Azərbaycan dövləti insanların rifah halının yaxşılaşdırılmasını prioritet istiqamət hesab edir

Dünya iqtisadiyyatının tərkib hissəsi olan ölkəmizdə 2009-cu ildə çox düzgün və vaxtında atılmış addımlarla iqtisadi maraqlarımızı qoruya bildik, insanların rifah halının pisləşməsinə yol vermədik, əksinə, 2009-cu ildə Azərbaycan əhalisinin sosial vəziyyəti daha da yaxşılaşdı.

Azərbaycan Respublikasının Prezidenti İlham Əliyevin Nazirlər Kabinetinin 2009-cu ilin sosial-iqtisadi inkişafının yekunlarına həsr olunmuş iclasındakı nitqindən

Ulu öndər Heydər Əliyev həm mənəvi, həm də demokratik dəyər kimi qiymətləndirilən xalqa hesabat verilməsi məsələsini daim üstün tutmuş, özü bu tendensiyanın çox mükəmməl nümunəsini yaratmışdır. Ümummilli liderimizin hələ ölkəmizə birinci dəfə rəhbərlik etdiyi 1969-82-ci illərdə nazirlik və komitələrin, şəhər və rayon rəhbərlərinin dövri olaraq öz fəaliyyətləri barədə açıq hesabatla çıxış etmək ənənəsi çox müsbət qarşılanırdı.

Sonrakı dövrdə isə ulu öndərin xalq qarşısında hesabat verməyin möhtəşəm nümunəsini yaratdığının şahidi olduq. Birincisi, dövlətimizin Ermənistan—Azərbaycan, Dağlıq Qarabağ münaqişəsinin həlli üçün həyata keçirdiyi tədbirlər və danışıqların vəziyyəti barədə ulu öndərin 1998-ci ildə Milli Məclis qarşısında verdiyi hesabat idi. Həmin hesabat elə əhatəli və incəliklə hazırlanmışdı ki, əcnəbi siyasətçi və politoloqlar da həmin hesabatdan yüksək səviyyədə bəhrələnmişdilər. Münaqişənin kökləri, problemin aradan qaldırılmasına mane olan amillər, tərəflərin mövqeyi, beynəlxalq ictimaiyyətin ikili standartlardan əl çəkə bilməməsi və bir çox amillər hətta, konfliktoloq mütəxəssislər üçün də maraqlı ola biləcək səviyyədə səsləndirilmişdi.

Ulu öndərin daha böyük və analitik məzmunlu hesabatı isə 2000-ci ilin son günlərində “Yeni il, yeni əsr və üçüncü minilliyin başlanması münasibətilə Azərbaycan xalqına müraciəti” idi. Rəsmi adı müraciət olan həmin sənəd əslində xalqımızın mövcud olduğu bütün dövrü, dövlətçilik tariximizi, müstəqil Azərbaycanın keçdiyi yolu və konkret olaraq 2000-ci ili əhatə edən mükəmməl hesabat idi. Ulu öndər Şərq müdriklərinin “Geriyə baxmayan qabağı görməz” ifadəsinin fəlsəfi aspektlərini daim üstün tuturdu. Bir də ki, xalq qarşısında hesabat verməyi xalq qarşısında xidməti olanlar bacararlar. Təmsil etdiyim siyasi partiyanın hakimiyyətdə olduğu bütün dövrdə — bu dövr Azərbaycanın möhtəşəm inkişafı və çiçəklənməsi ilə yadda qalmışdır — dövlət və dövlət başçısı daim xalqa açıq hesabat vermiş, öz fəaliyyətinin müsbət və mənfi tərəflərini qətiyyətlə söyləmişdir. Prezident İlham Əliyev də bu ənənəni yüksək səviyyədə, dövri olaraq davam etdirir. Yuxarıda qeyd etdiyimiz ifadədə təsdiq olunduğu kimi, bugünkü Azərbaycan dövlətinin xalqımız qarşısında hesabat verərkən söyləməyə çoxlu faktları vardır. Aşağıda onlardan bəzilərini qeyd edəcəyik. Elə Nazirlər Kabinetinin Prezidentin sədrliyi ilə keçən 18 yanvar 2010-cu il tarixli geniş iclasında da həmin faktların bəziləri səsləndirilmişdi. Ancaq biz əvvəlki illəri əhatə edən bəzi məqamları da yada salmaq istəyirik.

Azərbaycan dövlətinin xalqa hesabat verərkən söyləməli olduğu faktlar yüzlərlədir. 2003-cü ilin oktyabrından sonra ölkədə 750 mindən çox yeni iş yerinin yaradılması, əhalinin yoxsulluq həddinin 49 faizdən 12 faizə endirilməsi, adambaşına düşən ümumi daxili məhsul istehsalının artım tempinə görə ölkəmizin ardıcıl olaraq bir neçə il dünyada liderlik etməsi, təxminən 2 minə yaxın yeni məktəb binasının tikilməsi, təhsil sisteminin günün tələbləri səviyyəsində inkişafını təmin etmək üçün 14 dövlət proqramının təsdiq və icra edilməsi, bütün regionlarda Olimpiya İdman Kompleksi, Müalicə-Diaqnostika Mərkəzi və digər yeni qurğuların, çoxsaylı körpü, yol qovşağı və min kilometrlərlə müasir yolların ərsəyə gəlməsi günümüzün reallıqlarıdır. Bakıdan sonra Naxçıvan, Gəncə, Lənkəran və Zaqatalada beynəlxalq hava limanlarının tikilib-istifadəyə verilməsi ölkə iqtisadiyyatının və turizmin inkişafına, eləcə də respublikamızın beynəlxalq aləmə inteqrasiyasının genişlənməsinə çox böyük stimul verir. Uzağa getməyək. Son bir ildə Balakəndə o qədər möhtəşəm işlər görülüb ki, saymaqla qurtaran deyil. Bu gün balakənlilər Azəbaycan vətəndaşı olmaları ilə fəxr edirlər.

Bəli, bu, həqiqətdir. Balakən hər gün dəyişir, gözəlləşir. Yeni-yeni obyektlər istifadəyə verilir, iş yerləri açılır. Bir faktı xüsusi qeyd etmək istəyirəm ki, Azərbaycan Prezidenti İlham Əliyev rayonumuza təkcə son səfəri zamanı 8 obyektin açılışında bilavasitə iştirak etdi. Hələlik respublikada yeganə olan kanat vasitəsilə Heydər Əliyev parkının ən uca zirvəsinə qalxdı. Belə faktları çox sadalamaq olar. Bütün bunlar Prezident İlham Əliyevin 2004-cü ilin fevral ayında imzaladığı fərmanla təsdiq edilmiş “Azərbaycan Respublikası regionlarının sosial-iqtisadi inkişafı Dövlət Proqramının (2004-2008-ci illər)” icrası zamanı mümkün olmuşdur. Dövlət başçımızın özünün də söylədiyi kimi, Azərbaycanda cəmiyyət həyatının elə bir sahəsi yoxdur ki, orada elmi şəkildə əsaslandırılmış dövlət proqramları icra edilməsin: “Biz dəqiq bilirik ki, hansı proqram hansı nəticələrlə başa çatacaq, nə vaxt başa çatacaq və sonrakı mərhələlərdə biz hansı işləri görəcəyik”.

Yeri gəlmişkən, 2004-2008-ci illərdə Azərbaycan Respublikası regionlarının sosial-iqtisadi inkişafını təmin etmiş Dövlət Proqramının 2008-2013-cü illəri əhatə edən növbəti mərhələsi də uğurla icra edilir. Ölkəmizin sosial-iqtisadi inkişafı barədə söz açarkən bir məsələni xüsusilə vurğulamaq zərurəti yaranır. Belə ki, respublikamızda həyata keçirilən bütün sosial-iqtisadi tədbirlər beynəlxalq təşkilatlar və dünya dövlətləri tərəfindən maraqla izlənilir və yüksək qiymətləndirilir. Hətta bir neçə beynəlxalq təşkilatın illik hesabatında belə ifadələr özünə yer tapırdı ki, Azərbaycandakı sosial-iqtisadi inkişaf modeli region ölkələrinin hamısına nümunə göstərilə bilər. Bu məsələyə münasibət bildirən Prezident İlham Əliyevin fikirləri isə bir qədər fərqli idi: “Biz heç bir məsələdə heç bir dövlətə nümunə göstərmək istəmirik. Biz sadəcə öz dövlətimizi qüdrətləndirmək, öz xalqımızın sosial-rifah halının yaxşılaşdırılmasını təmin etmək məqsədilə müvafiq dövlət proqramları icra edir, qarşıya qoyduğumuz məqsədlərə nail oluruq”.

Bununla yanaşı, ölkə rəhbəri beynəlxalq təşkilatların və əcnəbi ekspertlərin ölkəmizdə həyata keçirilən tədbirlər barədə fikirlərinə dərin hörmətlə yanaşır, öz çıxış və nitqlərində həmin faktlara istinad etməyi vacib sayır. Dövlət başçımız Nazirlər Kabinetinin son iclasındakı yekun nitqində də həmin ənənəyə sadiq qaldı: “Ölkəmiz, iqtisadiyyatımız böhranlı ildə də uğurla inkişaf etməyə davam etdi. İndi hər şey müqayisə ilə ölçülür. Mən indi başqa ölkələrlə Azərbaycanı müqayisə etmək istəmirəm, ancaq statistika vardır, göstəricilər vardır. MDB məkanında ən sürətlə inkişaf edən ölkə Azərbaycandır. Bütün bölgədə iqtisadi tənəzzül, sənaye istehsalının tənəzzülü hökm sürür, Azərbaycanda isə artım vardır. Dünya İqtisadi Forumu — dünyanın mötəbər beynəlxalq təşkilatı Azərbaycanı rəqabət qabiliyyətliliyinə görə 51-ci yerə layiq gördü və bu, MDB məkanında birinci yerdir. Yəni iqtisadiyyatımız bütün MDB məkanında ən rəqabət qabiliyyətlidir, ən çoxşaxəlidir, ən müasirdir, ən güclüdür. Bu, reallıqdır. Biz bu reallıqla haqlı olaraq fəxr edirik... 2008-ci ildə Dünya Bankı Azərbaycanı bir nömrəli islahatçı ölkə kimi tanıdı və təqdim etdi. Yəni, budur uğurlarımızın təməlində duran məsələlər — güclü siyasət, siyasi iradə, siyasi və iqtisadi islahatlar, düşünülmüş strategiya və taktika”.

Ulu öndər Heydər Əliyev qeyd edirdi ki, xalq qarşısında verilən hesabatın əhəmiyyəti bir də ondadır ki, bu zaman təkcə görülmüş işlər barədə statistik məlumatları, faktları sadalamaqla kifayətlənmirsən, qarşıda duran vəzifələr, həyata keçiriləcək tədbirlər, plan, proqramlar barədə də insanları məlumatlandırırsan. Bunun isə ölkədəki ümumi inkişaf tempinin artırılması üçün çox böyük əhəmiyyəti vardır. Ulu öndərin siyasi kursunu bütün incəliklərinə qədər uğurla davam etdirən Prezident İlham Əliyev yanvarın 18-də hökumətin hesabatını dinlədikdən sonra söylədiyi yekun nitqində həmin ənəni də davam etdirdi: “Əldə etdiyimiz nailiyyətlərlə kifayətlənməməliyik. Bu gün əldə olunmuş nailiyyət sabah daha da böyük addımın atılması üçün əsas olmalıdır. Xüsusilə, dünyada sürətlə inkişaf edən informasiya texnologiyaları sahəsində biz hər zaman bir addım öndə olmalıyıq, rəqibləri də, zamanı da qabaqlamalıyıq. Məhz bu yanaşma bizə imkan verdi ki, biz qısa müddət ərzində Azərbaycanda informasiya-kommunikasiya texnologiyaları sahəsində demək olar ki, inqilab yarada bildik”.

Prezident İlham Əliyevin ölkəmizdə kosmik sənayenin yaradılması və telekommunikasiya peyklərinin orbitə çıxarılması barədə müvafiq sərəncamı və “Azərbaycan Respublikasında kosmik sənayenin yaradılması və inkişafı üzrə Dövlət Proqramı”na uyğun olaraq ötən il respublikamızda ilk peykin orbitə çıxarılması üçün müvafiq tenderlər həyata keçirilmişdir. Bu məsələləri dövlət başçımız, sadəcə, inqilab adlandırır. Ancaq bu elmi-texniki inqilabın qədr-qiymətini biz Azərbaycan rabitə peykinin kosmosda inkişaf etmiş dünya ölkələrinin anoloji qurğuları ilə yanaşı fəaliyyət göstərməsi zamanı biləcəyik.

Bir məqamı da xüsusilə qeyd edək ki, Prezident İlham Əliyev qeyri-neft sektorunun inkişaf etdirilməsi, xüsusən, neft sektorundan əldə edilmiş kapitalın insan kapitalına—intellektual kapitala çevrilməsi məsələsinə çox böyük önəm verir. Bu sahədə məhz azərbaycanlı alimlərin elmi ixtiraları nəticəsində yeni inqilab yaradılması məsələsi əsas vəzifə kimi qarşıya qoyulmuşdur. Ölkədə ümumi və ali təhsil sisteminin təkmilləşdirilməsi, xaricdə təhsil alan tələbələrin xərclərinin dövlət hesabına ödənilməsi, xüsusi istedada və qabiliyyətə malik gənclərin yaradıcılığının dəstəklənməsi və bir çox başqa məsələlər məhz bu mərama xidmət edir.

2009-cu il artıq keçdiyimiz tarix kimi geridə qaldı. 2010-cu il isə öz uğurlu addımlarını atmağa başlayıb. Yeni ilin ilk günlərində region və dünya siyasətçilərinin verdiyi bəyanatlardan belə bir nəticə çıxır ki, bu il Ermənistan—Azərbaycan, Dağlıq Qarabağ münaqişəsinin həlli üçün mühüm, əlverişli şərait yaranacaqdır. Bu faktı Prezident İlham Əliyev də öz nitqində təsdiq etdi. Deməli, Azərbaycan dövlətinin bu istiqamətdəki siyasi-diplomatik fəaliyyəti öz nəticələrini verməkdədir. Məlumdur ki, ölkəmiz Dağlıq Qarabağ problemi istisna olmaqla bütün problemləri özü həll etmişdir. Bu düyünün açılmasından sonra isə Azərbaycanın inkişafının sürəti qat-qat artacaqdır. ABŞ, Avropa və ümumiyyətlə, dünya politoloqlarının fikrincə, Ermənistan—Azərbaycan, Dağlıq Qarabağ münaqişəsinin həll edilməsi nəinki təkcə Azərbaycanın, hətta, Ermənistan da daxil olmaqla regionun bütün ölkələrinin güclü inkişafına təkan verəcəkdir. Həmin inkişafı isə öz xalqının sosial-rifah halının yaxşılaşdırılmasına xidmət edən siyasətçilər arzulayır və reallaşdırırlar.

Fakt ondan ibarətdir ki, Azərbaycan dövləti bütün hallarda ölkə əhalisinin rifah halının yaxşılaşdırılmasına xidmət edir. Bu fakt özünü dünya ölkələrinin iqtisadi böhrandan çıxmağa çalışdığı 2009-cu ildə daha əhatəli şəkildə göstərdi. Prezident İlham Əliyevin səyləri nəticəsində Azərbaycan əhalisinin sosial-rifah halı böhran ilində də yaxşılaşmaqda davam etdi. Deməli, ölkədə Heydər Əliyev siyasi kursu uğurla davam etdirilir.

Akif ULUXANOV,

Yeni Azərbaycan Partiyası

Balakən rayon təşkilatının sədri

Xalq qəzeti.- 2010.- 26 yanvar.- S. 4.