Yeni kitablar

Yurd həsrətiylə qovrulan ürəyin "yuxuları"...

Həsrətin ürəkdə yaşadığını, nisgilin ürəklə daşındığını bilirdik. Həsrəti kim büküb cibinə qoya bilər ki? Nisgili əldə və ya qab-qacaqda aparmaq mümkündürmü? Yox, onların məskəni ürəkdir və həsrətində qaldığımızın yuxumuza gəlməsi də elə ürəyin möcüzəsidir.

Bu möcüzələrdən birini həmkarımız Ramazan Səməroğlunun üç il fasilə ilə işıq üzü görən növbəti kitabındakı "Dağları yuxuda gördüm" adlı şeirini oxuyanda bir daha hiss etdim. Zəngəzurun, Qafanın, doğulub boya-başa çatdığı Kurud kəndinin həsrətiylə yatan müəllif yuxuda gördüyü dağların halını dilə gətirir. Zirvələr alalanıb, bulaqlar axmağa tələsmir, küləklər Qapıcıq dağını "oyatmır", uşaqların gizlənpaç oynadığı kaha torpağın altında itib, yal-yamac fikirlidir, dərələrdə sular köpüklənmir, qar yaman tez əriyir, gədiklər paralanıbdı... Ən ağrılısı isə

"Zirvə əl açıbdı göydə Allaha,

Qayalar, elə bil, dualanıbdır".

Bu, yuxudur, vaqiədir, yurd həsrətli ürəyin yuxusu, vaqiəsi. Həqiqətdə isə adı İŞĞALdır. Min illərdən bəri soyumuzun, soydaşımızın yaşadığı yurdun işğalı. Mən dəqiq bilirəm ki, Ramazan Səməroğlu və ya hansısa başqa bir şair bu lövhəni "işğal" sözüylə ifadə etmiş olsaydı, şeirin indiki formada yaratdığı təsirin heç yarısı da yarana bilməzdi. Amma "Belini qurşamır cığırlar dağın, Arxacda sürü yox, başlamır sağın" - deyən müəllifin siyasətdən, ideologiyadan, həqiqətdən uzaq yaratdığı yuxu lövhəsi işğalı və işğalçını min qat lənətləyir, öz yurdunu işğaldan təmizləməli olan zəngəzurluları birə min qat səfərbər edir.

"Nə qədər səhərlər sənsiz açacaq..." kitabı tanınmış telejurnalist Ramazan Səməroğlunun "Özüm də itirəm vaxtın içində" - kitabından sonra oxucularla ikinci görüşüdür. Bu kitabda müəllifin son bir ildə qələmə aldığı müxtəlif mövzulu şeirlər toplanmışdır. İstənilən şeir müasirimiz olan hər kəsi düşündürən - yaşlı nəsli ağrıdan, gəncləri narahat edən mövzudadır. Öz qələmiylə həmsöhbət olan şairin maraqlı və bəlkə də, qəribə qənaəti var:

İçimdə odlanan həsrət yanğısı

Sənin nəfəsinlə soyudu hərdən.

Vaxt məni müqəssir bilib taladı,

Amma sən soruşdun ötən illərdən.

Şair ürəyində cücərmək istəyən fikirləri toxum kimi kağıza səpən qələm bizim üçün adi, həm də kiçik bir əşyadır. Ancaq əli yanan körpənin barmaqlarını anasının üfürüb sərinlətdiyini görmüş şair üçün qələm də eləcə sərinlik gətirmək gücündə olan bir qüvvədir. Ürək yanır, yanğını qələm vasitəsiylə kağıza köçürürsən və ... sərinləşirsən. Zaman səni minbir bəhanə ilə müqəssir edib talayanda isə... qələm, şairi ötən illərdən soruşur, xəbər alır və öz sahibinin dünənini yada salmağa, gündəliyə gətirməyə çalışır. Yaxşıdır, çox yaxşı. Amma, "Dünya mənə ögey baxır" - deyə etdiyi ümu-küsünün altında gizlənən məqam daha yaxşıdır.

Maraqlıdır, Ramazanın sevgi şeirlərində də, Vətən şeirlərində də, ictimai-siyasi məzmunlu şeirlərində də, hətta təbiət şeirlərində də kifayət qədər kədər, nisgil, sızıltı var. Məsələn:

Elə bil dərədə su da yorulub,

Axır, damla-damla süzülür gedir.

Hirsindən özünü döyür daşlara,

Ümidi hər yerdən üzülür gedir

(təbiət şeirindəki nisgil).

Yaxud, qocalar evində tənha şəkildə can verən qadının - ananın taleyindən bəhs edən "Həsrətdən biçilən kəfən" poemasının finalında az qala bütün insanlara üz qaralığı olan bir məqam təsvir olunur. Son anlarını yaşayan qadın - oğul anası canındakı olan-qalan gücünü toplayıb birtəhər özünü qibləyə doğru uzadır və əzrayılın addım səslərini eşidəndə oğlunun nigarançılığını edir: "hardasan?" Ramazan qloballaşmanın fəsadlarından olan, hansısa xalqdan əxz etdiyimiz biganəlik faciəsindən qətiyyən söz açmır. Sadəcə həmin faciənin nəticəsini təsvir etməklə buludlara çatacaq və bəlkə də, oradan da yuxarı qalxacaq bir fəryad qoparır.

Kitabda gündəlik həyatımızı özündə əks etdirən çoxsaylı şeirlərlə yanaşı qəzəllər, müxəmməs və poema da verilmişdir. Əsas odur ki, hər söz sadədir, hər fikir səmimidir. Ən başlıcası isə düşündürücüdür.

Sonda müəllifin özü barədə bir neçə kəlmə yada salaq. Ramazan Səmər oğlu Ziyadov 1961-ci ildə Zəngəzur mahalının Kurud kəndində anadan olub. Orta məktəbi Qafanda bitirdikdən sonra indiki Bakı Dövlət Universitetinin filologiya fakültəsində təhsil alıb. Dövlət Teleradio verilişləri şirkətiylə yanaşı ANS, Lider, Space telekanallarında da çalışıb. Müxtəlif kütləvi informasiya vasitələrində Ramazan Zəngəzurlu imzası ilə çoxsaylı şeirləri verilib. Hazırda üçüncü kitabı çapa hazırlanır.

İttifaq MİRZƏBƏYLİ

Xalq qəzeti.- 2011.- 10 aprel.- S. 6.