Şəmkir: Neqativ hala qarşı mübarizə varsa, inkişaf da var

"Biz struktur islahatlarından, institusional metodlardan korrupsiyaya, rüşvətxorluğa qarşı mübarizəni gücləndirmək üçün istifadə etməliyik. Ancaq əlbəttə ki, təkcə struktur islahatları aparmaqla biz istədiyimiz nəticəyə nail ola bilməyəcəyik. Ona görə bütün dövlət qurumları, bütün dövlət şirkətləri, yerli icra orqanları bilməlidir ki, hər bir məmur öz işində elə işləməlidir ki, həmişə üzüağ olsun, alnıaçıq olsun"

İlham ƏLİYEV,

Azərbaycan Respublikasının Prezidenti

Şəmkirin inkişafı, abadlıq, quruculuq işləri haqqında qəzetimizdə vaxtaşırı yazılar dərc etmişik. Əhalisinin sayı 200 min nəfərə çatan bu rayon sözün əsl mənasında özünün tərəqqi dövrünü yaşayır. İlin istənilən fəslində, günün istənilən vaxtında Şəmkirə yolunu salsan bu inkişafı addım-addım, saatbasaat izləmək mümkündür. Çünki hara baxırsan iş gedir. Maraqlı, həm də fərəhləndirici faktdır ki, şəmkirlilər özləri bu işlərdən böyük həzz alırlar, sevinirlər, qonaq-qaraya danışırlar, göstərirlər. Təsadüfi deyildir ki, Şəmkirin on beş-iyirmi il qabaq bir-birinin ardınca boşalan kəndlərinin əhalisi artmağa başlayıb. Artıq bu yerləri tərk edən demək olar ki, yoxdur. Təkcə keçən il rayona 418 nəfər gəldiyi halda, cəmi 11 nəfər üzürlü səbəbə görə qeydiyyatdan çıxmışdır. Diqqətçəkən, həm də fərəhləndirici faktdır.

Elə sahə yoxdur ki, sürətlə inkişaf etməsin. Nəzərdə tutulubsa, plana salınıbsa mütləq həyata keçməlidir, ləngidilməməlidir! İşə məhz bu cür yanaşma vəziyyəti tədricən nizama salıb. Məsələn, "Azərbaycan Respublikası regionlarının 2009-2013-cü illərdə sosial-iqtisadi inkişafı" Dövlət Proqramında Şəmkir rayonu üzrə nəzərdə tutulmuş 17 tədbirdən artıq 15-nin icrasına başlanılmışdır. Rayonda 295 milyon 36 min manatlıq, yəni ötən ildəkinə nisbətən 8,1 faiz çox ümumi məhsul buraxılmış, adambaşına düşən ümumi məhsul 7 faiz artaraq 1515 manat təşkil etmişdir. Təkcə son iki ildə 4296 iş yeri açılmışdır ki, onların da yarıdan çoxu daimi iş yerləridir. Bir-birindən gözəl, milli ornamentli yaşayış və inzibati binalar, park və xiyabanlar, rahat, hamar yollar, idman meydançaları bu gün Şəmkiri tanınmaz dərəcədə dəyişdirib. Əhalinin qaz, işıq, su problemləri, digər sosial məsələlər çox uğurla həll olunub və bu işlər davam etdirilir. Hazırda şəhər, 4 qəsəbə və 43 kəndin əhalisi, eləcə də 107 müəssisə və təşkilat təbii qazdan istifadə edir.

Hazırda Şəmkir çayı üzərində su anbarının və kiçik su elektrik stansiyasının tikintisi davam edir. Su anbarında olan 3 tuneldən 2-də tikinti işləri başa çatdırılmış və uzunluğu 845 metr olan nəqledici tunelə su verilmiş, ön bəndin tikintisinə başlanılmışdır. Şəmkir çayı üzərində tikilən bu dəryaçanın ümumi su tutumu 160 milyon kubmetr, uzunluğu 6,1 kilometr, bəndin hündürlüyü 155 metr təşkil edəcəkdir. Dəryaçanın tikintisi başa çatdıqdan sonra 75 min hektar torpaq sahəsini suvarmaq, o cümlədən Şəmkir və Gəncə şəhərlərinin içməli su ilə təmin olunmasına imkan yaranacaqdır.

Rayonda kənd təsərrüfatı sahəsi durmadan inkişaf edir. Hər il artım var, özü də nəzərəçarpacaq dərəcədə "Rayon statistika idarəsindən aldığımız məlumata görə, bu ilin martın 1-dək 14 min 220 hektar sahədə payızlıq taxıl sahəsi var ki, bu da keçən ilin müvafiq dövründəkindən təxminən 170 hektar çoxdur, keçən il bu vaxt 225 hektar yazlıq bitki əkilmişdisə, bu il həmin rəqəm 300 hektarı keçib. Yaxud, 125 hektar əvəzinə 164 hektar kartof, 100 hektar əvəzinə 135 hektar tərəvəz əkilib. Ət, süd istehsalı qat-qat artıb...

Oxucunu rəqəmlərlə yormaq istəməzdim. Həm də bir yazıda Şəmkirdə görülən işlərin yalnız çox cüzi hissəsindən danışmaq mümkündür. Digər tərəfdən mövzumuz da bu, deyil.

"Gərək adamların gözünün içinə dik baxmağa haqqın olsun"

Rayon icra hakimiyyətinin başçısı Nazim Veysovun bu sözlərini yarımsərlövhəyə təsadüfən çıxarmamışam. Bu, təkcə dövlət qulluğunda uzun illər çalışan bir məmurun sözü deyil. Bu, həm də başçının tabeliyində olan digər struktur rəhbərlərinə bir növ mesajdır. Bəlkə də tapşırığıdır, tövsiyəsidir, məsləhətidir, bilmirəm, hər halda söhbətin nədən getdiyini yəqin ki, hər kəs anlayır.

Nazim Veysovu otuz ildən çoxdur ki, tanıyıram. Keçmiş Xanlar (indiki Göygöl), Gədəbəy rayonlarında rəhbər təsərrüfat, sovet, icra strukturlarında çalışıb. Ən başlıca keyfiyyəti sadəliyi, adamlarla vəzifəsindən, mövqeyindən asılı olmayaraq tez ünsiyyət qura bilməsidir.

- Korrupsiya və rüşvətxorluq olan yerdə səmimiyyət də yoxdur, - deyə N.Veysov söhbətimizin mövzusuna sanki yeni bir fikir də qatır, - natəmiz, rüşvətxor adamın, xüsusilə rəhbər işçinin sadə adamlarla davranışında olan səmimiyyət, isti münasibət istər-istəməz yoxa çıxır, aradan götürülür. Rəhbərin hər hansı bir sözü də, tövsiyəsi, məsləhəti də sanki qayaya çırpılıb geri qayıdır, əks reaksiya yaradır, ikrah hissi oyadır...

Şəmkirin adamları torpağa bağlı adamlardır, zəhmətsevərdirlər, tənbəl deyillər. Onlara şərait yaradan, köməklik göstərən adama hörmət-izzətlə yanaşırlar. Ulu öndər Heydər Əliyevin vaxtilə Şəmkirə göstərdiyi diqqət, qayğı bu gün də dərin ehtiramla xatırlanır. Son illər Azərbaycan Respublikasının Prezidenti cənab İlham Əliyevin Şəmkirin inkişafı, tərəqqisi üçün etdiyi köməklik şəmkirliləri hədsiz ruhlandırıb, onları dövlətçilik ətrafında daha sıx birləşməyə səfərbər edib. Yəqin fikir vermisiniz, hara baxırsan bir-birindən gözəl, yaraşıqlı yeni yaşayış binaları tikilir. Adamlar yaxşı yaşamağa başlayıblar. Çünki zəhmətkeşdirlər, qoçaqdırlar...

Nazim müəllim bunları danışdıqca hiss edirsən ki, ən xırda işə belə uşaq kimi sevinir. Deyir təkcə indi 4 min hektara yaxın şitillik var, hamısı da həyətdə-bacada. Torpağı heç kim boş qoymaq istəmir...

İş adamlarına çoxdan "yaşıl işıq" yandırılıb. Bacarığı olan adam ac qalmır.

Nazim Veysov rəhbərlik etdiyi aparatda ciddi nizam-intizama nail ola bilib. Bir fakt da maraqlıdır ki, son vaxtlar aparat işinə gətirilənlərin demək olar ki, hamısını gənclər təşkil edir. Digər idarə və müəssisə rəhbərlərinin də əksəriyyəti gənc mütəxəssislərdir. Əhalinin sosial müdafiə mərkəzinin direktoru Qoşun Heydərov da belə gənclərdəndir. Cəmi 8 aydır ki, bu vəzifədə çalışır.

İmkansız elə adından bəllidir...

- İmkanı olan bizə müraciət edərmi? Əlbəttə, yox - deyə Q.Heydərov sualına özü cavab verir. Deyir ki, imkansız elə adından bəllidir. Elə yerlərdə əhalinin sosial müdafiəsi mərkəzləri də bu məqsədlə yaradılıb və əsas işimiz imkansız, aztəminatlı, tənha, ahıl adamlara, əlillərə, pensiya yaşlı vətəndaşlara xidmət göstərməkdən ibarətdir.

- Rüşvətxorluq və korrupsiya deyimləri bizim işimizlə bir araya sığmır və bəzən də açıq deyim, adamda ikrah hissi oyadır. Əgər desəm ki, işimizdə nöqsanlar yoxdur, neqativ hallarla bir dəfə də olsun rastlaşmamışıq, bu, Sizə qeyri-səmimi görünər. Amma mübarizə həmişə aparmışıq və bu gün ikiqat mübarizə aparırıq, məsuliyyət hissi keçiririk. Çalışırıq ki, ən mütərəqqi iş metodlarını tətbiq edək, xoşagəlməz hallara şərait yaranmasın. Artıq xeyli vaxtdır bütün ödənişlər plastik kartlar vasitəsilə həyata keçirilir. Üç mindən artıq ünvanlı sosial yardım alan ailə var. Onların hər birinə xüsusi diqqət və qayğı ilə yanaşılır. İzahat-təbliğat işlərini xeyli gücləndirmişik. Doğrudur, son vaxtlar müraciətlərin sayı ən azı 2 dəfə artıb. Amma bu, bizi qətiyyən narahat etmir. Qanun, təlimat çərçivəsində ehtiyacı olan hər bir ailə müavinət alacaqdır. Təbii ki, bəzən əsassız müraciətlər də olur. Hətta "qaynar xətt"ə bir başqasının cib telefonunu gizlicə götürüb zəng edən də tapılıb. Belə hallar olacaq və buna görə biz narahat olmuruq. Əsas məqsədimiz odur ki, əhalinin bu qrup təbəqəsi bizdən narazı qalmasın.

Hazırda mərkəz üzrə 3586 nəfər sosial müavinət alan, o cümlədən 1060 nəfər Qarabağ müharibəsi veteranı və pensiya almayan şəhid ailəsi, 337 nəfər Prezident təqaüdçüsü, 214 şəhid ailəsi, 21 nəfər əmək zədəsinə görə müavinət alan var. Sosial müavinət alanlardan 291 nəfər yaşa görə, 561 nəfəri ailə başçısını itirməyə görə və 2734 nəfəri isə müxtəlif kateqoriyadan olan əlilliyə görə müavinət alanlardır. Ötən il xidmət olunan kontingentə 3 milyon 103 min manat vəsait ayrılmış və mərkəz tərəfindən həmin vəsait Kapital Bankın, Beynəlxalq Bankın və poçtamtın hesabına göçürülərək həmin müəssisələr tərəfindən ödənilmişdir. Bundan əlavə keçən il mərkəzə müraciət edən 28 nəfər şəhid ailəsinin 40 nəfər azyaşlı uşağına, 64 nəfər Çernobıl əlilinin 100 uşağına, 137 nəfər müharibə əlilinin 324 uşağına 56,9 min manatlıq müavinət ödənilmişdir. Uşaq doğumu ilə əlaqədar 2787 nəfər uşaq üçün 190,5 min manat birdəfəlik müavinət, 117 nəfər Çernobıl əlili ailəsinə isə müalicə ilə əlaqədar 17 min 550 manat birdəfəlik kompensasiya ödənilmişdir. Mərkəzin sosial-məişət xidməti sektoru tərəfindən 155 nəfər tənha ahıl vətəndaşa və əlilə xidmət göstərilmişdir ki, bunlardan da 138 nəfərini 70 yaşdan yuxarı olanlar, 17 nəfərini isə 70 yaşdan aşağı olanlar təşkil edir.

Biz mərkəzdə olarkən ən müxtəlif kateqoriyalardan olan vətəndaşlarla görüşdük. Adamlar birmənalı şəkildə rayon rəhbərliyinin, Mərkəzin işindən razılıqlarını bildirdilər. Öyrəndik ki, elə bayram yoxdur sosial müdafiəyə ehtiyacı olanlar yaddan çıxsın, diqqət göstərilməsin. Keçən il 1 nəfər Vətən müharibəsi əlilinə, 4 nəfər Qarabağ müharibəsi əlilinə pulsuz "Tavriya" markalı minik maşını verilib, üç nəfər ikinci qrup Qarabağ müharibəsi əlili üçün fərdi yaşayış evi tikilib istifadəyə verilib.

"Müəllimə bir ədəd qızıl gül kifayətdir"

Bir faktı qeyd etmək lazımdır ki, Məcid Şıxlinski rayon təhsil şöbəsinə rəhbərlik etdiyi vaxtdan Şəmkir təhsilində əməlli-başlı canlanma hiss olunur. Doğrudur, şöbə müdiri təvazökarlıq edərək özü haqqında bir söz demir, daha çox rayon icra hakimiyyətinin, Təhsil Nazirliyinin, digər xeyirxah insanların, iş adamlarının Şəmkir təhsilinə göstərdiyi köməkdən danışır və bildirir ki, bu köməklik, diqqət, qayğı olmasaydı, indi hamının yanında, xüsusilə şagirdlərin və onların valideynlərinin yanında xəcalətli olardıq.

M.Şıxlinski ilə bu dəfəki görüşümüz də onun yorğun vaxtına düşdü. Hansısa məktəbdə keçirdiyi səyyar şura iclasından gəlmişdi. Dərdini bizə söylədi:

- Söhbətimiz çox ciddi oldu. İşləmək istəməyən, göstəriciləri ilbəil pisləşən məktəb direktoru və ya onun müavini, sıravi müəllimi bizə lazım deyil. Bəzi məktəb direktorlarımız var ki, hələ də necə deyərlər, köhnə "!baqajla" baş girləyirlər. Məsələni konkret qoyduq: ya islahatlara getməli, yeniliklə yaşamalı, neqativ hallara qarşı kəskin mübarizə aparmalı, ya da çıxıb getməlidirlər. Qeyd edək ki, M.Şıxlinski özü bir sıra məktəblərdə test sualları hazırlayıb müəllimləri yoxladıqdan sonra bu qənaətə gəlib.

Hazırda Şəmkirdə 68 orta, 11 əsas və 1 ibtidai məktəb, 53 məktəbəqədər və 6 məktəbdənkənar təhsil müəssisəsi fəaliyyət göstərir. Rayonda 31 min nəfərdən çox şagirdin təlim-tərbiyəsi ilə 4112 nəfər müəllim məşğul olur. Keçən il şagirdlərin 86,6 faizi bütün fənlərdən yüksək qiymət alaraq təhsil haqqında attestata layiq görülmüşdür. Əgər beş il qabaq rayonun ümumtəhsil məktəblərini bitirən gənclərdən 224 nəfəri ali məktəbə daxil olmuşdusa, keçən il ali məktəbə sənəd vermiş 1046 nəfərdən 401 nəfəri tələbə adını qazana bilmişdir. Tələbələrin bilik səviyyəsi də yüksəlmiş, 11 nəfər 600-dən çox, 28 nəfər isə 500-dən çox bal toplamışdır.

Şəmkirdə rayon rəhbərliyi tərəfindən təhsildə fərqlənənlərə daim diqqət göstərilir. Tez-tez görüşlər keçirilir, qaliblər mükafatlandırılır. Keçən il Azərbaycan Respublikası Prezidentinin sərəncamı ilə M.Füzuli adına Şəmkir şəhər orta məktəbi "Ən yaxşı ümumtəhsil məktəbi" müsabiqəsinin qalibi kimi 10 min manat pul mükafatı, həmin məktəbin ibtidai sinif müəllimi Sevinc Əmrahova "Ən yaxşı müəllim" müsabiqəsinin qalibi kimi 5 min manat pul mükafatına layiq görülmüşdür. Ölkə Prezidentinin sərəncamı ilə Təhsil İşçiləri Azad Həmkarlar İttifaqı Şəmkir Rayon Komitəsinin sədri Məzahir Hüseynli "Əməkdar mədəniyyət işçisi" fəxri adını almışdır.

Məktəblərin maddi-texniki bazası əsaslı şəkildə möhkəmləndirilmişdir. Son 5 ildə rayonun 58 məktəbində əsaslı tikinti və təmir-bərpa işləri aparılmış, 25 yeni məktəb binası tikilmişdir.

Rayonun Təzəkənd kəndində S.Vurğun adına orta məktəbi üçün 960 şagird yerlik, Dəllər qəsəbəsində 880 şagird yerlik, Zəyəm-Cırdaxan kəndində 1200 şagird yerlik yeni məktəb binaları tikilmişdir.

Qeyd etməliyik ki, Heydər Əliyev Fondunun vəsaiti hesabına Qərb bölgəsində ilk dəfə olaraq Dəllər qəsəbəsində tikilmiş yeni məktəb binasında Bakı-Oksford məktəbinin Şəmkir filialı yaradılmışdır. Həmin məktəbin təşkili Şəmkirdə təhsilin inkişafına yeni təkan vermişdir. Hazırda məktəbdə 52 nəfər şagird təhsil alır. Burada tədris üçün hər cür şərait yaradılmışdır.

Rayonun ümumtəhsil məktəblərinin pedaqoji kadrlara olan tələbatının ödənilməsi və onlara qarşı tələbkarlığın gücləndirilməsi sahəsində də məqsədyönlü tədbirlər görülmüşdür. 33 nəfər gənc müəllim məktəblərə göndərilmişdir. Son beş ildə 147 nəfər gənc pedaqoji kadr ümumtəhsil məktəblərində işlə təmin olunmuşdur.

Məktəblərin informasiya və kommunikasiya texnologiyaları ilə təminatı proqramına uyğun olaraq indiyədək rayon məktəblərinə 770 dəst kompyuter, 15 ədəd noutbuk, 6 ədəd çap qurğusu verilmişdir.

Hazırda 9 şəhər və 8 kənd məktəbi internet şəbəkəsinə qoşulmuşdur.

Məcid Şıxlinski neqativ hallara qarşı mübarizə tədbirlərindən danışarkən qeyd etdi ki, bu işləri inzibati metodlarla aparmaq mümkün deyil. Burada daha çox mənəvi-psixoloji faktorlar, fərdi söhbətlər və təbii ki, müəllim-valideyn-şagird münasibətlərində işin düzgün qurulmasıdır. İndi Şəmkir məktəblərində şagirdlərdən pul yığılması, müəllimlərə hədiyyələr verilməsi kimi faktlara rast gəlmək mümkün deyil.

- Ən yaxşı halda müəllimə bir ədəd qızıl gül kifayətdir, - deyə M.Şıxlinski gülümsədi.

"Mədəniyyətimizi qorusaq, mənəviyyatımızı qorumuş oluruq"

Bu sözlər isə rayon mədəniyyət və turizm şöbəsinin müdiri Qüdrət Əliyevə məxsusdur. Qüdrət Əliyev də yuxarıda qeyd etdiyimiz gənc kadrlardandır. Bu vəzifəyə gəlməmişdən əvvəl rayon icra hakimiyyətində işləyib. Şöbəyə rəhbərlik etdiyi vaxtdan vəziyyət əməlli-başlı dəyişib. Xüsusilə ən müasir avadanlıqlar, kompyuter dəstləri, geniş təmir-tikinti işləri Şəmkirin mədəniyyət sahəsini qabaqcıllar sırasına çıxarıb.

Rayonun mədəniyyət və turizm sistemində bir mərkəzləşdirilmiş kitabxana və 96 filial, 1 yeddi illik uşaq musiqi məktəbi, 20 mədəniyyət evi və 29 klub, 3 muzey fəaliyyət göstərmişdir. Mədəniyyət sahəsində 69 nəfər işçi çalışır.

Mədəniyyət müəssisələrinin maddi-texniki bazasının yaxşılaşdırılması üçün keçən il də çox iş görülüb. Heydər Əliyev muzeyində və musiqi məktəbində cari təmir işləri aparılıb. Mədəniyyət evlərinə və klublarına 14126 manatlıq inventar və avadanlıq alınıb.

Heydər Əliyev Muzeyinin fəaliyyəti genişləndirilmişdir. Ümummilli lider Heydər Əliyevin irsini öyrənmək məqsədi ilə 2028 nəfər məktəbli, 1427 nəfər rayon sakini, qonaqlar muzeydə olmuşlar. Muzeydə ümummilli liderin doğum və anım günü ilə bağlı tədbirlər keçirilmişdir. Rayonda peşə bayramlarının Heydər Əliyev Muzeyində keçirilməsi ənənə xarakteri almışdır.

Muzeydə kompyuter və ingilis dili kursları fəaliyyət göstərir.

Şəmkir şəhər yeddi illik uşaq musiqi məktəbinin fəaliyyətinin genişləndirilməsi istiqamətində tədbirlər görülmüşdür. Məktəbin şagird qəbulu 100-dən 150-yə qaldırılmışdır. Nəticədə rayonda yaşayan istedadlı uşaqların musiqi təhsili almalarına geniş imkanlar yaranmışdır. Hazırda musiqi məktəbində 721 nəfər şagird təhsil alır. Onların təhsili ilə 120 nəfər müəllim məşğul olur.

Mədəniyyət və Turizm Nazirliyi tərəfindən 2010-cu ilin martın 2-də Bakı şəhəri 26 saylı musiqi məktəbi ilə Şəmkir rayon 6 illik uşaq musiqi məktəbinin birgə konserti təşkil olunmuşdur.

Azərbaycanda keçirilən 1-ci Beynəlxalq Aşıqlar Festivalı çərçivəsində Şəmkir şəhərində bir sıra ölkələrin aşıqlarının iştirakı ilə tədbir keçirilmişdir.

Rayonun tarixi keçmişinin, maddi və mənəvi dəyərlərinin öyrənilməsinə, mədəniyyət abidələrinin qorunmasına diqqət yetirilir. Rayonda 52 tarixi mədəniyyət abidəsi qeydə alınmışdır. Onlardan 26-sı respublika əhəmiyyətli, 26-sı rayon əhəmiyyətli abidələrdir.

Qaracəmirli kəndində Almaniya, Gürcüstan və Azərbaycan arxeoloqlarından ibarət beynəlxalq ekspedisiya çox qədim dövrlərə aid tarixi abidə aşkara çıxarmışdır. Qədim Şəmkir qalasının ərazisində arxeoloji qazıntı işləri davam etdirilir.

Oktyabr ayının 27-28-də Şəmkir şəhərində Azərbaycan Milli Elmlər Akademiyasının Prezidenti Mahmud Kərimovun rəhbərliyi altında "Antiq və Orta əsr Azərbaycan şəhərləri" mövzusunda respublika elmi-praktik konfransı keçirilmişdir.

Qüdrət Əliyev deyir ki, problemləri rayon rəhbərliyinin yaxından köməyi ilə həll edirik. Təbii ki, hələ görüləsi işlərimiz çoxdur. 2003-cü ildə bünövrəsi çökən və hazırda əsaslı təmirə ciddi ehtiyacı olan mərkəzi Mədəniyyət Evinə, mərkəzi kitabxana sistemi binasına ehtiyacımız var.

Səhiyyə sistemindəki islahatlar səmərə verir

Son illər Şəmkirin səhiyyə sistemində aparılan köklü dəyişikliklər, islahatlar sahənin fəaliyyətinə əsaslı şəkildə müsbət təsir göstərib. Bir sıra tibb müəssisələrinin birləşdirilməsi, lazımi ixtisarların aparılması, təkmilləşdirmə və yenidənqurma işin xeyrinə olmuşdur. Respublika səhiyyə nazirliyinin qərarı ilə əhaliyə göstərilən mama-qinekoloji və cərrahiyyə xidməti sahəsində Şəmkir Mərkəzi rayon xəstəxanası qərb bölgəsi üzrə Zona Metodik Mərkəzi təsdiq olunmuşdur.

Səhiyyə müəssisələrinin maddi-texniki bazasının möhkəmləndirilməsi sahəsində tədbirlər davam etdirilir.

Rayon Mərkəzi Xəstəxanasının reanimasiya şöbəsi, Təcili Təxirəsalınmaz Tibbi Yardım Stansiyasının binası əsaslı təmir olunmuş, Kür qəsəbə xəstəxanasının dam örtüyü dəyişdirilmişdir. Mərkəzi Rayon Xəstəxanasına 2 ədəd sanitar avtomobili gətirilmiş, tibbi xidmət üçün vacib olan bir sıra yeni müayinə aparatları alınmışdır.

2009-2013-cü illər üzrə Dövlət Proqramına uyğun olaraq rayon mərkəzi xəstəxanasının ərazisində 150 çarpayılıq doğum evinin və poliklinika binalarının tikintisi 60 çarpayılıq yolxucu xəstəliklər və Kür qəsəbə xəstəxanalarının əsaslı təmiri nəzərdə tutulmuşdur.

Şəmkir Rayon Gigiyenə və Epidemiologiya Mərkəzi tərəfindən əhalinin sağlamlığının qorunması məqsədilə sanitariya nəzarəti gücləndirilmişdir. Gigiyena və Epidemiologiya Mərkəzi tərəfindən 2010-cu ildə 10 adda satışdan çıxarılmış, 200 ədda ərzaq məhsuluna gigiyenik sertifikat alınmış, 2 ticarət müəssisəsinin fəadiyyəti dayandırılmışdır.

Hazırda rayonun səhiyyə sahəsində əhaliyə 11 xəstəxana, 32 həkim məntəqəsi, 27 feldşer-mama məntəqəsi, 1 təcili yardım stansiyası, 1stomatoloji poliklinika, Gigiyena və Epidemiologiya Mərkəzi və rayonlararası taun əleyhinə şöbə tibbi xidmət göstərir.

Səhiyyə müəssisələrində 343 nəfər həkim, 1739 nəfər orta və kiçik tibb işçisi çalışır.

Rayonun səhiyyə sistemində bir sıra uğurlar əldə olunmuşdur. Vaxtında həyata keçirilən sanitar tədbirləri nəticəsində yoluxucu xəstəliklərin sayı kəskin azalmışdır.

Tibb müəssisələrində 3200 nəfər uşaq doğulmuşdur. Bir yaşa qədər uşaqlar arasında cəmi 8 ölüm hadisəsi qeydə alınmışdır ki, bu da respublika göstəricisindən xeyli aşağıdır.

Rayondakı mərkəzi xəstəxanaya baş çəkdik. Səliqə-sahman, həkimlərin maraqlı söhbətləri diqqətimizi cəlb etdi. Hiss olunur ki, hamının məsuliyyəti artıb. Həkim-xəstə münasibətlərində neqativ halların aradan qaldırılması üçün tədbirlər görülüb. Mərkəzi xəstəxananın baş həkimi Nurəddin Əhmədov uzun illərdir bu sahəyə rəhbərlik edir və rayonda hörmət qazanmış adamdır. Deyir ki, həkimin ən böyük qazancı xəstənin , xəstənin yaxın adamlarının onlara minnətdarlıq etməsi razılığını bildirməsidir. Baş həkim xəstəxananın görməli yerindən asılmış fərman preparatlarının siyahısı ilə də bizi tanış etdi.

- Xəstə bilir ki, dövlət onları hansı dərmanlarla pulsuz təmin edir, - deyə N.Əhmədov son vaxtlar bu sahəyə ciddi nəzarət olması barədə məlumat verdi.

"Buyur, bu da sənin evinin sənədi"

Son vaxtlar Şəmkirdə bu sözləri daha tez-tez eşitmək olur. Adamların ən çox giley-cüzar etdiyi bu sahədə dönüş açıq-aşkar hiss olunur. Bir fikir verin. Bu ilin birinci rübündə evinin hüquqi qeydiyyata alınması ilə bağlı rayon icra hakimiyyətinə 158 müraciət daxil odduğu halda, keçən il həmin rəqəm təxminən 10 dəfə az olub. Bu günədək 148 nəfərə artıq sərəncam verilib. Rayon icra hakimiyyəti başçısı aparatının hüquq şöbəsinin müdiri Elşən Quliyev deyir ki, sənədləri qaydasında olan hər bir vətəndaşa ləngidilmədən müvafiq rəy verilir.

Memarlıq və tikinti şöbəsinin müdiri Ramiz Rəhimov da son günlər vətəndaşların daha çox müraciət etməsindən danışdı. Ötən il boyu cəmi 385 müraciət daxil olduğu halda təkcə bu ilin 3 ayı ərzində 145 müraciət daxil olub və artıq onların 130-u müsbət həll olunub. Ayrı-ayrı vətəndaşları, iş adamlarına hərtərəfli şərait yaradılıb. Hələ ki, işimizdən narazılıq edən yoxdur.

...Şəmkirin hər bir sakini gün ərzində görəcəyi işi əvvəlcədən bilir. Artıq neçə vaxtdır ki, rayon icra hakimiyyətinin təşəbbüsü ilə küçə və məhəllələr sakinlər, ayrı-ayrı təşkilatlar arasında bölüşdürülüb. Kimin payına nə düşür, məlumdur. Məhz bu xeyirxah təşəbbüsün həyata keçməsinin nəticəsidir ki, Şəmkir indi ən təmiz, yaşıl, abad şəhərlərdən birinə çevrilib.

Şəmkir təmizliyi ilə nümunə olmağa çalışır. Həm sözün əsl mənasında, həm də bu gün toxunduğumuz mövzu baxımından.

Hamlet QASIMOV

Xalq qəzeti.- 2011.- 14 aprel.- S. 6.