İlə yekun vurulur

Keşlə qəsəbəsində hesabat yığıncağı keçirilmişdir

Yola saldığımız 2009-cu ildə dünyanı bürümüş maliyyə böhranına baxmayaraq, Azərbaycanın dinamik inkişafı davam etmiş, ölkəmizdə bir sıra infrastruktur layihələri reallaşdırılmış, mühüm sosial-iqtisadi inkişaf proqramları həyata keçirilmişdir. Yanvarın 18-də Nazirlər Kabinetinin 2009-cu ildə sosial-iqtisadi inkişafının yekunlarına və qarşıda duran vəzifələrə həsr olunmuş iclasında ölkə Prezidenti İlham Əliyev Azərbaycanın son illər qazandığı uğurları yüksək qiymətləndirmiş, dinamik inkişafın daha da sürətləndirilməsi üçün qarşıya yeni vəzifələr qoymuşdur. Hazırda ölkənin hər yerində 2009-cu ilə yekun vurulur, dövlət başçısının məlum iclasda verdiyi tövsiyə və tapşırıqlar əsl fəaliyyət proqramı kimi qəbul edilərək 2010-cu ildə görüləcək işlərin konkret istiqamətləri müəyyənləşdirilir.

Dünən paytaxtın Nizami rayonunun Keşlə qəsəbəsində 2009-cu ilin yekunlarına dair keçirilmiş hesabat yığıncağında da bu barədə geniş danışıldı, görülmüş işlərə qiymət verildi, qarşıda duran vəzifələr müzakirə olundu. Tədbiri giriş sözü ilə açan Nizami Rayon İcra Hakimiyyətinin başçısı Tahir Budaqov bildirdi ki, Nazirlər Kabinetinin 2009-cu ilin sosial-iqtisadi inkişafının yekunları ilə bağlı geniş iclasında Prezident İlham Əliyev giriş nitqində ölkəmizdə ötən il ərzində qazanılmış uğurları geniş təhlil etdi. Qeyd olundu ki, dövlət başçısının Azərbaycanda keçid dövrünün artıq başa çatması və ölkəmizin yeni inkişaf mərhələsinə qədəm qoyması ilə bağlı fikirləri bütün icra strukturlarından işlərini bu dövrün şərtlərinə uyğun qurmalarını tələb edir.

Nizami Rayon İcra Hakimiyyəti başçısının Keşlə qəsəbəsi üzrə nümayəndəsi Qara Qarakişiyev 2009-cu ildə görülmüş işlər barədə geniş hesabat məruzəsi ilə çıxış etdi. Natiq bildirdi ki, ölkə Prezidenti İlham Əliyevin rəhbərliyi ilə həyata keçirilən sosial-iqtisadi islahatların uğurlu nəticələri abadlıq-quruculuq işlərinin geniş vüsət almasına səbəb olmuşdur. Qeyd olundu ki, dövlət başçısının imzaladığı mühüm fərman və sərəncamlardan irəli gələn vəzifələrin həlli istiqamətində həyata keçirilən tədbirlər ölkəmizin sosial-iqtisadi inkişafının xeyli sürətlənməsinə, əhalinin güzəranının əhəmiyyətli dərəcədə yaxşılaşması ilə nəticələnmişdir. Xüsusilə də Yeni il ərəfəsində “Əhalinin təbii qazdan istifadəsi üzrə yaranmış borcların silinməsi tədbirləri barədə” ölkə Prezidentinin məlum fərmanı sakinlər tərəfindən dərin razılıqla qarşılanmışdır.

Ötən il ölkədə keçirilən ictimai-siyasi tədbirlərdə Keşlə sakinlərinin də fəal iştirak etdiyini diqqətə çatdıran Q.Qarakişiyev 23 dekabr bələdiyyə seçkilərinin qəsəbədə geniş seçici fəallığı şəraitində keçdiyini və yeni bələdiyyə üzvlərinin artıq öz səlahiyyətlərinin icrasına başladıqlarını bildirdi.

Sənaye zonasında yerləşən və 35,8 hektar ərazini əhatə edən Keşlə qəsəbəsində 2009-cu ildə görülmüş işlərdən, nəzərdə tutulan planlardan və həlli vacib məsələlərdən geniş bəhs edən natiq bildirdi ki, ötən il əhaliyə göstərilən rabitə xidmətlərinin səviyyəsinin yaxşılaşdırılması üçün 4600 nömrə tutumu olan ATS, yeni poçt binası tikilib istifadəyə verilmiş, 32 saylı birləşmiş Şəhər Xəstəxanası əsaslı təmir edilərək lazımi avadanlıqlarla təchiz olunmuş, bu səhiyyə ocağının nəzdindəki uşaq poliklinikası bərpa olunaraq sakinlərin ixtyarına verilmişdir. Bundan əlavə, qəsəbədə 550 yerlik xeyir-şər evi inşa edilmişdir. Qəsəbənin mədəni-tarixi abidələrindən sayılan XVIII əsrə aid Şah Abbas məscidi təmir olunmuşdur. Bütün bu işlərin dövlət tərəfindən göstərilən qayğı və diqqətin təcəssümü olduğunu bildirən qəsəbə nümayəndəsi sakinlər adından Prezident İlham Əliyevə minnətdarlığını bildirdi.

Məruzəçi 2009-cu ildə kommunal sahədə həyata keçirilən işlərdən də geniş bəhs etdi. Qeyd olundu ki, qəsəbənin qaz təchizatını daha da yaxşılaşdırmaq üçün il ərzində yeni kəmərlər çəkilmiş, bir sıra ərazilərdə qaztənzimləyici siyirtmələr quraşdırılmış, lazımi əsaslı təmir-bərpa işləri aparılmışdır. Bununla yanaşı, sakinlərin elektrik enerjisi ilə təminatını yaxşılaşdırmaq, eləcə də qəsəbədə yerləşən təhsil və səhiyyə müəssisələrini istiliklə normal şəkildə təchiz etmək üçün lazımi işlər görülmüşdür. Qəsəbənin içməli su ilə təchizatını yaxşılaşdırılması üçün isə cari ildə bir sıra zəruri tədbirlərin həyata keçiriləcəyini diqqətə çatdıran Q.Qarakişiyev kanalizasiya şəbəkəsinin yenidən qurulması ilə bağlı ötən il mühüm işlərin görüldüyünü dedi. İl ərzində qəsəbədə həyata keçirilmiş abadlıq-quruculuq işlərindən bəhs edən natiq sakinlərin üzləşdikləri problemlərin aradan qaldırılması üçün zəruri tədbirlərin görüldüyünü də diqqətə çatdırdı. Qəsəbə sakinlərini narahat edən məsələləri sadaladı, onların rayon icra hakimiyyəti rəhbərliyinin köməyi ilə qısa müddətdə aradan qaldırılacağına əminliyini ifadə etdi.

Məruzə ətrafında çıxış edən ayrı-ayrı xidmət sahələrinin rəhbərləri ötən il həyata keçirilən tədbirlər barədə hesabat verdilər, 2010-cu ildə qəsəbənin sosial-iqtisadi inkişafının sürətləndirilməsi ilə bağlı bütün imkanlardan lazımınca istifadə edəcəklərini bildirdilər. Çıxış edən digər natiqlər son illər Keşlə qəsəbəsinin simasının xeyli gözəlləşdiyini vurğuladılar, bütün bunlara görə dövlət başçısına dərin minnətdarlıqlarını bildirdilər.

Yığıncağa yekun vuran Nizami rayon icra hakimiyyətinin başçısı Tahir Budaqov ötən il ərzində qəsəbədə kommunal sahədə görülmüş işlərə münasibətini bildirdi, çıxışlarda səsləndirilən həlli vacib məsələlərə xüsusi qayğı ilə yanaşacağını diqqətə çatdırdı. Natiq həmçinin Keşlə bələdiyyəsinə yeni seçilmiş üzvləri təbrik etdi, onlara işlərində uğurlar arzuladı. Xüsusilə qeyd olundu ki, rayonun bütün xidmət sahələri, bələdiyyə, eləcə də sakinlər qəsəbənin simasının daha da gözəlləşdirilməsi, mövcud problemlərin aradan qaldırılması üçün birgə səylərini gücləndirməlidirlər.

Mirbağır YAQUBZADƏ

Xalq qəzeti.- 2010.- 27 yanvar.- S. 5.