Qazax: cinayətkarlığa qarşı mübarizə, ictimai asayişin mühafizəsi

Qazaxın bugünkü ab-havasında, sağlam mühitində heç şübhəsiz, polis əməkdaşlarının da əməyi az deyil. Son vaxtlar rayonda cinayətkarlığa qarşı mübarizənin daha da gücləndirilməsi, ictimai asayişin mühafizəsi istiqamətində bir sıra işlər görülmüşdür. Rayonda ötən ildə görülən işlər barədə söhbət açmağı Qazax rayon polis şöbəsinin rəisi, polis polkovniki Şükür Mehdiyevdən xahiş etdik. O, dedi:

- Cinayətkar varsa, ona qarşı mübarizə aparanlar da var. Hüquq-mühafizə orqanları olmasa, özbaşınalıq baş alıb-gedər. Təsadüfi deyil ki, yola saldığımız ilin doqquz ayı ərzində rayonda törədilmiş 152 cinayət hadisəsindən 121-nin istintaqı tamamlanaraq məhkəməyə göndərilmişdir. Axtarışda olan 16 nəfərdən 10-u tutularaq istintaqa təhvil verilmişdir.

Narkomanlığa və narkotik maddələrin satışı ilə məşğul olanlara qarşı mübarizə davam etdirilmişdir. Bu sahədə aşkar edilən 16 haldan 4-ü belə zərərli maddələrin satışı ilə məşğul olanların tapılması, 12-si isə narkotik vasitələrin saxlanması ilə bağlı olmuşdur. Rayon ərazisində keçirilən reydlərin nəticəsi də səmərəli olmuş, yabanı halda bitmiş yaşıl kütlə aşkara çıxarılaraq məhv edilmişdir. Bildiyiniz kimi, Qazax sərhəd rayonu olduğundan tranzit yolu ilə keçirilən narkotik vasitələrin qarşısının alınması üçün mübarizə tədbirlərinin gücləndirilməsinə ehtiyac var.

2009-cu ilin 9 ayı ərzində rayon polis şöbəsinin icraatında olan 53 cinayət işindən 38-i tamamlanaraq baxılmaq üçün məhkəməyə göndərilmişdir. İstintaq bölməsi tərəfindən istintaqı aparılmış cinayət işləri üzrə həbsəalma, əsassız cəlb, əlavə istintaqa qaytarma və sair kimi qanunsuz hallar aşkar edilməmişdir. Lakin hesab edirəm ki, cinayətin isti izlərlə aşkar olunması istiqamətində və qapalı qalmış cinayətlərin tezliklə açılması sahəsində səylər gücləndirilməlidir.

Cinayətkarlığa qarşı mübarizədə sahə inspektorlarımız da yaxından iştirak edirlər. Ötən ilin 9 ayı ərzində 17 nəfər məhkum olunmuş şəxs profilaktiki uçota götürülmüşdür. Ümumilikdə rayonda 99 nəfər əvvəllər məhkum olunmuş şəxs barəsində profilaktiki tədbirlər həyata keçirilir. Əməkdaşlarımız mənəviyyat əleyhinə olan hallara, sanitar-epidemioloji qaydaların pozulması, qanunsuz silahların saxlanması, ekoloji pozuntular, xırda xuliqanlıq və s. qarşı mübarizəni gücləndirirlər.

Yetkinlik yaşına çatmayanlarla profilaktiki iş də rayon polis şöbəsinin diqqət mərkəzindədir. Əməkdaşlarımız rayonun təhsil müəssisələrində, internet klublarda reydlər aparır, tədbirlər həyata keçirirlər. Hazırda 13 nəfər yetkinlik yaşına çatmayan şəxs və bir valideyn profilaktiki qeydiyyata götürülmüşdür. Ötən ilin əvvəlindən rayon ərazisində azyaşlılar və yeniyetmələr tərəfindən cinayət hadisəsinin törədilməməsi da diqqətəlayiq bir haldır.

Ötən ilin 9 ayı ərzində post-patrul xidməti bölüyünün əməkdaşları Respublika DİN-nin müvafiq əmr və göstərişlərinə əməl etmiş, axtarışda olan iki şəxsin tutulmasında fəallıq göstərmişlər. Onlar 3 ədəd odlu silah tapıb təhvil vermiş, bir oğurluq və iki narkotik faktının üstünü açmışlar. Yaxşı iş diqqətdən kənarda qalmamış, bölüyün 44 üzvü mükafatlandırılmışdır.

Polis şöbəmizin Qeydiyyat və Şəxsiyyət vəsiqəsi bölməsinin əməkdaşları Azərbaycan Respublikasının “Şəxsiyyət vəsiqəsi haqqında” və “Ölkədən getmək, ölkəyə gəlmək və pasportlar haqqında” qanunlarının müddəalarını əhali arasında geniş yaymaq üçün maarifləndirmə işi aparırlar.

Soyadlarının dəyişdirilməsi, şəxsiyyət vəsiqələrinin itirilməsi, yararsız hala düşmüş vəsiqələrin yenidən verilməsi, qeydiyyata alınma zamanı qaydalar və rüsumlar barədə vətəndaşlara izahatlar verilmiş, ötən ilin 9 ayı ərzində 4180 nəfərə şəxsiyyət vəsiqəsi təqdim olunmuşdur.

Dövlət yol polisi bölüyünün əməkdaşları da rayon ərazisində baş verə biləcək yol-nəqliyyat hadisələrinin qarşısının alınması üçün müəyyən işlər görmüşlər. Fərdi və dövlət avtomaşınları texniki baxışdan keçirilmiş, yol hərəkəti təhlükəsizliyinin təmin edilməsi, sərxoş vəziyyətdə avtomaşın idarə edilməsi və cinayətkarlığa qarşı mübarizə sahəsində tədbirlər görülmüşdür. Onu da qeyd edim ki, yol hərəkəti qaydalarını pozan 1332 nəfərin 96-sı sərxoş vəziyyətdə olmuşdur.

Rayon polis şöbəsinin Daş Salahlı polis bölməsinin əməkdaşları 2009-cu ilin 9 ayı ərzində baş vermiş 8 cinayət hadisəsinin açılmasını təmin etmişlər. Onlar “Xaş-xaş-2009” şərti adı altında keçirilən əməliyyatlarda da fəal iştirak etmiş, xidmət etdikləri inzibati ərazidə yabanı halda bitmiş çətənə kollarını çıxardıb yandırma yolu ilə məhv etmişlər.

Sıralarımız yeni əməkdaşlar hesabına genişlənir. Üç nəfər işə qəbul edilmiş, 31 nəfər polis əməkdaşı DİN-nin göstərişi əsasında müxtəlif kurslarda olmuşdur. İşimizdəki nöqsanları vaxtında müzakirə edir, aradan qaldırılması yolunda tədbirlər həyata keçiririk. Bu gün deyə bilərəm ki, Qazax Rayon Polis Şöbəsinin şəxsi heyəti mənəvi cəhətdən sağlam, peşə hazırlığı baxımından qənaətbəxşdir. Üzərimizə düşən vəzifələri layiqincə yerinə yetirmək bizim həm peşə, həm də vətəndaşlıq borcumuzdur.

Söhbəti yazdı: Hamlet QASIMOV,

“Xalq qəzeti”nin bölgə müxbiri

Xalq qəzeti.- 2010.- 9 yanvar.- S. 4.