Dövlət İdarəçilik Akademiyasında keçirilən tədbirdə 20 Yanvar şəhidlərinin qəhrəmanlığı yüksək dəyərləndirildi

Azərbaycan Respublikasının Prezidenti yanında Dövlət İdarəçilik Akademiyasında 20 Yanvar şəhidlərinin xatirəsinə həsr olunmuş anım mərasimi keçirilmişdir.

Mərasimi akademiyanın rektoru, əməkdar elm xadimi, professor Seyfəddin Qəndilov açmış və onun təklifi ilə şəhidlərin əziz xatirəsi bir dəqiqəlik sükutla yad edilmişdir. Sonra o, 1990-cı ilin qanlı yanvar günlərini xatırlamış, sovet imperiyasının törətdiyi bu hərbi cinayət aksiyasını xalqımızın milli azadlıq hərəkatını boğmağa, ərazi bütövlüyümüzün qorunması naminə haqq səsimizi susdurmağa çalışan siyasətin acı nəticəsi olduğunu qeyd etmişdir. Rektor bu gün də qanlı hadisələrin unudulmadığını, günahsız insanların əziz xatirələrinin xalqımızın qəlbində hər zaman yaşayacağını bildirmişdir. 1988- ci ildə respublikamızda baş vermiş məlum hadisələrin davamı olan və böyük fəlakətlə nəticələnən bu faciənin tariximizə qanlı yanvar hadisələri ilə daxil olunduğunu diqqətə çatdıran S.Qəndilov həmin dövrdə Moskvada yaşayan xalqımızın böyük oğlu, görkəmli siyasi xadim, ümummilli lider Heydər Əliyevin böyük çətinliklər hesabına öz haqq səsini ucaldaraq başımıza gətirilən müsibətlərin dünya ictimaiyyətinə çatdırılması üçün göstərdiyi səylərdən danışmış, faciənin ertəsi günü Azərbaycanın Moskvadakı daimi nümayəndəliyinə gələrək keçirdiyi mətbuat konfransının böyük əhəmiyyətini bir daha vurğulamışdır. Rektor Heydər Əliyevin yenidən ölkə rəhbərliyinə qayıdışından sonra bu istiqamətdə gördüyü işlərdən, onun təşəbbüsü ilə ilk dəfə bu hadisəyə hüquqi-siyasi qiymət verdiyindən danışmış, şəhidlərin xatirəsinin əbədiləşdirilməsi, onların ailə üzvlərinə kömək üçün ulu öndərin imzaladığı sənədlərin bu insanların xatirəsinə böyük ehtiram olduğunu bildirmişdir.

S.Qəndilov demişdir ki, ulu öndərin siyasi kursunu böyük uğurla davam etdirən möhtərəm Prezidentimiz cənab İlham Əliyevin siyasi uzaqgörənliyi sayəsində hazırda müstəqil ölkəmiz dünyanın inkişaf etmiş dövlətləri cərgəsinə qoşulmaqdadır. Möhtərəm Prezidentimiz Vətənimizin ərazi bütövlüyü uğrunda canlarından keçənlərin əziz xatirəsinin daim yad edilməsi, onların ailələrinin sosial rifah halının yüksəldilməsi, mənzil-məişət şəraitinin yaxşılaşdırılması istiqamətində mühüm əhəmiyyətli tədbirlərin həyata keçirilməsinə göstəriş vermiş, çox zəruri fərmanlar imzalamışdır. Şəhidlər Xiyabanının yenidən abadlaşdırılması üçün Prezidentimizin imzaladığı fərman Vətən uğrunda, müstəqillik, azadlıq yolunda canlarını qurban verənlərə göstərilən diqqət və qayğının bariz nümunəsidir. Azərbaycana rəsmi səfərə gələn dövlət nümayəndələrinin Şəhidlər Xiyabanını ziyarət etmələri şəhidlərimizə olan ehtiramın təcəssümüdür. Onlar həmişə bütün soydaşlarımızın qəlbində yaşayacaqlar.

Dövlət İdarəçilik Akademiyası beynəlxalq münasibətlər və xarici siyasət kafedrasının dosenti Elçin Əhmədov, aspirantura və doktorantura şöbəsinin müdiri, dosent Musa Quliyev 1988-1990-cı illərdə baş vermiş hadisələr zəminində başa çatan bu faciə, onu təşkil edənlər, törədənlər barəsində ətraflı məlumat vermişlər. Qeyd olunmuşdur ki, SSRİ-nin o vaxtkı rəhbəri Mixail Qorbaçovun göstərişi ilə güc nazirləri Yazov, Bakatin və Kryçkovun rəhbərliyi ilə Stavropol, Sevastopol və Krasnodar vilayətindəki hərbi hissələrdə xidmət edən erməni əsgər və zabitlərindən komplektləşdirilmiş qoşun birləşmələri 1990-cı il yanvarın 19-dan 20-nə keçən gecə Bakıda və Azərbaycanın digər rayonlarında dəhşətli qırğın törətmiş, dinc əhalini vəhşicəsinə qətlə yetirmişlər. Sovet ordusunun əsgər və zabitləri faşistlərdən də betər qəddarlıq nümayiş etdirərək əliyalın xalqa qanlı divan tutmuş, bir gecənin içərisində küçə və meydanları insan qanı ilə boyamışlar. Ancaq imperiya bu qəddarlığı ilə də Azərbaycanın haqq səsini boğa bilmədi və şəhidlərimizin azadlıq, müstəqillik arzusu reallaşdı. Ulu öndər Heydər Əliyevin zəngin idarəçilik qabiliyyəti, siyasi uzaqgörənliyi sayəsində müstəqilliyimiz daimi və əbədi oldu.

Sonra Azərbaycanın əməkdar artisti Ağalar Bayramov və akademiyanın tələbələrinin ifasında şəhidlərə həsr olunmuş şeirlər səsləndirildi. Anım mərasiminə toplaşanlar 20 Yanvara həsr olunmuş kitab sərgisinə və faciənin müxtəlif epizodlarını əks etdirən videolentə baxdılar.

Əliqismət BƏDƏLOV

Xalq qəzeti.- 2010.- 19 yanvar.- S. 5.