"Bakı Forumu sivilizasiyalararası barış və dostluğa böyük töhfə verdi"

Dünən Bakıda Ümumdünya Mədəniyyətlərarası Dialoq Forumu öz işini başa çatdırıb. Azərbaycan Respublikasının mədəniyyət və turizm naziri Əbülfəs Qarayev tədbirdən sonra mətbuat konfransı keçirərək bildirib ki, Bakı Forumu beynəlxalq təşkilatların böyük marağına səbəb olub. Nazir demişdir: "Azərbaycan Respublikasının Prezidenti cənab İlham Əliyevin forumun açılışında iştirakı, Azərbaycanın birinci xanımı Mehriban Əliyevanın forumda çıxışı bu tədbirə xüsusi əhəmiyyət vermişdir".

Bəli, üç gün davam edən Bakı Forumu artıq tarixə çevrilib. Tədbirdə 80 ölkədən 450-yə yaxın rəsmi qonaqlar, elm və mədəniyyət xadimləri, jurnalistlər iştirak ediblər. Qeyd edək ki, dünyanın aparıcı qəzetləri, radio və televiziyaları forumun işini geniş işıqlandırıblar. Ümumi rəy belədir ki, müzakirə olunan məsələlərin aktuallığına və əhəmiyyətinə görə, forumun nəticələrini çox uğurlu hesab etmək olar.

Əməkdaşımız Mədəniyyətlərarası Dialoq Forumunun iştirakçıları ilə görüşərək onlardan bu mötəbər tədbirlə bağlı fikir və mülahizələrini bildirmələrini xahiş edib. Qonaqların ürək sözlərini bu gün diqqətinizə çatdırırıq. Şeney Başar, Türkiyənin mədəniyyət və turizm nazirinin müavini:

- Mən bu fikirdəyəm ki, Bakı forumu ölkələr arasında barış və dostluğa çağırış idi və forum bu istiqamətdə həqiqətən böyük töhfə verdi". Belə tədbirlər uzun illər unudulmur, təsirləri də keçici yox, davamlı olur. Sadəcə, Bakıda bünövrəsi qoyulan ənənələri davam etdirmək lazımdır. Bir daha vurğulayıram, qardaş Azərbaycanda belə bir mötəbər tədbirin yüksək səviyyədə təşkil olunmasından çox məmnunam. Bu tədbir göstərir ki, Azərbaycan dövləti düşünülmüş humanitar siyasət aparır və sivilizasiyalararası dialoqda fəal tərəfdaş kimi mühüm bir missiya həyata keçirir. Türkiyə və Azərbaycan qardaş dövlətlərdir. Ulu öndər Heydər Əliyevin dediyi kimi, biz bir millət, iki dövlətik. Bizim çox qədim sarsılmaz tarixi əlaqələrimiz var. Son illər bütün sahələrdə olduğu kimi, mədəniyyət sahəsində də əlaqələrimiz daha da genişlənib. TÜRKSOY təşkilatı çərçivəsində də əlaqələrimiz faydalı və sıx olub. Söz sözü çəkər, TÜRKSOY-un baş katibi Düseyn Kaseinov da forumun işində iştirak edir. Onun da forumun işi barədə gözəl təəssüratları olduğu mənə bəllidir.

Türkiyədə bir mədəniyyət və turizm işləri üzrə bakan yardımçısı olaraq Azərbaycanda son illər turizmin sürətli inkişafı sahəsində aparılan uğurlu işləri diqqətlə izləyirəm. Turizm iqtisadi cəhətdən çox sərfəli bir sahədir, turizm həm də xalqların bir-birləri ilə mədəni bağlılığını artırır. Forum çərçivəsində ölkənizin mədəniyyət və turizm naziri, sayın Əbülfəs Qarayev ilə görüşüm oldu. Turizm sahəsində zəngin təcrübəsi olan Türkiyənin qardaş Azərbaycana yardım etməyə hazır olduğunu bir daha bəyan etdim.

Bakı Forumu çox dəyərli bir tədbir idi, onun mədəni proqramı da zəngin idi. Tədbirin birinci günü axşam Heydər Əliyev Sarayında Azərbaycan və Litva incəsənət ustalarının birgə iştirakı ilə təşkil olunan "Küləyin yuxusu" tamaşasını izlədim. Çox məmnun qaldım. Belə tədbirlər bütün dünyada Azərbaycanın hörmətini, nüfuzunu qaldırır. Bir dost, qardaş xalq olaraq sizin uğurlarınıza çox sevinirəm. Qəzetiniz vasitəsi ilə bütün azərbaycanlı qardaşlarıma sevgi və sayğılarımı bildirirəm.

Anatol Lazareviç, Minsk Fəlsəfə İnstitutunun direktoru:

- Mən Ümumdünya Mədəniyyətlərarası Dialoq Forumunda iştirakımdan çox razı qalmışam. Forumun həm plenar iclaslarında, həm də forum çərçivəsində "Müasir dünyada dialoq fəlsəfəsinin dərkinə dair" mövzusunda keçirilən "Dəyirmi masa"da özüm üçün bir çox yeni, dəyərli şeylər əxz etdim. Dialoq fəlsəfəsi mövzusu məni çoxdan düşündürürdü. Bakıda çağdaş dünyada mədəniyyət və təhsildə baş verən dəyişikliklərin mahiyyəti, müasir dünyanın dialoq fəlsəfəsinin yeni dərkini tələb edən problemlər ciddi müzakirə olundu. Belə faydalı fikir mübadilələri alimlər üçün çox gərəklidir. Biz gender mədəniyyəti, postsovet məkanında milli şüurun müasirləşdirilməsi problemləri, tolerantlıq, mədəniyyətlərin müxtəlifliyi, qloballaşma əsrində fəlsəfə, təhsil və mədəniyyət arasında əlaqələrə yanaşma və digər mövzular ətrafında da fikir mübadiləsi apardıq. Bunları ona görə deyirəm ki, siz biləsiniz, bu forum dekorativ xarakter daşımayıb, çox məhsuldar olub, burada çox maraqlı, dəyərli ideyalar səsləndirilib.

Azərbaycanın çox böyük elmi, mədəni, fəlsəfi potensialı var. Yaxşı haldır ki, Azərbaycan dövləti elmi himayə edir. Azərbaycanlı alim dostlarımdan biri məlumat verdi ki, Prezident İlham Əliyevin himayəsi ilə bu gün Azərbaycan Elmlər Akademiyası öz fəaliyyətini uğurla davam etdirir. Fundamental elmlər xalqların uzunmüddətli inkişafının bünövrəsini yaradır. Azərbaycan dövləti bu yolu seçibsə, düz edib. Azərbaycanlı gənclərin Qərb dövlətlərinin nüfuzlu ali məktəblərində dövlət hesabına təhsil almalarını da təqdir edirəm.

Jino Çioqli, İtaliyanın Çerveteri şəhərinin meri:

- Azərbaycanda keçirilən Mədəniyyətlərarası Dialoq Forumunu yüksək qiymətləndirirəm və bu möhtəşəm tədbir münasibətilə ölkə rəhbərliyini təbrik edirəm. Azərbaycan hökumətinin mədəniyyətlər arasında körpü salmağa xidmət edən belə bir layihəni öz çiyninə götürməsi və onu uğurla icra etməsi cəsarətli və qürur doğurucu addımdır. Bu, ona dəlalət edir ki, Azərbaycan iqtidarı mədəniyyətlərarası dialoq aparmağı öz siyasətində əsas istiqamətlərdən biri kimi görür. Sivil dünya bunu qiymətləndirməyə bilməz.

Tədbir çərçivəsində bir sıra maraqlı layihələr, o cümlədən "Şəhərlərin mədəniyyətlərarası dialoqa qoşulması" mövzusu müzakirə olunub. Bu mövzu mənə, Çerveteri şəhərinin meri olaraq xüsusilə yaxın mövzudur. Dünyanın hər yerində olduğu kimi, bizim şəhərin sakinləri də dialoqa hazırdırlar, terror və münaqişələri istəmirlər. Reallıq isə budur ki, son illər Yer kürəsində "qaynar nöqtələr" daha da artıb. İraqda, Əfqanıstanda terror ara vermir. İndi də ərəb dünyası qarışıb. Bəziləri buna görə Qərbi günahlandırır, bir başqaları başqa səbəb axtarır. Kim haqlıdır bilmirəm. Lakin çıxış yolunu dialoqda görürəm. Axı, sülhün, anlaşmanın alternativi yoxdur. Əminəm ki, mədəniyyətlər yaxınlaşdıqca, bir-biri ilə təmasda, ünsiyyətdə olduqca belə narahat hallar, münaqişələr azalacaq.

Bunu da deməyi özümə borc bilirəm ki, Bakının qeyri-adi gözəlliyi də məni çox valeh etdi. Gizlətmirəm, Azərbaycan paytaxtının bu qədər gözəl olduğunu təsəvvür etmirdim. Bakılı həmkarlarım sağ olsunlar, bu qədim və gözəl şəhərlə məni yaxından tanış etdilər. Burada Şərq və Qərb memarlıq üslubları olduqca harmonik bir vəhdət təşkil edir. Diqqətimi başqa bir məqam da çəkdi. Bakılılar da bizim italyanlar kimi çox səmimi, istiqanlı insanlardır. Mən sizin gözəl şəhərinizi, onun lütfkar sakinlərini unutmayacağam. Bakı ilə yenidən görüşəcəyimə ümid edirəm.

Söhbəti yazdı: Məsaim ABDULLAYEV

Xalq qəzeti.- 2011.- 10 aprel.- S. 3.