Azərbaycan Dillər Universiteti ilə Hacəttəpə Universiteti arasında əməkdaşlıq müqaviləsi imzalanıb

Türkiyə Cümhuriyyətinin paytaxtı Ankarada Azərbaycan Dillər Universiteti ( ADU) və Türkiyənin Hacəttəpə Universiteti arasında əməkdaşlıq müqaviləsi imzalanıb. İmzalanma mərasimində ADU-nun rektoru, Milli Məclisin deputatı professor Səməd Seyidov, Azərbaycanın Türkiyə Cümhuriyyətindəki fövqəladə və səlahiyyətli səfiri Zakir Həşimov, ADU-nun nümayəndə heyəti, Strasburq Universitetinin və Fransanın Türkiyədəki səfirliyinin nümayəndələri iştirak ediblər.

Tədbiri giriş sözü ilə açan Hacəttəpə Universitetinin rektoru, professor Uğur Erdener bildirib ki, Azərbaycan ilə Türkiyə arasında olan münasibətlər hər sahədə olduğu kimi, təhsil sahəsində də sürətlə inkişaf edir və bu cür layihələrin həyata keçirilməsi ölkələrarası münasibətlərin inkişaf dinamikasına öz töhfəsini verəcək.Professor Uğur Erdener həmçinin iki universitet arasında olan yüksək səviyyəli əməkdaşlığa görə məmnunluğunu dilə gətirib. ADU-nun rektoru, Milli Məclisin deputatı , professor Səməd Seyidov öz çıxışında universitetlərarası bu əməkdaşlığı sevindirici hal kimi qiymətləndirib və ADU, Hacəttəpə və Strasburq Universitetləri arasında əməkdaşlığın davamının da olacağını vurğulayıb.

Azərbaycanın Türkiyədəki fövqəladə və səlahiyyətli səfiri Zakir Həşimov ADU ilə Hacəttəpə Universiteti arasındakı əməkdaşlığı yüksək qiymətləndirib.

ADU-nun mətbuat xidmətindən aldığımız məlumata görə, müqavilənin imzalanmasında əsas məqsəd universitetlərarası əməkdaşlığı gücləndirmək , elm və təhsil səviyyəsini təkmilləşdirməkdir.

Bu əməkdaşlıq Azərbaycan ilə Türkiyə arasında təhsil sahəsində mövcud olan əlaqələrə daha bir təkan verəcək və ölkələrarası münasibətlərin yüksəlişində müsbət rol oynayacaqdır.

Qəzənfər QASIMOV

Xalq qəzeti.- 2010.- 17 yanvar.- S. 6.