Sahibkarlıq fəaliyyəti üçün əlverişli şərait yaradılır

Bakı Şəhər Vergilər Departamentinin Kommersiya hüquqi şəxslərin dövlət qeydiyyatı İdarəsində sahibkarlıq fəaliyyəti subyektlərinin “bir pəncərə” prinsipi ilə qeydiyyatının tətbiqinin 2 illiyi ilə əlaqədar brifinq keçirilmişdir.

Vergilər Nazirliyinin Kommersiya hüquqi şəxslərin dövlət qeydiyyatının təşkili və iqtisadi təhlil Baş İdarəsinin rəisi Rauf Namazov ölkədə sahibkarlığın sürətlə inkişaf etdirilməsi, daha əlverişli biznes mühitinin formalaşdırılması və biznesə başlama prosedurlarının sadələşdirilməsi məqsədilə Azərbaycan Respublikasının Prezidenti İlham Əliyevin birbaşa rəhbərliyi ilə həyata keçirilən sahibkarlıq fəaliyyəti subyektlərinin “bir pəncərə” prinsipi üzrə dövlət qeydiyyatının mahiyyəti barədə məlumat vermiş, bu prosesə dövlət başçısının iştirakı ilə 29 dekabr 2007-ci il tarixdən başlanıldığını xatırlatmışdır. Bildirmişdir ki, kommersiya hüquqi şəxslərin qeydiyyat prosedurlarının (biznesə başlama) sayı 13-dən 6-dək, sərf edilən müddət 53 gündən 8 günədək, o cümlədən sırf qeydiyyatın aparılmasına sərf edilən müddət 3 günədək azaldılmışdır. Qeydiyyatın aparılması üçün təqdim edilməli sənədlərin sayı 5 dəfədən çox azalmışdır.

Baş idarə rəisinin sözlərinə görə, 2008-ci il ərzində Vergilər Nazirliyi tərəfindən 44.277, 2009-cu ildə 44.539 sahibkarlıq subyekti qeydiyyata alınmışdır. Ümumiyyətlə, bu 2 ildə “bir pəncərə” prinsipi ilə qeydiyyata alınan 88.397 sahibkarlıq subyektindən 11.403-ü kommersiya hüquqi şəxs olmuşdur.

R.Namazovun sözlərinə görə, qeydiyyat məlumatları mərkəzləşdirilmiş şəkildə Dövlət Sosial Müdafiə Fonduna, Dövlət Statistika Komitəsinə və Dövlət Gömrük Komitəsinə ötürülür ki, bu da vergi ödəyicilərinin vaxtına xeyli qənaət etməsi deməkdir. İqtisadi İnkişaf Nazirliyi ilə imzalanmış razılaşmaya görə isə, 2008-ci ilin sonlarından etibarən sahibkarlıq subyektlərinə, digər dövlət qurumuna müraciət etmədən, nəzarət kitabçalarını “bir pəncərə” vasitəsilə əldə etmək imkanı yaradılmışdır. Artıq “bir pəncərə” vasitəsilə 47.487 vergi ödəyicisinə nəzarət kitabçası təqdim olunmuşdur.

Baş idarə rəisi bildirmişdir ki, artıq vergi orqanları ilə 16 bank arasında elektron məlumat mübadiləsi təşkil edilmiş, daha 5-i ilə bu mübadilənin təşkili üçün test sınaqları keçirilir. Banklarla elektron sənəd mübadiləsinin təşkili hesabların açılması prosedurunun əhəmiyyətli dərəcədə sadələşməsinə və vergi ödəyicilərinin vaxta qənaət etməsinə şərait yaratmışdır.

Hazırda Vergilər Nazirliyi ilə Əmək və Əhalinin Sosial Müdafiəsi Nazirliyi arasında elektron məlumat mübadiləsinin təşkili istiqamətində aparılan hazırlıq işləri də yekunlaşmaq üzrədir. Dövlət qurumları arasında inteqrasiyanın gücləndirilməsinə xidmət edən bu layihənin işə salınması ilə nəzarət mexanizmlərinin daha da təkmilləşdirilməsi nəzərdə tutulur.

Sonra jurnalistləri maraqlandıran suallar cavablandırılmış, KİV nümayəndələri “bir pəncərə” prinsipi ilə qeydiyyatın həyata keçirilməsi ilə əyani surətdə tanış olmuşlar.

B.VAQİF

Xalq qəzeti.- 2010.- 29 yanvar.- S. 3.