilər.

İnanırıq ki, Nailə İbrahimovanın "Ürəklə söhbət" şeirlər kitabı, tez bir zamanda şeir həvəskarları və oxucularımızın rəğbətini qazana biləcək.

Babək QURBANOV,

Fəlsəfə elmləri doktoru,

professor

Xalq qəzeti.- 2010.- 26 sentyabr.- S. 8.