Balakən: 20 Yanvar şəhidlərinin xatirəsi yad edilir

20 Yanvar şəhidlərinin xatirəsi ölkəmizin hər yerində olduğu kimi, ucqar Balakəndə də silsilə tədbirlərlə yad olunur. Balakən Rayon İcra Hakimiyyətinin tədbirlər planına uyğun olaraq, rayonun bütün idarə, müəssisə və təşkilatlarında 20 Yanvar faciəsinin 20 illiyinə həsr olunmuş tədbirlərin keçirilməsinə hələ yanvarın 11-dən başlanılmışdır. Şəhidlərimizin əziz xatirəsinə həsr olunmuş silsilə tədbirlərə fotostendlər, sərgilər, rəsm və inşa müsabiqələri, “dəyirmi masa”lar, voleybol, güləş və şahmat yarışları və s. daxildir.

15 yanvar 2010-cu ildə şəhər 3 saylı orta məktəbində rayon üzrə oğlanlar arasında voleybol yarışı keçirilmiş, yanvarın 16-da isə güləş üzrə xatirə turnirinə start verilmişdir.

Rayonun Nəsimi adına şəhər orta məktəbində keçirilən elmi-praktik konfrans da şəhidlərimizin əziz xatirəsinə həsr olunmuşdu. Tədbir iştirakçıları təhsil şöbəsi tərəfindən rayon məktəbliləri arasında keçirilən rəsm müsabiqəsində yer tutmuş və məktəbin foyesində nümayiş olunan rəsm əsərləri ilə, fotostendlə, inşa yazı nümunələri ilə tanış oldular. Daha sonra konfrans işinə başladı. Rayonun idarə, müəssisə və təşkilat rəhbərlərinin, təhsil işçilərinin, Qarabağ əlillərinin, şəhid ailələrinin və ictimaiyyət nümayəndələrinin iştirak etdiyi tədbiri rayon icra hakimiyyəti başçısının müavini Nəzakət Rüstəmova açdı. Şəhidlərin xatirəsi bir dəqiqəlik sükutla yad edildi.

YAP rayon təşkilatının sədri Akif Uluxanov “20 Yanvar–Xalqımızın qəhrəmanlıq salnaməsi” mövzusunda məruzə ilə çıxış etdi. Məruzə ətrafında çıxış edən rayon statistika idarəsinin rəisi Məhəbbət Həsənov, 1 saylı peşə məktəbinin direktoru Rəhim Tağıyev, “Balakən” qəzetinin redaktoru Mürsəl Mikayılov, Nəsimi adına şəhər orta məktəbinin tarix müəllimi Akif Məmmədli, Qabaqçöl qəsəbə orta məktəbinin tarix müəllimi Həybullah Atayev, Uşaq Texniki Yaradıcılıq Mərkəzinin direktoru Xatın Qarayeva 20 Yanvar faciəsinin Azərbaycan tarixinin şanlı səhifəsi olduğunu qeyd etmiş, həmin günlərdə ulu öndər Heydər Əliyevin Azərbaycanın Moskvadakı nümayəndəliyinə gələrək bu qanlı faciəyə öz etiraz səsini ucaltdığını xüsusi vurğulamış, şəhidlərimizə ulu Tanrıdan bir daha rəhmət diləmişlər.

Şəhidlərin xatirəsinə həsr olunmuş tədbirlər davam edir. Yanvar ayının 20-də isə ayon ictimaiyyətinin nümayəndələri Şəhidlər xiyabanına gedərək şəhidlərin xatirəsinə ucaldılmış tunc abidə önünə çiçək qoyacaqlar.

İlqar HƏSƏNOV,

“Xalq qəzeti”nin bölgə müxbiri

Xalq qəzeti.- 2010.- 19 yanvar.- S. 5.