Azərbaycan dövləti qüdrətləndikcə qeyri-hökumət təşkilatlarının fəaliyyəti də genişlənir

Gənc Vətənpərvərlər Birliyi özünün 10 illiyini yüksək əhval-ruhiyyə ilə qeyd etdi

Ötən hər il bütün azərbaycanlılar kimi bizim üçün də əlamətdar və yaddaqalan hadisələrlə tarixə yazılır. “Bizim üçün” — dedikdə mən ən əvvəl ölkədə fəaliyyət göstərən çoxsaylı qeyri-hökumət təşkilatlarını, sonra isə konkret olaraq öz birliyimizi nəzərdə tuturam. Ulu öndər Heydər Əliyevin region ölkələri üçün analoqu olmayan dövlətçilik kursunun uğurla davam etdirilməsi, eləcə də müasir dünya siyasətində qətiyyətli dəst-xətti və nüfuzu olan Prezident İlham Əliyevin idarəçilik prinsipləri dövlətimizə və xalqımıza yeni nüfuz qazandırır, baş ucalığı gətirir.

Ölkənin ictimai-siyasi həyatında özünəməxsus mövqeyi olan Gənc Vətənpərvərlər Birliyi bu imkanlardan bir neçə istiqamətdə bəhrələnir. BİRİNCİ: Bu gün Azərbaycan dövləti ölkə əhalisinin sosial-rifah halının yaxşılaşdırılması məqsədiylə çoxsaylı tədbirlər həyata keçirir və nəticələr beynəlxalq təşkilatlar tərəfindən yüksək səviyyədə təqdir olunur. Biz — GVB üzvləri də ölkənin bütün vətəndaşları kimi bu nəticələri böyük məmnunluqla qəbul edirik və onlardan bəhrələnirik. İKİNCİ: Prezident İlham Əliyevin siyasi kursunun mühüm istiqamətlərindən biri də ölkədə fəaliyyət göstərən qeyri-hökumət təşkilatlarının fəaliyyətinə dövlət qayğısı göstərilməsi, bu fəaliyyətin stimullaşdırılmasıdır. Biz Gənc Vətənpərvərlər Birliyi olaraq bu qayğını daim görür, yüksək qiymətləndiririk. Bəri başdan qeyd edim ki, birliyimizin bütün üzvləri həmin qayğının cavabı olaraq öz xidmətlərində dövlətə və dövlətçiliyə müəyyən töhfələr verirlər. Bu töhfələrin dövlət tərəfindən yüksək qiymətləndirilməsi isə bizi daha da ruhlandırır. ÜÇÜNCÜ: 1993-cü ilin yayından sonra (son beş ildə isə daha intensiv olaraq) ölkədə həyata keçirilən Dövlət Gənclər Siyasəti ölkə gənclərinin yaradıcı potensialının ortaya çıxarılması üçün mühüm zəmin kimi hamı tərəfindən alqışlanır. Gənclər Təşkilatları Milli Şurasının dekabrın 26-da Qubada keçirilmiş növbəti qurultayında qeyd edildiyi kimi, Azərbaycan dövlətinin Gənclər Siyasəti SSRİ dağılandan sonra yaranmış müstəqil dövlətlərin heç birində olmayan bir səviyyədə qurulmuşdur. Biz — Gənc Vətənpərvərlər Birliyi dövlətimizin Gənclər Siyasətindən də bəhrələnirik və bu siyasəti məmnuniyyətlə dəstəkləyirik. Deməli, dövlətin siyasəti, həyata keçirdiyi istənilən tədbir ölkədə fəaliyyət göstərən qeyri-hökumət təşkilatlarının, xüsusən, gənclərlə bağlı olan qurumların daha geniş və daha səmərəli fəaliyyət göstərməsinə əlverişli zəmin yaradır.

Fəaliyyətimizin bütün dövrü kimi 2009-cu il də bizim üçün uğurlu oldu. Belə ki, adından da göründüyü kimi Gənc Vətənpərvərlər Birliyinin fəaliyyət sahəsi ölkənin sabahını təmin edəcək nəslin — gənclərin vətənpərvərlik tərbiyəsində böyüməsinə nail olmaqdan ibarətdir. Bu tərbiyə isə dünya təcrübəsində olduğu kimi təkcə nəzəri məsələlərdən ibarət olmalı deyil, həm də əməlli işlərlə göstərilməlidir. Vətənpərvərlik tərbiyəsi ictimai-siyasi işin mühüm tərkib hissələrindən olduğuna görə 2009-cu ildə bizim əməli fəalityyət göstərməyimiz üçün geniş meydan yaranmışdı. Əvvəla, hələ yanvar ayından etibarən Azərbaycan Respublikasının Konstitusiyasına bəzi əlavə və dəyişikliklər edilməsi üçün keçiriləcək 17 mart referendumuna böyük hazırlıq işləri gedirdi. Konstitusiyaya ediləcək əlavə və dəyişikliklər Azərbaycanın daha qüdrətli sabahını təmin etmək məqsədi daşıdığına görə və bu məqsəd bizim təşkilatın da əsas məramlarından biri olduğuna görə Gənc Vətənpərvərlər Birliyi referenduma hazırlıq prosesində, referendum aktı layihəsinin müzakirələrində geniş iştirak etmiş, öz təklif və təşəbbüsləri ilə fəallıq göstərmişdir.

Qeyd edim ki, Gənc Vətənpərvərlər Birliyi rəsmi olaraq 1999-cu ilin dekabrında qeydiyyata alınsa da mən və tərəfdarlarım 1993-cü ilin yayından etibarən ölkədə keçirilən bütün seçkilərdə fəal iştirak etmiş, dövləti və dövlətçiliyi yüksək səviyyədə dəstəkləmişik. Birlik sədri və sıravi azərbaycanlı kimi mənim ömrümün ən mənalı anları ulu öndər Heydər Əliyevin (1998-ci il) və cənab Prezident İlham Əliyevin (2003—2008-ci il seçkiləri) seçki qərargahlarında gördüyüm işlərdir. Eləcə də tərcümeyi-halımın ən şərəfli cizgiləri bu iki böyük insanla görüşdüyüm, onlardan Gənc Vətənapərvərlər Birliyi haqqında təqdiredici fikirlər eşitdiyim anlardır. Mətbuat vasitələri həm ulu öndər Heydər Əliyevin, həm də cənab Prezident İlham Əliyevin Gənc Vətənpərvərlər Birliyi haqqında söylədiyi yüksək fikirləri yayandan sonra bizim təşkilata üz tutan könüllülər sürətlə artmağa başlamış, bizə olan inam və etimad qat-qat çoxalmışdır.

2009-cu ildə bizim fəaliyyətimizin daha mühüm hissələrindən biri də aprel ayına təsadüf etdi. Azərbaycan torpaqlarının 20 faizini işğal altında saxlayan təcavüzkar Ermənistan dövlətini iqtisadi tənəzzüldən qurtarmaq istəyən bəzi beynəlxalq qüvvələr bunun üçün ən yaxşı variant kimi Türkiyə—Ermənistan sərhədlərinin açılmasını üstün tutdular. Bu istiqamətdə konkret addımlar atılarkən Azərbaycan Respublikasının Prezidenti İlham Əliyev misilsiz bir siyasi iradə nümayiş etdirdi. Fikrimizcə Ali Baş Komandımız cənab İlham Əliyevin həmin günlər nümayiş etdirdiyi lider qətiyyəti Azərbaycan tarixinin ən şərəfli anlarından idi. Prezident İlham Əliyev dünyanın aparıcı dövlətlərinə sübut etdi ki, Azərbaycan xalqının mənafeyinə cavab verməyən heç bir addım atmayacaqdır. Cənab Prezidentin həmin addımı Azərbaycan gəncləri üçün ən böyük, misli olmayan bir vətənpərvərlik nümunəsi idi. Məhz o səbəbdən də bizim həm paytaxtımızdakı, həm də regionlardakı şöbə və bölmələrimizin hamısında dövlət başçımızın siyasətini dəstəkləyən müvafiq tədbirlər keçirildi, Ali Baş Komandanımızın nümayiş etdirdiyi vətənpərvərlik nümunəsinin bütün gənclər arasında örnək kimi təbliğ edilməsinə nail olundu.

2009-cu ildə Azərbaycan gənclərindən ibarət 5 nəfərlik güləş komandamızın İrəvan şəhərində keçirilən Avropa çempionatında qazandığı şanlı qələbələr, işğalçı dövlətin paytaxtında beş dəfə Azərbaycan bayrağının qaldırılması, bir dəfə qüdrətli Azərbaycan himninin səsləndirilməsi Respublika gəncliyinin ən şərəfli səhifələrindən biri idi. Mən özüm peşəkar idmançı olduğuma, uzun illər, elə indi də şərq əlbəyaxa döyüşləri üzrə məşqçi müəllim kimi fəaliyyət göstərdiyimə görə, eləcə də Gənc Vətənpərvərlər Birliyinin nizamnaməsinin əsas müddəalarından birinin fiziki tərbiyə məsələsi olduğuna görə birliyimizdə idmançı gənclərin sayı daha çoxdur. Ona görə də gənc güləşçilərimizin İrəvanda qazandığı uğurlar bizim təşkilatın fəalları tərəfindən daha böyük sevinclə qarşılandı. Şöbələrimizin hamısında fiziki tərbiyənin təbliği məsələsi gündəliyə gətirilərkən güləşçilərimizin İrəvan zəfəri bir nümunə kimi göstərilirdi. Xüsusilə istinad etdiyimiz arqument ondan ibarət idi ki, İrəvanda beş dəfə Azərbaycan bayrağını qaldıraraq düşmənə göz dağı çəkən pəhləvanlarımızın hamısı məhz yerli gənclər, Azərbaycan övladları idi. Onların arasında heç bir nəfər də olsun legioner yox idi.

Başqa bir məqam. Yeni Azərbaycan Partiyası sədrinin müavini Əli Əhmədov hələ 2008-ci ilin oktyabrında bəyan etmişdi ki, 2009-cu ilin dekabrında ölkədə keçiriləcək bələdiyyə seçkilərində daha çox gənclərin və qadınların namizədliyinin irəli sürülməsi məsələsi gündəliyə gətiriləcək. Həmin tezisi əsas götürən GVB rəhbərliyi gənclər arasında yerli özünüidarəetmə orqanı olan bələdiyyə seçkilərinin mahiyyəti, bu seçkilərdə gənclərin iştirakının əhəmiyyəti, ümumiyyətlə, gənclərin ictimai-siyasi həyatda fəallığının artırılması məsələləri ilə bağlı çoxsaylı tədbirlər keçirmiş, müzakirə, dialoq və diskussiyalar aparılmışdır. Ancaq bizim üçün 2009-cu il daha çox rəsmi olaraq fəaliyyət göstərməyimizin 10 ilinin tamam olması ilə yadda qaldı.

Gənc Vətənpərvərlər Birliyinin fəaliyyət tarixçəsinə qısaca da olsa nəzər salaraq fikrimizi davam etdirək. Kreml rəhbərliyinin SSRİ-də yaşayan xalqlara qarşı ayrı-seçkiliyinin bariz nümunəsi olan 20 Yanvar faciəsinin ertəsi günü bütün azərbaycanlıların ümummilli lideri olan Heydər Əliyev Moskvadakı Azərbaycan nümayəndəliyinə gələrək bu hərbi-siyasi aksiyanı lənətləyən bəyanat verdi. Həmin bəyanat bütün azərbaycanlılar kimi bizi də ruhlandırdı. Biz — hazırda Azərbaycan Milli Olimpiya Komitəsinin vitse-prezidenti vəzifəsində çalışan Xəzər İsayev (20 Yanvar faciəsində onun qardaşı Müşfiq İsayev də həlak olmuşdu), Şuşa ziyalısı Zəki Salayev, hazırda Respublika Həmkarlar İttifaqları Konfederasiyasında sədr müavini vəzifəsində çalışan Cavanşir Alxasov, Tacəddin Mehdiyev və başqaları birlikdə “Koroğlu” Cəmiyyəti adlı müstəqil bir qurum yaratdıq. Əsas məqsədimiz fiziki cəhətdən sağlam, əqidəcə Azərbaycan dövlətinə və dövlətçiliyinə sədaqətli olan gəncləri öz ətrafımıza toplayaraq yeni nəslin vətənpərvərlik ruhunda tərbiyə edilməsinə nail olmaqdan ibarət idi. Bu təşkilat sonrakı xaos illərində özünəməxsus fəaliyyət göstərdi. Məhz həmin xidmətlərimizə görə mən 1992-ci ilin noyabrında Dövlət Maddi Ehtiyatlar Komitəsində tutduğum vəzifədən kənarlaşdırıldım. 1993-cü ilin yayından sonra ölkədə vəziyyət durulmağa başladı və ulu öndər Heydər Əliyev 1994-cü ildə Azərbaycan Respublikası Gənclər və İdman Nazirliyi yaradılması barədə fərman imzaladı. Ölkədə pərakəndə şəkildə fəaliyyət göstərən bütün gənclər təşkilatları həmin nazirlik ətrafında birləşdirildi və gənclərin milli dövlətçilik naminə təşkilatlanmasının birinci mərhələsi başlandı. Bu mərhələ bilavasitə ulu öndər Heydər Əliyevin misilsiz xidmətləri nəticəsində möhtəşəm uğurlarla yadda qaldı.

Həmin mərhələdə mən Gənclər və İdman Nazirliyinin məsul işçisi kimi 1996-cı ildə keçirilən Gənclər Forumunda çıxış etmişdim. Fiziki və mənəvi tərbiyənin bütün sahələrini əhatə edən həmin çıxışım rəhbərlik və gənclik tərəfindən yüksək qiymətləndirilmişdi. İki il sonra isə — 1998-ci ildə Gənc Vətənpərvərlər Birliyinin təsis konfransını keçirərək bu qurumu rəsmiləşdirdik. 1999-cu ildə birliyimiz dövlət qeydiyyatına alındı və biz ölkə gənclərinin təşkilatlanmasının ikinci mərhələsinə mütəşəkkil bir qurum kimi qatıldıq.

Gənc Vətənpərvərlər Birliyi ölkədə fəaliyyət göstərən Gənclər Təşkilatlarının Milli Şurası, Qeyri-hökumət Təşkilatları Assosiasiyası, Gənclər və İdman, Müdafiə, Təhsil, Mədəniyyət nazirlikləri, eləcə də Respublika Hərbi Komissarlığı ilə birlikdə silsilə vətənpərvərlik tədbirləri həyata keçirmişdir. Ölkədə gənclərlə bağlı keçirilən elə bir kütləvi tədbir olmaz ki, orada Gənc Vətənpərvərlər Birliyi yüksək səviyyədə təmsil olunmasın. Xüsusən, ulu öndərimizin adını daşıyan Heydər Əliyev Fondunun tədbirlərində iştirakımız birlik üzvlərinin böyük məmnunluğu ilə qarşılanır. Yeri gəlmişkən, Gənc Vətənpərvərlər Birliyinin sonuncu toplantısında Heydər Əliyev Fondunun Moskva şəhərindəki nümayəndəsi Leyla xanım Əliyevanın “İlin vətənpərvər xanımı” adına layiq görülməsi barədə qərar yekdilliklə qəbul edilmişdir.

Əlbəttə, bütün təşkilatlarda olduğu kimi GVB-də də fəaliyyətin mühüm hissəsini ən fəal üzvlərimiz reallaşdırırlar. İdarə Heyətimizin üzvlərindən professor Rafiq Baxşəliyev (ADPU-nun prorektoru), tanınmış jurnalist Azər Sarıyev (MSK-nın mətbuat xidmətinin rəhbəri), əməkdar məşqçi Mirəli Seyidov və başqaları qarşıya qoyduğumuz məqsədlərin reallaşdırılması üçün böyük fəallıq nümayiş etdirirlər. Şöbə müdirlərimizdən Elçin Axundov (Gəncə regional şöbəsi), Natiq Qaçayev (humnitar və mədəniyyət şöbəsi), İsgəndər Əliyev (fiziki və psixoloji hazırlıq şöbəsi) və Nuru Quliyev (beynəlxalq əlaqələr şöbəsi) çoxsaylı könüllülərimizin təşkilatlanmasında xüsusi rol oynayırlar. On illiyimiz ərəfəsində keçirilən növbəti qurultayımızda birliyin İdarə Heyətinə yeni üzvlər seçilmiş, yeni ictimai-siyasi məzmun kəsb edən növbəti illərdəki fəaliyyətimizin istiqamətləri müəyyənləşdirilmişdir. Ən əsası odur ki, Azərbaycan dövləti qüdrətləndikcə qeyri-hökumət təşkilatlarının fəaliyyət meydanı da genişlənir.

Müqamət ƏLİYEV,

Gənc Vətənpərvərlər Birliyinin sədri,

Azərbaycan Respublikası fəxri bədən

tərbiyəsi və idman işçisi

Xalq qəzeti.- 2010.- 7 yanvar.- S. 7.